Dag 22: Vrede op aarde

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

In die Rome van Jesus se tyd was daar beslis nie vrede op aarde nie. Die vrede wat daar was, was ‘n vrede afgedwing deur Rome vir Rome. Vir meeste mense was die antieke wêreld nie ‘n plek van vrede nie – dit was ‘n plek van vrees en onsekerheid. Toe Jesus kom was Hy die Vredevors waarvan Jesja 9:6 gepraat het.

Die engelkoor wat die skaapwagters uitgenooi het om na Betlehem te kom, belowe vrede op aarde. Dit was ‘n gepaste boodskap vir daardie tyd. Die verlange in die harte van mense vir vryheid van vrees en die versekering van vrede was daar in die 1ste eeu – dit is steeds by alle mense teenwoordig.

Tydens die afgelope aantal dekades was daar heelwat studies om die mens se grootste vrese te bepaal. Bo-aan die lys was dinge soos praat in die openbaar, hoogtes, slange, kieme, vlieg, ens. Onlangs is daar ‘n aantal nuwe vrese wat vinnig op daardie lys klim: misdaad (moord, diefstal en inbrake), ekonomies (nie geld vir die toekoms nie), omgewing (globale verwarming, oorbevolking), en die regering (korrupsie, gesondheidsorg, ens). Dit is maar net ‘n paar van die dinge wat ons vandag bangmaak.

Hoe meer dinge verander, hoe meer bly hulle dieselfde. As ambassadeurs en volgelinge van Jesus in die wêreld het ons ‘n boodskap van vrede. Die wêreld moet weet dat die koms van Jesus na die wêreld is die koms van vrede vir hulle. Die beste geskenk wat ons vir mense hierdie Kersfees kan gee, is die boodskap van vrede. Sal mense na ons kyk en ‘n vreeslose vrede sien omdat ons verseker is dat ons die Verlosser ken? Ons kan vredemakers wees is sale vol mense, in verkeer wat stilstaan, in moeilike familieomstandighede en in die besigheid van die seisoen. As ons hierdie vrede uitdra, laat ons die lig van Jesus skyn.

Eer aan God in die hoogste hemel, en vrede op aarde vir die mense in wie Hy ‘n welbehae het (Lukas 2:14).

Everything is good when it looks to Him and bad when it turns from Him – C. S Lewis

Psalm 33 (1)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Ek gaan ‘n paar blogs aan hierdie psalm spandeer.

Billy Graham lees elke maand al 150 psalms. Vir hom het hulle duidelik ‘n besondere betekenis. Meeste van ons, ek ingesluit, lees die psalms nie so sistematies nie – ons pik hier en pik daar. Daarom het ek besluit dat ek hierdie jaar ‘n bietjie dieper in die psalms wil delf. Ek het veral gebruik gemaak van John Goldingay se drie-volume kommentaar – Psalms.

Tema: Die regverdiges en opregtes – gelowiges – kan in die Here jubel deur Hom in die tempel te dank.

Hierdie psalm het geen opskrif nie. Dit het 22 verse – die aantal letters in die Hebreeuse alfabet – maar elke vers begin nie met die volgende letter in die alfabet nie. Psalm 33 is ‘n lofpsalm en skeppingspsalm. In die eerste drie verse vra die digter regverdiges om oor God se goedheid te sing. Daarna volg twee lofliedere. Die laaste drie verse sê die digter en die volk waarom hulle God op sy woord neem.

[Regverdiges verwys nie in hierdie psalm na mense wat deur hulle eie goeie dade regverdigheid verdien het nie. Dit is die naam vir mense wat God onverdiend as sy volk gekies het; wie se sonde Hy vergewe het en wat Hy regverdig verklaar het. Hulle dra daardie naam omdat God dit in sy genade aan hulle gegee het.]

31:1 – 3: Opdragte: Sing oor God se goedheid

Die Here is die voorwerp wat aanbid moet word, maar Hy is ook die rede waarom die psalmis aanbid. Die musiek betrek beide instrumente en sang. Hier kry ons geen rede vir die lof nie. Die motiewe en begeertes van die aanbidder verdwyn – al die fokus is op die Here.

Die vorige psalm is afgesluit met ‘n oproep aan die regverdiges en die opregtes. Hierdie psalm begin met ‘n oproep aan dieselfde twee groepe. Dit is immers hierdie groepe wat die reg het om die tempel binne te gaan. Waarskynlik moes hulle dit doen tydens ‘n groot dankfees – na ‘n besondere uitkoms wat die Here gegee het. Hierdie psalm is nie net vir een soort geleentheid bedoel nie, maar vir alle tye. Daar moet altyd ‘n nuwe lied wees, want God doen altyd verrassende nuwe dinge.

Regverdiges, jubel oor die Here! ‘n Loflied pas opregtes.

Wie word uitgenooi om by die lofprysing aan te sluit – regverdiges … opregtes. Hierdie name impliseer die mense van God. Dit is ook ‘n uitdaging vir hierdie mense om aan hierdie benamings getrou te bly. ‘n Loflied pas alle opregtes.

²Loof die Here met ‘n lier; speel vir Hom op die tiensnarige  harp!

Hier word die inhoud van die lof en die instrumente gekombineer. Twee instrumente is hier te sprake – die lier en die harp met tien snare.

³Sing vir Hom ’n nuwe lied; speel mooi op snaarinstrumete met uitroepe van vreugde.

Hierdie nuwe lied kan wees iets nuuts wat die Here gedoen het. Dit mag ook verwys na ‘n nuwe bewustheid van die Here wat met soewereine gesag optree en sy vyande verslaan.

Volgende keer gaan ons kyk na redes waarom die Here geloof moet word.

“There is nothing like returning to a place that remains unchanged to find the ways in which you yourself have altered.” – Nelson Mandela

Ek wil die wêreld verander deur bombastiese taal op sosiale media te gebruik

Vraag: Gee ek genoeg om om my hande vuil te maak of hou ek net van die gevoel dat ek my plig gedoen het as ek dit op die sosiale media geplaas het. Daar is omstandighede waaronder die sosiale media tot verandering in die samelewing kan bydra – deur protesoptrede en boikotte te organiseer, deur mense ingelig te hou, ens.

Jesus het belanggestel om ware mense met ware probleme te help. Toe Johannes se volgelinge vir Jesus gevra het of Hy die Een is wat sou kom en of hulle vir iemand anders moes wag, antwoord Hy hulle: Gaan vertel vir Johannes wat julle hoor en sien. Blindes sien, lammes loop, melaatses word gereinig, dowes hoor, dooies word opgewek, en aan armes word die evangelie verkondig (Matteus 11:4 – 5). As ons sosiale ongeregtigheid wil hanteer, moet ons Jesus se voorbeeld volg Ons geloof moet tot optrede lei: bring hoop vir die verlorenes, vertel almal van die Geneser.

Met al die inligting tot ons beskikking is daar geen tekort aan geleenthede om mense te help nie. Die probleem is dat ons nie altyd weet hoe om dit te doen nie. Hoe kan ons ons goeie bedoelings verander in betekenisvolle optrede.

1. Kom in die gewoonte om te gee

Om vrygewigheid te ontwikkel, is ‘n goeie belegging. Studies wys dat armer mense gewoonlik ‘n groter persentasie van hulle inkomste aan barmhartigheid gee as ryk mense. Bepaal ‘n persentasie wat jy bereid is om te gee.  Die finansiële seëninge wat ons ontvang, moet ook tot voordeel van die gemeenskap wees.

2. Gee jou tyd en talente

Spandeer ‘n paar uur per week in ‘n organisasie wat ander help. Begin klein. Dit gee aan ons ‘n beter perspektief van die lewe. Ons uitdagings word in perspektief geplaas as ons direk in aanraking is met mense wie se uitdagings veel groter as ons eie is.

3. Wy jou vaardighede, beroep en lewenstaak aan die sake waarin jy glo.

Beroepsukses word nie net gemeet deur die bedrag wat jy verdien nie, maar ook deur die impak wat jou lewe op ander het. Maak nie saak wat ons oortuigings oor sosiale media is nie … ons kan altyd terugstaan en vra of daar nie iets meer is wat ek kan doen nie.

Baie van ons het goeie bedoelings. As ek daardie bedoelings oorsit in optrede kan ek begin om die wêreld te verander.

Dag 21: ‘n Advent gebed: U breek in

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

U breek in die daaglikse siklus van ons lewens as alles met ons en die wêreld goed lyk.

As ons juk maklik en ons las lig is

U breek in en verbreek 0ns selftevredenheid

In die daaglikse siklus van ons lewens  as ons gemaklik en rustig is.

As die vuur aangesteek is, maar ons oë toe is

Breek U in en daag ons afhanklikheid uit.

U breek in ons daaglikse gebede in

U maak harte nederig en ontbloot siele

U breek in; U breek in as ons verdediging slaap

Met ‘n uitroep of ‘n stlle geluid breek U in, U breek in

En ons verander; alle dinge verander as U inbreek.