The truth is, of course, that what one regards as interruptions are precisely one’s life – C.S.Lewis

Die appel van my oog

Daar is baie maniere waarop ek my liefde vir ander kan uitspreek. Sommige uitdrukkings is duidelik; ander is minder duidelik, want hulle is idiomaties. Een van die hierdie uitdrukkings is: Jy is die appel van my oog. Hierdie uitdrukking het diep wortels in ons taal, want dit het sy oorsprong in die Bybel. Die appel van my oog is my gunsteling persoon.

In die Bybel verwys dit na God se besondere liefde vir sy volk. Hy het sy volk in die woestyn gevind, in ‘n onbewoonde land waar woestyndiere skreeu. Die Here het sy volk omhels, hom vertroetel en versorg soos die appel van sy oog (Deuteronomium 32:10); Beskerm my soos die appel van u oog, steek my weg in die skaduwee van u vleuels (Psalm 17:8); Maak wat ek jou leer jou eie, so eie soos die appel van jou oog (Spreuke 7:2); So sê die Here die Almagtige wat my met volmag gestuur het na die nasies toe wat oorlogsbuit van julle gemaak het: Wie aan hulle vat, vat aan my oogappel (Sagaria 2:8).

Hoekom sou hierdie uitdrukking van God se teer versorging nou juis na die oog verwys? Daar is geen plek wat ons outomaties so beskerm as juis ons oë nie. Wat is kosbaarder vir ons as ons sig? As God sê dat sy volk die appel van sy oog is, sê Hy daar is niks kosbaarder vir Hom nie.

Ons gebruik die frase vir iemand wat ons liefhet. Ons moet egter altyd onthou dat ons liefde maar ‘n dowwe skaduwee van die groter liefde van God vir ons is.

Die begin van kersfees – die fees van die Lig (Shireen van der Watt)

In die westelike deel van die Christendom het die heidense voorgeskiedenis veroorsaak dat Kersfees vandag nog in die middel van die winter gevier word. In 313 nC word die Christendom ‘n wettige godsdiens in die Romeinse Ryk toe Keiser Konstantyn ‘n Christen word. Later in die vierde eeu word dit ook tot staatsgodsdiens verklaar. So vervang die God van die Christendom die Romeinse gode en godsdiens. Die ou bygelowe in die ander gode is egter nie met een veeg uit die lewens en gedagtes van die mense gevee nie. Dit het Christelike sendelinge eeue geneem om die heidense godsdiens en heidense gebruike in Europa uit die gedagtes van die mense te kry. Kersfees was een manier om dit te doen en dit is sommer vinnig gedoen.

Pre-Christelike Europeërs het elke jaar op die langste nag van die winter tydens die wintersonkeerpunt feeste gevier ter ere van die songod. Van nou af word die dae langer en son begin die donker verdryf. Dit moet gevier word, want nou is die lente, lewe en son oppad. Al was die Christendom die staatsgodsdiens, het die gewone mense die fees aan die einde van Desember bly vier. Dit was natuurlik ’n probleem, want die Christene wou nie ’n fees vier wat vir ’n heidense god bedoel is nie. Die leiers van destyds het toe die plan bedink om die fees ’n ander betekenis te gee. Waarom nie fees vier ter wille van die ware ‘Lig van die wêreld’ nie? So het die inhoud van die fees verander na die fees wat Jesus vereer. Sy geboorte en nie die terugkoms van die songod nie het toe die inhoud van die fees geword. Van toe af was dit nie meer ’n heidense fees nie, maar ’n Christusfees. Jesus se koms wat die Lig vir die wêreld bring word tot vandag toe gevier. So word Jesus se oorwinning oor alle afgode ook gevier. Die oorwinning beteken dat heidense gebruike met Christelike gebruike vervang is – 25 Desember (ongeveer 325 nC) staan dus in die geskiedenis vas as die dag van die oorwinning van Jesus oor die heidense gode van daardie tyd.

Niemand weet presies wanneer Jesus gebore is nie, want in Jesus se tyd is daar nie verjaardae gevier soos vandag nie en hulle het ook nie detail kalenders gehad soos vandag nie. Kersfees is dus vir die Christene ’n simboliese dag, ’n dag waar daar aan Jesus en sy oorwinning gedink word. Dit maak nie saak dat dit nie die presiese dag van Jesus se geboorte is nie, want dit is nie die dag nie, maar die betekenis van die dag en die betekenis van Jesus wat gevier word. Dit maak kersfees een van die wonderlikste dae van die jaar, juis omdat dit maak dat mens kan nadink… oor die Lig in jou lewe.

Dag 25: ‘n Gebed van Augustinus

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

Laat die regverdiges hulle verheug, want die Regverdige is gebore.

Laat die siekes hulle verheug, want hulle Verlosser is gebore.

Laat die gevangenes hulle verheug, want hulle Redder is gebore.

Laat die slawe hulle verheug, want hulle Meester is gebore.

Laat vry mense hulle verheug, want hulle Bevryder is gebore.

Laat alle Christene hulle verheug want Jesus Christus is gebore.

Regverdige, Verlosser, Redder, Meester, Bevryder, Jesus Christus.

[Augustinus van Hippo ( 354 – 430)]

Blog326

Men do not reject the Bible because it contradicts itself, but because it contradicts them. —E. Paul Hovey

Wat sal jy hierdie Kersfees kry?

En dit is vir julle die teken: julle sal ‘n kindjie vind wat in doeke toegedraai is en in ‘n krip lê … Kom ons gaan reguit Betlehem toe om te sien wat gebeur het, soos die Here dit aan ons bekend gemaak het (Lukas 2:12 en 15).

Ons spandeer baie tyd om geskikte geskenke vir ons kinders en vriende te kry. Baie van ons sal nie kry wat ons graag wil hê nie. Daardie eerste Kersfees het baie mense ook nie die kindjie gekry nie, want hulle het Hom nie gesoek nie. Die wyse manne en die skaapwagters het Hom gekry, want hulle het Hom gesoek.

Wat gaan jy hierdie Kersfees kry? Dit waarna jy soek? Soek, en julle sal kry (Matteus 7:7). Mense vra wat is die betekenis van die lewe of is daar ‘n God en as daar ‘n God is hoe kry ek Hom? Dit is waaroor Kersfees gaan: om God te soek en te kry. God weet alles van ons en Hy wil hê dat ons alles van Hom moet weet. Daarom het Hy vir Jesus gestuur.

Rick Warren sê dat God vir ons hierdie Kersfees drie geskenke gee.

1. Hierdie Kersfees gee God vir jou vergifnis

Vandag is daar vir julle in die stad van Dawid die Verlosser gebore (Lukas 2:11)

Kersfees gaan oor hierdie Verlosser. As gevolg van hierdie Verlosser kan my sondes nou vergewe word – ek kry die kosbare geskenk van ‘n skoon gewete. Van Hom getuig al die profete dat elkeen wat in Hom glo, vergewing van sondes deur sy Naam ontvang (Handelinge 10:43). Let wel: elkeen, almal. Erken net dat jy Hom nodig het om jou te verlos. Vra enige lewensredder hoe jy ‘n persoon wat besig is om te verdrink, red. Jy gaan nie slaag terwyl hy nog sukkel om homself te red nie. Eers as hy oorgegee het, kan jy hom red. Dit is ons groot probleem: ons probeer onsself red.

2. Hierdie Kersfees gee God vir jou gemoedsrus

Vir dié wat u wet liefhet, is daar groot sekerheid; niks kan hulle laat struikel nie (Psalm 119:165)

Ons weet nie meer wat ware vrede is nie. Daar is drie dinge wat ons vrede steel: skuldgevoelens, hartseer en as ek ‘n wrok dra. Ware vrede word deur ons verhouding met Jesus Christus bepaal. Ons weet dat God nooit sal ophou om ons lief te hê nie; Hy sal my nooit alleen laat nie. Maak nie saak wat gebeur nie, God gaan my krag gee om dit te hanteer.

3. Hierdie Kersfees kan ek die ewige lewe kry

• Almal van ons gaan eendag sterf.
• Ons gaan ‘n groter deel van ons lewe na die dood as voor die dood spandeer.

Hierdie is lewensfeite wat ons moet aanvaar. Hierdie Kersfees kan ons die ewige lewe kry … ons moet net in Jesus Christus glo. Dan sal Hy ons verlos.

Die probleem van ons moderne mense is dat ons dikwels nie weet wat ons soek nie. Wat ons hierdie Kersfees moet soek – soos die wyse manne en die skaapwagters – is Jesus Christus.

 En ons weet dat die Seun van God gekom het en ons verstand gegee het om die ware God te ken; en ons is in die ware God, in sy Seun, Jesus Christus. Hy is die ware God en die ewige lewe (1 Johannes 5:20)