God is too wise to err, to good to be unkind; leave off doubting Him, and begin to trust Him, for in so doing, you will put a crown on His head (Spurgeon).

Kersfees

Een van die voordele van die Kersseisoen is dat mense meer oop is om oor Jesus te praat. Mense aanvaar Hom makliker as Hy as ‘n klein baba in ‘n krip voorgestel word. Maar te midde van hierdie geleenthede vir bespreking is daar ook baie misverstande oor Christus se ware identiteit. Dit geld selfs vir Christene Hulle weet dat Hy die Seun van God en hulle Verlosser is, maar verder weet hulle maar min van Hom. Hulle kan nie verduidelik wie Jesus werklik was nie en hoekom hulle in Hom glo nie.

Charles Stanley gee vir ons ses Bybelse waarhede oor Jesus se ware identiteit.

1. Jesus het bestaan voor Hy in sy moeder se baarmoeder bevrug is.

Omdat die Kersverhaal oor sy geboorte gaan, aanvaar mense  dat sy lewe toe begin het. Daarom dat Jesus soveel ontsteltenis veroorsaak toe Hy sê: Voordat Abraham gebore is, was Ek al wat Ek is (Johannes 8:56 – 59). Net voor sy kruisiging, terwyl Hy met sy dissipels was, bid Hy tot die Vader: U My al voor die skepping van die wêreld liefgehad het (Johannes 17:24) Jesus het saam met die Vader geleef voor tyd begin het.

2. Jesus het ‘n aardse moeder en ‘n hemelse Vader gehad

Dit is waarom Hy die Seun van God genoem word. Op die vasgestelde tyd het Hy sy plek in die hemel verlaat en kom die wêreld binne deur die baarmoeder van ‘n maagd. Dit was ‘n noodsaaklike deel van God se verlossingsplan. ‘n Volmaakte offer was nodig om vir die mense se sondes te betaal. Jesus, omdat Hy deur die Heilige Gees bevrug is, het nie Adam se sondige natuur geërf nie. Hy alleen het ‘n volmaakte lewe geleef. Daarom is Hy ons Verlosser.

3. Jesus was beide God en die Seun van God

In die begin was die Woord daar, en die Woord was by God, en die Woord was self God (Johannes 1:1). Dwarsdeur sy bediening sê Jesus dat Hy God is: Ek en die Vader is een (Johannes 10:30). Hy sê verder: Wie My sien, sien ook Hom wat My gestuur het (Johannes 12:45).

4. Die Vader en die Seun het alle dinge gemaak

God het deur Hom alles geskep wat in die hemel en op die aarde is: alles wat gesien kan word en alles wat nie gesien kan word nie … Voor alles was Hy al daar, en deur Hom bly alles in stand (Kolossense 1:16 – 17). Jesus is gebore in die wêreld wat Hy gemaak het.

5. Jesus se Naam is soos geen ander naam nie

Daar is geen ander naam op die aarde aan die mense gegee waardeur God wil dat ons verlos moet word nie (Handelinge 4:12). Dit is een van die redes waarom die wêreld sê dat Christene onverdraagsaam is – hulle verkondig dat Jesus die enigste weg na die Vader toe is.

6. Jesus sal een dag na die wêreld terugkeer as die Koning en Regter oor alle mense

Nou sal Hy egter nie as ‘n hulpelose baba kom nie. Kyk, Hy kom op die wolke, en al die mense sal Hom sien (Openbaring 1:7). Jesus was nie ‘n gewone baba nie. Dit was nooit die bedoeling dat Hy een maal per jaar as deel van ‘n storie ten toon gestel sal word nie.

Jesus is baie groter as wat mense dink. Kersfees is die ideale geleentheid om sy ware identiteit aan ander te vertel. God open deure vir ‘n gesprek oor sy Seun. Skraap jou moed bymekaar en stap deur daardie deur. Dit is die belangrikste boodskap wat die wêreld moet hoor, want Hy is ons enigste hoop.

When you realize that the antidote to being bad is not just being good, you are on the brink of understanding the Gospel. —Tim Keller

Is Kersfees nog fris en vol passie?

Kersfees is vir ons ‘n besige tyd – ons hardloop heen en weer in oorvol winkels op soek na geskenke; ons koop speiale kos vir ‘n spesiale Kersmaaltyd. Hoe kan ons Kersfees vars hou?

1. Keer terug na jou eerste liefde

Ons fokus graag op die “wat” van Kersfees – die besonderhede van Jesus Christus se geboorte. Ons moet meer op die “hoekom” fokus – hoekom is dit die belangrikste gebeurtenis in die geskiedenis van die wêreld. In Openbaring 2 skryf Jesus ‘n brief aan die gemeente in Efese. Hy het een ding teen hulle: Maar Ek het dit teen julle: julle het My nie meer so lief soos in die begin nie (2:4). Hulle doen die werk, maar hulle het hulle passievolle “eerste liefde” verloor. Daarom herinner Hy hulle: Dink daaraan hoe ver julle al agteruitgegaan het. Bekeer julle en doen weer wat julle in die begin gedoen het (2:5).

2. Fokus op die “hoekom”

Jaar na jaar fokus ons op wat daardie eerste Kersfees gebeur het. As jy jaar na jaar op hierdie besonderhede fokus, word dit naderhand vervelig, want hulle verander nie. Die “wat” praat met ons denke; die “hoekom” praat met ons hart. Natuurlik moet ons nie die “wat” heeltemal vergeet nie. Verduidelik die “wat” om mense tot by God se “hoekom” te bring. Die doel waarom God sy Seun gestuur het, het baie fasette – verlossing, vergifnis, hoop, liefde, ens. As jy onder leiding van die Heilige Gees op die “hoekom” fokus, gaan baie moontlikhede vir jou oop.

3. Bring Jesus tot op straatvlak

Baie gemeentes het spesiale programme vir Kersfees. Word hulle jaar na jaar herhaal word die program maar vaal. Kyk na wat jy doen, hoekom jy dit doen en of dit bereik wat die Here graag deur die gemeente gedoen wil hê. Doen een of ander diensprojek op straatvlak. Hier is ‘n paar moontlikhede:

• Maria was ‘n krisis swangerskap – sy was ongetroud en ‘n tiener.
• Die feit dat daar geen plek vir Josef en Maria in die herberg was nie, is ‘n behuisingskrisis.

[Daar is nog baie ander moontlikhede.]

Hier is twee wesentlike probleme in ons samelewing. Kom ons wees hierdie Kersfees vennote met organisasies wat hierdie  probleme hanteer en maak so weer die kersboodskap vars en lewend.

Mag die Gees van God ons lei om hierdie Kersfees na ons eerste liefde terug te keer. Kom ons fokus op die “hoekom” van Jesus se menswording. Laat ons die gelowiges oproep om op straatvlak by ander mense betrokke te raak.

“God has one destined end for mankind – holiness! His one aim is the production of saints. God is not an eternal blessing-machine for men. He did not come to save men out of pity. He came to save men because He had created them to be holy.” – Oswald Chambers

Wie verdien hulp?

God se werk om lewens te verander, gaan meer oor God se liefde as oor verdienste. Niemand verdien God se hulp nie. Wat ons nodig het, is God se genade. Maar ons is geneig om armes te verdeel in dié wat hulp verdien en dié wat nie hulp verdien nie. Armes wat dit nie verdien nie, glo ons, probeer nie hard genoeg nie – hulle is lui, hulle drink te veel, hulle rook dagga …

Om te vra of mense ons hulp verdien of nie, is die verkeerde vraag. En as jy die verkeerde vraag vra, gaan jy elke keer die verkeerde antwoord kry. In Jesus se tyd is gestermdheid en armoede gesien as die gevolg van sonde. Jesus verwerp hierdie siening. Jesus en sy dissipels kom by ‘n man wat blind was. Sy dissipels vra: Rabbi, deur wie se sonde is dit dat hierdie man blind gebore is: sy eie of sy ouers s’n? (Johannes 9:2). Jesus besluit om op ‘n belangriker vraag te fokus: Dit is nie deur sy sonde nie en ook nie deur sy ouers s’n nie, maar hy is blind sodat die werke wat God doen, in hom gesien sal kan word.

Jesus maak dit baie duidelik dat God se werk om lewens te verander, gaan oor God se liefde en nie verdienste nie. In Matteus 25 plaas Jesus nie die mense in kategorieë – sondaars of nie sondaars – nie. Sy oproep was eenvoudig om uit te reik na diegene met behoeftes en om hulle lief te hê. “Ek was honger; Ek was dors; Ek was sonder klere; Ek was siek.”

As ons met mense wat ons glo nie ons hulp verdien in aanraking kom, moet ons drie beginsels  in gedagte hou.

1. Gee aan hulle dieselfde genade as wat ons ontvang het

Doen aan ander wat ons graag wil hê dat hulle aan ons moet doen. Almal van ons het gesondig; almal van ons skiet tekort aan God se standaarde in ons lewens. As ons sou meet hoeveel genade, vergifnis of liefde ons verdien, skiet ons ver tekort. Ons weet nie genoeg om ons naaste te oordeel nie. Ons weet nie wat werklik in hulle lewens aangaan nie. Net God weet dit. My rol is om lief te hê, te dien en te bid vir verandering.

2. Probeer om te verstaan en nie te oordeel nie

Ons is baie gou om diegene wat ons glo nie ons hulp verdien te oordeel – hulle is nie ons liefde en pogings werd nie. Weerspieël hierdie gesindheid die liefde van Jesus? Probeer eerder verstaan wat met hierdie persoon op ‘n persoonlike vlak aangaan. Hoekom is hy ontmoedig? Hoekom neem hy aan vernietigende gedrag deel? Maar ons moet ook probeer om die sistemiese oorsake vir armoede te verstaan. Hoekom word mense uit die sisteem uitgesluit? Vir mense wat uit ‘n bevoorregde agtergrond kom, probeer jou voorregte verstaan. Onthou dit is makliker vir iemand met hulpbronne om hulp vir sy verslawing te kry.

3. Vra die regte vrae

Die vraag is nie of hierdie persoon my hulp verdien of nie. Die vraag is: “Hoe kan ek God se liefde aan hierdie persoon bewys?” oF: “Watter optrede sal die meeste liefde en verandering in hierdie persoon se lewe teweegbring?” Hierdie vrae beteken dat ek nie oordeel nie. My klem is nou op lewensverandering. Dit laat my toe om in genade te reageer – die genade wat Jesus aan ons gebied het. Jesus kan hierdie mense “wat dit nie verdien nie,” genees. As Hy na hulle kyk, sien Hy ‘n geliefde seun/dogter wat desperaat liefde, genade en vergifnis nodig het.

Daar is so baie mense wat ons dink nie genade en hulp verdien nie. Ek verdien dit ook nie. Dit maak van ons die volmaakte kandidate vir genade. Kom ons reik in hierdie Kerstyd uit na mense “wat dit nie verdien nie.”

Nobody stands under the wrath of God save those who have chosen to do so. —J.I. Packer

Kersfees: Dickens en Starbucks

Kersfees, volgens Dickens, gaan oor sing en blydskap en groot familie-etes met kalkoen. Dit gaan oor Kersbome, kinders wat kersliedere sing en sneeu op die grond en sterre in die hemel. Nou kom Starbucks met ‘n rooi koffiebeler vir Kersfees – sonder enige van Dickens se beelde van Kersfees. Baie mense is kwaad, want Starbucks het nou ons kultuur van Kersfees gestroop.

Scot McKnight sê dit is nie so nie. Kom ons kyk na die temas van die eerste Kersfees.

• Israel se langverwagte Messias het gekom – die hooftema was Jesus as Messias.
• Israel het nie sneeu of mooi koffiebekers of kersbome met baie geskenke gehad nie.
• Daar was ‘n jong meisie, Maria, wat swanger was al was sy ongetroud. Maria aanvaar haar rol.
• Josef verloor sy reputasie, want hy besluit om met ‘n ongetroude vrou wat swanger was, te trou.
• Sterrekykers uit die Ooste het hierdie eerste Kersfees gevier. Hulle het nie geweet wat die belang van die geboorte van Jesus was nie Hulle gee geskenke om te vier wat God gedoen het al het hulle dit nie mooi verstaan nie.
• Herodes was so geïrriteerd deur die nuus dat hy al die seuntjies twee jaar en jonger laat vermoor het. Josef, Maria en Jesus was so bedreig deur Herodes dat hulle na Egipte gevlug het.

Dit was die eerste Kersfees.

Om die wêreld van Jesus as die Messias te vertel, is nie Starbucks se werk nie – dit is die kerk se roeping. Maar dit is nie die kerk se taak om die wêreld van ‘n Kersfees volgens Dickens te vertel nie. Dit is die kerk se taak om die wêreld die ware verhaal van Kersfees te vertel – ‘n God wat in die wêreld gekom het in ‘n familie wat sosiaal beskaamd was om ‘n wêreld wat sosiaal beskaamd was op te lig na die hoogste Naam. Starbucks kan nie daardie storie goed vertel nie.