As die sout sy krag verloor

The dogmas of the quiet past are inadequate to the stormy present. The occasion is piled high with difficulty, and we must rise with the occasion. As our case is new, so we must think anew and act anew – Abraham Lincoln

As die sout sy krag verloor

Jy stig ‘n gemeente op gesonde leer, maar later hoor jy die liggaam is verlei deur ‘n aantal selfaangestelde leiers – hulle verdraai die evangelie. Dit was die lot van Paulus in feitlik elke gemeente wat hy gestig het. Sy hartseer is nêrens duideliker as in sy brief aan die Galasiërs nie.

Hulle aanvaar die goeie nuus van God se vrye genade in Christus, maar soos die Korintiërs wil hulle nog sekere dinge byvoeg. Daar is mense wat die evangelie van Christus probeer verdraai, en dit is hulle wat in julle verwarring bring (1:7). Hulle wou selfs gehad het dat Christene wat gedoop is ook  besny moet word.

As dit by die evangelie kom, tree Paulus ferm op. Na ‘n kort groeteboodskap verklaar hy: Dit verbaas my dat julle so gou van God wat julle deur die genade van Christus geroep het, afvallig word en ‘n ander evangelie aanneem. Daar is geen ander evangelie nie!  … Maar al sou een van ons of selfs ‘n engel uit die hemel aan julle ‘n evangelie verkondig wat in stryd is met die evangelie wat ons aan julle verkondig het – die vloek van God sal hom tref! (1:7 – 9).

Hierdie oproermakers word gemotiveer deur die begeerte om Jode van die diaspora aan te trek. Paulus sê: “Daar is geen soeker-vriendelike doelwit wat ‘n ander evangelie kan regverdig nie. Klink dit nou asof ek die guns van mense soek, of soek ek die guns van God? Probeer ek by mense in die guns kom? As ek nog steeds die guns van mense soek, sou ek geen dienaar van Christus wees nie (1:10).”