We are not primarily called to do something or go somewhere; we are called to Someone. —Os Guinness

Gesonde gemeentes

Ons doel is ‘n gesonde gemeente. Daar is baie beskrywings van hoe ‘n gesonde gemeente lyk. ‘n Vraag wat ons moet vra, is: Is ons ‘n vrygewige gemeente? Die vraag is wat doen ‘n gemeente met wat aan hom gegee is. Sommige gemeentes fokus op dit wat hulle kan spaar en bymekaarmaak; ander kyk weer watter verskil hulle aan die koninkryk van God kan maak met die hulpbronne wat God voorsien het. Ons moet bly wees as ons in staat is om ons hulpbronne op iets anders as onsself te spandeer.

Wat gee ‘n vrygewige gemeente?

1. Liefde

So ‘n gemeente vertolk Matteus 5:43 – 45 letterlik: Maar Ek sê vir julle: Julle moet julle vyande liefhê, en julle moet bid vir dié wat julle vervolg, sodat julle kinders kan wees van julle Vader in die hemel. ‘n Vrygewige gemeente soek diegene wat God se liefde op praktiese maniere moet sien en ontvang. Hulle vra voortdurend: Wie kan ons help? Aan wie kan ons kos gee? ‘n Vrygewige gemeente het almal lief al weet hulle dat sekere mense, selfs gemeentelede, nie daarvan sal hou nie.

2. Vriendskap

‘n Vrygewige gemeente ryk uit na diegene wat ‘n vriend nodig het. Hulle wil graag soos Jesus wees wat openlik daarvan aangekla is dat Hy ‘n vriend van sondaars was. ‘n Vrygewige gemeente vra: Wie het ‘n vriend nodig? Hoe kan ek ‘n vriend word vir diegene wat ander ignoreer?

3. Vergifnis

‘n Vrygewige gemeente is vergewe en daarom beoefen hulle vergifnis teenoor ander. Hulle wil hê dat almal God se vergifnis sal ondervind. Hulle wil die boodskap van die evangelie van Jesus Christus verkondig. Hierdie boodskap is ‘n boodskap van vergifnis en herstelde verhoudings.

‘n Gesonde gemeente is ‘n vrygewige gemeente. Maar as ons dink aan vrygewigheid dink ons aan geld. Daar is meer om te gee as net geld.

You don’t need permission to make a difference – Martin Luther King, Jr

Mag ek in die sekulêre wêreld werk?

Werk wat God tevrede stel, moet eerlik en wettig wees. Gelowiges kan nie werk doen wat vereis dat ons sonde doen nie, maar ons kan tog nie elke Christelike invloed uit die sekulêre wêreld verwyder nie. Dissipels moet weet hoe om met integriteit op te tree – ook in die sekulêre wêreld.

Die farao’s van Egipte was outokrate; hulle is beskou as gode en die mense het hulle aanbid. Toe een farao droom van sewe maer koeie wat sewe vet koeie opeet, interpreteer Josef die droom. Hy werk vir die farao ‘n plan uit oor hoe om die sewe jare van hongersnood te oorleef. Die farao was so beïndruk dat hy vir Josef oor sy paleis aangestel het. Josef dien ‘n goddelose heerser en God wys hom nie tereg nie.

Ongeveer 400 jaar later weier Moses om ‘n ander farao te dien. Moses was ‘n Jood, maar farao se dogter het hom aangeneem. Omdat Moses geglo het, het hy toe hy groot geword het, geweier om die seun genoem te word van die farao se dogter. Hy het verkies om liewer sleg behandel te word, saam met die volk van God as om die kortstondige genieting van die sonde te hê. Die smaad ter wille  wille van die Christus het hy ‘n groter rykdom geag as die skatte van Egipte (Hebreërs 11:24 – 27). Moses weier om vir die farao te werk, want hy het ‘n ander roeping gehad – hy moes Israel uit Egipte lei.

Beteken hierdie verhale van Josef en Moses dat gelowiges, afhangende van omstandighede, kan besluit of hulle vir ‘n sekulêre baas wil werk of nie? in 2 Konings 18 sien ons selfs dat twee van God se dienaars aan teenoorgestelde kante staan. Agab was ‘n bose koning Elia dien God deur teen Agab te staan. Obadja, daarenteen, dien God deur binne in Agab se huishouding te bly Obadja steek die profete weg en gee vir hulle kos en water.

Die twee profete het verskillende roepings gehad: Elia skreeu oordeel van buite; Obadja werk stilweg binne die koning se hof. Beide  respekteer die ander een se roeping; hulle bevraagteken nie mekaar nie; elkeen ken sy rol. Die les is duidelik: as Obadja vir Agab kon werk, kan gelowiges vir enigeen werk as hulle die verkeerde kan beperk en geregtigheid bevorder.

As gelowiges alle kontak met onsedelike mense wil vermy, moet hulle hulle uit die wêreld onttrek – iets wat beide Jesus en Paulus verbied. Ek moet egter gereeld vra: dien ek my Koning? As konflik tussen die wêreld en God ontstaan, staan ek by my beginsels al mag dit beteken dat ek my werk mag verloor? Wat motiveer my – vrees vir die menings van mense of liefde vir God en my naaste? Jesus het in God se wêreld met al sy gebrokenheid en sonde gekom om dit te verlos.

“Better to be in trouble with Christ, than in peace without him.” Richard Sibbes

Merkers vir dissipelskap

Daar is ‘n tekort aan dissipels in alle gemeentes. Tog het Jesus aan ons die opdrag gegee om dissipels te maak. Daar is baie suksesvolle modelle, maar die basiese vraag is: Hoe kan ons dissipels maak net hier waar ons is?

As ons saamstem dat geestelike volwassenheid die doel vir dissipels is, hoe kan ons dit bereik? ‘n Begeerte vir geestelike groei is noodsaaklik vir die gelowige, maar dit is nie genoeg nie. Hulle moet ‘n pad loop. As ons net hoop dat dissipels hulle pad deur die geestelike oerwoud sal kry, bluf ons onsself. Daar is baie afleidings en strikke. Leiers moet soms inspring en ‘n pad oopkap; ander, soos Paulus, het reeds ‘n pad oopgekap. Ons moet net bereid wees om by sy proses te leer.

Daarom, van die dag af dat ons dit van julle gehoor het, hou ons ook nie op om vir julle te bid nie. Ons vra God dat Hy deur al die wysheid en insig wat die Gees gee, julle sy wil duidelik sal laat ken, sodat julle tot eer van die Here sal lewe deur net te doen wat Hy verlang. Mag julle vrugte dra deur goeie werke en toeneem in die kennis van God (Kolossense 1:9 – 10). In hierdie pad noem Paulus drie betekenisvolle dinge.

1. Ken

Ons vra God dat Hy deur al die wysheid en insig wat die Gees gee, julle sy wil duidelik sal laat ken. Ons kan mense die hele dag lank vertel dat hulle meer soos Jesus moet wees, maar as hulle Hom nie ken nie, kan hulle nie soos Hy wees nie. Ons moet die Bybel gereeld lees: U woord is die lamp wat my die weg wys, die lig op my pad (Psalm 119:105). Gemeenteleiers moet die woord dra – onderrig en mentors wees. Om feite in die Bybel te leer, sal nie van jou ‘n Christen maak nie, maar as ons die lig van die Skrif ignoreer sal ons nie op die pad van geestelike ontwikkeling kan bly nie.

2. Wees

Ons leer sodat ons kan wees – ons moet toenemend wees wie ons in Christus is. As ons saam met Hom loop, word ons gevorm om meer soos Hy te wees. Julle moenie aan hierdie sondige wêreld gelyk word nie, maar laat God julle verander deur julle denke te vernuwe (Romeine 12:2). Ons kan nie vir God tevrede stel deur ons eie pad te loop nie. Ons moet die geestelike pad loop.

3. Doen

As ek weet wie ek in Christus is en as ek dan sy pad loop, lei dit tot die doen van die werk van God. Ons moet geestelik produseer. Mag julle vrugte dra deur goeie werke is ‘n aanduiding van ontwikkeling. Ons word nie verlos deur goeie werke te doen nie, maar as ons dissipels is, sal ons onvermydelik die werk van dissipels doen – ons sal vrugte dra. As ek vrugte dra, stal ek Christus se teenwoordigheid uit – Hy is die wingerstok en ons is die lote. Vrugte is ‘n teken dat ‘n boom volwasse word; vrugte in die lewe van ‘n gelowige dui op groei.

Ons word nie “per ongeluk” dissipels nie. God gee nuwe lewe in Christus. Dissipels leer dan om te weet, te wees en te doen wat die Christelike lewe is.

“The purpose of life is not to be happy, nor to achieve pleasure nor avoid pain, but to do the will of God, come what may.” Martin Luther King, Jr

Laat u Naam geheilig word

Ons Vader wat in die hemel is, laat u Naam geheilig word (Matteus 6:9).

Baie bekende woorde. Word baie algemeen gebid. Tog word dit dikwels nie waardeer nie en nie reg verstaan nie. Waarvoor bid ons hier? Hoekom het Jesus dit so belangrik geag dat dit die eerste sin van die gebed is?

Hoe kan ons dit duideliker verstaan? Deur drie stappe/vrae:

• Vra die vraag: Is dit ‘n stelling of is dit ‘n versoek? Meeste van ons glo dit is ‘n stelling van aanbidding en lof – iets soos U is heilig en waardig. Maar hierdie vers sê nie dat God se Naam heilig is nie. Nee, laat u Naam geheilig word. Dit is ‘n versoek; ons vra God om iets te doen.
• Wat beteken geheilig word? Is dit om iets as heilig te eer? Is dit om iets af te sonder en die uniekheid daarvan te erken? As ons iets heilig, eer ons dit as iets ongewoon en spesiaal.
• Wat vra ons moet geheilig word? God se Naam. God se Naam is net ‘n ander manier in die Skrif om na Homself te verwys. God se Naam verteenwoordig wie Hy is.

Die ontheiliging van Godse Naam was ‘n groot probleem in die Ou Testament. In reaksie op hulle voortdurende opstandigheid stuur God hulle in ballingskap. En toe hulle daar by die ander nasies kom, het hulle my heilige Naam oneer aangedoen (Esegiël 36:20). En: Ek is begaan oor my heilige Naam wat oneer aangedoen word deur Israel … Dit is nie ter wille van julle dat Ek optree nie, Israel, maar ter wille van my heilige Naam (vers 21, 22). Hoe gaan hy dit doen? Deur ‘n nuwe verbond; deur sy mense. Dit sal Hy doen deur sondes te vergewe, hulle klipharte met ‘n hart van vleis te vervang, en sy Gees aan hulle te gee (vers 25 – 28). Jesus het gekom om hierdie seëninge te bring. As gevolg van sy lewe, dood en opstanding is Jesus besig om nuwe mense te maak – mense wat God se Naam sal heilig.

Hoe moet ons hierdie gebed dan in ons lewens integreer?

1. Ons moet bewus wees dat God se Naam te min geheilig word

As ek bid dat God se Naam geheilig moet word, erken ek dat dit nie genoeg gedoen word nie. As ons om ons kyk, sal ons besef hoe min waarde aan God geheg word. As ons die Ons Vader-gebed bid, beteken dit dat hierdie ons eerste prioriteit is Dit is ons grootste bekommernis en daarom ons grootste prioriteit.

2. Ons moet bid dat God se heiligheid ons grootste doelwit is

Dit moet dié doelwit van ons gebed wees. Paulus het dit gereeld gedoen: Daarom bid ons altyd vir julle: Mag ons God julle waardig maak vir die lewe waartoe hy julle geroep het, en mag Hy deur sy krag julle liefde vir die goeie en die werk van die geloof volkome maak. So sal die Naam van ons Here Jesus deur julle verheerlik word, en julle deur Hom, in ooreenstemming met die genade van ons God en van die Here Jesus Christus (2 Tessalonisense 1:11 – 12).

3. Ons versoeke moet deur hierdie doelwit bepaal word

As die heiliging van God se Naam ons grootste begeerte is, moet ons versoeke gerig wees op die verwesentliking van hierdie doelwit. God se beloftes in Esegiël (beloftes van sondevergifnis, veranderde harte en gehoorsaamheid) help ons hiermee. Soos meer en meer mense hierdie beloftes ondervind, sal hulle God toenemend met hulle hart en optrede eer.

Die eerste versoek in die Ons Vader-gebed rig ons begeertes en bring ons versoeke in lyn met God se wil.