There are no uninteresting things, only uninterested people – G.K.Chesterton

Jesus leer die mense ‘n paar lesse

Ons sien dat Jesus die mense ‘n paar belangrike lesse in Markus 2:13 – 22 leer.

• Ek het nie gekom om mense te roep wat op die regte pad is nie, maar sondaars (2:17). Jesus maak hierdie opmerking nadat Hy vir Levi, ‘n tollenaar, geroep het om Hom te volg. Daarna eet Hy met ‘n groep tollenaars en sondaars. Dit het die Fariseërs en skrifgeleerdes ontstel: hoe kon Hy so iets doen? Dit is toe dat Jesus vir hulle sê dat gesonde mense nie ‘n dokter nodig het nie. Jesus het gekom vir sondaars.
• Kan die bruilofsgaste dan vas terwyl die bruidegom by hulle is? (2:19). Die mense wou weet waarom sy dissipels nie vas nie. Die volgelinge van Johannes en van die Fariseërs vas almal. Daar was geen rede om te vas terwyl Jesus by hulle was nie. Die Fariseërs het ‘n swaar las van God se wet gemaak – ‘n las wat die mense nie kon dra nie. Jesus verander dit. Hy bring vreugde en nie hartseer nie.
• Hy kom om die nuwe te bring en nie om die oue te lap nie. Die Fariseërs het waarskynlik gehoop dat Jesus die beste van hulle leer sal behou en dit dan kombineer met sy eie leer. Jesus sê egter dat jy nie ou klere met ‘n nuwe lap kan lap nie. Die nuwe lap het nog nie gekrimp nie en sal die klere net verder skeur (2:21 – 22). Jy plaas ook nie nuwe wyn in ou velsakke nie. As die wyn dan gis, sal die sakke oopbars. Dan verloor jy die wyn en die velsakke. Wat Jesus gebring het, was ‘n nuwe skepping. Hy het alles nuut gemaak.

In the service of Christ … there may be disappointments, but there cannot be despair; ther may be conflicts but never doubt; there may be afflictions, but never withouit comfort – Philip Hughes

Die evangelie is nie alles nie

Wat bedoel ons met die evangelie? Die antwoord is ingewikkelder as wat ons gewoonrlik dink. Die evangelie is ‘n boodskap van hoe ons uit die gevaar gered is. Die agtergrond van die woord evangelie is ‘n nuusberig oor ‘n lewensveranderende gebeurtenis wat reeds plaasgevind het.

• Die evangelie is goeie nuus – nie goeie raad nie. Dit is nie iets wat ons doen nie, maar iets wat vir ons gedoen is en waarop ons moet reageer. Omdat dit goeie nuus is, moet dit in die openbaar aangekondig word – dit is tog wat jy met nuus doen.
• Die evangelie is goeie nuus wat aankondig dat ons gered is. Waarvan? Jesus deur wie ons gered word van die oordeel wat kom (1 Tessalonisense 1:10). Hierdie oordeel is nie onpersoonlik nie – dit is God se oordeel. Ons verhouding met God is stukkend. God se toorn is die groot probleem vir die mens (Romeine 1:18 – 32). Hier sien ons dat God se toorn baie vertakkings het. Die agtergrond kry ons in Genesis 3:17 – 19. Omdat ons van God vervreemd is, is ons in onsself sielkundig vervreemd – ons is skaam en bang (3:10). Ons is ook sosiaal van mekaar vervreemd – Adam en Eva moes klere aantrek (3:7). Daar is ook vervreemding tussen man en vrou (3:16). Omdat ons van God vervreemd is, is ons ook fisies van die natuur vervreemd. Ons ondervind nou hartseer, harde werk, fisiese agteruitgang en die dood. Selfs die aarde is vervloek (3:17).

Sedert daardie dag leef ons in ‘n wêreld vol lyding, armoede, natuurrampe, oorlië, veroudering en die dood. Die wêreld is deurmekaar en ons het redding nodig. Alle probleme tussen mense is simptome waarvan die oorsaak teruggevoer kan word na die skeiding tussen ons en God. Daarom moet die eerste en primêre fokus van enige verlossing fokus op ons verhouding met God. Eers as ons verhouding met God reg is, sal die ander dinge in plek val.

• Die evangelie is nuus oor wat Jesus Christus gedoen het om ons verhouding met God reg te stel. As ek ‘n gelowige word, verander my status: Ons weet dat ons klaar uit die dood na die lewe oorgegaan het (1 Johannes 3:14). Klaar oorgegaan. Jy is of in Christus of nie; jy is of aanvaar of jy is nie aanvaar nie; jy het die ewige lewe of jy het dit nie.

There are two ways to get enough: One is to accumulate more and more. The other is to desire less – G.K.Chesterton

Jesus genees ‘n verlamde man

Hierdie verhaal kry ons in Markus 2:1 – 12. Die mense hoor dat Jesus weer by die huis in Kapernaum was. Dit was waarskynlik Petrus se huis. Gasvryheid is ‘n basiese wet in die Ooste. Daarom stroom die mense na die huis – hulle wag nie eers totdah hulle uitgenooi word nie. Daar was nie meer plek vir ‘n muis nie. Dit beteken dat van die mense met werklike behoeftes nie naby Jesus kon kom sodat Hy hulle kon help nie.

Vier vriende kom met ‘n verlamde man daar aan. Weens die gedrang kon hulle nie naby Jesus kom nie. Hulle breek die dak regoor Jesus oop en laat die verlamde man op sy draagbaar afsak. Hulle vertrou dat Jesus hom sal help … en Hy doen dit. Hierdie wonderwerk gee aan Jesus die geleentheid om ‘n les oor vergifnis vir die mense te leer.

Dink aan die toneel. Toe Jesus opkyk sien Hy die vier mans met hulle verlamde vriend op die dak. Die huise het plat dakke gehad. Daar was gewoonlik ‘n buitetrap wat toegang tot die dak gegee het. Daar is sekere kenmerke van hierdie mense wat ons moet raaksien.

• Hulle was diep bekommerd oor hulle verlamde vriend. Hulle sou alles in hulle vermoë doen om hom te help.
• Hulle het geloof gehad in wat Jesus kon en sou doen.
• Hulle het nie net daaroor gebid nie, maar iets daaromtrent gedoen. Hulle het nie toegelaat dat die moeilike omstandighede hulle ontmoedig nie. Saam werk hulle en doen iets anders. Jesus beloon hulle pogings. Hulle kon baie maklik gesê dat daar te veel mense was en dat dit hopeloos was om eers Jesus se aandag te trek. Nee, hulle doen iets.

Is ons so bekommerd oor ons vriende wat swaarkry? Glo ons dat Jesus hulle kan help? Staan op en doen iets daaromtrent.

Fairy Tales are more than true; not because they tell us that dragons exist, but because they tell us that dragons can be beaten – G.K.Chesterton

Die Evangelie volgens Markus

The gospel is neither a discussion nor a debate. It is an announcement – Paul S. Rees

Markus mors geen tyd om daardie aankondiging te maak nie. Die eerste vers lees: Die evangelie van Jesus Christus, die Seun van God begin so. Matteus wat primêr vir die Jode geskryf het, begin met ‘n geslagsregister. Hy moes vir sy lesers wys dat Jesus Christus inderdaad die erfgenaam van Dawid se troon was. Lukas fokus op die bediening van die Seun van die mens. Daarom  gebruik hy die vroeë hoofstukke van sy boek om die geboorte van die Verlosser te beskrywe. Hy beklemtoon die feit dat Jesus Christus ‘n mens was. Johannes  se evangelie begin met ‘n stelling oor die ewigheid. Hoekom? Johannes skryf om vir die hele wêreld te bewys dat Jesus Christus van Nasaret die Seun van God is (Johannes 20:31). Hy skryf oor die goddelikheid van Jesus Christus. Die doel van sy skrywe is om sy lesers aan te moedig om in hierdie Verlosser te glo en so die gawe van die ewige lewe te ontvang.

Die feit dat Markus vir die Romeine skryf, help ons om sy styl en benadering beter te verstaan. Die klem in sy evangelie is op aktiwiteit. Hy beskryf vir Jesus soos Hy van die een plek na die ander beweeg om die fisiese en geestelike behoeftes van mense te hanteer. Een van sy gunsteling woorde was dadelik/onmiddellik. Hy beskryf nie baie van Jesus se preke nie, want hy beklemtoon wat Jesus gedoen het eerder as dit wat Jesus gesê het. Hy openbaar Jesus as God se Dienaar – Jesus is gestuur na mense wat swaarkry en ly en om te sterf vir die sondes van die wêreld. Markus begin deur te sê dat Jesus die Seun van God is. Hy was waarskynlik ‘n ooggetuie van sekere van die gebeure wat hy beskryf. Hy het in Jerusalem by sy moeder Maria gebly. Haar huis was ‘n bynekaarkomplek vir gelowiges in die stad.

Dit is moontlik dat Petrus vir Markus tot geloof gelei het. In 1 Petrus 5:13 verwys hy na Markus as sy seun. Volgens kerktradisie weerspieël hierdie evangelie die persoonlike ondervindings en getuienis van Petrus.

Ons het gesien dat Matteus vir die Jode en Markus vir die Romeine geskryf het. In ons moderne tyd kry ons ‘n soortgelyke aanpassing van gemeentes in die benadering wat hulle volg. Die inhoud van die aankondiging bly dieselfde, maar die aanbieding mag verskil.