20 Julie: Pas jou liggaam mooi op. – Jan van der Watt

1 Kor 6:12-7:9 (fokus 6:12-20)

‘n Mens kan nie sommer met jou liggaam doen wat jy wil nie. Dit is net so belangrik vir die Here as wat jou gees is. Hy het altwee gemaak en altwee behoort aan Hom.

Paulus moes destyds hierdie boodskap net weer onderstreep, want onder die ryker vry mense was daar die idee dat jy letterlik enigiets kon doen (6:12), veral by drinkpartytjies. Dit is hoe hulle vryheid verstaan het, om eenvoudig te kan doen wat jy wil. Selfs hulle groot filosoof, Aristoteles, het vryheid so gedefinieer. By die groot drinkpartytjies was daar natuurlik vroue ook en dan was daar geen keer nie. Teen die agtergrond skryf Paulus 6:12-20.

Christene se vryheid word altyd beperk, omdat hulle nooit alleen is nie. God se Gees is in hulle (6:19). Saam met Hom is hulle vry om te doen wat hulle wil, mits die Gees gemaklik daarmee voel. Dit geld ook vir hulle liggame. Hulle moenie dinge met hulle liggame doen waarvan die Gees nie hou nie. Immers, destyds het die mense alles wat hulle kon gedoen om hulle tempel mooi te hou. Hulle sou hulle laaste sente daarvoor gee. Ons liggame is nou die blyplek of tempel van die Gees. Net so moet ons alles in ons vermoë doen om ons liggame so gesond en fiks te hou sodat dit ‘n goeie blyplek vir die Gees kan wees.

Jou liggaam behoort ook aan die Here (6:20). Pas dit mooi op.