“Whenever a man allows himself to have anxieties, fears, or complaints, he must consider his behaviour as either a denial of the wisdom of God or as a confession that he is out of his will.” ~ Williams Law

Wat vier ons Kersfees?

Die geboorte van ‘n baba? Beslis, maar veral die menswording van God. In die begin was die Woord daar, en die Woord was by God, en die Woord was self God (Johannes 1:1). Later  skryf hy: Die Woord het mens geword en onder ons kom woon (1:14). Wat beteken dit? Jesus het na die aarde gekom, Homself verneder deur die gestalte van ‘n slaaf aan te neem en aan mense gelyk geword (Filippense 2:7).

Jesus laat toe dat Hy aan menslike kritiek, vyandigheid en ontkenning blootgestel word.  Hy kom as dienaar – ‘n slaaf. ‘n Slaaf het geen waardigheid nie. En toe Hy as mens verskyn het, het Hy Homself verder verneder. Hy was gehoorsaam tot in die dood, ja, die dood aan die kruis (Filippense 2:7 – 8).

Kersfees. ‘n Baba is gebore; God word mens.

As we face the cross, we can say to ourselves both ‘I did it, my sins sent him there’ and ‘he did it, his love took him there.’” –John Stott

Hoekom is Kersfees spesiaal?

Toe Neil Armstrong op die maan geland het, was dit groot nuus – almal het gekyk. En sy woorde: “One small step for man, ons giant leap for mankind.” Dit is niks in vergelyking met die nuus dat Jesus Christus op die aarde geland het nie.

Die belang van Kersfees: God kom na die aarde

Hy wat in die gestalte van God was … (Filippense 2:6). Jesus was God en Hy het onder ons kom woon (Johannes 1). Dit is die belang van Kersfees. Jesus het nie in die krip begin nie – Hy was hier selfs voor die skepping. Die Seun is die beeld van God, van God wat self nie gesien kan word nie. Die Seun is die Eerste, verhewe bo die hele skepping. God het deur Hom alles geskep, wat in die hemel en op die aarde is (Kolossense 1:15 – 16). Jesus is nie ‘n vae wese in die lug nie, maar Hy is God as mens. Jesus is God wat na die aarde gekom het – die belangrikste gebeurtenis in die geskiedenis.

Die werklikheid van Kersfees: God word mens

Jesus was volledig mens – vleis en bloed. Hy was nie ‘n mite nie. Maar Hy het Homself verneder deur die gestalte van ‘n slaaf aan te neem en aan mense gelyk te word (Filippense 2:7). Hoekom sou Jesus nou ‘n mens geword het? Hy wou met ons mense kommunikeer. Maar hoe is Jesus soos ons?

• Hy is soos ons gebore. Hy het alles opgegee en na die wêreld as ‘n gewone baba gekom. Hy kom in die nag in ‘n stal – gebore soos ons.
• Hy groei soos ons. En Jesus het verstandelik en liggaamlik gegroei (Lukas 2:52). Hy lyk soos ‘n Jood in Palestina. Hy was ‘n man wat as timmerman gewerk het.
• Hy is net soos ons versoek. Hy is versoek, maar Hy was sonder sonde (Hebreërs 4:14 – 16). Hy het dieselfde druk as ons ondervind – dieselfde versoekings, maar Hy het nooit toegegee nie. Daarom weet Jesus wat dit beteken as ons voor versoekings te staan kom.
• Hy het net soos ons gely. Hy het pyn en teleurstelling gevoel; Hy het moeg geword; Hy het soms eensaam gevoel. Jesus word wat ons is, sodat ons kan word wat Hy is.

Die rede vir Kersfees: Jesus kom om te sterf

Jesus gaan vrywillig na die kruis en lê daar sy lewe vir ons af. Hy was gehoorsaam tot in die dood, ja, die dood aan die kruis (Filippense 2:8). Hoekom het Hy dit gedoen?

• Om God se liefde vir ons te wys. Maar God bewys sy liefde vir ons juis hierin dat Christus vir ons gesterf het toe ons nog sondaars was (Romeine 5:8). Sy motivering was liefde. Hy gee sy lewe vir ons toe ons Hom verwerp het – voor ons nog gebore was.
• Om vir ons sondes te betaal. As jy ‘n wet verbreek, moet jy betaal. Die betaling vir sonde is die dood. Hy het ons sondes in sy liggaam aan die kruis gedra. Daardeur is ons vir die sondes dood en kan ons lewe in gehoorsaamheid aan die wil van God. Deur sy wonde is julle genees (1 Petrus 2:24). Ons is volkome vergewe vir alles wat ons verkeerd gedoen het.

As ons nie ‘n Verlosser nodig gehad het nie, sou God nie al die moeite gedoen het om een te stuur nie. Die feit dat Jesus Christus wel mens geword het, is ‘n bewys dat ons wel ‘n Verlosser nodig het. Nou is ons vry van skuldgevoelens, vrees, bekommernisse en ‘n doellose lewe. Ons weet dat God aan ons die ewige lewe gegee het. Die kruis is nie die einde van Jesus Christus nie. Hy het opgestaan en sit aan die regterhand van God. Hy wil ons huis toe bring – na sy Vader toe.

Die gevolg van Kersfees: Jesus is die Here

Ons lees in Filippense 2:9 – 11: Daarom het God Hom ook tot die hoogste eer verhef en Hom ‘n Naam gegee wat bo elke naam is, sodat in die Naam van Jesus elkeen wat in die hemel en op die aarde en onder die aarde is, die knie sou buig, en elke tong sou erken: “Jesus Christus is Here!” tot eer van God die Vader. Wat beteken dit as ek sê dat ek gelowige is, dat ek verlos is? Dit beteken ek sê: “Jesus in my Here.”

• Ek erken dat Hy God is. Hy is meer as ‘n mens of ‘n profeet – Hy is die Here van my lewe. Dit beteken dat ek sal doen wat Hy sê. Ek is aan Hom toegewy.
• Ek glo dat Hy alles onder beheer het. Al lyk alles maar donker weet ons dat Hy alles onder beheer het. Ek mag dalk nie sien presies wat gebeur nie, maar ek weet dat Hy die Here is en alles onder beheer het. As ek sê dat Jesus die Here is, weet ek nie wat die nuwe jaar vir my inhou nie, maar ek weet wel Wie die toekoms in sy hande hou.
• Ek gee myself volkome aan Hom oor. Hy het die reg om te bepaal wat reg of verkeerd in my lewe is; ek moet leef volgens sy roeping vir my. Eendag sal elke knie voor Hom buig en elke tong sal bely dat Jesus die Here is. Vir eeue is dit gebruik as die toets vir gelowiges. Ons moet dit weer ontdek: Jesus is die Here. As jy met jou mond bely dat Jesus die Here is, en met jou hart glo dat God Hom uit die dood opgewek het, sal jy gered word (Romeine 10:9).

As ons mismoedig of bekommerd of bang of eensaam is, sê “Jesus is die Here.” Sê dit hierdie Kersfees, maak dit die tema van jou lewe in 2015: Jesus is die Here.

There may be times when we are powerless to prevent injustice, but there must never be a time when we fail to protest. -Elie Wiesel, skrywer, Nobel pryswenner

Kersfees

Kersfees is nie meer ‘n dag nie, maar ‘n seisoen. Hierdie seisoen begin elke jaar so ‘n bietjie vroeër. Sommige geniet al die aktiwiteite; ander vind dit net te veel en uitputtend. Daar is egter sekere geestelike insigte wat ons kan leer as ons na die eerste Kersfees terugkyk.

• Die eerste Kersfees is ook deur heelwat voorbereiding vooraf gegaan. Reeds voor die skepping van die wêreld is Hy hiervoor bestem, maar ter wille van julle het Hy eers in hierdie eindtyd gekom (1 Petrus 1:20). Christus se geboorte is reeds voor die skepping beplan en vind plaas op die presiese tyd wat God gekies het. Maar toe die tyd wat God daarvoor bepaal het, aangebreek het, het Hy sy Seun gestuur. Hy is uit ‘n vrou gebore en van sy geboorte af was Hy aan die wet onderworpe om ons, wat aan die wet onderworpe was, los te koop sodat ons as kinders van God aangeneem kon word (Galasiërs 4:4 – 5). Kersfees is die oplossing van die mens se grootste probleem – sonde. Jesus was nie maar net nog ‘n baba nie. As Hy net nog ‘n baba was, was ons almal verlore. As die ewige Seun van God is Hy na die wêreld gestuur om hier as mens te leef en aan die kruis te sterf. Jesus sterf in ons plek, Hy staan uit die dood op en versoen ons met God.
• Nog ‘n ooreenkoms tussen die eerste Kersfees en ons huidige Kersfees is die misterie wat dit omring. Daardie klein baba toegedraai in doeke was ‘n misterie – net soos die toegedraaide geskenke vir die kinders ‘n misterie is. Selfs Maria het nie al die gebeure verstaan nie. Eeue lank het dit geheim gebly, maar nou is dit geopenbaar. Aan die hand van die geskrifte van die profete en in opdrag van die ewige God is dit aan alle nasies bekend gemaak sodat hulle in God kan glo en aan Hom gehoorsaam kan wees (Romeine 16:25 – 26).Vandag het ons die volledige Skrif wat beskryf waarom Jesus Christus moes kom en hoe ons met God versoen kan word deur in Hom te glo en deur sy offer vir ons te aanvaar.
• Nog ‘n ooreenkoms tussen Jesus se geboorte en ons Kersviering is vreugde. Die geskenke en liedere en familiebyeenkomste is maniere waarop ons ons vreugde op hierdie spesiale dag uitdrukking gee. Maar dink aan Maria se vreugde toe sy in die gesig van haar baba gekyk het.

Ons moenie toelaat dat al die aktiwiteite ons aandag aftrek nie; laat die voorbereidings en tradisies ons herinner dat Jesus se geboorte dié bewys van God se liefde vir ons is.

We cannot change things and we will not accomplish anything, no matter how much we may torture ourselves with worrying. — Martin Luther

God se onbreekbare liefde

Jesaja 40 en Psalm 23 is sekerlik die gedeeltes in die Ou Testament wat ons die meeste hoor. G. F. Handel het Jesaja 40 gebruik aan die begin van sy “Messias.” In Jesaja 1 – 39 veroordeel die profeet vir Israel vir ‘n aantal sondes – veral hulle weiering om die weduwees, die weeskinders en die vreemdelinge te versorg. Die volk het nie God se wil en weg gevolg nie.

Dan skielik kom Jesaja 40. Ons hoor ‘n ander skrywer. Luister net na sy openingswoorde: Die uitkoms is hier! Die uitkoms is hier! Dit, sê julle God, moet julle vir die volk sê. Ons as Christene glo dit kondig die koms van Jesus aan. Uiteindelik uitkoms – finaal en volledig.

Hierdie woorde van die profeet is gerig aan die ballinge wat uit Babilon terug gekeer het. Is ons nie ook ballinge nie? Ons huis is in God wat ons oproep om ons naaste lief te hê, die armes lief te hê, die geringes te dien. Ons hoop is die roeping en teenwoordigheid van God. Ons het uitkoms nodig – Iemand wat vir ons uitkoms kan gee. In Jesaja 40 hoor ons dat uitkoms hier is. Bring vir Jerusalem die goeie tyding, sê vir hom sy swaarkry is verby, hy het geboet vir sy sonde, hy het van die Here die volle straf ontvang vir al sy sondes (vers 2).

Hier is ‘n duidelike stelling van God se genade. Hier sien ons sy onbreekbare liefde. Dit is die boodskap wat ons oor en oor moet verkondig – veral in Kerstyd, maar dwarsdeur die jaar. Ons is in ballingskap, maar dit is ons eie skuld. Ons het nie ons naaste lief nie; ons hoor nie die uitroepe van die behoeftiges nie. Ons word egter nog steeds deur God vertroos … om hierdie dinge te doen.

Is dit nie die tema van die Kerstyd nie? God gee uitkoms sodat ons sy kinders kan wees – sy agente in die wêreld bemagtig deur sy liefde.