“O Father who sought me, O Son who bought me, O Holy Spirit who taught me” Celtic Prayer to the Holy Trinity” – Keltiese gebed

Belê in God se beleggingsfondse

Spoor hulle aan om goed te doen, en ryk te wees in goeie dade, vrygewig en mededeelsaam. So vergader hulle vir hulle ‘n skat as ‘n goeie belegging vir die toekoms, sodat hulle die ware lewe sal verkry (1 Timoteus 6:18 – 19).

Rick Warren verwys na God se vyf beleggingsfondse waarin ons moet belê.

 

1. Belê in God se tesourie-fonds

Ons gebruik van ons geld om uitdrukking aan ons aanbidding te gee. Daar is niks wat ons vir God kan gee wat Hy nodig het nie. God het nie ons geld nodig nie. As ons ‘n offer vir God gee, aanbid ons Hom – ons sê dat ons Hom liefhet. Vereer die Here met offerandes uit wat jy besit en met die beste uit jou oes (Spreuke 3:9). Ons eer God as ons aan Hom offer. God wil hê dat ons in hierdie fonds belê voor ons in enige ander fonds belê.

 

2. Belê in God se onderlinge hulpfonds

God wil hê dat ons van ons geld moet gebruik om die geloofsgemeenskap te bevorder – om te wys dat ons ander gelowiges liefhet; om verhoudings te bou. As ek in hierdie fonds belê, kry ek ook voordele uit ander bronne: Liewe Gaius, jy handel reg in wat jy vir jou medegelowiges doen, en dit nog terwyl jy hulle nie eens geken het nie (3 Johannes :5). As ons ons geld belê in die ontwikkeling van verhoudings in die gemeente, rig dit ander op God – dit help om mense na God te bring.

 

3. Belê in God se groeifonds

Sorg daarenteen dat julle steeds toeneem in die genade en kennis van ons Here en Verlosser, Jesus Christus (2 Petrus 3:18). Ons moet in ons persoonlike en geestelike ontwikkeling belê. Ons moet geestelik groei, vaardihede ontwikkel en onsself opvoed, sodat ons die persoon kam wees  wat God ons gemaak het.  Ons belê in God se groeifonds as ons goeie boeke koop en Christelike kongresse bywoon.

 

4. Belê in God se ekwiteitsdiensfonds

God wil van ons geld gebruik om behoeftige mense te help. God het ons nie op aarde geplaas net om vir onsself te lewe nie. God is vrygewig. Alles wat ons in die lewe het, is as gevolg van sy vrygewigheid. God wul hê dat ons, net soos Hy, vrygewig moet wees. Hy wil veral hê dat ons vrygewig teenoor die armes moet wees. Wie hom oor die arm mens ontferm, gee ‘n lening aan die Here en Hy sal hom ten volle vergoed (Spreuke 19:17); Wie vir ‘n arm mens iets oor het.sal self niks kortkom nie, maar wie anderpad kyk, sal baie verwensings hoor *Spreuke 28:27).

 

5. Belê in God se globale fonds

God wil hê dat ons van ons geld gebruik om die evangelie dwarsoor die wêreld te verkondig. Hierdie is  goeie gebruik van ons geld. Dit is evangelisasie of sendingwerk.

 

Om in hierdie vyf fondse te belê is van ewigheidsbelang. As jy al jou skatte in die wêreld belê, is dit al wat jy het. Maar as jy in die ewigheid belê sal jy jou beleggings vir altyd geniet.

 

 

 

The church that eats together and prays together, stays together – Michael Bird

 

Psalm 17 (2)

[Ek gaan dwarsdeur van die Nuwe Testament en Psalms. ‘n Direkte Vertaling van die Bybelgenootskap van Suid-Afrika (2014) gebruik maak.] Ek gaan ‘n paar blogs aan hierdie psalm spandeer.

Billy Graham lees elke maand al 150 psalms. Vir hom het hulle duidelik ‘n besondere betekenis. Meeste van ons, ek ingesluit, lees die psalms nie so sistematies nie – ons pik hier en pik daar. Daarom het ek besluit dat ek hierdie jaar ‘n bietjie dieper in die psalms wil delf. Ek het veral gebruik gemaak van John Goldingay se drie-volume kommentaar – Psalms.

 

17:6 – 9:

Die psalm beweeg nou aan na die tweede pleidooi.

⁶Ek roep U aan, want U verhoor my, o God;

Draai u oor na my, luister na my woorde.

Die psalmis kan ‘n pleidooi aan die Here rig op grond van die integriteit van die psalmis se woorde en omdat die Here luister.

 

Wys my die  wonders van u troue liefde, o Verlosser van hulle wat teen teenstanders skuiling soek by u regterhand.

Die psalmis rig nou ‘n pleidooi vir optrede en nie net vir luister nie. Die psalmis bid soos iemand wie se posisie in vergelyking met Israel bedreig word deur mense wat hom aanval. Die Here moet optree soos Hy vir Israel opgetree het. Hy vra vir ‘n persoonlike verlossing. Hy vertrou immers op Hom. Die regterhand is gewoonlik die sterkste hand. Daarom is regtehand dikwels ‘n uitdrukking van krag.

 

⁸Beskerm my soos die appel van u oog; verberg my in die skadu van u vlerke

Die pleidooi vir optrede gaan voort. Die psalmis is bewus daarvan dat die idee van verberg van die vyande bepaal word deur sy afhanklikheid van die Here,

 

⁹vir goddelose mense wat my geweld wil aandoen, vir my vyande wat my lewe van alle kante bedreig.

Hierdie vers brei vers 8 verder uit. Hier word na goddelose mense en vyande verwys.

 

17:10 – 12:

Hulle ongevoelige harte is geslote; met hulle monde praat hulle aanmatigend.

Daar is ‘n verskil tussen die psalmis en sy vyande oor die gebruik van die innerlike – daar waar die hart geleë is. Hulle harte wat geslote is, beteken hulle is onwillig om hulle gesindhede en lewens te herdink. Hulle beheer ook nie hulle monde/tonge nie. Hulle het ambisieuse planne om moeilikheid vir die psalmis te maak.

 

¹¹Hulle het my spoor gehou, nou het hulle my omsingel; hulle is daarop ingestel om my ten gronde te laat gaan.

Die psalmis is omsingel deur sy vyande. Die Here moet hom inderdaad as die appel van sy oog hanteer. Die teenstanders is duidelik gierig en ambisieus.

 

¹²Die goddelose mens is soos ‘n leeu wat daarop uit is om te verskeur, soos ‘n jong leeu wat in skuilplekke wag.

Hier word die gevaar van die psalmis duidelik beskrywe. Die goddelose mens is soos ‘n leeu wat honger is – vol energie.

 

17:13 – 15:

Weereens kry ons ‘n pleidooi van die psalmis – ‘n pleidooi vir optrede. Dit is ‘n pleidooi teen sy vyande en ‘n pleidooi vir sy eie verlossing en herstel.

 

¹³Staan op, Here, loop op hom af, laat hom die knie buig.

Die eerste drie opdragte volg ‘n logiese opvolging: staan op … loop op hom af …laat hom die knie buig. As die Here op hom afloop, red Hy die psalmis. Die psalmis glo dat dit nie vir die Here te moeilik sal wees om dit te doen nie.

 

¹⁴ Bevry my tog van goddelose mense met u swaard, met u hand, Here, van hulle wat doodmaak. Hulle wat doodmaak, het geen lewensduur;

Dit is hulle lot in die lewe. Met u verborge straf vul U hulle buik; hulle kinders word versadig daarvan en wat oorbly, laat hulle agter vir hulle jong kinders.

Hier word die optrede wat die psalmis van die Here verlang beskryf. Dit sluit in dat sy vyande ‘n vroeë dood sal ondervind. Ons sien hier die psalmis se vrees vir sy vyande. Hulle lot verwys gewoonlik na iemand se verdiende loon. Die psalm laat toe vir die uitdrukking van gewelddadige gevoelens en begeertes. Ons kan nie sê hulle moenie uitgespreek word, want hulle behoort nie daar te wees nie – hulle is daar.

 

¹⁵Omdat ek onskuldig is, sal ek u teenwoordigheid ervaar;

Wanneer ek wakker word, sal ek van u verskyning versadig wees.

U teenwoordigheid ervaar is letterlik “u gesig sien.” Hierdie is ‘n uitdrukking van hoop en vertroue in die toekoms. Hierdie psalm sluit dus af soos hy begin het. Die psalmis word deur die gesig van sy vyand bedreig – hy wil eerder die gesig van die Here sien. As ek die Here se gesig sien, kry ek die antwoord. Die psalm bevestig dat gelowiges nie tot die volgende lewe hoef te wag om God te sien optree nie – Hy tree nou op.

 

Volgende keer gaan ons na die teologiese implikasies van hierdie psalm kyk.

 

 

We ought to read the Scriptures with the express design of finding Christ in them – Johannes Calvyn

 

Maak dissipels

Dissipelskap lyk nie na ‘n goeie manier om ‘n koninkryk te bou nie. Gewoonlik gaan dit oor oorloë en groot geld. Maar Jesus sluit sy verblyf op aarde af deur sy dissipels opdrag te gee om dissipels te maak. Is dit nou hoe jy ‘n koninkryk moet bou? Jesus leer sy dissipels om nie vir vandag of môre te leef nie, maar met die oog op die ewigheid. Ons leer ander om Jesus te volg; ons bid vir die invloed van die evangelie; ons verkondig God se woord – alles met die oog op die laaste dae. Ons mag nou vrugte sien, maar die einddoel is om aan die einde volwasse gelowiges aan God voor te lê.

Mark Dever sê dat om dissipels te maak, gaan oor ‘n verhouding waarin jy onderrig, regstel, modelleer en liefhê. Dit vereis nederigheid.

 

1. Onderrig

Die kern van dissipels maak, is onderrig. Ons onderrig met woorde – al die woorde waarmee Jesus sy dissipels onderrig het. Daarom moet ons sistematies die Bybel lees – Ou en Nuwe Testamente. Ons moet ook goeie boeke lees. Mense leer ook as hulle geestelik betekenisvolle gesprekke het. Vra jou vriende wat God hulle geleer het die afgelope week; vertel hulle van wat God jou geleer het van Homself. Kleingroepe han hierdie tipe verhoudings fasiliteer.

 

2. Regstel

Soms vereis die maak van dissipels dat jy iemand moet waarsku oor die keuses wat hy maak. Mense groei as jy hulle waarhede leer, maar ook as jy besondere foute regstel. Deel van Christenwees is om te besef dat sonde ons mislei en dat ons ander gelowiges nodig het om die dinge te sien wat ons nie self raaksien nie. Net so moet ons ander uitnooi om ons foute uit te wys – maak dit vir hulle maklik om dit te kan doen. Uiteindelik is die taak van regstelling die hele gemeente se taak. Dit mag selfs nodig wees om so ‘n persoon uit die kerk te ban (Matteus 18:15 – 20). Die oorgrote meerderheid van regstelling in die gemeente  moet in die privaat geskied.

 

3. Modelleer

Jesus het sy dissipels geleer dat hulle mense moet leer om te gehoorsaam. Die doel van dissipelskap is om lewens te verander. Dit behels meer as om ‘n boek te lees met ‘n ander persoon. Ons moet ons hele Christelike lewe voor ander uitleef. Jesus is die voorbeeld wat ons moet volg. Ons kommunikeer nie net met ons woorde nie, maar met ons hele lewens. Dit behels meer as onderrig in ‘n kalskamer. Dit vereis onderrig soos ons kry by vakleerlinge. ‘n Vakleerling leer deur te luister, te kyk en deel te neem. Met verloop van tyd kry die vakleerling meer verantwoordelikhede.

 

4. Liefde

Dissipelskap is ‘n vorm van wedersydse liefde. Ons word dikwels geseën en in die geloof bemoedig deur diegene wat ons leer.  Saam leer ons wat Paulus in Kolossense 3:16 sê: Die boodskap van Christus moet in sy volle rykdom in julle bly. Leer en onderrig mekaar met alle wysheid. Ons moet ander gelowiges liefhê en hulle help wetende dat ons in die proses baie by hulle kan leer. Om dissipels te maak is nie net die werk van kundiges nie – dit is die werk van elke gelowige.

 

Die plaaslike gemeente is die beste plek vir hierdie verhodings om te groei. Ons moet egter onthou dat sekere mense net eenvoudig sal wegbeweeg. Ons moet dit in nederigheid aanvaar.

 

The tyrant dies and his rule is over, the martyr dies and his rule begins –Søren Kierkegaard

 

Leiers wat eensaam is

Leiers is dikwels eensaam. Vir jou emosionele gesondheid en vir langtermyn doeltreffendheid moet jy vriendskappe ontwikkel. Hoekom?

• God het die mens vir gemeenskap en vriendskap gemaak.
• Vriende help ons om geestelik te groei.
• Vriende ondersteun ons as ons swaarkry.
• Vriende hou ons aanspreeklik vir integriteit.
• Vriende is vreugde – ons moet die lewe saam met ander mense geniet.

 

‘n Goeie plek om mense te ontmoet is in die gemeente – sluit aan by ‘n kleingroep en werk as vrywilliger is net twee voorbeelde. Om te weet dat jy vriende nodig het, is net die begin. Om vriendskappe te bou is noodsaaklik. Hoe doen ‘n mens dit? As betekenisvolle, lewenslange vriendskappe wil hê, wees die vriend wat jy graag wil hê.

 

Hoe kan ons vriendskappe ontwikkel? Rick Warren stel ses maniere voor.

1. Belê tyd

Diep vriendskappe gebeur nie sommer per ongeluk nie. Dit is ‘n keuse. Hulle is ook nie onmiddellik of goedlkoop nie. Jy moet kies om tyd en energie te spandeer. Julle moet tyd saam deurbring. Maats kan jou breek, maar daar kan ook ‘n vriend wees wat nader is as ‘n broer (Spreuke 18:24). Jy gaan meer vriende kry as jy in ander belangstel eerder as om te wag tot hulle in jou belangstel.

 

2. Wen hulle vertroue

Vertroue maak of breek vriendskappe. Jy praat met kennise, maar jy vertrou vriende. Baie gee te kenne dat hulle getrou is, maar wie kan ‘n werklik betroubare mens vind? (Spreuke 20:6). Vriende is betroubaar.

 

3. Luister met deernis

Jy kan nie mense liefhê sonder om na hulle te luister nie. Daar is ‘n groot verskil tussen hoor en luister. Elke mens moet maar te gewillig wees om te luister, nie te gou praat nie en nie te gou kwaad word nie (Jakobus 1:19). Wat beteken dit om met deernis te luister? Dit beteken jy kan jouself in iemand anders se skoene plaas. Genesing is dikwels die gevolg van weet dat iemand luister.

 

4. Aanvaar hulle foute

Almal het foute; almal het swakhede en sonde. Niemand is volmaak nie. Aanvaar mekaar dan, soos Christus julle ook aanvaar het, tot eer van God (Romeine 15:6).

 

5. Vier oorwinnings en deel verliese

Wees bly saam met dié wat bly is en treur saam met dié wat treur (Romeine 12:15); As een lid ly, ly al die lede saam; en as een lid geëer word, is al die lede saam bly (1 Korintiërs 12:26). Jy moet leer om die goeie dinge wat met jou gebeur te vier, maar ook die goeie dinge wat met ander mense gebeur – sonder dat jy jaloers of krities word.

 

6. Bring die beste na vore

Jy wil mense help om te word wat hulle nie sonder jou kan word nie. Niemand kan alles wat hy behoort te wees op sy eie regkry nie. Jou beste vriend is die persoon wat die beste in jou na vore bring.