Public faith means going public with what’s in your heart, with humility and respect for others, as we speak of the truth of the gospel – Tim Keller

Wil jy jou bediening uitbrei? Erken jou swakhede

Rick Warren sê daar is twee groot belydenisse in die Bybel. Die eerste is Petrus se belydenis: U is die Christus! (Markus 8:29). Ons geloof is op hierdie belydenis gegrond. In Handeling 14:15 kry ons ‘n belydenis van Paulus: Ons is maar net sulke mense soos julle. Baie kerkleiers stem saam met die eerste belydenis, maar is versigtig vir Paulus se belydenis. Kerkleiers is dikwels meer geneë om hulle geestelikheid as hulle menslikheid te erken.

Maar as jy jou menslikheid ontken is jy oneerlik, maar jy bewys ook ‘n ondiens aan jouself en aan diegene wat jy dien. God hou daarvan om swakhede te gebruik en hulle in sterkpunte te verander. Ons het almal beperkings; almal van ons dra die evangelie in kleipotte. Maar die beperkinge wat God in jou lewe toelaat, kan, as ons eerlik is daaroor, in werklikheid ‘n seën wees. Hoe?

1. Jy sal meer afhanklik van God wees

Gewoonlik weerstaan ons enige beperking op ons bediening – ons vra vir God om dit te verwyder. Maar as God wys dat Hy sterk is onder hierdie omstandighede, hoekom moet Hy die beperking verwyder? God werk soms deur ons menslike swakhede, eerder as om hulle te verwyder. Lees net weer die storie van God wat vir Gideon gebruik om die Midianiete te verslaan. Hy kies die jongste kind in die armste familie in Israel. Voordat Gideon teen 135 000 Midianiete kan optrek, verminder God sy leër tot net 300 man. Hoekom doen God dit? Hy wou gehad het dat Gideon Hom alleen vir sy sukses vertrou. As ek ‘n beperking in my bediening of persoonlike lewe het, is dit ‘n geleentheid om God meer te vertrou.

2. Dit verhoed trots

Paulus het ‘n doring gehad. Ons weet nie presies wat dit was nie, maar ons weet dit het pyn veroorsaak en sy bediening beperk. Ons weet ook dat dit Paulus nederig gehou het. Daarom, sodat ek nie hoogmoedig sou wees nie, is daar vir my ‘n doring in die vlees gegee … Drie maal het ek vir die Here gebid dat dit van my af weggeneem moet word. Sy antwoord was: ‘ My genade is vir jou genoeg. My krag kom juis tot volle werking wanneer jy swak is.” (2 Korintiërs 12:7 – 9). Paulus het geweet dat hy nie trots kan wees nie, want hy het sekere beperkinge gehad.

3. Dit beteken ons is meer van ander Christene afhanklik

Een van die groot gevare van sterkpunte is dat dit tot onafhanklikheid lei. God laat swakhede toe sodat ons sal besef dat ons medegelowiges nodig het. Nie een van ons kan alleen staan nie. Ons menslikheid vereis interafhanklikheid. Snowflakes are frail, but if enough of them stick together they can stop traffic (Vance Havner).

4. Dit brei ons vermoë vir bediening uit

Mense gaan dikwels genesing uit jou wonde kry. Warren glo dat van ons grootste boodskappe uit ons diepste seerkry kom. In elke moeilikheid bemoedig Hy ons. Daarom kan ons ook ander bemoedig wat in allerlei moeilikhede verkeer. Ons kan hulle bemoedig met dieselfde bemoediging waarmee God ons bemoedig (2 Korintiërs 1:4). Pyn maak ons sensitief vir die seerkry van ander. As jy nog nooit met jou swakhede gestry het nie, is jy waarskynlik uit voeling met diegene wat jy bedien.

Jy kry hierdie voordele slegs as jy gewillig is om jou swakhede te deel. As jy jou swakhede, pyn en foute probeer wegsteek, is jy van geen voordeel vir diegene wat jy moontlik kon bedien het nie.

“Those times when you feel like quitting can be times of great opportunity, for God uses your troubles to help you grow.” ~ Warren Wiersbe

Napoleon en die moeder

Luis Palau vertel die storie van ‘n moeder wat vir Napoleon Bonaparte genader het om vir haar seun te pleit. Die keiser het na haar versoek geluister, maar antwoord dat die jong soldaat ‘n sekere oortreding begaan het – twee maal – en daarom die doodstraf verdien.

Die moeder: “Ek vra nie vir geregtigheid nie, ek pleit by u vir barmhartigheid.”

Napoleon: “U seun verdien nie barmhartigheid nie.”

Moeder: “Meneer, as hy dit verdien het, was dit nie barmhartigheid nie en barmhartigheid is al wat ek vra.”

Napoleon: “Wel, dan sal ek barmhartigheid bewys.”

Napoleon spaar die lewe van die jongman.

Barmhartigheid is God wat die oordeel wat ons as gevolg van ons sonde verdien van ons terughou.

If the suffering Jesus endured did not make him give up on us, nothing will – Tim Keller

Die Here is jaloers

Jealousy is the trademark of small minds – Mark Twain

In sy menslike uitdrukking kan jaloesie sekerlik destruktief wees. Die wortel van ons jaloesie is onsekerheid, vrees en angs as ons verwag om iets te verloor – soos ’n verhouding of status of besittings. Jaloesie veroorsaak spanning  en probleme in ons interaksie met ander mense. Daarom beskou ons jaloesie beslis nie as ’n deug nie. Dit is lelik en kleinlik – ’n negatiewe emosie wat tot negatiewe optrede lei. Paulus sê dat dit ‘n praktyk van ons sondige natuur is (Galasiërs 5:20).

Daarom is dit vir baie mense verbasend om te hoor dat God ’n jaloerse God is. Tog lees ons in beide die Ou en die Nuwe Testament dat God ‘n jaloerse God is. In Eksodus 20:5 lees ons: Jy mag jou voor hulle nie neerbuig en hulle nie dien nie; want Ek, die Here jou God, is ’n jaloerse God (OAV). Want jy mag jou nie neerbuig voor ‘n ander God nie; want die Here se Naam is Jaloers – ‘n jaloerse God is Hy (Eksodus 34:14 – OAV). Wie dan ‘n vriend van die wêreld wil wees, word ‘n vyand van God. Of meen julle dat die Skrif tevergeefs sê: Met jaloersheid begeer die Gees wat in ons woon (Jakobus 4:4 – 5 – OAV). In al hierdie gevalle is God jaloers as gevolg van die mense se ontrou. Hy is jaloers as Israel afgode aanbid of as die kerk soos die wêreld word.

God se jaloesie vloei voort uit sy groot liefde vir sy kinders. Dit is sy passievolle toewyding wat met reg aan Hom behoort.

The purposes of God in the gospels are focused on God’s longing to put the world to right, and to put people to right is part of that world – N. T. Wright

Vergewe en onthou

Die sleuteltoets vir leierskap is wat gebeur nadat ek ‘n fout gemaak het. Dean Keith Simonton sê dat kreatiwiteit die gevolg van produktiwiteit is. If a creator wants to increase the number of hits, he or she must risk a parallel increase in misses. Hy glo die suksesvolste innoveerder is die een met die meeste mislukkings.

Wat nodig is, is ‘n klimaat van vergewe en onthou. Ons hoor dikwels mense sê: “Mislukking is nie ‘n opsie nie.” Dit stuur ‘n verkeerde boodskap uit. Natuurlik sal niemand doelbewus mislukking soek nie. Mislukking is ‘n newe-effek van waag. Eerlike foute moet verskoon word.

God moedig ons aan om met Hom oor ons twyfel en  mislukkings te praat – eerlike en oneerlike foute. Ons moet ook met God oor ons vertroue en suksesse praat. In die wêreld glo ons die beste pad om te loop, is om te vergewe en te onthou. Dit veroorsaak dat mense nie weer dieselfde foute maak nie. Maar wat doen God met ons sondes? Oor hulle ongeregtighede sal Ek genadig wees en aan hulle sondes nooit weer dink nie (Hebreërs 8:12). Wat doen God? Hy vergewe en vergeet.