God’s Word, when rightly expounded, is medicinal for a whole host of spiritual diseases. —Joel Beeke

Die kerk vandag (11)

Daar het onlangs ‘n goeie boek van Jared C. Wilson – The Prodigal Church –  verskyn. [Prodigal = verkwistend, luuks, uitspattig] In hierdie boek kyk hy na die manier waarop ons vandag kerk “doen.” Ons gaan ‘n hele aantal blogs aan hierdie boek spandeer.

Die kern van die boek is: sentraal staan die evangelie. Hoe word dit prakties uitgeleef? Daar is egter geen program of skema of formule nie. Ook moet ons onthou dat dit God is wat bepaal wie sukses behaal en wie nie. Watter aanvanklike skuiwe moet ons maak?

Meet die regte dinge

In Matteus 25:14 – 27 lees ons Jesus se gelykenis van die muntstukke. Uit hierdie gelykenis kan ons ‘n paar dinge leer:

• God gee nie aan almal dieselfde aantal gawes en hulpbronne nie. Party kry min; party kry baie. Maar elkeen wat iets van God ontvang het, word vertrou met dit wat hy gekry het.
• Dit maak nie saak hoeveel jy het nie, maar wat jy doen met dit wat jy ontvang het. Wie in die kleinste dinge betroubaar is, is ook in die groot dinge betroubaar (Lukas 16:10). Getalle is nie al wat belangrik is nie. Wat belangrik is, is nie die kwantiteit van jou bediening nie, maar die kwaliteit. Ons moet baie versigtig wees om kwaliteit te meet. Vrae soos: Het jy die musiek geniet? Was die erediens opwindend en relevant? Het jy spesiaal gevoel toe jy daar was? Nie een van hierdie vrae is eintlik geestelik nie. Nie een van hulle meet die werklike waarde van die ondervinding nie. Ons kan hierdie selfde vrae oor Disney World vra.

Dit is duidelik ons moet ander dinge meet.

• Diegene wat gedoop is, wandel hulle nog in die geloof na een/twee/drie jaar?
• Hoeveel mense is opgelei om ander persoonlik te help om dissipels te word?
• Watter persentasie van mense wat die eredienste bywoon, is betrokke by gemeenskapsgroepe/ Evangelisasie/ Gemeenskapsdiens.
• Hoeveel mense kan die boodskap van die evangelie artikuleer?
• Wat is die reputasie van die gemeente in die gemeenskap?

Hierdie dinge is baie moeiliker om te meet, maar vertel vir ons baie meer as blote getalle en ondervindings. Die verskil is om ‘n skare bymekaar te maak of om dissipels te maak. Om ‘n skare bymekaar te maak, beteken ons moet voortdurend innoveer en probeer om voor die kultuurwinde te bly. Wat van belang is, is nie grootte nie, maar verhoudings. Die klem moenie op gebeure en ondervindings val nie, maar om mense by die storie van die Bybel betrokke te kry.

Ons moet ons aan die soewereine barmhartigheid van die Heilige Gees, wat nie gemeet kan word nie, oorgee. Jy han nie dissipelskap programmeer nie.  Ons is nie hier met ‘n godsdienskode besig of ‘n stel opdragte vir ‘n meer suksesvolle leefwyse of gedragsmodfikasie nie. Dit gaan oor die opstanding uit die dood. Ons word deur genade ontvang in geloof geloof verlos. Dit kom alles van die Here.

Die boodskap van die evangelie is ‘n aankondiging oor wat God in Jesus Christus gedoen het. ‘n Dinamiese prediker maak nie die evangelie kragtiger nie. Die evangelie kan nie verbeter word nie. Hartsverandering is iets wat net die Heilige Gees kan doen. God is aan die werk in die evangelie – dit kom van Hom, dit word deur Hom bemagtig en dit werk deur Hom. Die Heilige Gees wat deur die evangelie werk, is die enigste krag wat ons het. Die probleem is dat ons nie die Heilige Gees kan beheer nie. Die Heilige Gees is nie ‘n formule nie – Hy waai waar Hy wil.

Word selfkrities

Die pad vorentoe gaan bepaal word deur alles op die tafel te plaas vir onderhandeling. Dit verwys uiteraard nie na die Bybel en ons basiese geloofswaarhede in nie. Dit verys na ons metodes en aannames van “hoe dinge werk.” Elke kerk het mense met die nodige gesag nodig om te sê: “Dit is ‘n slegte idee.” Luister na wat hulle sê; bewys dat hy verkeerd is as jy van hom verskil, maar moenie die vrae onderdruk nie. Die probleem is dat baie van ons gemeentes enige kritiek uitsluit, want dit mag seermaak. Dikwels is die kritiek ook uit onkunde.

Ons kan van sekere van ons kritici leer. As ons die nodige nederigheid en vertroue in Jesus Christus het, kan ons by hulle leer. Dink ten minste oor wat hulle sê. Daar is baie kritici wat kritiseer, want hulle het die kerk lief. Begin deur betroubare persone uit te nooi om die waarheid met jou te praat; laat hulle toe om vrae te vra; laat hulle toe om te sê as hulle nie met jou saamstem nie. Mense hou nie van kritiek nie – veral nie as dit geldig is nie. Ek begin onmiddellik verdedig en verskonings maak. Moenie aanvaar dat elke goeie idee wat jy het in werklikheid goed is nie.

Success has a hundred fathers; defeat is an orphan – Anoniem

God se goeie doel in die geskiedenis van die mens

Wat is die goeie doel van God in die geskiedenis van die mens? Ons het ‘n goeie God wat teen die bose is. God waak gedurig teen die bose – ons kry dit oor en oor in die Skrif. Dink aan Job. Job was nie ‘n Jood nie – hy was nie deel van die verbondsvolk nie. Tog het God ‘n heining om hom gebou. Net so bou God ‘n heining om elkeen wat Hom soek en verhoed Hy so dat die bose hulle oorval. Deur die liefde van die Here het ons nie vergaan nie; daar is geen einde aan sy ontferming nie (Klaagliedere 3:22).

Die probleem met baie dinge in die Bybel en ons liedere is dat dit vir ons net mooi woorde wat nie werklik vir ons iets beteken nie, is. Ons moet voortdurend vir God vra om ons teen die bose te beskerm. Ons is op die slagveld vasgevang tussen twee leërs – die een is goed, die ander is boos. God is egter groot en kan ons beskerm. God is teen die bose. Ons is in die arena van die geskiedenis van die mens waarin die goeie doel van God bereik moet word.

Kom ons kyk hoe stel Paulus die doel van God in Efesiërs 2:4 – 7: Maar God is ryk aan barmhartighed en het ons innig lief. Deur sy groot liefde het Hy ons wat dood was as gevolg van ons oortredings, saam met Christus lewend gemaak. Uit genade is julle gered! Ja, in Christus Jesus het Hy ons saam met Hom opgewek uit die dood en ons saam met Hom ‘n plek in die hemel gegee, sodat God ook in die tye wat kom, sou laat sien hoe geweldig groot sy genade is deur die goedheid wat hy in Christus Jesus aan ons bewys het. Dit is waaroor die geskiedenis van die mens gaan. In vers 7 sien ons dat ons God se vertoonstukke is wat in die tye wat kom die bewyse van God se genade en goedheid sal wees.

Maar nou het God die ryke verskeidenheid van sy wysheid deur die kerk bekend laat word aan elke mag en gesag in die hemelruim (Efesiërs 3:10). Wat bekend gemaak moet word, is wat God uit die geskiedenis van die mens gaan voortbring. Wat God gaan voortbring is dat sy mense die grootste weerkaatsing van God se heerlikheid, wysheid en liefde gaan wees – ‘n geloofsgemeenskap wat die kroonjuweel in sy skepping sal wees.

Things have come to a pretty pass when religion is allowed to invade the private life – Lord Melbourne, Britse eerste minister in die 1830’s

Hoekom is daar ‘n hel?

Sommige mense wil nie net vir God wegkruip nie, maar wil so ver as moontlik van Hom wees. Die beste plek vir hulle om te wees, is daar waar God nie is nie. En dit is die hel. Die fundamentele werklikheid van die hel is skeiding van God. Dit gebeur omdat mense nie by Hom wil wees nie.

Dallas Willard sê ‘n deel van ons probleem om die hel te verstaan, is die manier waarop ons oor die hemel dink. Ons dink aan die hemel as ‘n gemaklike blyplek. Die belangrikste ding van die hemel is dat ons in die teenwoordigheid van God gaan wees. Hy het toegelaat dat ons Hom op aarde kan vermy as ons sou wou, maar as jy hemel toe wil gaan, is God die belangrikste ding op jou horison. Daar is geen manier wat jy Hom sal kan vermy nie.

Ons het heelwat simboliek oor die hel oor die jare ontwikkel. Dit het ons op ‘n verkeerde spoor laat beland. Baie mense dink dat die duiwel in beheer is van die hel – die koning. Onwaar. Hy is aan die ontvangskant van straf en lyding in die hel. Hy is verantwoordelik vir baie daarvan op aarde, maar hy is nie verantwoordelik vir wat in die hel gebeur nie.

Natuurlik is dit nie God se wil dat iemand moet omkom nie; God probeer nie mense uit die hemel hou nie; Hy probeer juis om hulle in die hemel te kry. Die enigste manier waarop daar nie ‘n hel sou wees nie, is as almal God sou liefhê en in sy teenwoordigheid wou wees. God respekteer die wil van die mens. All that are in hell in hell choose it. Without that self-choice there would be no hell. No soul that seriously and constantly desires joy will ever miss it (C. S. Lewis) As die mens homself as god sien, as hulle tevrede is om in hulle eie wêreld te bestuur, sal dit hulle van God weghou.

Jesus het voortdurend probeer om mense deel van sy koninkryk te maak; Hy het nie geprobeer om mense na die hel te stuur nie. God probeer sy bes met ons binne die beperkings van ons verbeelding en denke. Soms het ons die verkeerde indruk van God. God het nie die hel gemaak omdat hy kwaad was nie; omdat Hy mense wou sien ly nie; omdat Hy daarvan hou om mense te martel nie. Die enigste rede waarom daar ‘n hel is, is omdat God voorsiening  maak vir wat mense wil hê.

A church without the broken is a broken church. —Ed Stetzer

Die fases van geloof

Volgens Rick Warren gebruik God ‘n baie voorspelbare proses om jou karakter te bou, Die proses bestaan uit ses fases. As jy nie die proses verstaan nie, kan jy baie maklik ontmoedig word as probleme opduik. Jy wonder: “Hoekom gebeur dit met my?”

Kom ons kyk na hierdie fases:

Fase #1: ‘n Droom

God gee aan jou ‘n droom – ‘n idee of doelwit. Elke groot prestasie begin met ‘n Godgegewe droom. Aan Hom wat deur sy krag wat in ons werk, magtig is om oneidig meer te doen as wat ons bid of dink (Efesiërs 3:20).

Fase #2: Besluit

‘n Droom is waardeloos totdat jy besluit om iets daarmee te doen. Dit is die oomblik van waarheid wanneer jy besluit om jou tyd, energie, geld en selfs jou reputasie te belê. As jy op die water wil loop, moet jy eers uit die boot klim. Maar ‘n mens moet gelowig bid en nie twyfel nie, want iemand wat twyfel is soos ‘n brander in die see wat deur die wind aangejaag en heen en weer gedryf word (Jakobus 1:6)

Fase #3: Vertraging

Daar is altyd ‘n vertraging voor jou droom bewaarheid word. God gebruik juis hierdie wagperiode om jou te leer om Hom te vertrou. Die openbaring geld vir ‘n bepaalde tyd; dit sal gou kom, want dit kom beslis. Jy moet net geduldig bly wag as dit nie gou kom nie, want dit kom beslis, dit sal nie uitbly nie (Habakuk 2:3).

Fase #4: Probleme

Nou begin probleme opduik. Die algemeenste probleme is kritici en omstandighede. Moenie bekommerd wees nie, want dit is deel van God se plan. Verheug julle hieroor, selfs al is dit nodig dat julle ‘n kort tydjie bedroef gemaak word deur allerhande beproewings sodat die egtheid van julle geloof getoets kan word. Julle geloof is baie kosbaarder as goud wat vergaan (1 Petrus 1:6 – 7).

Fase #5: ‘n Doodloopstraat

Jou situasie maf selfs verder versleg. Jou situasie lyk hopeloos. Nou moet jy God vertrou. Die swaar wat ons moes verduur, het ver bo ons kragte gegaan, sodat ons selfs die hoop om te bly lewe, laat vaar het … Maar dit het gebeur, sodat ons nie op onsself sou vertrou nie, maar op God wat die dooies opwek tot die lewe (2 Korintiërs 1:8 – 9)

Fase #6: Verlossing

God voorsien ‘n bonatuurlike antwoord. Wonderbaarlik val alles in plek. As ek darem nie geglo het dat ek die goedheid van die Here sal sien in die land van die lewendes nie … (Psalm 27:13).