Moenie hierdie Kersfees van Josef vergeet nie.

Dit is baie maklik om van Josef in die Kersverhaal te vergeet Beide Matteus en Lukas volg Josef se geslagsregister terug tot by Dawid. Profesieë het vereis dat die Seun van God ook die Seun van Dawid moes wees. Dit was seker nie die enigste kwalifikasie van Josef nie. Hier is nog ‘’n paar kwalifikasies wat hy gehad het.

1. God het Josef weens sy oortuigings gekies

‘’n Verlowing destyds het meer bindende krag gehad as vandag. Haar verloofde wat aan die wet van Moses getrou was maar haar tog nie in die openbaar ot skande wou maak nie, het hom voorgeneem om die verlowing stilweg te verbreek (Matteus 1:19). So ‘’n verbreking van die verlowing in hierdie geval was toelaatbaar volgens die Skrif en die burgerlike wet. Kyk na Josef se punt:

• Sy verloofde was swanger; en
• die baba was nie syne nie.

Hy kon met reg geglo het dat Maria ‘’n storie opgemaak het dat sy deur die Heilige Gees swanger geword het.

2. God kies Josef vir sy deernis

Josef hanteer ‘’n baie sensitiewe situasie met groot deernis.                                                                                                                        Hy was regverdig – hy doen die regte ding op die regte manier. Goeie vaders intimideer en verneder nie diegene wat God aan hulle gegee het om lief te hê en te lei nie. Josef het geweet hoe om mense te behandel. Volgens Deuteronomium 22:21 het Josef die reg gehad om Maris te stenig. Ons stenig nie meer mense nie – ons dagvaar hulle en smeer hulle swart op sosiale media. Ons kan baie van mans leer deur te kyk hoe hulle hul vrouens, kinders, ouers, werknemers ens. behandel.

3. God het Josef gekies as gevolg van sy moed

‘’n Mate van vrees is normaal en gesond. Vrees dat hy vir sy verloofde se probleem gestenig kan word, is genoeg rede om nie met haar te trou nie. Dit is ’n maklike uitkoms, want Josef kon nie bewys dat Maria ontrou aan hom was nie. Hy kon dus self gestraf word. Dit was ‘’n groot geloofstap vir Josef om vir Maria te glo. Hoe kon hy weet of die swangerskap die gevolg van Maria se ontrou was of as gevolg van God se intrede? Hy vertrou sy hemelse Vader en nie sy eie gevoelens nie. Hy aanvaar sy rol as eggenoot en vader. As ons familie probleme het, moet ons vir hulle bid en nie paniekerig raak nie. Om God te vertrou met die onvolmaakte mense in ons gesinne vereis geloof en moed.

Toe Josef uit sy droom wakker word, doen hy wat die engel hom beveel het. Hy trou met Maria, hy noem die seun Jesus en hy het geen omgang met Maria tot ná die seun se geboorte nie. Hy neem die swanger Maris byna 150 kilometer van Nasaret na Betlehem.. Na die geboorte neem hy haar na Egipte. Later trek hy wee terug na Nasaret. Hy doen dit alles om moeilikheid in Jerusalem te voorkom.

Josef is nie gekies omdat hy slim of ryk of beroemd was nie. Hy is gekies, want hy was ‘’n gehoorsame man.

Christene volg Jesus uit eie vrye wil

Hy sê: “Kom, volg My.” Om ‘n Christen te wees beteken meer as dat ek moreel en intellektueel saamstem met die Christelike onderrig. Christus vra van ons liefde en lojaliteit. Om Hom te volg vereis bekering, wat lei na lidmaatskap van die kerk, die liggaam van Christus.  Om ‘n Christen te wees, beteken ek is ’n burger van ‘n stad met ‘n ryk erfenis en ‘n heerlike toekoms. Soos die psalmis sê: Gaan om Sion, trek reg rondom, tel sy torings, bewonder sy mure, bekyk sy versterkings, sodat julle dit aan die volgende geslag kan vertel! Dié God is ons God vir altyd; hy sal ons altyd lei (Psalm 48:13 – 15).

Die Christendom is ‘n geloofsgemeenskap gevorm deur die Heilige Gees, deur aanbidding en verkondiging, deur gebed en geestelike dissiplines, deur antieke rites en onderrig wat ontvang is van diegene wat vooraf gegaan het. In die geloofsgemeenskap ken en geniet ons God se teenwoordigheid. Die Christelike lewenswyse se wortels is in die mense van Israel. Christene deel met Jode ‘n erfenis wat teruggaan tot eeue voor Jesus van Nasaret geleef het op aarde. Dit begin met God se beloftes aan Abraham: Trek uit jou land uit, weg van jou mens en jou familie af na die land toe wat Ek vir jou sal aanwys. Ek sal jou ‘n groot nasie maak. Ek sal jou seën en jou ‘n man van groot betekenis maak, en jy moet tot ‘n seën wees. Ek sal seën, wie jou seën, en hom vervloek  wat jou vervloek. In jou sal al die volke van die aarde geseën wees (Genesis 12:1 – 3)

Trek uit jou land uit, weg van jou mense. Die soeke na God is aanhoudend. Godsdienstige oortuigings en rites kry ons in alle kulture. Die Christelike godsdiens het nie uit natuurlike menslike impulse, begeertes of instinkte ontstaan nie. Net soos God Abraham uit sy vader se huis en land geroep het, net so roep Christus ons om in ‘n nuwe werklikheid te leef. Ons besit ‘n natuurlike  godsdienstige sin, maar die goeie nuus dat God liefde is en begeer dat ons na Hom moet kom, is ‘n onverwagte en verbasende gawe. Ons kan onsself nie na God oplig nie – God kom en lig ons op na Hom. Die Christelike weg is bonatuurlik, gebaseer op die persoon en werk van Jesus Christus.

Jesus herhaal God se oproep aan Abraham as Hy vir sy eie dissipels sê: As iemand na My toe kom, kan hy nie my dissipel wees tensy hy afstand doen van sy eie vader en moeder en vrou en kinders en broers en susters, ja, selfs van sy eie lewe (Lukas 14:26). Jesus wil nie die natuurlike bande wat ons saambind ondermyn of vernietig nie, maar hy beklemtoon hiermee sy eie gesag. Hy is die Here oor alle dinge. Geen geestelike magte of menslike magte kan Jesus se oproep vervang nie. Die Here Jesus heers oppermagtig oor die Christelike weg en oor alle skepsels. Diegene wat Hom volg, mag geen ander God hê nie.

Christus se Heerskap gee aan die Christelike weg ‘n karakter wat die hele wêreld in beroering kan bring (Handelinge 17;6). As beperkte mense leef ons in ‘n wêreld waar amptenare, goewerneurs-generaal, goewerneurs, administrateurs, die raadgewers, die tesourieamptenare, die regters die landdroste, die hoofamptenare van die provinsie heers (Daniël 2:3). Vandag het die gesagte van die wêreld ander name – kundiges terapeute, bestuurders, burokrate, ens. Hulle heers en oefen hulle gesag uit in die normale loop van die lewe – soms ten goede, soms nie. Christene moedig ‘n kritiese evaluering van wêreldse gesagte aan. Christene ontken ook hulle finale gesag; Jy mag naas My geen ander gode hê nie (Eksodus 20:3).

God is een en as Skepper van die heelal is Hy oppermagtig. Hierdie aanspraak word met krag uitgespreek deur die sentrale stelling van die Christelike geloof: “God die Vader het die gekruisigde Jesus uit die dood opgewek deur die krag van die Heilige Gees.”

We are irritable, o Lord. Until we make our peace with you –  Lewis Smedes

Maria se geloof

Ons het gesien dat tydens Kersfees God groot dinge aan ons gegee het. Hoe moet ons reageer op dit wat Hy vir ons gegee het. ‘n Goeie model is Maria. Wat kan ons by haar leer?

1. Sy reageer deur na te dink

Toe die engel by Maria kom en sê dat sy swanger sal word en aan ‘n Seun geboorte sal gee, reageer sy nie met blinde geloof nie. Sy was verbysterd oor die woorde en het gewonder wat die begroeting tog kan beteken (Lukas 1:29). Sy was bekommerd. Is dit waarlik ‘n engel wat met my praat? Sy aanvaar nie onmiddellik die boodskap nie, maar vra eers: Hoe is so iets moontlik? Om in geloof te reageer sluit ook die intellek in. Ons kultuur leer vir ons om nie in die bonatuurlike te glo nie. Maria se kultuur het haar geleer dat God nooit ‘n mens kan word nie. Die kombinasie van bewyse en ondervinding breek hierdie hindernisse tot geloof. Sy twyfel, sy vra, sy gebruik haar rede – net soos ons vandag moet doen. Daar is ‘n soort twyfel wat dui op ‘n geslote denke. Sekere vorms van twyfel soek egter antwoorde. Soos Maria moet ons oop vir die waarheid wees – al verskil die waarheid van dit wat ons verwag het.

2. Maria reageer geleidelik

Die Christelike geloof eis ons hele lewens. Baie van ons is sommer onmiddellik volkome toegewyd. Natuurlik verskil dit van mens tot mens. John Bunyan het 18 maande gestry voordat hy God se liefde en genade ontvang het. Die bewaarder in Filippi, daarenteen, het onmiddellik vir God volledig aanvaar (Handelinge 16:22 – 40). Bekering en aanvaarding kom na mense teen ‘n verskillende spoed. Deur na Maria se proses te kyk, kan ons baie leer.

• Maria reageer met ’n mate van skeptisisme. Hoe is so iets moontlik? Sy stop nie onmiddellik die gesprek nie – sy vra meer inligting.
• Sy aanvaar. Ek is tot beskikking van die Here. Laat met my gebeur wat u gesê het. Ons moet ook vertrou ten spyte van twyfel en voorbehoude.
• Sy beoefen haar geloof vanuit haar hart. Maria gaan by Elisabet kuier. Dié sê vir haar: Waaraan het ek dit te danke dat die moeder van my Here na my toe kom? Die kennis en insig wat Elisabet het, bevestig wat die engel gesê het. Sy word dus meer van haar geloof verseker. Ware geloof is ‘n proses, maar nie ‘n proses waaroor ons beheer het nie. Hy moet Hom aan ons openbaar anders sal ons Hom nie kry nie.

3. Sy reageer met verwondering

In Lukas 1:46ev kry ons die loflied van Maria. Ek besing die grootheid van die Here, ek juig oor God my Verlosser. Sy is ook verbaas dat juis sy gekies is. God het eeue lank aan hierdie dag voorberei oor hoe Hy die wêreld deur ’n eenvoudige, arm, ongetroude tiener gaan red. Die geloof is iets wat vir jou, aan jou en in jou gedoen word. Daarom die verwondering.

4. Sy reageer met gewillige oorgawe

Ek is tot beskikking van die Here. Laat met my gebeur wat u gesê het. Hierdie is ‘n stelling van gehoorsaamheid. Haar gehoorsaamheid berus op die werklikheid dat Hy God is en daarom verdien Hy ons diens. Hy het die reg om te sê wat ons moet doen.

Hierdie opdrag om ons oor te gee, is teen ons kultuur. Persoonlike outonomie is vandag alles. Die engel sê vir Maria: Niks is vir God onmoontlik nie. Die geskiedenis wys dat die engel reg was. Gee oor aan Christus en moet nooit onderskat wat Hy in en deur jou kan doen nie.