Laat sy liefde jou lei: Ook jý is sy ribbok-kind!

Laat sy liefde jou lei: Ook jý is sy ribbok-kind! – Milanie Vosloo

”Vriendin, ek is moedeloos! Dit gaan so moeilik met my en ek voel so ver van God. Het Hy my vergeet?”, lees die desperate sms op my foon.

In sulke tye kan ons gerus weer die boek Habakuk lees en hoor hoe moedeloos gesmeek hierdie man van God was. Hy wou so graag hê dat die Here sy volk van die Babiloniёrs moes red. Dit het immers gelyk asof die vyand met moord wegkom terwyl God blind is daarvoor. Dis dan wanneer die Here hom met groot deernis antwoord en sê: Wag geduldig al voel dit of dit stadig gaan. Wees seker dit gaan gebeur, dit sal nie onnodig talm nie. (Habakuk 2:3) Alhoewel die Here nie dadelik hul swaarkry wegneem nie, het Habakuk geweet dat God op sy bestemde tyd wel die volk sal bevry. Hy het sonder twyfel gewéét dat God nooit sy kinders in slegte tye los nie of sal toelaat dat die bose met hulle weghardloop nie.

Onthou vandag: Ook jý is sy ribbokkind! Daarom sal Hy, wanneer jy oor moeilike terrein beweeg, jou veilig laat loop.

Here, hou my vandag styf vas asseblief.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning. Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy liefde jou lei: ‘n “Ja” vir God bring vrede!

Laat sy liefde jou lei: ‘n “Ja” vir God bring vrede! – Milanie Vosloo

“Elkeen wat aan die wil van my hemelse Vader gehoorsaam is, is my eintlike familie.” Matteus 12:50

God se opdragte is nooit goedkoop nie. Dan sou almal mos doen wat Hy vra. Nee, ons Here vra dikwels juis die effens moeiliker dinge van ons. Soms selfs die oёnskynlik onmoontlike. Want ons God weet waartoe ons in staat is wanneer ons dit sáám met Hom doen.

Die heerlikheid van gehoorsaamheid lê dikwels nie in die uitkoms nie, maar in die blote wéte dat jy getrou aan sy stem was. Want gehoorsaamheid bring ongekende vrede in die harte van God se kinders. Dit maak jou vry van jouself, van wêreldse bande, van aardse goed en van skuldgevoelens. Oombliklike gehoorsaamheid, sê Rick Warren, gaan jou meer van God leer as ‘n leeftyd van Bybelstudie. Jy sal sommige bevele trouens nooit verstaan as jy hulle nie eers gehoorsaam nie.

Onthou vandag, jy kan nooit ‘n fout maak as jy aan God gehoorsaam is nie, want wanneer jy doen wat Hy vra, sê wat Hy van jou verwag en leef soos wat Hy hou voorskryf, sal dit altyd tot jou beswil en tot sy eer en verheerliking wees.

Heilige Gees, leer my om u stem nie net te hoor nie, maar sonder aarseling te doen wat U vra.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning. Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy liefde jou lei: ”Selfs al sou …”

Laat sy liefde jou lei: “Selfs al sou …” – Milanie Vosloo

Elkeen van ons het ons eie vyeboom-lewens. Daar’s tye wanneer dit fantasties met ons gaan en die takke van ons harte swaar hang aan al die oes wat ons oplewer. En dan is daar dié fases wanneer dit voel of ons vrug-arm is: tye waarin dit voel of niks wil uitwerk nie, ons aan onsself, ander en die lewe twyfel of ons sommer net ongemotiveerd en moedeloos voel. Ander kere weer beleef ons droёtak-tye wanneer dit voel of ons maar sommer net nóg ‘n boom is wat iewers ongesiens geplant is? Natuurlik is daar dié stadiums wanneer die storms van die lewe ons wortelstelsel ernstig wil uitruk en ons wonder waar ons hulp vandaan gaan kom.

Bid vandag dat jy altyd die vermoё sal hê om te juig oor die feit dat jy ‘n verloste is wat, ondanks alles, ondersteun word deur jou getroue Vader.

Saam met Habakuk getuig ek: U, die Here, is my krag.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning. Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy liefde jou lei: Wat verwag jou Vader van jou?

Laat sy liefde jou lei: Wat verwag jou Vader van jou? – Milanie Vosloo

Voorspoed het mos ‘n manier om ons gou van ons kinderlike en afhanklike geloof te stroop. En wanneer dit gebeur het, is ons presies waar Satan ons wil hê. Wanneer ons op ons eie missie is en ons hand uit God s’n laat gly het, kan die bose met ons maak net wat hy wil. Iets wat tragiese gevolge kan hê!

Liewe medegelowige, wanneer dit met jou goed gaan, jy gelukkig is en op alle terreine van jou lewe die goeie geniet, beleef jy ‘n wonderlike fase van jou lewe. Geníét dit! Want dis God se geskenk van goedheid aan jou! Maar weet ook, dat niks wat jy is of het, daar sou wees sonder die genade van jou Vader nie.

God verwag van ons dat ons in slegte én goeie tye Hom met dieselfde passie sal aanbid. Dis wanneer ons dubbele seёn ervaar!

Dankie Here vir u onuitspreeklike genade en seёn-op-seёn in my lewe! Dankie!

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning. Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo