Die seënuitsprake van Jesus (3)

In die begin van die bergrede lees ons dat Jesus teen die berg opgegaan het, gaan sit het en Hy het hulle geleer:

Geseënd is dié wat geestelik arm is, want aan hulle behoort die koninkryk van die hemele.

Geseënd is dié mense wat treur, want hulle sal die aarde erf.

Geseënd is die sagmoediges, want hulle sal die nuwe aarde ontvang.

 Geseënd is dié wat honger en dors na geregtigheid, want hulle sal versadig word.

Geseënd is die barmhartiges, want hulle sal barmhartigheid ontvang.

Geseënd is dié wat suiwer van hart is, want hulle sal God sien.

Geseënd is die vredemakers, want hulle sal kinders van God genoem word.

Geseënd is die mense wat vervolg word ter wille van geregtigheid, want aan hulle behoort die koninkryk van die hemele.

Matteus 5:3 – 10 (Nuwe Testament en Psalms , Direkte Vertaling. Bybelgenootskap van Suid-Afrika. (2014).

Colin S. Smith het ‘n baie interessante boek geskryf oor die seënuitsprake van Jesus: Momentum – Pursuing God’s Blessings Trough the Beatitudes (2016).  Die boek sê wat ons kan doen om die momentum in die Christelike lewe wat ons almal soek, te kan kry. Ek gaan ‘n hele paar blogs aan hierdie boek spandeer.

As ons begin het om op die pad as Christen te loop, wil ons graag vorder. Hier help die seënuitsprake ons. Daar is ‘n besliste orde in die seënuitsprake – die een vloei uit die ander wat voorafgegaan het. Hulle beskryf nie net ‘n geseënde lewe nie – hulle gee vir ons ‘n padkaart om daar te kom. Die eerste drie uitsprake hanteer ons behoeftes. Ons is geestelik arm, want ons kan nie volgens God se opdragte leef nie. Ons treur, want ons sondes is baie. Ons is nie sagmoedig nie.

Uit hierdie wortels kom die spruit van die  vierde seënuitspraak. – ‘n honger en dors na geregtigheid. God gebruik die wortels om jou eie behoeftes raak te sien vir ‘n diep verlange na geregtigheid. Die loot wat uitspruit dra vrugte. Dit sluit in barmhartigheid, suiwer van hart en vrede. Ons Here gee nog ‘n seënuitspaak: Geseënd is die mense wat vervolg word ter wille van geregtigheid.

Dit is duidelik dat jy nie die vrugte kan kry sonder die wortels en spruit/loot nie. Hierdie seënuitsprake se volgorde wys vir ons hoe om vooruitgang in ons Christelike lewens te maak.

Spurgeon het ‘n reeks preke oor die seënuitsprake in 1873 gehou. Hy het ook die belang van die volgorde van die uitsprake beklemtoon.

Observe carefully. And you will see that each one rises above the one that precede it … not only do the Beatitudes rise one above the other, but they spring out of each other, as if each depended on all that went before.

Martyn Lloyd-Jones sê dieselfde:

There is beyond any question, a  definite order in these Beatitudes. Our Lord does not place them in their respective positions haphazardly or accidentally; there is what we may describe as a spiritual logical sequence to be found here.

Baie mense sien hulle egter steeds as ‘n aantal onverwante uitsprake. Hulle is juwele wat nie op ‘n hoop gegooi is nie, maar saamgevoeg is in ‘n pragtige string. Die tema van vooruitgang of vordering is baie belangrik.

Ons het hier ‘n praktiese model vir groei in die Christen se lewe, dit is Bybels en prakties

Die seënuitsprake van Jesus (2)

In die begin van die bergrede lees ons dat Jesus teen die berg opgegaan het, gaan sit het en Hy het hulle geleer:

Geseënd is dié wat geestelik arm is, want aan hulle behoort die koninkryk van die hemele.

Geseënd is dié mense wat treur, want hulle sal die aarde erf.

Geseënd is die sagmoediges, want hulle sal die nuwe aarde ontvang.

 Geseënd is dié wat honger en dors na wat reg is, want hulle sal versadig word.

Geseënd is die barmhartiges, want aan hulle sal barmhartigheid bewys word.

Geseënd is dié wat suiwer van hart is, want hulle sal God sien.

Geseënd is die vredemakers, want hulle sal kinders van God genoem word.

Geseënd is die mense wat vervolg word ter wille van geregtigheid, want aan hulle behoort die koninkryk van die hemele.

Matteus 5:3 – 10 (Nuwe Testament en psalms , Direkte Vertaling. Bybelgenootskap van Suid-Afrika. (2014).

Colin S. Smith het ‘n baie interessante boek geskryf oor die seënuitsprake van Jesus: Momentum -Pursuing God’s Blessings Trough the Beatitudes (2016).  Die boek sê wat ons kan doen om die momentum in die Christelike lewe, wat ons almal soek, te kan kry. Ek gaan ‘n hele paar blogs aan hierdie boek spandeer.

Die  seënuitsprake vertel vir ons hoe ‘n ware Christen lyk. Ons ken ‘n geelvink aan sy kleur. Die geel kleur maak nie van hom ‘n geelvink nie. Hy is geel omdat hy ‘n geelvink is. Die natuur gee aan hom sy kleur en sy kleur weerspieël sy natuur. ‘n Christen word herken deur die onderskeidende tekens bepaal deur Jesus: God het ons dan nou vrygespreek deurdat ons glo. Daarom is daar nou vrede tussen ons en God deur ons Here Jesus Christus. Deur Hom het ons in die geloof ook die vrye toegang verkry tot hierdie genade waarin ons nou vasstaan. En ons verheug ons ook in die hoop om deel te hê aan die heerlikheid van God (Romeine 5:1 – 2). Staan in die genade is waar ons aan die begin en ook aan die einde van ons reis as Christene staan. Jy is afhanklik van God se genade op die eerste dag en die laaste dag van jou lewe as Chisten.

Om in genade te staan en om te streef na groei hoort bymekaar. If we do not imitate His ( = Christ’s) life, we cannot be saved by His death (Thomas Watson). Beywer julle vir vrede met alle mense asook vir ‘n heilige lewe, waarsonder niemand die Here sal sien nie (Hebreërs 12:14). Jesus Christus het vir ons geword die wysheid wat van God af kom: die vryspraak, die heiliging en die verlossing (1 Korintiërs 1;30).  As jy Christus aanneem , kry jy meer as verlossing. Christus is jou heiligmaking, jou wysheid en jou verlossing. Hy gee nooit die een sonder die ander nie. Christus is die mega-gawe en Hy bevat al hierdie ander gawes in Homself. Met Hom het jy al hierdie gawes en sonder Hom het jy niks nie. Wie die Seun het, het die lewe; wie nie die Seun van God het nie, het ook nie die lewe nie (1 Johannes 5:12). God gee een gawe aan ons: Jesus Christus. Hy is al wat ons nodig het. Ons word in Christus met elke geestelike seën geseën.

As wanhoop naby is

As jy jouself in die lig van die seënuitsprake bestudeer, voel jy asof jy oorweldig is Dit is jammer. Jy moet weet hoe om die waarheid aangaande jouself te hanteer sonder om wanhopig te word. As die Heilige Gees sy verlossingswerk in jou lewe begin, open Hy jou oë en jou ore vir die waarheid. So word jy oortuig van jou sonde, ongeregtigheid en oordeel. As jy oortuig word van jou sonde, besef jy hoe ver jy tekortskiet in die lewe waartoe God jou geroep het. Omdat jy nou hierdie dinge sien, klou jy vas aan Christus.

Klou vas aan Christus

Hoe hanteer ons die ontmoediging as gevolg van ons gebrek aan vordering. As ons dit besef moet ons vaster en met groter dankbaarheid en blydskap aan Jesus Christus vasklou en aan dit wat Hy aan die kruis vir ons bereik het. Wees dankbaar dat die rede waarom jy jou sondes duideliker en self pynliker raaksien, is dat die Heilige Gees in jou woon.

Die seënuitsprake van Jesus (1)

In die begin van die bergrede lees ons dat Jesus teen die berg opgegaan het, gaan sit het en Hy het hulle geleer:

Geseënd is dié wat geestelik arm is, want aan hulle behoort die koninkryk van die hemele.

Geseënd is dié mense wat treur, want hulle sal die aarde erf.

Geseënd is die sagmoediges, want hulle sal die muwe aarde ontvang

 Geseënd is dié wat honger en dors na geregtigheid, want hulle sal versadig word.

Geseënd is die barmhartiges, want hulle sal barmhartigheid ontvang.

Geseënd is dié wat suiwer van hart is, want hulle sal God sien.

Geseën is die vredemakers, want hulle sal kinders van God genoem word.

Geseënd is die mense wat vervolg word ter wille van geregtigheid, want aan hulle behoort die koninkryk van die hemele.

Matteus 5:3 – 10 (Nuwe Testament en psalms , Direkte Vertaling. Bybelgenootskap van Suid-Afrika. (2014).

Colin S. Smith het ‘n baie interessante boek geskryf oor die seënuitsprake van Jesus: Momentum -Pursuing God’s Blessings Trough the Beatitudes (2016).  Die boek sê wat ons kan doen om die momentum in die Christelike lewe wat ons almal soek, te kan kry. Ek gaan ‘n hele paar blogs aan hierdie boek spandeer.

Ons wil wil meer van God se seëninge in ons lewens weet. Baie Christene is tevrede met die bietjie wat ons het. Maar diep in ons harte is daar ‘n verlange na iets  meer. Ons wil almal soos Dawid sê dat ons beker oorloop. Maar ons staan voor ernstige uitdagings, Hoe lyk ‘n geseënde lewe? Almal wil geseënd wees – in ons verhoudings, in ons besigheid, in ons gemeentes. Die teenoorgestelde van geseënd wees is om vervloek te wees

Wat is die geseënde lewe?

‘n Gelukkige huwelik; begaafde kinders; finansiële stabiliteit; gesondheid; geleenthede om te reis; lidmaat van ‘n gesonde gemeente. Almal is seëninge, maar nie een van hulle kom in Jesus se lys voor nie. Jesus sê nie: “Geseënd is hulle wat goeie gesondheid geniet nie”, maar “Geseënd is die mense wat treur.” Volgens Jesus is die seëninge nie te kry waar ons gewoonlik kyk nie, maar daar waar ons nie gewoonlik kyk nie. Jesus se seënuitsprake druis teen die intuïsie in. As jy arm is, het jy geen hulpbronne nie. Niemand wil dit hê nie, maar Jesus praat van ‘arrmoede wat jou ryk maak. Om te treur sal nie op ons wenslysie wees nie. Maar Jesus praat van ‘n soort treur wat vir jou vreugde bring.

Hoe herken jy ‘n ware Christen?

Ons wil almal in die Christelike lewe vooruitgaan. Om vooruit te gaan, moet ons eers weet hoe ons doelwit lyk. Wat moet jy najaag? Wat is die onderskeidende tekens van ‘n ware Christen? God het sekere waarhede in die Bybel geopenbaar. Daarom het Ek vir julle gesê. Julle sal in julle sondes sterwe, want as julle nie glo dat Ek is wat Ek is nie, sal julle in julle sondes sterwe (Johannes 8:24). Jesus het ook gesê: Wat God van julle verlang,  dat julle moet glo in Hom wat Hy gestuur het (Johannes 6;29). Hierdie verse en baie ander leer vir ons dat daar sekere waarhede is waarsonder ‘n persoon nie ‘n Christen kan wees nie.

Jakobus herinner ons daaraan dat die bose geeste ook glo (Jakobus 2:19). In die evangelies was dit ‘n onrein man wat eerste bely het dat Jesus die Heilige van God is (Markus 1:24). Die Satan weet wie Jesus is en wat Hy gedoen het., maar Hy weier om Hom aan Jesus te onderwerp. Mense wat bely dat hulle Christene is, maar voortgaan met die sondes van hulle keuse is vals. Vals mense leef nie onder die seën van God nie. Geloof is ‘n noodsaaklike teken van ‘n Christen, maar dit s nie voldoende nie.

Dade is ook belangrik: Elkeen dan wat hierdie woorde van My hoor en daarvolgens handel, kan vergelyk word met ‘n verstandige man wat sy huis op rots gebou het (Matteus 7;24). Jesus verwys ook na mense wat in sy Naam gepreek en deur sy Naam bose geeste uitgedryf het en wonders gedoen het en Hy sê vir hulle: Ek het julle nooit geken nie (Matteus 7:23). Hierdie is indrukwekkende dade maar volgens Jesus is nie een van hierdie dade bewys dat ‘n persoon aan Christus behoort nie.

 Vra ‘n paar eerlike vrae

Geseënd is die vredemakers. Is jy ‘n vredemaker? Of maak ek ander mense gespanne.

Geseënd is die barmhartiges: gee ek aan ander? Vergeef ek gou? Is ek barmhartig met die swakhede van ander? Toe Jesus die mense wat geseënd is beskryf het, was Hy besig om jou te beskrywe? Die kerk is ‘n gemengde groep van ware Christene en mense wat hulleself mislei oor hulle ware geestelike toestand..

Vyf wanbegrippe oor die Nuwe Testament

1. Die evangelies gee teenstrydige berigte oor Jesus se lewe, dood en opstanding

Ooggetuies se verslae oor dieselfde gebeurtenis is baie selde presies dieselfde. In die evangelies is daar baie meer ooreenkomste as verskille. Waar daar wel verskille is, is dit onbeduidend en verander nie die basiese verslag beduidend nie. Dit sou meer suspisieus gewees het as almal presies dieselfde besonderhede vertel het. Dit sou gelyk het of hulle vooraf saamgespan het om die verhaal reg te kry.

2. Paulus en Jesus leer verskillende dinge

Mense argumenteer dat die evangelies vol van Jesus se onderrig oor die koninkryk van God is, terwyl Paulus se fokus op regverdigmaking is. Leer Paulus nie hier iets wat Jesus nooit geleer het nie. Hierdie beredenering verstaan nie hoe openbaring in die Bybel werk nie. Openbaring werk op ‘n organiese stap vir stap manier en nie sommer alles op een slag nie. Jesus het onthul waarop die apostels gebou het. Jesus het sekere dinge onthul waarop die apostels onder leiding van die Heilige Gees gebou het. Dit is ook moontlik dat ‘n konsep teenwoordig is al is daar nie noodwendig ‘n spesifieke woord wat die konsep beskryf nie. Jesus het duidelik geleer dat verlossing net deur Hom moontlik is (Johannes 3;16 – 17; Johannes 14:6) al gebruik Hy nooit die woord regverdigmaking nie. Paulus leer ook dat Christene wat op Christus vertrou ‘n ewige erfenis het, dat hulle kinders van God is en dat hulle sal opstaan as Jesus Christus weer terugkom. Al hierdie dinge is elemente van die koninkryk van God wat verkondig is.

3. Jakobus en Paulus leer twee verskillende verlossings

Dwarsdeur sy briewe beklemtoon Paulus verlossing deur geloof alleen. Ons kry die veral duidelik in sy briewe aan die Romeine en die Galasiërs. Jakobus verkondig skynbaar ‘n teenstrydige verlossing van geloof en werke (Jakobus 2:14 – 17). Jakobus ontken nooit dat geloof noodsaaklik vir verlossing is nie. Sy fokus op weke is om te wys dat lewende geloof, soos ‘n lewende boom vrugte dra. Geloof wat dood is, dra nie vrugte nie en is dus waardeloos. Dit ontken nie verlossing deur geloof nie, maar beklemtoon net dat verlossing en heiligmaking verbind is. Verlossing kom altyd eerste as optrede van God terwyl heiligmaking later kom as die voortgesette werk van God.

4. Die Christelike geloof is ‘n primitiewe godsdiens geskep om di behoeftes van die gemeenskap te pas

Die argument is dat die apostels Jesus geredigeer, aangepas en verander het om die behoeftes van die gemeenskap te pas. Dit is onwaarskynlik. Die evangelies is nie lank na Jesus se hemelvaart geskryf nie. Dit was ‘n tyd toe baie mense wat vir Jesus geken het nog gelewe het. Dit is onwaarskynlik dat die apostels Jesus se teologie sou verander het terwyl daar nog mense was wat kon gesê het hulle jok.

5. Die Bybel moet foute hê, want daar is variante tussen die manuskripte

Die ooreenkomste tussen die kern onderrig van die Nuwe Testamentiese manuskripte is ver meer as die verskille. Die verskille is so klein dat dit nie betekenis van die teologie op ‘n betekenisvolle wyse verander nie. Dit is merkwaardig as ons dink hulle is moeisaam per hand gekopieer. Baie van die variasies is kopieerfoute wat ‘n enkele woord uitlaat of die orde van twee woorde omdraai – Jesus Christus en Christus Jesus. Ons weet wat die oorspronklike manuskripte gesê het, want ons het so baie kopieë wat almal dieselfde ding sê.

.