29 April: Kyk na God en nie na my nie. – Jan van der Watt

Joh 7:1-30 (fokus 7:14-24)

“Ek wil hê dat julle eerder moet raaksien hoe groot God werklik is! Kyk na Hom en nie na My nie”. Dit is niemand anders as Jesus se woorde nie (7:18). As Hy dit sê, wat moet ons dan nie sê nie!

Partymaal staan ons so in die pad van God dat niemand Hom raaksien nie. Ons kan so kla oor ons groot probleme, so oor onsself praat, so in ons eie gevoelens verdwaal dat ons vergeet dat God deel van ons lewens is en wil wees.

As gelowiges moet ons vra watter boodskap ons by ander agterlaat as ons so oor ons eie lotgevalle sanik. Kom hulle agter dat jy ʼn God het wat jou in jou swaarkry vashou? Kry hulle die idee dat jy hoegenaamd dankbaar is oor wat God vir jou doen? Weet hulle dat jy op jou lewensreis ʼn Metgesel het wat vir jou die verskil maak? Kom hulle hoegenaamd agter dat die Here jou God is?

Dra jou lewe die volgende boodskap: Kyk na God en nie na my nie?!