The truly wise are humble because they know they still have so much to learn. —Don Whitney

Jesus by die tempel

Die Nuwe Testament vertel ons baie min van Jesus se lewe vanaf sy geboorte tot aan die begin van sy bediening. Ons lees: Die Kindjie het gegroei en sterk geword, en Hy was vol wysheid, en die genade van God was op Hom (Lukas 2:40). In Lukas 2:41 – 52 beskryf Lukas wel een besondere geleentheid – Jesus by die tempel. In vers 49 lees ons Jesus se eerste woorde wat opgeteken is: Waarom het u na My gesoek?  Het u nie geweet dat Ek in die huis van my Vader moet wees nie. Hiermee gee Hy duidelik te kenne dat Hy die Seun van God is. Hy sê dat sy roeping is om te doen wat die Vader van Hom vra en om die Vader te verheerlik – in alle dinge en te alle tye.

Van die apokriewe boeke vertel meer oor Jesus se kinderjare. Dit vertel van Jesus wat sy mag vir nietige dinge gebruik het. Daar is vandag baie belangstelling in die apokriewe boeke, want Dan Brown se DaVinci Code sluit baie van die spekulasie wat ons in die apokriewe boeke kry, in.

In die tempel sit Jesus tussen die geleerdes – die teoloë van sy dag. Almal wat Hom gehoor het, was verbaas oor sy insig en sy antwoorde. Sonde belemmer ons vermoë om duidelik te dink. Almal van ons maak foute in ons denke. Al lees ons dieselfde Bybel is daar gedeeltes waaroor ons verskil, want ons kom na die Skrif met sekere vooroordele wat ons nie sommer kan ignoreer nie. Jesus se denke, daarenteen, was nie deur sonde beïnvloed nie, want Hy was sondeloos. Daarom dat die geleerdes verbaas was oor sy insig en antwoorde.

Jesus is na die tempel gebring toe Hy 12 jaar oud was. Dit was die paasfees. Na die paasfees vetrek Josef en Maria terug na Nasaret. Hulle reis in ‘n groot geselskap.  Daarom kom hulle eers na ‘n dag agter dat Jesus nie met die geselskap is nie. Hulle draai terug. Drie dae lank soek hulle Hom voordat hulle Hom in die tempel kry. Maria was ontsteld en wil weet waarom Jesus so met hulle gemaak het – jou vader en ek het met angs na jou gesoek.

Jesus wys sy moeder so ligweg tereg, Sy moes geweet het dat Hy in die huis van sy Vader moet wees. Sy het immers heelwat openbarings gehad. Selfs op die ouderdom van 12 jaar weet Jesus wat sy taak is: Hy was onderworpe aan die Vader vir die werk waarvoor Hy geroep is.

Wat kan ons uit hierdie gedeelte leer?

• Jesus onderwerp Hom aan sy aardse ouers. Hy gaan saam met hulle terug Nasaret toe en Hy was aan hulle onderdanig (2:51). Net so moet ons ook onderdanig wees aan diegene wat gesag oor ons het.
• Jesus het sy roeping voltooi. Daarom kan ons ook nou vir God Vader noem. Ons moet Hom vir hierdie voorreg loof.

High degrees of Christian assurance are simply not compatible with low levels of obedience. —Sinclair Ferguson

Die Ontwikkeling van die Psalms

Die skrywers van die Septuagint (tussen derde en tweede eeu voor Christus) het reeds die psalms min of meer in sy huidige vorm geken. Dit was egter die einde van ‘n lang proses. Hoe het hierdie proses verloop? Ons weet nie wanneer die individuele psalms geskryf is nie, maar ons kan wel iets van die proses naspeur.

In die Psalms is daar ‘n aantal subversamelings. Hierdie subversamelings het soortgelyke opskrifte en gebruike en hanteer soortgelyke onderwerpe. So kry ons twee openingsversamelings van Dawid (Psalms 3 – 41 en 51 – 72). Aan die einde van Psalm 72 lees ons: Hier eindig die gebede van Dawid, seun van Isai. Dit geld egter net vir die versameling en nie die hele boek nie, want later kry ons weer Psalms van Dawid. Daar is ook twee versamelings van die Koragiete (42 – 49 en 84 – 87 met ‘n Dawidpsalm tussenin – Psalm 86). Daar is psalms van Asaf (Psalm 73 – 83) en verdere Dawidspsalms (138 – 145).

Soms is dit duidelik hoekom psalms op mekaar volg, maar meestal is hulle losstaande. Psalms wat op mekaar volg sluit in 1 en 2, 3 en 4, 16 en 17, 30 en 31 en 32 en 33.

Daar is ook psalms wat sekere eienskappe deel. So byvoorbeeld gebruik Psalms 42 – 83 die woord Elohim vir God en nie YHWH nie. Psalms 93 en 95 – 99 vier God se koningskap. Psalms 113 – 118 staan as die Egiptiese Hallel bekend en is tydens die paasfees gebruik. Psalms 120 – 134 is weer pelgrimspsalms,

Hierdie versamelings is mettertyd saamgevoeg in een bundel. Daarom is daar geen struktuur in die psalms wat ons kan help met sy inhoud nie. Die Midrasj (=antieke kommentaar op deel van die Hebreeuse Skrif wat aan die teks aangeheg is) sê: As to the exact order of David’s psalms, Scripture says elsewhere: Man knoweth not the order thereof. Ons moet aanvaar dat slegs God die orde verstaan: Wie soos Ek is, laat hom dit sê, laat hom sy saak stel en dit aan My voorlê; laat hom ‘n verklaring gee van wat gebeur het vandat Ek my volk lank gelede gemaak het en ook wat sal gebeur; laat hy vertel van die dinge wat kom (Jesaja 44:7). Ons moet aanvaar dat die psalms nie soos Genesis of Jesaja werk nie. In plaas van soek na struktuur van die psalms as geheel moet ons eerder probeer om die tipe psalms wat herhaaldelik voorkom, verstaan.

Though you hoard up wealth, gold is nothing but dust to a dying man. —C.H. Spurgeon

Drie lofliedere

Dwarsdeur die Ou Testament word God se verlossingsoptredes besing. Dink aan die liedere van Moses (Eksodus 15) en Debora (Rigters 5). Baie van hierdie lofliedere kry ons in die psalms. In Lukas 1 en 2 kry ons drie lofliedere wat die koms van die Messias vier. Vandag staan hulle bekend volgens die eerste woord van elk in die Romeinse vertaling.

• Die Magnificat

Hierdie is die Loflied van Maria (Lukas 1:46 -55). Sy is oorweldig deur die grootheid van die Here dat Hy juis vir haar gekies het as moeder van die Messias. Sy sien dit as ‘n voorreg: elke nuwe geslag sal my gelukkig noem. Sy gaan verder en sê dat God magtige dinge gedoen het: hoogmoediges in hulle eiewaan het Hy uitmekaargejaag; maghebbers het Hy van trone afgeruk. Daarenteen het Hy behoeftiges met goeie gawes oorlaai. Sy verbind ook Jesus se koms met God se beloftes aan Israel. Hy vervul die beloftes wat Hy aan Abraham gemaak het.

• Die Benedictus

Dit is die loflied van Sagaria (Lukas 1:68 – 79). Sagaria hanteer soortgelyke temas as Maria in sy lied. Die Jode het verlang na die dag wat die Here self sou kom. Dit sou ‘n donker dag wees, maar ook ‘n dag van verlossing – ‘n dag van hoop. Hy loof die geboorte van Jesus as ‘n besoek van die Here om te verlos. Sagaria verbind ook die koms van die Messias met die verlossingsbeloftes aan Abraham.

• Die Nunc Dimittus

Hierdie is die lied van Simeon (Lukas 2:29 – 32). Josef en Maria bring vir Jesus na die tempel. God het belowe dat Simeon nie sou sterf voordat hy die Messias gesien het nie. Toe Jesus na die tempel gebring word, herken Simeon Hom dadelik as die beloofde Messias en sing sy kort lied.

Hierdie drie liedere herinner ons weer daaraan dat ons die persoon en werk van Jesus Christus nie kan verstaan sonder dat ons die Ou Testamentiese beloftes verstaan nie. Martin Luther het gesê dat die lied van Maria gaan oor die groot dade van God ter versterking van ons geloof, vertroosting van die armes en tot verskrikking van die magtiges.

• Maria se loflied versterk ons geloof en vertroos ons met die waarheid van God se trou. Dit hou ons nederig. God wat magtig is en groot dinge vir Maria gedoen het, kan ook groot dinge vir ons doen,
• Sagaria se loflied sien God se tere genade teenoor die mens. Ons moet Hom wat uit Maria gebore is, dank vir ons verlossing.
• Simeon se lied se belang word so deur J. C. Ryle beskryf: If they, with so few helps, lived such a life of faith, how much more ought we with a finished Bible and a full Gospel. Let us strive, like them, to walk by faith and look forward.

If your actions inspire others to dream more, learn more, do more, and become more, you are a leader – John Wuincy Adams

Wat het Jesus vir jou gedoen?

As jy hierdie vraag vra, is die gewone antwoord: “Jesus het aan die kruis vir my sondes gesterf.” Dit is waar. Maar is dit die volle verhaal? As Jesus net aan die kruis moes sterf vir my sondes kon Hy mos daardie Goeie Vrydag neergedaal het uit die hemel om gekruisig te word. Hy kon drie dae later weer opgestaan het en na die hemel teruggekeer het.

Was dit nodig dat Jesus in ‘n stal gebore moes word? Was al die swaarkry en verdrukking nodig? Was die vyandigheid wat Jesus van die Joodse leiers moes verduur nodig?  Beteken dit niks dat Jesus vir 33 jaar op aarde geleef het nie?

Jesus het nie net as Verlosser gesterf nie, maar Hy het ook in volmaakte gehoorsaamheid geleef. Hoekom? Sodat sy geregtigheid aan almal wat op Hom vertrou, oorgedra kan word. As ek op die oordeelsdag voor God staan, sien Hy vir Jesus en sy geregtigheid oor my. Deur sy gehoorsaamheid verlos Jesus sy mense vir die ewige lewe.

Ons moenie Jesus se werk op aarde onderskat deur te eng net op sy kruisiging te fokus nie. Ons moet na Jesus se lewe kyk en sien dat Hy besig was om sy lewenslange roeping te vervul. Leer uit sy lewe.