An eye for an eye makes the world blind – Mahatma Gandhi

Ek gaan jou laat boet

Ek gaan binnekort die  koningshuis van Jehu laat boet (Hosea 1:4). Die New King James Version vertaal dit so: I will avenge. Hierdie Ek gaan of Ek sal, is baie algemeen in hierdie boek. Soms word dit negatief gestel: “Ek sal nie …” Meestal word dit egter positief gestel en vertel vir ons wat God aan en vir sy mense gaan doen.

In Hosea is daar twee hoofkategorieë van hierdie “Ek gaan …” stellings:

• Veroordelend: God se vasberadenheid om sy mense wat ongehoorsaam is, te straf.
• Verlossend: God se vasberadenheid om sy mense te herstel sodat hulle sy liefde ten volle kan ondervind.

God se mense het beide in hulle lewens nodig. Beide se wortels lê in God se liefde; beide openbaar God se liefde. Sonder die Ek gaan … laat boet, sal mense selftevrede en koud wees. Sonder die verlossende Ek gaan, sal mense tou opgooi. Soms is dit nodig dat ons die veroordelende Ek gaan, moet hoor; soms is dit nodig dat ek die verlossende Ek gaan, moet hoor. Die Christen se lewe beweeg tussen hierdie twee pole. Ons kan amper sê dat ons altyd of die een of die ander een ondervind.

In Hosea 1:4 belowe Hosea vir Israel dat God binnekort die koningshuis van Jehu gaan laar boet. Dit is as gevolg van Jehu se rol in Agab se aaklikge dood by Jisreël. Alhoewel hy God se opdrag om dood te maak uitgevoer het, doen hy dit op ‘n vals manier – dit was ‘n slagting. Hosea herinner Israel dat hierdie gebeurtenis meer as ‘n honderd jaar vantevore gebeur het, maar Israel het hulle nog nie bekeer nie – die gesindhede van destyds is steeds teenwoordig in die land. Hiervoor gaan God hulle straf.

Glo jy dat God vir jou kwaad is? Is jy onseker waarom dit so is? Is daar ‘n spesifieke sonde wat jy nog nie bely het nie? Of is die sondige gesindheid agter die sonde steeds in jou lewe? Wees dankbaar vir ‘n God wat nie net veroordeel nie, maar ook verlos.

An eye for an eye makes the world blind – Mahatma Gandhi

Gee my wysheid (7)

Matthew Henry (1622 – 1714) het ‘n kommentaar oor die hele Bybel geskryf. Uit hierdie massiewe werk het ‘n boek (Grant Me Wisdom) verskyn wat Henry se werk maklik toeganklik vir die moderne leser maak. Ek gaan ‘n hele aantal blogs aan hierdie werk wy.

Glo in ‘n Naam

Dit het ek aan julle geskryf sodat julle kan weet dat julle die ewige lewe het, julle wat in die Naam van die Seun van God glo (1 Johannes 5:13) [Nuwe Testament en Psalms. ‘n Direkte Vertaling.]

Gesonde Christengelowiges word beskerm teen sonde wat tot die dood toe lei. Hulle nuwe natuur en die inwoing van die Heilige Gees verhoed die toegang van sulke onverskoonbare sondes. Christene is versterk teen die aanvalle van die Satan. Hulle is aan God se kant in opposisie teen die wêreld.

Die mensdom is in twee groot partye verdeel:

• ‘n Party wat aan God behoort – dit is diegene wat in Jesus Christus glo.
• ‘n Party wat aan Satan behoort. Hulle is meer in getalle en is goddeloos.

Mag die God van die Christelike wêreld voortdurend die duiwel se heerskappy afbreek en mense in die koninkryk van sy Seun inbring.

Die Seun van God het na ons wêreld gekom. Die mense het Hom gesien en ken Hom. Hy het Homself as die ware God geopenbaar. Hy het ons denke oopgemaak sodat ons daardie waarheid kan verstaan – dat Hy die ware God is en dat Jesus Christus Hom aan ons geopenbaar het. Die Seun lei ons na die Vader en ons is in die Vader en Seun verenig.

Johannes waarsku ons: omdat ons die ware God ken en omdat ons in Hom is, moet ons toelaat dat sy liefde ons beskerm. Ons moet wegvlug van vals gode. God het ons deur sy Seun verlos; Hy het ons sondes vergewe; Hy gee aan ons die ewige lewe. Ons moet aan Hom in geloof, liefde en gehoorsaamheid vasklou.

The more empty I am, the more room is there for my Master. The more I lack, the more He will give me. —C.H. Spurgeon

Hiskia se gebed

In 2 Konings 19:14 – 19 lees ons Hiskia se gebed. Jerusalem word deur koning Sanherig van Assirië bedreig. Sy afgevaardigdes vertel vir Juda dat die gode van ander lande wat hulle verower het hulle nie kon beskerm nie. Hoe sal die Here hulle nou kon beskerm?

Hiskia se eerste reaksie was om vir Jesaja te vra om vir die volk te bid. Nou bid hy self. Hier sien ons iemand wat ten spyte van twyfel en vrees op die Here vertrou. Kom ons kyk na Hiskia se optrede:

• Neem dit na die Here. Hiskia neem Sanherib se dreigbrief en sprei dit voor die Here uit in die tempel. Hy lê fisies sy las voor die Here. In die Bybel lees ons herhaaldelik dat ons ons las voor God moet lê en dat ons ons versoeke aan God bekend moet maak. Kom na God: hulpeloos en met ‘n behoefte aan genade. Ons doen dit nie, want ons glo ons sal alles self kan oplos – ons is selfgenoegsaam. As ons dink dat ons dinge op ons eie kan doen, is dit tog nie nodig om te bid nie! Ons moet besef dat ons niks sonder Jesus Christus kan doen nie.
• Erken die grootheid van God. Hiskia sien die teenwoordigheid van God: U wat oor die gerubs troon.Hy erken God se eksklusiewe aard: U alleen is God. Hy erken God se oppermag: U alleen is God oor al die koninkryke van die aarde. Hy erken God se oneindige mag: U het die hemel en die aarde gemaak. Het ons so ‘n visie van God as ons bid? Het ons ophou bid omdat ons siening van God te laag is?
• Gee die probleem aan God. Hiskia vra dat die Here moet luister en oplet. Hy vra dat die Here die spot van Sanherib moet hoor – hy  beledig vir God. Hy sluit ‘n klaaglied in. Hy vertel vir God van hulle ernstige toestand. Hy sê dat Assirië ander nasies en hulle gode oorwin het, maar dit was nie gode nie. Hiskia kla nie – hy neem sy probleem na God toe. Hy is hartseer oor die situasie en stort sy hart uit. Praat jou probleme uit in God se teenwoordigheid. In ons krisisse kla ons teenoor ander mense voor ons ons harte voor God uitstort. Laai jou laste af op die Een wat dit kan dra.
• Soek God se hulp. God, red ons tog uit die mag van die Assiriese koning. Geen groot indrukwekkende woorde nie; kort en eenvoudig. Stel jou versoek aan God. Vertel vir die Vader wat jy as sy kind nodig het. God het die gebed van die tollenaar verhoor (Lukas 18:13).
• Waardeer die heerlikheid van God. Die doel van die gebed is eenvoudig, maar belangrik: Dan sal al die koninkryke van die aarde besef dat U, Here, alleen God is. Hiskia bid nie net vir homself  of vir die volk nie, maar ook vir God se heerlikheid. Ons kry dit ook in die Ons Vader gebed. Is dit ook ons bede dat die heerlikheid van God oral bekend sal word?

Hiskia word deur die Assiriërs bedreig In plaas van beplan, hulp van elders soek, kyk hy na God. Gebed skakel nie die behoefte aan menslike oplossings uit nie, maar uiteindelik moet ons God vertrou. Natuurlik moet ons raad by ander gelowiges kry, maar niks moet ons afhanklikheid van God vervang nie.

Put first things first and we get second things thrown in; Put second things first and we lose both first and second things – C. S. Lewis

Psalm 19(2)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Ek gaan ‘n paar blogs aan hierdie psalm spandeer.

Billy Graham lees elke maand al 150 psalms. Vir hom het hulle duidelik ‘n besondere betekenis. Meeste van ons, ek ingesluit, lees die psalms nie so sistematies nie – ons pik hier en pik daar. Daarom het ek besluit dat ek hierdie jaar ‘n bietjie dieper in die psalms wil delf. Ek het veral gebruik gemaak van John Goldingay se drie-volume kommentaar – Psalms.

19:8 – 13: Die wet openbaar die wil van God.

Hier kry ons ‘n skielike oorgang van die natuur na die wet.

⁸Die wet van die Here is volmaak, dit gee nuwe lewenskrag; die bepalings van die Here is betroubaar, dit gee wysheid aan die eenvoudige.

⁹Die opdragte van die Here is reg, dit maak die hart bly; die gebod van die Here is suiwer, dit verhelder die oë.

¹⁰Ontsag vir die Here is reinigend, dit hou vir altyd stand; die beslissings van die Here is waar, heeltemal regverdig.

Die wet van die Here mag na die profete sowel as na die tora verwys. Dit mag ook na die optrede van die Here in Israel verwys. Die onderrig wys vir ons hoe ontsag vir die Here lyk. Ons kry hier ses beskrywings van die onderrig van die Here: volmaak … betroubaar …reg … suiwer … reinigend … waar. Dit is die gevolge van God se onderrig.

Maar die psalmis gaan verder.

• Die Here se opdragte gee nuwe lewenskrag – soos kos vir die honger persoon. Hoe gebeur dit? Dit moedig ‘n lewe van gehoorsaamheid aan. Gehoorsaamheid herstel die lewe en die gevolg is ‘n persoon van integriteit. Dit gee ook wysheid aan die  eenvoudige.
• Dit maak die hart van die Here bly. Daar is blydskap as ons weet wat God se wil is, want dan kan ons dit doen en God se seën verwag. Dit verhelder die oë. Dit is ‘n teken van bemoediging.
• Ontsag vir die Here is reinigend en hou vir altyd stand – soos die beloftes van die Here.
• Die beslissings van die Here is waar, heeltemal regverdig. Die Here maak ferm en definitiewe besluite oor hoe die mens se optrede moet wees en wat die gevolge  sal wees as daarvan afgewyk word.

In die Ou Testament is daar nie ‘n woord vir godsdiens nie. Die psalmis se definisie van ware godsdiens is: om voor God te lewe in gehoorsaamheid en met eerbied en nederigheid.

¹¹Dit is begeerliker as goud, begeerliker as ‘n oormaat fyngoud; dit is soeter as ‘n heuningkoek wat oorloop.

Nie net goud nie, maar fyngoud; nie net ‘n heuningkoek nie, maar  een wat oorloop. Die Here se opdragte en besluite is so begeerlik soos fyngoud en ‘n heuningkoek wat oorloop. Adam en Eva het gereageer op wat hulle oë as begeerlik gesien het en hulle oë gaan op ‘n slegte manier oop.

¹²Ook die een wat U dien, neem dit ter harte; wanneer ‘n mens daarby hou, is die beloning groot.

Hier lees ons van die psalmis se toewyding in reaksie op God se wet. Deur die waarskuwings ter harte te neem, word mense beskerm teen die donkerte van Goddelike teregwysing in gevalle van sonde.