01 September: Die twee V’s – vryheid en verantwoordelikheid. – Jan van der Watt
Gal 4:21-31 (fokus 4:21-31)
Vryheid en Verantwoordelikheid word altwee met ʼn V gespel – dit hoort saam. Verantwoordelikheid trek die grense van vryheid. Die vryheid van die vis in die see beteken dat dit in die see moet bly. Die vrye vlug van die arend is net mootlik as die arend sy vlerke sprei om deur die lug te gly. ʼn Vis op die land of ʼn arend sonder oop vlerke is nie vry nie.
Toe God ons vrygemaak het, het Hy ons ook soos die vis in die vrye oseaan van sy liefde losgelaat. Daar, saam met Hom, is ons vry. Maar as ons soos ʼn vis op die droeë land uitswem verloor ons die vryheid wat God ons gegee het. Om jou rug op God se verlossende liefde te draai, om jou verantwoordelikhede teenoor Hom nie meer na te kom nie, is om jou eersgeboortereg op goddelike vryheid te verloor.
Om jou hande en jou hart van God af weg te trek en net vir jouself te hou, beteken om soos die arend te probeer vlieg met sy vlerke styf teen sy lyf. Sy vrye vlug is daarmee heen.
Om volledig vrye Christen te wees, beteken om volledig verantwoordelike Christen te wees.