And though this world with devils fill’d
Should threaten to undo us,
We will not fear, for God hath will’d
His truth to triumph through us.

Martin Luther.

Die kerk vandag

Die kerk word vandag deur verskeie interne en eksterne bedreigings gekonfronteer. Ons moet bid dat ons plaaslike gemeentes versterk sal word sodat hulle steeds bakens van lig in ‘n donker wêreld kan wees. Maar wat maak ‘n gemeente sterk? Jy kan dit nie sê deur na die gebou of die aantal mense wat eredienste bywoon, te kyk nie.

Hoe kan ons ons plaaslike gemeentes die plekke maak waardeur Christus sy werk kan doen?

1. Gesonde leer.

Verkondig die woord; hou daarmee vol, tydig en ontydig; weerlê, bestraf, bemoedig deur met alle geduld onderrig te gee, want daar sal ‘n tyd kom wanneer die mense die gesonde leer nie meer sal verdra nie (2 Timoteus 4:1 – 3). Daar is genoeg waarhede in die Bybel wat duidelik is. Stem dit wat ons leer ooreen met God se woord? Oppas vir gevoelens, persepsies, voorkeure en menings.

2. ‘n Sterk gemeente beklemtoon geloof en gebed

Doen dit alles biddend en smeek God by elke geleentheid deur die Gees. Wees waaksaam en bid gedurig vir al die gelowiges (Efesiërs 6:18). As daar lidmate is wat God se woord ken en glo dat Hy sal doen wat Hy belowe het, word hulle gebede doeltreffend en kragtig.

3. In ‘n sterk gemeente kry ons aanbidding wat God verheerlik

Ons kan privaat aanbid, maar dit is iets spesiaal as gelowiges bymekaar kom en saam aanbid. Met dankbaarheid in julle harte moet julle psalms, lofgesange en ander geestelike liedere tot eer van God sing (Kolossense 3:16). Ons moet vooraf ons harte voorberei en die erediens met ‘n gesindheid wat bereid is om te leer, bywoon – gereed om te hoor wat die Here vir ons wil sê.

4. In ‘n sterk gemeente dien mense volgens hulle gawes

Die Heilige Gees gee spesiale gawes aan gelowiges om hulle in staat te stel om in die liggaam van Christus te dien. Ons het mekaar nodig as ons werklik wil dien. As ons ons geestelike gawes ontdek en daarvolgens dien, sal ons doeltreffender wees – en meer vreugde ondervind.

5. ‘n Sterk gemeente is verenig

Die liggaam van Christus bestaan uit mense met verskillende voorkeure en oortuigings. So sal ons uiteindelik almal kom tot die werklike eenheid in ons geloof en in ons kennis van die Seun van God (Efesiërs 4:13). Ons mag nooit toelaat dat individuele verskille ons verdeel nie.

6. ‘n Sterk gemeente het ‘n visie vir ‘n verlore wêreld

God gee aan sy kinders geleenthede om die boodskap van verlossing met ander te deel en hulle dissipels van Hom te maak.

Soos ons nadink oor ons doelwitte vir 2015 moet ons ons gemeentes versterk deur hierdie beginsels na te volg. ‘n Sterk gemeente gebeur nie sommer vanself nie – dit begin by individue soos ek en jy.

The proud look down on the others because they do not look up to God (Raymond E.  Brown)

Probleemoplossing

Een manier waarop mense hulle vaardighede as leiers bewys, is deur hulle vaardighede om probleme op te los. Nehemia het dit gedoen. Nehemia was besig om die mure van Jerusalem te herbou. Sy vyande probeer hom met ‘n aantal verskillende tegnieke op ‘n syspoor te dwing.

• Hulle probeer hom uit Jerusalem lok deur hom uit te nooi vir samesprekings met hulle (Nehemia 6:1 – 4). Nehemia weier, want hy wil op die herbou van die mure fokus.
• Hulle beskuldig Nehemia daarvan dat hy ‘n opstand teen die koning beplan – ‘n leuen. Nehemia laat weet dat niks wat hulle sê waar is nie. Hy bid dat God sy hande moet sterk (6:5 – 9).
• Hulle probeer hom intimideer deur hom te oorreed om in die tempel skuiling te soek (6:10 – 14). Hy besef sy vyande probeer hom bang maak sodat hy ‘n misstap sou begaan. Hy gehoorsaam egter vir God en soek sterkte by Hom.

Alle leiers sal voor probleme te staan kom. Maar ons kan ons probleme oorkom deur Nehemia se model te volg:

• Behou jou fokus;
• Konfronteer enige vals aantygings teen jou onmiddellik en met integriteit; en
• Bid tot God vir sterkte en wysheid – jy sal vind dat God maar te gretig is om te help.

Maak nie saak hoe sterk die teenstanders skynbaar is nie, God is ‘n bondgenoot wat nie oorwin kan word nie. Dit is baie meer doeltreffend om God om hulp te vra as om self ‘n oplossing te probeer formuleer.

An unforgiving heart is an unforgiven heart. —Tim Keller

Ek verwerp God se plan

Die ware profeet is nie ‘n spreekbuis vir die openbare mening nie. Hy is ook nie ’n spreekbuis vir die rykes en diegene met gesag nie. Daarom word nog Johannes nog Jesus deur almal in Israel verwelkom. Toe Simeon die kindjie Jesus in sy arms hou en vir Hom en sy ouers geseën het, sê hy: Kyk, hierdie Kindjie is bestem tot ’n val en opstanding van baie in Israel en tot ’n teken wat weerspreek sal word (Lukas 2:34).

Diegene wat Johannes die Doper se oproep tot bekering en Jesus se aankondiging dat die koninkryk van God naby is, verwerp, sal fout vind met God se boodskappers. Wat hulle eintlik probeer doen, is om God se wil te laat ooreenstem met hulle eie wil. Hulle erken nie die soewereine wil van God nie; hulle wil vir God voorskryf. Hulle mag God se plan verwerp, maar hulle vernietig dit nie.

Hierdie opstandige mense was nie buite die kerk nie. Ons kry steeds dieselfde foutvindery en voetslepery in die kerk. Daar is steeds mense wat altyd wil hê dat hulle wil in die gemeente moet geld. Hierdie kleinlike stryery in gemeentes dwing ongelowiges om hulle rug op die kerk te keer. Daar is steeds mense in ons gemeentes wat God se plan vir die wêreld probeer dwarsboom deur  hulle magstryde en rugstekery.

The preacher can only bring the Word to the ear; the Spirit must bring it from the ear to the heart. —Steven Lawson

Aanvaar wyse raad

Daar is honderde “hoe om te …” boeke beskikbaar oor feitlik elke moontlike onderwerp. Dink maar net aan The 7 Habits of Highly Effective People waarvan 12 miljoen kopieë verkoop is. Een van die gewoontes wat baie belangrik is, is wat Covey “empatiese luister” noem. Hierdie benadering beteken dat ons eers ander moet verstaan voordat hulle ons verstaan kan word. Die meeste mense luister nie om te verstaan nie – hulle luister om te antwoord; hulle praat of hulle is besig om hulle voor te berei om te praat.

“Empatiese luister” beteken nie noodwendig dat ek met die ander persoon saamstem nie. Dit beteken wel dat ek die ander persoon probeer verstaan deur in sy verwysingsraamwerk te kom. Maar is dit nou nuut? Kyk na die boek Jakobus. Elke mens moet maar te gewillig wees om te luister, nie te gou praat nie en nie te gou kwaad word nie (1:19). Die luister hier beteken luister om te verstaan. Presies wat ons in The 7 Habits kry. Maar die gevolg van hierdie luister verskil. In die geval van die Bybel beteken dit om reg te doen voor God (1:20). Dit gaan nie oor doeltreffende bestuur van jou eie persoonlike lewe of van jou besigheid nie.

Om onderrig te ontvang en wyse raad te aanvaar, vereis luistervaardighede. Dit beteken dat ons op God moet vertrou en ontvanklik vir sy wysheid moet wees. Dit staan in teenstelling met op jouself vertrou. Hoe kan ons leer om aandagtig te luister na God en met deernis te luister na ander mense? Deur die dissipline van afsondering Stilte beteken dat ons nie praat nie, maar dit beteken nie dat ek nie moet luister nie. In stilte en afsondering kan ek God, en ander, duidelik hoor. Jesus het Hom dikwels afgesonder om met God te praat. Daarom het Hy gedoen wat die Vader van Hom verwag het.

So het die Here my God, die Heilige van Israel, gesê: As julle julle bekeer en tot rus kom, sal julle gered word. Julle krag lê in stil wees en vertroue hê (Jesaja 30:15).