“Ons het al al die vrae wat gevra kan word, gevra.  Ons moet ophou soek vir vrae en begin kyk vir antwoorde.”  GK Chesterton

Werk vir die uitgeworpenes

Die naam Jesaja beteken “God red.” Die boek Jesaja beklemtoon dat verlossing kom van God en nie van die mens nie. Gelowiges moet daarna streef om ‘n voorbeeld te wees vir diegene wat van God geskei is. Ons is ambassadeurs van God se liefde. Die beste manier om God se liefde te wys, is deur ons behandeling van die armes en die uitgeworpenes. Die Gees van die Here my God het oor my gekom; die Here het my gesalf om ‘n blye boodskap te bring aan die mense in nood. Hy het my gestuur om dié wat moedeloos is, op te beur, om vir gevangenes vrylating aan te kondig, vryheid vir dié wat opgesluit is (Jesaja 61:1).

As elke gemeente ‘n aantal haweloses versorg, sal haweloosheid verdwyn. Verlossing is die einddoel, maar min mense oorweeg geestelike verlossing as hulle fisies besig is om van honger dood te gaan. God is die enigste weg na verlossing. As mense eers die krag van God se liefde ondervind het, verander hulle. Hulle ontdek hoop. Hulle ondervind vrede en vreugde as hulle soggens opstaan.

Maar ons as gelowiges moet ‘n bron van hulp in ons gemeenskappe wees. Ons moet nooit tou opgooi nie – nie oor een enkele persoon nie. Die gemeente moet elke dag iemand bemoedig. Tommy Barnett se filosofie was:   “Find a need and fill it, find a hurt and heal it.” Christene moet die lig vir die wêreld wees. Ons moet ons lewens met ‘n boodskap van hoop en verlossing lewe – dan sal ons lig helderder wees. As verteenwoordigers van God moet ons bemoedig waar niemand anders dit wil doen nie; om liefde aan iemand te bewys, maak nie saak hoe diep hy geval het nie; om kos vir die armes te gee. Deur ons liefde aan mense te bewys, lei ons hulle tot verlossing in Christus.

How diligently the cavalry officer keeps his saber clean and sharp; every stain he rubs off with the greatest care. Remember you are God’s sword, His instrument – Robert Murray M’Cheyne

Fasiliteer transformasie van die kerk

Om verandering te lei, is ‘n geleentheid, maar daar is altyd teenstand en hindernisse. Dit kan ‘n oop deur na ‘n nuwe begin wees, maar dit kan ook beteken dat ons daardie dinge waarvoor ons lief is, verloor. Jesaja en Israel bevind hulle in so ‘n tyd van verandering. Ussia, wat 52 jaar geregeer het, is dood. Jesaja word met ‘n nuwe openbaring van God gekonfronteer. Hy word skielik van God se grootheid bewus en dit maak hom nederig. Verandering gaan kom en Jesja weet nie wat dit gaan behels nie – hy voel kwesbaar. Ten spyte van sy tekortkominge nooi God hom om te help met die transformasie van die volk wat in ‘n krisis is (Jesaja 6). Hy hoor dat dit eers slegter sal gaan voor dit beter sal word.

As ons na hierdie gedeelte kyk, is daar ‘n paar betekenisvolle lesse vir ons:

1. Leiers moet ‘n realistiese siening van huidige werklikhede hê. Sonder akkurate inligting sal ons toekomsplanne misluk. Jesaja het die hele landskap, insluitend sy eie tekortkominge, realisties beoordeel.
2. Die leier het ook die vermoë om ‘n toekoms vol moontlikhede raak te sien in sy verbeelding. Hy fokus nie op al die moontlike beperkings nie.
3. Die leier erken gereeld sy totale afhanklikheid van die Here. Doen hy dit nie, sal sy sukses beperk word tot dit wat hy self kan doen. Dit wat hy so bereik, sal nie volhoubaar wees nie.

Om doeltreffende transformasie van die kerk te fasiliteer vereis ‘n duidelike visie, hoop en ‘n opregte nederigheid.

We must be global Christians, with a global mission, because our God is a global God. —John Stott

Ek glo in jou

Hierdie is seker van die kragtigste woorde wat jy vir iemand kan sê. Dit lei tot vertroue en afwagting in wat ‘n mens kan word deur God se genade en mag. Dit moedig jou aan om te word wat God graag wil hê dat jy moet word. Dit is wat Elia met Elisa gedoen het.

Toe Elia by hom (Elisa) verbyloop, gooi Elia sy mantel op hom (1 Konings 19:19). Hierdie mantel was destyds een van die kosbaarste besittings wat iemand gehad het. Dit was ‘n kledingstuk, maar dien ook as kombers en kussing. Toe Elia dus sy mantel op Elisa gooi , sê hy in werklikheid vir hom: “Ek glo in jou. God se Gees is op jou.” Dit moes vir Elisa baie beteken het – ‘n persoon vir wie hy baie respek gehad het, het na hom gekom en met ‘n eenvoudige gebaar sy hele lewe verander.

Leiers besef dat vir God se werk om gedoen te word, moet potensiële leiers voortdurend geïdentifiseer, ontwikkel en uitgestuur word. Daarom bid hulle gedurig vir onderskeidingsvermoë, want alle gelowiges het ongelooflike potensiaal om in God se koninkryk te werk. Dikwels is mense nog nooit uitgedaag om vir God te werk nie. Niemand het hulle ooit uitgedaag om te glo dat hulle God-gegewe talente en sterkpunte het nie.

Wat op daardie dag tussen Elia en Elisa gebeur het, is die begin van ‘n proses van mentor wees wat uiteindelik sou beteken dat Elisa by Elia sou oorneem. Elia is die een wat die verhouding begin het Hy het nie gewag vir Elisa om na hom te kom nie.

Ons moet in Elia se spore volg en uitkyk vir die Elisa’s in ons lewens en dan as mentor vir hulle optree.

“Hy wat geen vyande het nie, word deur sy vriende verraai.” – Takitus

Die bediening van konfrontasie

As die kerk suiwer in sy geloof wil wees, moet hy dwaalleer en dwaalleraars konfronteer. Die Bybel waarsku gereeld teen vals lering en die gevaar daarvan vir God se mense.

• Jesus: Pas op vir die vals profete. Hulle kom na julle toe in skaapsklere, maar in werklikheid is hulle verskeurende wolwe (Matteus 7:15).
• Paulus: Ek weet dat daar na my vertek wrede wolwe onder julle sal indring, en hulle sal die kudde nie ontsien nie. Ja, uit julle eie geledere sal daar mense na vore kom wat met leuens die gelowiges agter hulle aan sal probeer verlei (Handelinge 20:29 – 30).
• Petrus: Maar daar was ook vals profete onder die volk, en so sal daar onder julle ook vals leraars kom. Hulle sal verderflike dwaalleer insmokkel en die Here wat hulle vrygekoop het, verloën … Baie mense sal hulle losbandigheid navolg, en deur hulle toedoen sal mense kwaad praat van die Weg van die waarheid. In hulle hebsug sal hulle julle met allerhande stories uitbuit (2 Petrus 2:1 – 3).
• Johannes: Daar het baie misleiers te voorskyn gekom in die wêreld. Hulle erken nie dat Jesus die Christus is wat mens geword het nie. Dit is wat ek met “die misleier”,”die antichris” bedoel (2 Johannes 7).
• Judas: Maar julle, geliefdes, moet die dinge onthou wat die apostels van ons Here Jesus Christus voorheen reeds vir julle geleer het. Hulle het vir julle gesê: “Daar sal in die laaste dae mense wees wie se lewe deur hulle eie goddelose begeertes beheers word, en hulle sal met julle die spot dryf.” Hierdie mense bring verdeeldheid (Judas 17 – 19)

God roep sy kinders vir ‘n bediening van versoening, maar ook vir ‘n bediening van teregwysing. Hy het ons ook geroep vir ‘n bediening van konfrontasie. So kry ons ‘n voorbeeld van konfrontasie in Titus 1:10 – 16. Paulus verwys na dwaalleraars wat in hulle spore gestuit moet word en wie se monde gesnoer moet word. Hulle is verfoeilik en koppig en deug vir geen goeie werk nie.

Die bediening van konfrontasie is nie maklik nie, maar dit is noodsaaklik. As die integriteit van die evangelie ter sprake is, kan ons nie weghardloop en wegkruip nie – ons moet staan en veg. Gewapen met die waarheid, gemotiveer deur liefde en geklee met ‘n rein lewe, kan ons ander konfronteer. Die waarheid is belangrik. Jesus sê: En julle sal die waarheid ken, en die waarheid sal julle vry maak (Johannes 8:32).