There is no absolute independence for man, our nature requires us to serve some master – J. Denney

Die evangelie begin met ‘n belofte (1)

Die mens het diep behoeftes. Ons is bewus daarvan dat ons hunker na dinge wat ons net nie op ons eie kan kry nie. Ons wil aan iets buite onsself verbind wees. Ons wil weet waarom ons bestaan. Hierdie behoeftes en verlangens staan sentraal in die storie van die Bybel. Die evangelie begin met ‘n belofte wat die diepste menslike behoefte hanteer. Waar verhoudings stukkend is, bring die evangelie herstel.

God het dus ‘n plan om hierdie verhouding te herstel. Hy doen dit deur sy verbonde. Kom ons kyk na ‘n paar.

Die verbond met Abraham

Die evangelie begin nie in Matteus 1:1 nie. Baie eeue vantevore het God ‘n belofte aan Abraham gemaak – hy sal die vader van ‘n spesiale groep mense wees. Ons lees daarvan in Genesis 12:1 – 3. Waarskynlik die grootste van God se beloftes aan Abraham was dat Hy deur hom sy seëninge na al die nasies sal versprei. Die konteks van hierdie belofte is belangrik. In Genesis 1 – 11 sien ons dat die mensdom sy eie pad loop – voortdurend van sy Skepper afdwaal. Die mens, soos vandag nog, het die neiging om sy rug op God te keer en sy eie belange na te jaag. Die verhaal is van God se standvastige liefde vir die mens. God se liefde is die kern van die evangelie.

Uit die verbond met Abraham vloei die storie van Israel. God se program is aan hierdie mense geopenbaar. Hulle was die draers van God se belofte en openbaring. Hulle word ‘n nasie geroep om God te eer.

God se verbond met Dawid

Israel het na ‘n koning verlang – soos die ander nasies gehad het. God was nie goed genoeg vir hulle nie. God gaan ‘n verbond met Dawid, die tweede koning van Israel, aan (2 Samuel 7:8 – 16). Hierdie koningslyn wat nou tot stand gekom het, het ‘n spesiale verhouding met God gehad as sy verteenwoordiger. Ek sal vir hom ‘n vader wees en hy sal vir My ‘n seun wees (2 Samuel 7:14). Hier kom die hoop van ‘n unieke koning – die soort heerser wat God begeer. Hieruit kom die hoop van die Messias – ‘n koning wat vrede sou bring en geregtigheid in ooreenstemming met God se beloftes aan Abraham sou vestig.

Die meeste van Israel se konings het misluk – hulle het nie God se ideale bereik nie. Hulle volg hulle eie koppe. Uiteindelik oordeel God die volk – oorlog en ballingskap. In hierdie konteks belowe God ‘n nuwe verbond. Volgende keer kyk ons na hierdie nuwe verbond.

Unless you point to the good news of God’s grace people will not be able to bear the bad news of God’s judgement. —Timothy Keller

Hoekom volg ek Jesus se roeping?

When Jesus bids a man to follow him, he bids him tot come and die (Dietrich Bonhoeffer)

Jesus het gesê dat as ons Hom werklik wil volg, moet ons ons kruis opneem. Die kruis was ‘n simbool van marteling. Bonhoeffer was reg: die eise van Jesus is totaal. Sy oproep om Hom te volg, is nie net ‘n aanbod van ‘n nuwe soort lewe nie, maar ‘n oproep om ons alles te gee. Watter motief sal enigeen oortuig om so ‘n roeping te volg? J. D. Greear sê dat ons in Markus 8:35 – 38 drie motiverings kry.

1. God bring lewe deur gehoorsaamheid

Wie sy lewe vir homself wil behou, sal dit verloor; maar wie sy lewe vir My en die evangelie verloor, sal dit behou (vers 35). Gehoorsaamheid aan God mag soos die dood voel, maar in werklikheid is dit lewe. Die vergifnis wat jy gaan gee, sal soos die dood voel, maar daardie “dood” sal ‘n verhouding herstel en jou van die gif van bitterheid vry maak. Daardie sondige verhouding waarvandaan jy wegloop, sal voel soos dood, maar dit open die moontlikheid vir ‘n gesonde, lewegewende verhouding. So kan ons aangaan.

Gehoorsaamheid aan God is nooit maklik nie Soms sal dit voel asof die koste van die opoffering net te groot is – dit sal soos die dood voel. Maar as ons helder kan sien, sal ons besef dat dit in werklikheid God se instrument van lewe is.

2. Jy kan in ieder geval nie daaraan vashou nie

Wat help dit ‘n mens tog om die hele wêreld as wins te verkry en sy lewe te verloor? Wat sal ‘n mens kan gee in ruil vir sy lewe (vers 36 – 37).

Waaraan jy nou ook al vasklou wat verhoed dat jy jou volledig aan Jesus Christus oorgee, sal jy nie kan behou nie. Jongmense wil aan hulle seksuele vryheid vasklou en oorweeg nie eers dat Jesus Christus die Here is nie. Jesus vra: “Is dit werklik die moeite werd? Dink jy dit is meer as jou ewige siel werd. Hoeveel mense weier nie om aan Jesus die beheer van hulle beroep of finansies oor te gee nie. Jy kan vir ‘n tyd aan jou geld vashou, maar wat dan? Waaraan jy nou vashou, gaan jy uiteindelik verloor – ons gaan met leë sakke eindig. Hoekom ons siel verruil vir daardie dinge nou?

He is no fool who gives what he cannot keep to gain what he cannot lose (Jim Elliot).

3. Jesus was nie skaam vir jou nie

Wie hom dan vir My en my woorde skaam te midde van hierdie ontroue en sondige geslag, vir hom sal die Seun van die mens Hom ook skaam wanneer hy kom saam met die heilige engele, en beklee met dieselfde heerlikheid as sy Vader (vers 38).

Die ironie van hierdie vers is dat Jesus, wat Hom vir ons behoort te skaam het, nie vir ons skaam is nie. Die kruis wat Hy opgetel het, was vrywillig. Ons kan baie baat deur ons kruise op te neem; Hy het niks gehad om te baat nie, maar baie om te verloor. Tog, uit liefde vir my het Hy my geïdentifiseer en ‘n kruis opgetel om my te red. Jesus was die enigste volmaakte mens – Hy het die reg gehad om die dood te vermy. Uit liefde vir my het Hy die dood verduur sodat ek kan lewe. Is dit nie werd om alles te verlaat vir so ‘n God nie?

Om Jesus te volg, is nie altyd maklik nie, maar beslis die moeite werd.

The root cause of anxiety is a failure to trust all that God has promised to be for us in Jesus. —John Piper

Wat is die evangelie?

Die kern van die evangelie is die mens se herstelde verhouding met God. Maar wat hoor ons vandag? Soms hoor ons ‘n terapeutiese oproep – God sal ons beter laat voel en ons sal voorspoedig wees. Soms klink dit soos ‘n transaksie – ons skuld word betaal. Soms klink dit asof ons iets moet vermy. Soms klink dit asof Jesus gekom het om die politiek van die wêreld te verander.

Wat sê die Bybel oor die evangelie? As die kerk nie die evangelie reg verstaan nie, kan hy sy bestaansrede verloor. As die evangelie verlore gaan, ly die kerk en God se mense raak die pad byster. Tragies, want wat die wêreld veral nodig het, is om God se teenwoordigheid te ondervind. Die kerk wat weet wat die goeie nuus is, kan die goeie nuus bring aan ‘n wêreld wat ‘n behoefte daaraan het.

Die kruis is die spilpunt van die evangelie, maar Jesus wat vir ons sondes gesterf het, is nie die hele evangelie nie. Maar ons verkondig Christus wat gekruisig is. Vir die Jode is dit ‘n aanstoot en vir die ander is dit onsin (1 Korintiërs 1:23). In 1 Korintiërs 15:3 – 5 som Paulus de evangelie op: Christus het vir ons sondes gesterf, volgens die Skrifte; Hy is begrawe en op die derde dag opgewek, volgens die Skrifte Weerens is die kruis die kern van die evangelieboodskap. As Paulus hier praat van die kruis gebruik hy dit as ‘n sinekdogee  vir die hele evangelie. [ = ‘n geheel word deur ‘n deel aangedui.] Dit is baie belangrik; die evangelie kan nie sonder die kruis oorleef nie.

Ons sien dit in 1 Korintiërs 1:30 waar Paulus sê dat om met Christus verenig te wees, beteken dat Hy vir ons die wysheid wat van God kom: die vryspraak, die heiligmaking en die verlossing, geword het. Hoekom is dit so belangrik? As die evangelie net die kruis is, beteken dit dat dit as ‘n transaksie wat op ‘n spesifieke tyd ondervind word, gesien word. Die gevaar daarvan as ons die evangelie net as ‘n transaksie sien, is dat ons dan glo as hierdie transaksie afgehandel is jy klaar met die evangelie is – jy het sy verlossing verkry en die hel vermy. Hierdie is egter net die beginpunt van God se goeie nuus.

The essence of God’s action in wrath is to give people what they choose, in all its implications. —J.I. Packer

Verbruikersgeloof

Daar kom oomblikke in die lewe van gelowiges wanneer wat God vir ons wil hê en wat ons vir onsself wil hê, verskil. Die apostel Petrus het met dieselfde spanning gesukkel – en aanvanklik het hy maar gesukkel. In Markus 8:27 – 38 lê Jesus drie elemente van ‘n verbruikersgeloof bloot.

1. Jy het verbruikersgeloof as jy verwag dat Christus alle swaarkry uit jou lewe sal verwyder

Wie sê julle is ek? Petrus het pas hierdie vraag van Jesus korrek geantwoord. Dit is sekerlik een van die belangrikste vrae wat enige mens ooit kan antwoord. Jesus leer daarna sy dissipels dat Hy  baie sal ly en verwerp sal word. Petrus neem vir Jesus opsy en berispe Hom! Jesus wys vir Petrus tereg deur vir Petrus Satan te noem. Hoekom was Jesus so ontsteld oor wat Petrus gesê het? Dit is om Petrus geglo het dat die Messias gekom het om alle swaarkry uit sy lewe weg te neem.

Jesus sê in werklikheid vir Petrus dat Hy hom nie van swaarkry gaan verlos nie, maar deur swaarkry. Jesus het gekom om sy kruis te dra en wie Hom wil volg, moet sy eie kruis dra. Almal kom by so ‘n punt in hulle lewens – as die kanker nie genees word nie, as die huwelik nie gred word nie … Dan vra God vir ons: “Hoekom volg jy My? Is dit vir die voordele wat Ek kan gee of omdat Ek so waardevol in jou lewe is.”

2. Jy het ‘n verbruikersgeloof as jy aan dissipelskap in terme van selfvervulling in plaas van opoffering dink

Almal van ons het sekere verwagtings van Christus. Ons verwag dat daar sekere dinge is wat Hy vir ons moet doen. Hy sê: “Ek is op pad na die kruis om te sterf. Wie gaan saam met My?”

Dietrich Bonhoeffer sê: “When Jesus bids a man to follow him, he bids him come and die.” Jesus het ons verlos sodat ons kan dien. Daarom roep Hy ons om Hom te volg.

3. Jy het ‘n gebruikersgeloof as daar perke is aan jou gehoorsaamheid aan God.

Petrus was baie opgewonde om Jesus te volg toe dit genesing en mag en gewildheid beteken het. Maar hierdie pratery van swaarkry en opoffer en diens besef Petrus dat om Jesus te volg iets kos. Hy sê vir ons om iemand van wie ons niks hou nie te vergewe; Hy vra jou om Hom op ‘n sending te volg na waar jy nie wil wees nie, ens. Nou moet jy besluit hoe waardevol Hy vir jou is. Wil jy iets van Jesus hê of wil jy vir Jesus hê?

Jesus kom nie om ‘n deel van my lewe te wees nie – Hy kom om die middelpunt van my lewe te wees. Terwyl ons gehoorsaamheid aan Hom nog perke het, staan ons nog self in die middelpunt van ons lewens. Ons moet met oop hande na Jesus toe kom en sê: “Alles wat ek is, alles wat ek het, alles wat ek hoop om te wees … alles behoort aan U.’