Faith that fizzles before the finish was faulty from the first – Vance Havner.

Christene moet bekend wees vir …

‘n Mens kry die indruk dat Christene meer bekend is vir dit waarteen hulle is as vir dit waarvoor hulle staan. Maar waarvoor moet Christene bekend wees? Jarrid Wilson identifiseer agt dinge

1. Liefde

Wie nie liefhet nie, het geen kennis van God nie, want God is liefde (1 Johannes 4:8). Liefde is ‘n intrinsieke waarde van elke Christen. Maak nie saak wat die omstandighede is nie, Christene word gekenmerk deurdat hulle ‘n helpende hand van liefde uitsteek. God het ons lief, al betoon ons nie altyd liefde teenoor Hom nie. Ons moet dieselfde vir ander doen.

2. Genade

Wees goedgesind en hartlik teenoor mekaar, en vergewe mekaar soos God julle ook in Christus vergewe het (Efesiërs 4:32). Die genade van God bedek baie sondes en sy kruisdood het daarvoor betaal. Ons verdien nie die genade wat so oorvloedig uitgedeel word nie. Net so moet ons as Christene bekend staan vir die genade en vergifnis wat ons aan ander bewys. Dit mag onverdiend wees, maar ons genade en vergifnis was ook onverdiend.

3. Reinheid

Verder, broers, alles wat waar is, alles wat edel is, alles wat reg is, alles wat rein is, alles wat mooi is, alles wat prysenswaardig is –  watter deug of lofwaardige saak daar ook mag wees – daarop moet julle julle gedagtes rig (Filippense 4:8). Reinheid geld nie net vir ons verhoudings nie, maar ook vir ons praat en optrede en motiewe.

4. Geduld

In Galasiërs 5:22 lees ons van die vrug van die Heilige Gees – een daarvan is geduld. Die res van die wêreld mag kitsoplossings verkies, maar die woord van God maak dit duidelike dat Christene onder alle omstandighede geduldig moet wees. Dit is nie altyd die maklikste pad om te kies nie, maar is beslis die beste.

5. Opoffering

In Johannes 3:16 lees ons van Jesus se offer aan die kruis. Ons sal nooit tot dieselfde mate kan offer nie, maar dit beteken nie dat ons hierdie voorbeeld wat Jesus gestel het, moet probeer navolg nie.

6. Onselfsugtigheid

Julle moenie net elkeen aan sy eie belange dink nie, maar ook aan dié van ander (Filippense 2:4). Gee jy net om iets terug te kry of gee jy uit die oorvloed van jou hart? Onthou net dat alles wat ons het, nie ons s’n is nie – ons is maar net rentmeesters.

7. Toewyding

Laat julle ‘ja’ eenvoudig ‘ja’ wees en julle ‘nee’ ‘nee.’ (Matteus 5:37)

As Christene sê dat hulle iets sal doen, moet hulle dit doen. Die wêreld moet sien dat hulle ons kan vertrou.

8. Respek

Julle moet alle mense respekteer en julle medegelowiges liefhê (1 Petrus 2:17). Ons sal sekerlik mense teenkom wie se siening van ons s’n verskil. Dit beteken nie dat ons hulle nie kan respekteer nie. Selfs as ons verskil, kan ons liefde en genade bewys.

Be careful, be careful of your private lives … and I believe your public lives will be sure to be right. Remember that it is upon your public life that the verdict of the world will very much depend – Charles Spurgeon

Volg My (1)

David Platt het ‘n kort boekie: What did Jesus really mean when He said: Follow me? geskryf. Ek gaan ‘n paar blogs aan hierdie boekie spandeer.

Jesus loop eendag langs die See van Galilea en roep vier vissers om Hom te volg, en Ek sal julle vissers van mense maak (Matteus 4:19). Petrus, Andreas, Johannes en Jakobus los hulle nette net daar en volg Hom. Hulle lewens, en die hele wêreld, was nooit weer dieselfde nie. Maar Jesus se uitnodiging om Hom te volg, geld ook vir elkeen van ons.

Hierdie oproep van Jesus is nie iets wat ons sommer kan ignoreer nie – selfs nie in ons besige lewens nie. Dit vereis ons volle aandag. Jesus het gesê: Ek is die weg en die waarheid en die lewe. Niemand kom na die Vader toe behalwe deur My nie (Johannes 14:6). Jesus is nie een gereg van die buffet waaruit ons die elemente waarvan ons hou, kan kies nie. As sy aansprake waar is, het ons geen keuse nie – soos die vier vissermanne moet ons alles los en Hom volg.

Jesus se roeping van die vissermanne is duidelik: hulle los hulle nette en volg Hom. Hulle loop saam met Hom waar Hy ook al gaan. Na sy dood en opstanding volg hulle Hom deur sy lewenswyse na te boots en deur die goeie nuus oor wat Hy op aarde gedoen het, te versprei. Maar wat beteken dit vandag om Hom te volg?

Ons moet ons mees fundamentele probleem voor God hanteer. Ons probleem is nie dat ons ‘n klompie slegte besluite geneem het nie. Ons probleem is dat ons almal in opstand teen God is. Die opstand is wat die Bybel sonde noem en dit hou ons weg van God. In die Bybel is dit duidelik dat sonde en sondaars gestraf word. Lot se vrou is ongehoorsaam – sy kyk terug na Sodom en Gomorra – en sy verloor haar lewe. Daar is baie sulke voorbeelde. Mense lees hierdie verhale en is verward. Is God dan nie ‘n God van liefde nie? Is hierdie strawwe darem nie ‘n bietjie te erg nie

Hierdie vrae is eerlik, maar maak ‘n probleem van ons perspektief duidelik. Ons sien sonde deur die oë van ‘n mens. Die straf vir sonde word nie deur ons maatstaf daarvan bepaal nie. Die straf vir sonde word bepaal deur die grootte van die Een teen wie ons gesondig het. As ek teen die oneindig heilige en ewige God sondig, is ek skuldig en verdien die ewige straf.

Volgende keer kyk ons na die betekenis van dood in ons sonde.

What you do with your whole heart is not burdensome to do – John Piper

Die Groot Opdrag

God het aan elke gelowige ‘n roeping gegee: gaan uit in die wêreld en verkondig die goeie nuus van Jesus Christus. Hoekom? Die liefde van Christus dring ons (2 Korintiërs 5:14). Ons liefde vir Jesus motiveer ons om ons roeping te vervul.

Almal is vir God belangrik. God het sekere mense gemaak waarvan ek nie hou nie, maar Hy het nog nooit ‘n persoon gemaak wat Hy nie liefgehad het nie. Omdat God omgee, moet ek ook omgee. Jy verander nie mense met proteste nie, maar met liefde.. Die gemeenskap word een lewe op ‘n slag verander. God het spesifieke mense op ons pad geplaas – mense met wie ons die evangelie moet deel. Vir sommige mense is jy die enigste Christen wat hulle ken

As lidmate van die gemeentes nie die goeie nuus deel nie, wie gaan dit doen. God gaan ons verantwoordelik hou vir die mense wat Hy op ons pad geplaas het om die goeie nuus te hoor.

Maar hoe doen ons dit? Ons moet dit sê en wys. Hy wil hê dat ander dit deur ons lewens sien en ons moet dit met ons mond verkondig. Ons word deur die mense dopgehou. Elke ding wat jy doen of sê of gesprek wat jy het, het ewigheidsimplikasies. Dit is ‘n ontsaglike verantwoordelikheid.

Tree met wysheid op teenoor die mense wat nog buite die gemeente is. Maak die beste gebruik van elke geleentheid (Kolossense 4:5).

Be sure that you are with God, and then you may be sure that God is with you – Spurgeon

Die Lübeck-katedraal

Die Lübeck-katedraal is ‘n Lutheraanse kerkgebou. Die bouwerk aan die gebou is in 1173 begin en in ongeveer 1230 voltooi. Op een van die mure is die volgende geskrywe:

Julle noem My Meester, maar gehoorsaam My nie,

Julle noem My Lig, maar sien My nie,

Julle noem My die Weg, maar loop nie op My nie,

Julle noem My Lewe, maar begeer My nie,

Julle noem My Wys, maar volg My nie,

Julle noem My regverdig, maar het My nie lief nie.

Julle noem My Ryk, maar vra My nie,

Julle noem My Ewig, maar soek My nie,

Julle noen My ewig, maar vertrou My nie,

Julle noem My edel, maar dien My nie,

Julle noem My Magtig, maar eer My nie,

Julle noem My geregtig, maar vrees My nie.

As Ek julle veroordeel, moenie My blameer nie