Till men have faith in Christ, their best services are but glorious sins. —Thomas Brooks

Hoekom ly gelowiges?

Niemand, ook nie gelowiges nie, is immuun teen krisisse in hulle lewens nie. Die boek Job help ons oor hoe om oor ons krisisse te dink. Job se lewe het ‘n tragiese wending geneem. Die boek gaan egter nie oor Job alleen nie, maar ook oor ons en veral oor God. Hoewel die boek ‘n uiterste krisis hanteer, wil dit nie ons lyding minimaliseer nie.

Ons kan nie lyding objektief meet nie. Dit maak nie saak hoe erg ons pyn en lyding is nie almal vra dieselfde vrae. Ongelukkig is daar baie vrae en min antwoorde. Dikwels sien ons nie antwoorde in Job nie, maar dit is omdat ons die verkeerde vrae vra. In Handelinge 3 lees ons van die verlamde bedelaar. Toe Petrus en Johannes daar verbykom, vra hy vir hulle geld. Petrus antwoord: Geld het ek nie, maar wat ek het, gee ek vir jou: in die Naam van Jesus Christus van Nasaret, staan op en loop. Die verlamde man het nooit eers daaraan gedink om vir genesing te vra nie. Wat ons vra, is dikwels te beperk om veel goed te doen.

Ons moet leer om beter vrae te vra, sodat ons meer betekenisvolle antwoorde kan kry. Die boek Job wys vir ons dat wat ons dink belangrike vrae is, nie betekenisvol genoeg is nie. Eers teen die einde van die boek leer ons wat werklik belangrike vrae is. Hoe leer ons dit? ‘n Hele reeks antwoorde. Die doel van al hierdie antwoorde is om ons te lei om die regte vrae te vra.

Hierdie boek gaan oor ons en God. Ons vrae oor lyding lei ons uiteindelik na God. As daardie moeilike tye in ons lewens kom, is daar niemand anders om te nader nie. As ek vra: “Waarom ek?” vra ek in werklikheid: “Hoe werk God?” Ek mag vra: “Hoekom verdien ek die lyding?” maar die ware vraag is: “Watter soort God is U?”

Anders as wat ons dink, is Job nie in die beskuldigdebank nie. Reg aan die begin verklaar alle partye dat hy onskuldig is. As Satan erken dat Job vroom en opreg is, bevraagteken hy egter Job se motiewe: “Job is vroom en regverdig, want God beskerm hom en sy huis en sy besittings – hy doen alles uit selfbelang.” Satan het geen bewyse vir hierdie stelling nie. Ook Job se vriende maak allerhande bewerings teen hom, maar hulle het geen bewyse daarvoor nie. Dit is nie Job wat teregstaan nie. Uit die proloog van die boek is dit baie duidelik dat dit God se beleid is wat bevraagteken word. Job is deel van die verhoor, maar hy staan nie in die beskuldigdebank nie.

Dit is nie sonder rede dat Job U dien nie (Job 1:9). Satan lê klem op Job se motivering om God te dien. Hy glo dat God se houding teenoor die regverdiges ‘n insentief is vir die gedrag van regverdiges: die regverdiges ondervind voorspoed en die goddeloses kry swaar. Daarom glo Satan dat God se beleid in werklikheid teenproduktief is. Ons vra: “Hoekom ly regverdige mense?”; Satan vra: “Hoekom moet regverdige mense voorspoedig wees.” God aanvaar Satan se voorstel dat Job moet swaarkry en so begin Job se lyding.

Hierdie boek sê nie vir ons hoekom Job of enigeen van ons swaarkry nie. Die boek sê wel vir my oor hoe ek oor God moet dink as ek swaarkry. Dit is in ieder geval die antwoord wat ons nodig het. Hierdie boek wil ons denke oor God en die manier waarop Hy oor die wêreld regeer, verander. Die boek gee nie redes vir ons lyding nie; die boek probeer nie God se geregtigheid regverdig nie; die boek antwoord nie die “hoekom-vraag” wat ons so graag vra nie. Nee, ons moet God se wysheid vertrou.

Ons sal nooit in staat wees om God se geregtigheid te beoordeel nie. Om dit te kan doen het ons al die feite nodig – en ons het nooit al die feite nie. Ons bevestig dat Hy regverdig is deur ons geloof in sy wysheid. God se uitsprake aan die einde van die boek is nie ‘n verdediging van sy oordeel nie – dit beklemtoon sy wysheid en mag.

“Where we cannot enjoy God’s company, we will not go. Our motto is, With God, anywhere. Without God, nowhere.” — C.H. Spurgeon

Affiliasie

Affiliasie is ’n persoonlike besluit om deel te word van ’n groep – lid te word van ’n groep of organisasie. Die evangelie van Jesus Christus roep mense tot affiliasie met Hom as die Seun van God en die kerk wat Hy dwarsdeur die wêreld wil bou. Hierdie affiliasie met die Christelike kerk word op verskillende wyses gedemonstreer:

• Dissipelskap – ’n volgeling van ’n leermeester wie se onderrig jy gehoorsaam. Soms beteken dit dat jy alles agterlaat en saam met die leermeester reis en sy weë beoefen.
• Openbare getuienis waarin jy jou verbondenheid aan Jesus Christus as dissipel bely.
• Die doop en ander optrede soos gebed en vas.
• Deelname aan die nagmaal.

Tydens tye van vervolging het die kerk sekere geheime simbole van identifisering en affiliasie gebruik – die vis vir identifikasie wat lidmaatskap van die kerk van Jesus Christus aandui. Hierdie visuele simbole van affiliasie versterk die gevoel van behoort aan wat insluit wedersydse versorging en ondersteuning, ’n nuwe identiteit  as ’n nuwe skepping van Christus, ‘n nuwe lojaliteit, inlywing by ‘n nuwe familie met verantwoordelikhede en verpligtings en ‘n nuwe rigting en doel in die lewe.

To love at all is to be vulnerable. If you don’t want to be hurt, give yourself to no one – C. S. Lewis

Die probleem van sonde

Die twee wondertekens in Lukas 5 (die genesing van ‘n melaatse en die genesing van ‘n verlamde man) wys vir ons dat God ons fisiese en geestelike heelheid verlang en dat God se mag wat deur Jesus Christus werk dit kan vermag. Dit wys ook vir ons dat al word die mens deur sekere fisiese siektes wat hulle kommer oorheers, geteister, is die belangrikste probleem wat die mens pla sonde. Ons is gedurig besig om geld in te samel vir sekere siektes, maar ons gee min aandag aan die sondige toestand van die mens. Die enigste oplossing vir sonde is vergifnis wat God in Jesus Christus aanbied. Geestelike gesondheid kan alle dinge, insluitend siekte, verdra.

Sonde is meer as een of ander sielkundige probleem. Sonde het objektiewe gevolge wat die welstand van die persoon en diegene om hom belemmer. Sonde begin met leuens wat ons vir onsself vertel. Sonde het die vermoë om te mislei sodat mense nie die gevolge van hulle optrede sien vir wat dit is nie. Sonde vang ons vas – soos ‘n vlieg gevang in die web van ‘n spinnekop.

Jesus se vergifnis stel ons nie alleen vry nie, maar laat ons die waarheid sien oor onsself. We love those who know the worst of us and don’t turn their faces away (Walker Percy). God weet meer van ons as enige mens ooit sal kan weet en Hy keer nie sy rug op ons nie – Hy doen versoening vir ons sonde.

Sonde is ‘n probleem, maar ‘n probleem wat Jesus reeds aan die kruis hanteer het.

“The Father did not require the death of Christ to persuade Him to love us. Christ died because the Father loves us.” —Sinclair Ferguson

Ons is louwarm

Here, Here , ‘n barmhartige en genadige God, lankmoedig en groot van goedertierenheid en trou (Eksodus 34:6 – OAV). En verder word van die bedienaars vereis dat hulle getrou moet bevind word (1 Korintiërs 4:2 – OAV). Hoe getrou is ons? Groot van trou? Louwarm? ‘n Louwarm gesindheid is dikwels die gevolg van herhaalde kompromieë wat ons aangaan. Met elke kompromis verminder ons voorneme om die waarheid te sien en om getrou te wees daaraan.

Die gemeente in Laodisea is daarvan beskuldig dat hulle louwarm was (Openbaring 3:14 – 22). Wat kan ons by hulle leer?

• Om louwarm te wees, is ‘n simptoom van ‘n siekte

Meeste van ons is ook maar louwarm. Ons geloof word nie deur vervolging in gevaar gestel nie, maar deur die voortdurende versoekings van kompromieë met die wêreld. Jesus, die geloofwaardige en ware getuie, sê dat die mense in Laodisea nie koud of warm is nie – hulle is nie meer getrou nie. Hy raai hulle aan om by Hom oogsalf te koop om aan julle oë te smeer, sodat julle kan sien. As ons louwarm is, is dit ‘n simptoom van ‘n onderliggende siekte – ons is nie meer getrou nie. Dit is ‘n siekte waarteen ons moet veg en dit oorwin.

• Jesus se voorskrif vir ontrou

Laat dit dan vir julle erns wees en bekeer julle. Ons moet ywerig wees (OAV).. Is dit nie ons probleem nie: ons is nie meer ywerig nie? Om louwarm te wees is nie die siekte nie – dit is bloot die simptoom van die onderliggende siekte. Behandel ons dit nie, is die gevolge ernstig: Jesus sê dat Hy ons uit sy mond sal uitspoeg. Die ontroues ontvang nie die ewige beloning nie, maar wel diegene wat die oorwinning behaal – hulle wat veg en oorwin.

Om getrou te bly, is ‘n stryd – dit is oorlog. Ons moet elke dag veg teen die versoeking om kompromië aan te gaan. Luister na Paulus se raad aan die jonge Timoteus: In die goeie wedloop van geloof moet jy al jou kragte inspan en die ewige lewe as prys behaal (1 Timoteus 6:12)