If you won’t stand up for religious liberty for everyone, stop talking about religious liberty. And sure stop raising money off of it. — Russell Moore

Wie is Here van jou geld?

Meeste van ons dink ons is vrygewig – al weerspreek ons optrede dit. Die persoon met die probleem is dikwels die laaste een om te weet dat hy allermins vrygewig is. Hoe kan ons vasstel of ons vrygewig is. J. D Greear identifiseer drie diagnostiese vrae om ons te help.

1. Wat is “eerste” in jou besluiteneming?

Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee (Matteus 6:33). Al hierdie dinge sluit geld, jou beroep, jou kinders en jou vrou in. Al hierdie dinge kom tweede. Elke besluit wat ‘n Christen neem, word voorafgegaan deur die vraag: Wat wil God hê ek moet doen? Eenvoudig, maar dit is verbasend hoe selde die mening van God ingewin word – selfs deur Christene. Vra wat God wil hê en doen dit. Die koninkryk van God moet altyd jou prioriteit wees.

2. Kry God die eerste en die beste van alles wat jy ontvang?

In Genesis 4 lees ons die verhaal van Kain en Abel. Beide bring offers vir God, maar daar was ‘n belangrike verskil. Abel offer van die eerstelinge uit sy kudde. Kain se offer was uit die opbrengs van die land.  Abel gee van die eerstelinge voor hy geweet het hoeveel ander daar nog sou wees. Kain, daarenteen, wag om te sien wat hy het en eers dan gee hy. Abel gee aan God die eerste en die beste; Kain gee vir God uit dit wat oor is. Daarom word net Abel se offer aangeneem.

Aan wie ek die eerste en beste gee, openbaar wie waarlik die Here van my lewe is. Dit wys waaraan ons die meeste waarde heg. Die probleem is nie geld nie; die probleem is wanneer geld God van sy troon afskop.

3. Dink jy aan jouself as ‘n eienaar of rentmeester?

Is my hulpbronne myne om te gebruik net soos ek wil of sien ek dit as God s’n om te gebruik soos Hy wil hê ek moet. As God ons ryklik seën is dit nie om ons standaard van lewe te verhoog nie, maar wel ons standaard van gee. God wat saad verskaf om te saai en brood om te eet, sal ook aan julle saad gee en dit laat groei en julle vrygewigheid ‘n ryk oes laat oplewer (2 Korintiérs 9:10). As jy nie ryklik gee nie, verduister jy in werklikheid God se geld.

I have held many things in my hands, and I have lost them all. But whatever I have placed in God’s hands, that I still possess (Martin Luther). Wat jy hou gaan jy eendag verloor; wat jy gee gaan God vermenigvuldig.

Walking with a friend in the dark is better than walking alone in the light. -Helen Keller

Antwoord jou roeping

Produktiwiteit is om ‘n doeltreffende rentmeester van my gawes, talente, tyd, energie en entoesiasme  te wees sodat dit tot voordeel van ander en ter verheerliking van God is. Almal van ons is verantwoordelik om alles wat ons het, te rig op een groot doel – jy moet produktief wees. Jy moet die beste ding doen (doen goed aan ander) vir die beste doel (om God te verheerlik). Tog sukkel ons almal hiermee. As jou doel duidelik is, hoekom sukkel ons dan?

Produktiwiteitsdiewe

Daar is veral drie belangrike sondebokke:

1. Luiheid

Luiheid was nog altyd ‘n probleem. Die Spreuke-boek het baie oor die luiaard te sê. Voorbeelde:

• ‘n Deur bly op sy skanier draai; ‘n luiaard bly omdraai op sy bed (26:14).
• Die luiaard se verskoning is: “ Daar is ‘n leeu in die pad! Daar is ‘n leeu in die straat (26:13) – verregaande verskonings.

Die luiaard in hierdie boek is iemand wat nie nuwe ondernemings begin nie, nie klaarmaak wat hy begin het nie, hy kan nie die werklikheid in die oë kyk nie en hy is rusteloos, nutteloos en hulpeloos. Sy lewe is chaoties, want sy siel is chaoties. Hy gee min om vir daardie dinge wat God eer en verheerlik – dinge soos harde werk en om goed aan ander te doen.

Daar is iets van die luiaard in almal van ons. As jy ‘n verskoning soek om onproduktief te wees, sal jy een kry – of een maak. Vandag is daar baie maniere om lui te wees en dinge uit te stel. Dink maar aan die tyd wat jy met jou vriende op Facebook spandeer of as jy op YouTube vermaak soek. Teksboodskappe is darem beter as om diep na te dink. Jy word omring deur versoekins om lui te wees. Jy gee meer dikwels toe as wat jy dink.

2. Besig wees

Hier doen jy te veel. Die probleem is dat die samelewing ons oordeel oor hoe besig ons is. Ons kla oor hoe besig ons is, maar ons glo dit verhoog ons waarde. Maar besig wees, moet nie met toewyding verwar word nie. Dit moenie met trou en vrugbaarheid verwar word nie. Dit mag jou laat goed voel oor jouself – dit skep die illusie dat jy dinge gedoen kry. Al wat dit beteken jy gee te min aandag aan te veel dinge – jy prioritiseer die verkeerde dinge en daarom ly jou produktiwiteit.

3. Dorings en dissels

Daar is ook uitdagings wat van buite kom. God het ons geleef om volmaak in ‘n volmaakte wêreld te leef. Maar toe kom die mens in opstand teen God. God verduidelik vir hom dat daar gevolge sal wees. Die aarde is deur jou toedoen vervloek; met swaarkry sal jy daaruit ‘n bestaan maak, jou lewe lank; die aarde sal vir jou dorings en dissels laat uitspruit, en jy sal veldplante eet (Genesis 3:17 – 18). Die straf was nie werk nie, maar die moeilikheid wat met die werk gepaard gaan. Wat eens maklik was, is nou moeilik. Die aarde wat op ‘n stadium net goeie plante voortgebring het, bring nou dissels en dorings voort – dit word ‘n slagveld tussen goeie plante en onkruid. Elke werk het sy dorings en dissels wat produktiwiteit bedreig.

Dit mag luiheid of besig wees of dorings en dissels of iets anders wees. Maar wat jou daarvan weerhou om goed aan ander te doen, is ‘n probleem. Dit is ‘n probleem wat verhoed dat jy die werk wat God aan jou toevertrou het kan doen. Die vermindering van produktiwiteit is eerstens ‘n teologiese probleem – Jy verstaan nie die waarhede wat God in die Bybel openbaar nie of jy kan dit nie toepas nie. Wat ook al die antwoord is, moet geïdentifiseer en uitgeroei word.

There is nothing in the law of God that will rob you of happiness; it only denies you that which would cost you sorrow. —C.H. Spurgeon

Hoe bestudeer ek die Bybel?

Ons gaan voort met die reeks van Mel Lawrenz.

Die rede waarom ons die Bybel bestudeer is om ons band met ons Skepper sterker te maak. Hy het  met ons deur die profete en apostels gepraat. Ons versterk hierdie band deur die ware betekenis van die teks te soek. Dit kan ons slegs doen as ons eers die geheel ondersoek het voordat ons na die dele kyk.

Die basies blok van betekenis is die individuele boek. Hierdie boeke het verskillende vorms – geskiedenis (Josua), ‘n versameling van profetiese uitsprake (Jesaja), ‘n versameling van gedigte en liedere vir aanbidding (Psalms), die verkondiging van die evangelie (Lukas), ‘n persoonlike brief en ‘n beskrywing van ‘n visie van die geskiedenis en toekoms (Openbaring).

As ek ‘n boek in die Bybel bestudeer moet ek die volgende verstaan:

1. Die historiese agtergrond van die boek. Die eerste vyf boeke van die Bybel is geskryf om vir die Israeliete ‘n visie van wie hulle is te gee.  Klaagliedere se oorsprong is die verlies en vernedering van die ballingskap. Openbaring se oorsprong is ‘n tyd van erge vervolging. So kan ons na al die boeke kyk. Hierdie historiese agtergrond help ons om die betekenis van die teks beter te verstaan.
2. Die kultuuragtergrond van die boek. Hiermee bedoel ons hulle gebruike, taal, kuns, leefwyse en wat hulle geglo het. Kultuur is baie ingewikkeld. Die skrywers het geskryf in ‘n besondere kultuur en ons moet hierdie kultuur verstaan om die teks te verstaan. Die Jode beweeg in Kanaän en die stryd tussen die twee kulture staan vir baie eeue sentraal in die verhaal van die Bybel. Ons moet die afgodsdiens en belang van stamme in hierdie tyd verstaan. 1 Korintiërs verwag dat ons iets van die sosiale onsedelikheid van die Griekse kultuur moet verstaan.
3. Die geografiese plasing van die boek. Ons moet verstaan dat Esegiël tydens die ballingskap in Babilonië geskryf is. Boeke vanuit ‘n plattelandse gebied gebruik plattelandse beelde en dié geskryf vanuit stede gebruik stedelike taal en vergelykings.
4. Die politieke agtergrond van die boek. Boeke afkomstig uit ‘n sterk ryk soos tydens die bewind van Dawid en Salomo het een stel bekommernisse. Boeke geskryf tydens oorloë het ‘n ander perspektief. Dié geskryf uit ballingskap het die perspektief van dié wat verslaan en onderdruk is.

Watter stappe moet ons neem om die Bybelse boeke as eenhede te benader?

• Lees ‘n eenvoudige inleiding tot die boek – soos ons dit in studiebybels en Bybelse handboeke kry.
• Lees die hele boek deur – vergeet van hoofstukke en verse. Hulle is in ieder geval eers eeue later bygevoeg.
• Maak notas. Die vrae wat jy het; stellings wat jou verbaas, woorde wat herhaal word, die oorgange wat vloei in die boek wys, die hoofpunte en die passie en bekommernisse van die skrywer.
• Maak ‘n lys van die hoofdele van die boek – jou persoonlike persepsie van die vloei en struktuur van die boek.
• Lees ‘n meer gedetaillerde agtergrond – ‘n kommentaar of ‘n artikel in ‘n Bybelensiklopedie.
• Gaan terug en lees weer die hele boek. Jy tel elke keer iets nuuts op.

Om die hele boek te lees verhoed dat ons fragmentaries lees. ‘n “Vers-‘n-dag” sal nooit die betekenis duidelik maak nie. Ons moet die geheel sien.

The way to do nothing at all is to be continually resolving that you will do everything. —C.H. Spurgeon

My doel in die lewe (2)

In die vorige blog het ons in die algemeen oor die doel van my lewe gepraat Nou gaan ons probeer vasstel wat dit is deur ‘n aantal vrae te vra en antwoorde te gee.

V: Waarom het God jou gemaak?

A: Om Hom te verheerlik.

Dit is die lewensvraag waarmee elke mens op een of ander stadium van sy lewe worstel. Die Bybel het die antwoord: Uit Hom en deur Hom en tot Hom is alle dinge. Aan Hom behoort die heerlikheid tot in ewigheid (Romeine 11:36). Ons bestaan om God te verheerlik. Dit maak ons nederig. As jy dit verstaan en toepas, verander dit alles in jou lewe. Die eenvoudige feit: ek is nie die rede waarom ek hier is nie. As ek vir myself, my eie gemak, heerlikheid en roem lewe, sal ek nie die doel waarvoor God my gemaak het verwesenlik nie.

V: Hoe kan ek God verheerlik in my alledaagse lewe?

A: Deur goeie werke te doen.

Word God net verheerlik as ek my Bybel lees en bid? Kan ek Hom in my alledaagse lewe verheerlik? Jesus self het hierdie vraag geantwoord: Laat julle lig so voor die mense skyn, dat hulle julle goeie werke kan sien en julle Vader wat in die hemel is, verheerlik (Matteus 5:16). Jou goeie werke is soos ‘n lig. As daardie lig skyn verlig dit vir God. As mense daardie lig sien, is hulle veronderstel om God te sien en te sê: Hy is ontsagwekkend. Jy verheerlik nie vir God net as jy oor Hom praat of sy evangelie met ander deel of Hom in die openbaar aanbid nie. Jy verheerlik ook vir God as jy goeie werke doen. Gedra julle altyd goed onder die heidene sodat, al praat hulle kwaad van julle asof julle misdadigers is, hulle julle voorbeeldige lewe kan sien en God kan verheerlik op die dag van afrekening (1 Petrus 2:12).

V: Wat is goeie werke?

A: Dit is dade gedoen tot verheerliking van God en die voordeel van ander mense.

Almal van ons weet hoe om goeie werke te doen wat ons bevoordeel. Maar toe jy verlos is, het God vir jou ‘n hart gegee wat verlang om goed vir ander te doen – al kos dit jou iets. Dit is immers wat God aan die kruis gedoen het. Hy roep ons om Hom na te boots.

V: Ek is ‘n sondige persoon: kan ek goeie werke doen?

A: Ja. Christene kan goeie werke doen as gevolg van die voltooide werk van Christus.

As Christen is jy bewus van jou sonde. Jy kan goeie werke doen – dit is die rede waarom God jou verlos het. Nee, God het ons gemaak wat ons nou is: in Christus Jesus het Hy ons geskep om ons lewe te wy aan die goeie dade waarvoor Hy ons bestem het (Efesiërs 2:10). Paulus gaan selfs verder in Titus 2:14:  Hy het Homself vir ons as offer gegee om ons van alle ongeregtigheid vry te maak en ons van sonde te reinig, sodat ons sy eie volk kan wees wat ywerig is om die goeie te doen. Ek kan werke doen wat vir God vreugde bring – al doen ek hulle nie so volmaak soos ek graag wil nie en al is ek onseker oor my motiewe. Jou beste dade is ver van volmaak, maar God is tevrede met hulle en aanvaar dit met vreugde.

V: In watter lewensgebiede moet jy goeie werke beklemtoon?

A: Te alle tye en op alle lewensgebiede.

Daar is geen gebied in jou lewe waar jy nie aan ander goed kan doen nie. Of julle eet en of julle drink of wat julle ook al doen, doen alles tot eer van God (1 Korintiërs 10:31). In 1 Timoteus 2:9 – 10 skryf Paulus spesifiek vir vroue: Hulle versierings …maar goeie werke , soos dit vroue betaam wat openlik bely dat hulle God dien. By elke geleentheid en binne elke konteks is dit moontlik om goed aan ander te doen.

V: Wat is produktiwiteit?

A: Dit is om ‘n doeltreffende rentmeester van my gawes, talente, tyd, energie en entoesiasme  te wees sodat dit tot voordeel van ander en ter verheerliking van God is.

Produktiwiteit roep jou om jou hele lewe op hierdie een doel te rig: om God te verheerlik en om goed aan ander te doen. Dit roep jou om jou geestelike gawes wat God vir jou gegee het toe Hy jou verlos het, te gebruik. Jy moet jou talente, jou natuurlike sterkpunte, gebruik. Jy moet die 24 uur wat God elke dag vir jou gee bestuur; jy moet jou energie gebruik. Dit betrek selfs jou entoesiasme – die passie en belangstelling wat jy na jou goeie werke kan bring. God roep jou om dit alles te neem en versigtig en getrou te gebruik om aan ander goed te doen.

My doel: Om God te verheerlik deur goed aan ander te doen.