If I had only one sermon to preach, it would be a sermon against pride – G. K. Chesterton

Ek het ‘n dwase belofte gemaak

In Rigters 10 – 12 lees ons die treurige verhaal van Jefta. Jefta maak ‘n gelofte teenoor die Here: As u die Ammoniete vandag heeltemal oorgee aan my mag, sal die een wat my uit my huis uit tegemoet kom wanneer ek behoue terugkom van die Ammoniete af, aan die Here behoort: ek sal hom as brandoffer offer (11:30). Sy enigste kind, sy dogter, kom hom tegemoet.

Wat moes Jefta met hierdie dwase belofte gedoen het: Ons eerste reaksie is: ignoreer dit. Hoekom sê ons so? Wat van hierdie gedeeltes?

• As jy aan God ‘n belofte gedoen het, moet jy nie versuim om dit te betaal nie. Hy hou nie van ligsinnige mense nie. Wat jy beloof het, moet jy betaal. Dit is beter dat jy nie belowe nie as dat jy belowe en nie betaal nie (Prediker 5:3 – 4).
• In die bergrede waarsku Jesus teen die aflê van ‘n eed (Matteus 5:33 – 37). Hy eindig met hierdie woorde: Laat julle ‘ja’ eenvoudig ‘ja’ wees en julle ‘nee’ ‘nee.’ Wat meer gesê word as dit, kom van die Bose.

Nou sal sommige mense sê: “Moenie dwase beloftes aan God maak nie, maar as jy dit wel gedoen het, moet jy dit nakom. Twee verkeerdes maak nie ‘n regte nie. Niks is erger as om vir God te jok nie.” Hierdie logika mag opreg wees, maar dit is gevaarlik. Natuurlik moes hy nie sy dogter geoffer het nie. Hoeveel van ons het nie al probeer om private ooreenkomste met God aan te gaan nie. “As U my uit hierdie situasie kry, sal ek …” Dikwels is dit iets dwaas – onmoontlik, onvolhoubaar, ens.

Wat doen ons hiermee?

1. Bely jou dwase belofte aan God – moenie sondig om God “gelukkig” te maak nie.
2. Leer uit die impulsiwiteit of vals geloof wat jou die belofte laat maak het.

‘n Deel van die rede waarom ons dwase dinge aan God belowe, is omdat ons dink dat God met ons grootsheid beïndruk sal wees. Hoe gouer ons hierdie idee vergeet, hoe beter. Dit is ‘n onvolwasse siening van God om te dink dat Hy met ons beïndruk sal wees. Wat ons nodig het, is die regte siening van God.

Ons moet leer van die impulsiwiteit wat ons die dwase belofte laat maak het en die geloof wat ons laat dink het hierdie dwase belofte sal die moontlikheid dat God ons gebed gaan beantwoord, verhoog.

As God berou en belydenis sien, glimlag Hy soos ‘n goeie Vader, want dit is ‘n teken van volwassenheid. God is nie ‘n advokaat wat ons probeer vastrek in woorde wat ons in die verlede gesê het nie. God is ‘n goeie Vader wat wil hê dat ons uit elkeen van ons foute moet leer. As jy jou verhouding met God in hierdie lig sien, sal jy jou woorde goed oorweeg.

God sal eerder ‘n dwase belofte in een van sy kinders wat besig is om te groei,  vergewe as om te sien dat ‘n eiesinnige kind sy dwaasheid deurvoer. God word meer verheerlik deur ons te vergewe as ons ‘n dwase belofte verbreek as wanneer ons ‘n dwase belofte uitvoer.

God is not embarrassed by his wrath or ashamed of his judgment, so we shouldn’t be either. —Thabiti Anyabwile

Vals bekerings

Let goed op jou lewe en jou leer, volhard daarin, want deur dit te doen, sal jy jouself red sowel as dié wat na jou luister (1 Timoteus 4:16).

Is vals bekerings ‘n probleem  in ons kerke vandag? In die gelykenis van die saaier gee Jesus vier voorbeelde van dieselfde saad wat reg gesaai word, maar is drie gevalle is die resultaat negatief. Is dit nie ‘n bewys dat Jesus verstaan dat dit lyk asof sommige mense positief op die evangelie reageer, maar mettertyd is dit duidelik dat hulle geestelik dood is nie? Is daar nie baie mense in ons kerke wat nie bekeerd is nie?

God se oorkoepelende plan is om heerlikheid vir Homself te bring deur mense. Hierdie plan begin toe Hy vir Abram geroep het. Later sê Dawid: Vertel die nasies van sy mag, al die volke van sy magtige dade (1 Kronieke 16:24). Hierdie is ‘n tema wat ons dwarsdeur die Bybel kry. Dit is God se plan: om Hom bekend te maak sodat Hy verheerlik kan word onder al die nasies. God gaan hierdie plan van Hom eerstens deur Jesus Christus vervul. Maar die storie gaan verder: Omdat U geslag is en met u bloed mense vir God losgekoop het uit elke stam en taal en volk en nasie (Openbaring 5:9). En wat van hierdie mense?  Wat julle ook al op die aarde toesluit, sal in die hemel toegesluit bly; en wat julle ook al op die aarde oopsluit, sal oopgesluit bly (Matteus 18:18). Jesus het dus sy gesag aan sy mense – sy kerk – gegee. God gaan sy plan deur Jesus Christus en sy kerk uitvoer.

Maar wat is die probleem? Die probleem is dat God se mense ontrou is. Ons sien dit reeds in die Ou Testament. Ons kry dieselfde in die Nuwe Testament. Jesus sê: Laat julle lig so voor die mense skyn, dat hulle julle goeie werke kan sien en julle Vader wat in die hemel is, verheerlik (Matteus 5:16).

Wat is dan die gevolge van mense wat in die kerk sit, maar hulle is nie werklik bekeer nie?

1. Vals bekerings mislei die individue self. In 1 Korintiërs 5:5 gee Paulus ‘n rede waarom die vals “gelowige” uit die kerk geban moet word: So sou sy sondige aard vernietig word, sodat sy gees gered kan word op die dag wanneer die Here kom. Dit is nie reg van ‘n gemeente om mense gemaak na die beeld van God te laat met die indruk dat hulle met God versoen is as dit nie waar is nie.
2. Vals bekerings mislei ‘n gemeente. ‘n Bietjie suurdeeg deurtrek die hele deeg. As die gemeente heelwat van hierdie vals bekeerlinge het, maak dit die gemeente nie minder liefdevol, vergewend en hoopvol nie? Die kerk word nou meer soos die wêreld.
3. Vals bekerings mislei die nasies deur die kerk se getuienis te onderdruk. Die kerk word so baie soos die wêreld dat de wêreld geen vrae meer vir die kerk het nie. As daar min/geen verskil tussen die kerk en die wêreld is nie, is die kerk nie meer ‘n baken van hoop nie.
4. Vals bekeerlinge onteer die heerlikheid van God se Naam. Die kerk moet die waarheid oor God weerspieël. As die kerk verdeel is, vertel dit vir die mense dat God verdeel is. Ons gemeentes moet die karakter van God weerspieël sodat Hy deur die nasies verheerlik kan word.

Wat is die probleem? In baie gemeentes is daar min bewyse van die vrugte van die Gees. Hoekom? Paulus waarsku vir Timoteus: Maar van onheilige en sinlose verdigsels moet jy wegbly (1 Timoteus 4:7). Hy waarsku ook dat vals leermeesters mense in die gemeente sal mislei. Dwarsdeur die Nuwe Testament word ons teen dwaalleraars gewaarsku.

Earth has no sorrow that heaven cannot heal – Thomas Moore

Hoekom groei sekere gemeentes nie?

Greg Stier identifiseer ‘n hele aantal redes waarom gemeentes nie groei nie.

1. Hulle is nie vriendelik genoeg nie

Hoe dikwels stap jy deur die voorportaal op pad na die erediens en niemand verwelkom of groet of help jou nie? Dan is daar weer gemeentes waar jy warm verwelkom word – jy voel onmiddellik tuis. Onthou: eerste indrukke is baie belangrik.

2. Hulle is nie doelgerig nie

Groei gebeur nie sommer vanself nie – jy moet daarvoor beplan. Hoe kan ons meer doelgerig wees?

• As jou lidmate iemand wat nie die Here ken nie na ‘n erediens bring, maak seker dat hulle die goeie nuus van Jesus Christus hoor.
• Leer die hele gemeente om hulle geloof met ander te deel.
• Vertel stories van hoe lidmate aan hulle vriende, bure, ens die goeie nuus oordra. Al wat nodig is, is ‘n drie minute segment by elke erediens.

3. Hulle is nie georganiseerd genoeg nie

Baie gemeentes lei mense na Christus, maar het geen plan oor hoe om hulle in die gemeente te assimileer nie. Ons kan hulle nie sommer net los nie. Ons moet ook georganiseerd wees in ons eredienste, kinderbediening, kleingroepe ens. Alles moet egter gepas en ordelik geskied (1 Korintiërs 14:40).

4. Hulle is nie relevant genoeg nie

As die woord van God op ‘n afgeleë, verwarrende manier verkondig word, het die gemeente probleme. Die woord van God is lewend en kragtig. Dit is skerper as enige swaard met twee snykante en dring deur selfs tot die skeiding van siel en gees en van gewrigte en murg. Dit beoordeel die bedoelings en gedagtes van die hart (Hebreërs 4:12).

5. Hulle het nie genoeg substans nie

Dikwels is die preke maar oppervlakkig en wollerig. Soos nuwe gelowiges in hulle geloof groei verwag hulle meer – hulle wil nie meer net melkkos kry nie. Wat kry ons vandag in so baie van ons kerke? “Ligte. Kameras. Aksie.”

6. Hulle is nie liefdevol genoeg nie

Op die oppervlak mag hulle liefdevol voorkom, maar na ‘n tydjie word jy bewus van die onderliggende politiek en verdeeldheid.

7. Hulle bid nie genoeg nie

Hierdie faktor moet natuurlik eerste genoem word. Ek dring daarop aan dat daar in die eerste plek met smeking, voorbidding en danksegging gebid moet word vir alle mense, vir dié wat regeer en vir almal wat gesag uitoefen, sodat ons ‘n rustige en stil lewe kan lei in volkome toewyding aan God en in alle eerbaarheid. So is dit goed en aanneemlik vir God, ons Verlosser (1 Timoteus 2:1 – 3). Kerke wat saam bid, groei saam. Hoekom? Hulle word aangevuur deur Goddelike wysheid en krag – nie deur die nuutste gemeentegroei tegnieke nie. In baie gemeentes word meer tyd aan die afkondigings as aan gebed gespandeer

Herken jy van hierdie dinge in jou gemeente?

Blog150a

Without worship you shrink; it’s as brutal as that – Peter Shaffer

 ‘n Heilige lewe (2)

In die werklike lewe word die najaag van heiligheid deur die krag van die Gees en deur die evangelie gedryf en deur geloof aangevuur.

• Deur die krag van die Gees

In 1 Petrus 1:2 lees ons dat ons deur die Gees afgesonder is om aan Hom gehoorsaam te wees. Die Gees sonder ons nie net af nie, maar maak ons progressief heiliger sodat ons al meer soos Christus word. Hier dink ons aan twee Bybelse beelde van die Gees:

• Ek bid dat Hy deur sy Gees uit die rykdom van sy heerlikheid aan julle die krag sal gee om innerlik sterk te word (Efesiërs 3:16). Die Gees is aan die werk binne in ons. Hy gee aan jou die wil om sonde te weerstaan. Die Gees gee aan ons die krag om te doen wat ons nie op ons eie kon doen nie.
• En wanneer Hy kom, sal Hy bewys dat die wêreld skuldig is aan sonde en dat die reg aan my kant is en dat die oordeel al gekom het (Johannes 16:8). Hier sê Jesus dat Hy die Gees sal stuur om die wêreld van hulle sonde, geregtigheid en die oordeel te oortuig. Die Gees gaan die wêreld se opstand blootlê. Die Gees skakel die ligte aan sodat ons kan sien dit waarvoor ons tot dusver nog blind was. Baie mense hou van die donkerte, want hulle dade is boos.

Sonde hou nie van die lig nie. Maar die Gees openbaar ook die waarheid en die heerlikheid van Christus. Dit vestig ons aandag op Jesus Christus.

Die Gees maak ons heilig deur ons sondes te openbaar, die waarheid te openbaar en om Christus te openbaar. Die Gees is ons krag en ons lig.

• Gedrewe deur die evangelie

Die najaag van heiligheid vloei uit die evangelie. Maar hoe vloei dit?

1. Die evangelie dryf ons na heiligheid uit ‘n gevoel van dankbaarheid. Dit is die punt van Romeine 12:1: En nou doen ek ‘n beroep op julle, broers, op grond van die groot ontferming van God: Gee julleself aan God as lewende en heilige offers wat vir Hom aanneemlik is. Dit is die wesenlike van die godsdiens wat julle moet beoefen. Dit beteken nie dat ons vir God betaal vir wat Hy vir ons gedoen het nie. Nee, dit is ons reaksie op God se genade – dankbaarheid. Die nederigheid en blydskap wat saam met dankbaarheid kom, dryf al die ander lelike dinge uit.
2. Die evangelie dryf ons na heiligheid, want dit vertel vir ons die waarheid oor wie ons is. Ons moet terugveg teen die bose met die waarheid van die evangelie. Onthou: Daar is dus nou geen veroordeling vir dié wat in Jesus Christus is nie (Romeine 8:1). Omdat die Gees van Hom deur wie Jesus uit die dood opgewek is, in julle woon, sal Hy deur wie Christus uit die dood opgewek is, ook julle sterflike liggame lewend maak deur sy Gees wat in julle woon (Romeine 8:11). Onthou: ons is kinders en erfgename van God; onthou: niks kan ons van die liefde van God skei nie. Die evangelie motiveer ons deur ons te herinner wie ons is. Die goeie nuus van die evangelie is dat dit maak nie saak hoe ons gebore is nie, maar ons is anders na ons weergeboorte. Die evangelie dryf ons na heiligheid.

• Deur geloof aangevuur. Maar jy, man van God, moet van hierdie dinge af wegvlug. Streef na geregtigheid, ‘n persoonlike verhouding met God, geloof, liefde, volharding, minsaamheid. In die goeie stryd van die geloof moet jy al jou kragte inspan en vashou aan die ewige lewe (1 Timoteus 6:11 – 12).

Die stryd om in heiligheid te groei word aangevuur deur geloof in die evangelie, geloof in ons identiteit in Christus, geloof in God se woord en geloof in sy beloftes. ‘n Heilige lewe is altyd een van geloof. Ek glo nie net my vryspraak nie, maar ook al God se beloftes. Dan tree ek op wetende dat dit die waarheid is.