High-soaring, sun-soaked, fruit-laden branches are owing to deep-reaching, rock-splitting, truth-fed roots. – John Piper

Laat u wil geskied

Ek gaan ‘n hele aantal blogs gebruik om weer na die Ons Vader-gebed te kyk. Ek gaan onder andere van R. C. Sproul se boek The Prayer of the Lord gebruik maak.

Sekerlik die algemeenste vraag wat Christene vra, is: Hoe weet ek wat die wil van God is? Laat u wil ook op die aarde geskied, net soos in die hemel. Hierdie petisie vloei voort uit die vorige twee. Maar hoe moet ons die wil van God verstaan? Daar is drie maniere waarop die meestal verstaan word:

• Die soewereine wil van God. Dit beteken wat God beveel, gebeur. Toe Hy sê dat daar lig moes wees by die skepping was daar lig. Toe Christus vir Lasarus beveel om uit die graf te kom, gebeur dit onmiddellik.
• Die voorskriftelike wil van God. Dit het met sy wet en opdragte – sy voorskrifte – te doen. God het hulle gegee om die gedrag van sy sy skepping te reguleer. Dit is God se wil dat jy nie moet moord pleeg nie. Ons kan hierdie wil oortree – en doen dit ook elke dag.
• Die wil van God ten opsigte van sy basiese gesindheid – wat Hom tevrede stel en wat Hom ongelukkig maak.

Wat presies het Jesus bedoel toe Hy gesê het: Laat u wil geskied? Dit kan ‘n pleidooi wees dat sy soewereine wil geskied. Ons weet dat dit uiteindelik sal gebeur, maar intussen moet ons gereeld hieraan herinner word. Ons het ‘n vrye wil, maar dit is altyd ondergeskik aan God se soewereine wil.

Jesus kwalifiseer hierdie petisie. Hy sê nie net laat u wil geskied nie, maar voeg by: op aarde net soos in die henel. Dit wys vir ons dat daar ‘n verskil is tussen die uitvoering van God se wil op aarde en in die hemel. Ons weet dat die soewereine wil van God altyd uitgevoer word. Waarskynlik verwys Jesus hier na God se voorskriftelike wil. Hierdie wil word altyd in die hemel uitgevoer, want daar is geen sonde nie. In die hemel word God voortdurend verheerlik en die gelowiges vind vreugde in Hom.

Jesus bevestig met hierdie petisie dat die wil van God in die hemel gedoen word, maar Hy bevestig ook dat dit nie op aarde gedoen word nie. Mense op aarde streef nie daarna om God te verheerlik nie; mense op aarde soek nie die koninkryk van God nie. Laat u wil geskied is ‘n uitdrukking van geloof en onderdanigheid – ons onderwerp ons aan God.

We are saved as a gift of God’s grace so that we might be sent as a gift of God’s grace. —Kevin Dibbley

Stel doelwitte

Doelwitte is uniek en moet ons unieke persoonlikheid en passie weerspieël. Elkeen het sy eie manier om sy doelwitte te bepaal. Mark Batterson (The Circle Maker) beskryf tien stappe om ons te help om ons doelwitte te stel.

1. Begin met gebed.

Wat van groot waarde is, is om jou vir ‘n dag of twee te onttrek. Dit gee aan jou die geleentheid om te droom, te bid en te dink. As jy jou doelwitte in die konteks van gebed stel, is dit waarskynliker dat hulle God sal verheerlik.

2. Stel jou motiewe vas

Kyk lank en hard in die spieël. Maak seker jy stel jou doelwitte vir die regte rede. ‘n Algemene doelwit in baie gemeentes is byvoorbeeld om hierdie jaar soveel rand in te vorder. ‘n Beter doel sou wees dat ons as gemeente hierdie jaar soveel rand gaan weggee.

3. Dink in kategorieë

Moenie iemand anders se doelwitte net so oorskrywe nie. Jy kan hulle wel gebruik om idees te kry. Om jou te help kan jy jou doelwitte in kategorieë verdeel (voorbeelde:gesin. Fisies, familie, ondervindings, ens). Alle doelwitte moet ‘n geestelike dimensie hê.

4. Wees spesifiek

As ‘n doelwit nie meetbaar is nie, sal ons nooit weet of ons dit bereik het nie. Dit is nie altyd maklik nie. Dit is beter om te hoog te mik en die doelwit nie te bereik nie, as om te laag te mik en dit maklik te bereik.

5. Skryf dit neer.

The shortest pencil is longer than the longest memory. As jy nie jou doelwitte neergeskryf nie, het jy hulle nie werklik gestel nie. As jy ‘n doelwit neerskryf, hou dit jou aanspreeklik.

6. Sluit ander in

Niks versterk ‘n verhouding soos gedeelde doelwitte nie – hulle is die gom van verhoudings. A jy ‘n doelwit met iemand anders deel, vermeerder dit jou vreugde. Baie hiervan het natuurlik met jou familie te doen.

7. Vier fees langs die pad

As jy ‘n doelwit bereik het, vier dit.

8. Droom groot

Jou lys sluit groot en klein doelwitte in. Sommige is korttermyn en ander is langtermyn. Maar daar moet ‘n paat baie groot doelwitte wees. Groot doelwitte maak van ons groot mense.

9. Dink lank

As ons groot wil dink, moet ons langtermyn dink. As jy wil droom totdat jy die dag doodgaan, moet jy doelwitte stel wat ‘n leeftyd neem om te bereik. Dit is nooit te laat om te begin nie.

10. Bid hard

Die stel van doelwitte begin en eindig met gebed. Doelwitte wat deur God bevestig word, word in gebed gebore en gebed is wat hulle tot by vervulling bring. Gebed help ons om geleenthede wat God vir ons skep, raak te sien

Isolation + feeding on vanity = soul-starving loneliness. Isolation + communion with God = soul-feeding solitude. – John Piper

Laat u koninkryk kom

Ek gaan ‘n hele aantal blogs gebruik om weer na die Ons Vader-gebed te kyk. Ek gaan onder andere van R. C. Sproul se boek The Prayer of the Lord gebruik maak.

Ons sien God se Naam as heilig. Dit plaas ons in ‘n posisie van aanbidding – ons sien God as die Een wat algeheel heilig is. Dit bring ons op ons knieë voor Hom. Ons buig voor God soos ‘n onderdaan voor sy aardse koning buig. Daarom: Laat u koninkryk kom. Die eerste petisie vloei oor in die tweede een.

Jesus begin sy bediening met die aankondiging dat die koninkryk van God naby gekom het. Dit beteken dat in die verhaal van verlossing wat deur die Bybel ontplooi word iets nuuts gaan gebeur.  Maar die koninkryk van God was nog altyd daar. God moes nie wag tot die tyd van die Nuwe Testament om as soewereine Heerser gekroon te word nie – Hy was van die begin af Koning oor die heelal. By Sinai gee God aan Israel sy wet. Daarin sê Hy onder andere: Ek is die Here jou God … Jy mag naas My geen ander gode hê nie (Eksodus 20:2 – 3).

In Israel se geskiedenis breek daar ‘n tyd aan waar hulle God as hulle koning verwerp – hulle wil soos die ander nasies ook ‘n koning hier op aarde hê. Dit gebeur nadat God verklaar het dat Hy Israel se koning is. Toe Samuel by God hieroor kla, sê God vir hom: Hulle het jou nie verwerp nie; hulle het My verwerp as koning oor hulle (1 Samuel 8:7). Samuel waarsku hulle teen ‘n aardse koning wat net vat. God is egter ‘n koning wat net gee en gee.

Hierdie gevoel teen die heerskappy van God is so diep in die mens se hart ingewortel dat die mense Jesus voor die Romeinse gesag gebring het. Die aanklag was dat Jesus Homself Koning gemaak het. Net soos God deur die antieke Israeliete as koning verwerp is, net so is Jesus verwerp. In Johannes 18 kry ons ‘n interessante gesprek tussen Jesus en Pontius Pilatus. Pilatus wil weet of Jesus die koning van die Jode is. Jesus antwoord hom: My koninkryk is nie van hierdie wêreld nie … As my koninkryk van hierdie wêreld was, sou my onderdane geveg het sodat Ek nie aan die Jode uitgelewer sou word nie. Maar nou is my koninkryk nie van hier nie. Pilatus vra weer of Jesus ‘n koning is waarop Jesus antwoord: Ek is ‘n koning … Hiervoor is Ek gebore en hiervoor het Ek na die wêreld toe gekom. Jesus getuig hier van die heerskappy van die ware Koning. As Hy sy volgelinge oproep om te bid laat u koninkryk kom, maak Hy hulle deelnemers aan sy sending: om die koninkryk van God oor die hele wêreld te versprei.

Wat is die koninkryk van God: Die maklike antwoord is dat dit die gebeid is waaroor God regeer. Omdat ons weet dat God die Skepper van die heelal is, moet die hele wêreld sy ryk wees. Die koninkryk van God is waar Hy regeer en Hy regeer orals. Daarom is die koninkryk van God orals.

In die Nuwe Testament kom Johannes die Doper in die woestyn met ‘n ernstige aankondiging: Bekeer julle, want die koninkryk van die hemel het naby gekom (Matteus 3:2). Jesus kom met dieselfde aankondiging. As die koninkryk van God dan die heelal is, hoekom sal iemand dan sê die koninkryk het naby gekom? Johannes die Doper en Jesus sien iets meer in hierdie konsep van die koninkryk van God.

Hulle verwys na die koninkryk waar God se Messias sal heers. Hy is nie net die mense se Verlosser nie, maar ook hulle Koning. Net voor Jesus se hemelvaart vra sy dissipels nog vir oulaas ‘n vraag: Here, is dit nou die tyd dat U die koninkryk van Israel weer gaan oprig? (Handelinge 1:6). Jesus antwoord hulle: Dit is nie vir julle om die tyd en omstandighede te weet wat die Vader in sy eie krag bepaal het nie. Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en in Samaria en tot in die uithoeke van die wêreld.

Die koninkryk het naby gekom, want die Koning van die koninkryk was by hulle. Met sy koms na die wêreld vestig Jesus God se koninkryk op aarde. Hy het dit nie voltooi nie, maar Hy het dit begin. Jesus se koninkryk is nie iets van die toekoms nie. Christus is op hierdie oomblik Koning: Aan My is alle mag gegee in die hemel en op die aarde (Matteus 28:18). Daarom sê Paulus: Maar ons is burgers van die hemel (Filippense 3:20).

Laat u koninkryk kom? Waarvoor bid ons as ons dit sê? Daar is ‘n logika in die petisies in hierdie gebed. Ons begin deur te pleit dat God se Naam geheilig sal word. As dit nie gebeur nie, sal sy koninkryk nie kom nie. Maar ons wat glo dat God se Naam heilig is, het die verantwoordelikheid om te verseker dat sy koninkryk sigbaar kom. Ons doen dit deur so te leef dat dit van die werklikheid van God se koninkryk getuig.

He who would learn to serve must first leard to think little of himself – Dietrich Bonhoeffer

Van kopkennis na hartstoepassing

Vertrou volkome op die Here en moenie op jou eie insigte staat maak nie (Spreuke 3:5). Hoe kom ek hiervandaan na die persoonlike bevestiging van die psalmis in Psalm 56:4 – 5 beweeg: Die dag as ek bang word, vertrou ek net op U. In God, wie se woord ek prys, in God stel ek my vertroue, ek is nie bang nie. Met ander woorde, hoe kom ek van kopkennis na hartstoepassing? Hier is ‘n paar moontlikhede.

1. Jy moet realistiese verwagtings van beide lyding en diens hê

God se beloftes skakel nie pyn, vrees en hartseer uit nie. Natuurlik gee die evangelie vir ons rus in hierdie wêreld, maar daar is ook geen twyfel dat lyding deel van God se plan is nie. Ons verheug ons ook in die swaarkry, want ons weet: swaarkry kweek volharding, en volharding kweek egtheid van geloof, en egtheid van geloof kweek hoop (Romeine 5:3 – 5). Ons probeer dikwels God se beloftes soos ‘n towerstaf gebruik wat elke pyn kan wegneem. Paulus maak dit egter duidelik dat God se beloftes ons nie van pyn beskerm nie. Ja, die evangelie kleur ons pyn met hoop wat dit meer draaglik maak.

2. Bid en lees jou Bybel daagliks en woon die weeklikse byweenkomste by

Hoe minder ons God se woord lees, hoe minder lyk dit vir ons of dit op ons van toepassing is. As ons ons aptyt vir die dinge van God verloor, moet dit ons nie verbaas as ons nie God se teenwoordigheid in ons lewens aanvoel nie. ‘n Mens leef nie net van brood nie maar van elke woord wat uit die mond van God kom (Matteus 4:4).

3. Kry ‘n Skrifgedeelte en memoriseer dit

Memorisering van die Skrif is belangrik. Ons het daarvan vergeet in die tyd van soekenjins op ons rekenaars. Memoriseer ‘n gedeelte; dink daaroor na; kry alles wat jy moontlik kan daaruit; kry ‘n ander gedeelte en doen dieselfde.  Die vermoë om onmiddellik een van God se waarhede toe te pas, help ons om ons emosies in die vorm van die kruis en nie in die vorm van die wêreld te buig nie.

4. Kry ‘n Christelike lied wat aanklank vind terwyl dit God se waarheid kommunikeer

Musiek is kragtig en help ons om ons emosies tereguleer. As ons liedere kan sing wat die waarhede van die Skrif kan versterk, kan ons moeilike tye beter hanteer. Dit is nie toevallig dat die grootste boek in die Bybel – die psalms – ‘n boek van liedere is nie.

5. Kry ‘n plek om in te skakel en te dien

Ons moet ‘n hoër prioriteit aan ander as aan onsself gee Dit help ons om uit die dryfsand van selfbejammering te kom, want ons besef dat ons nie alleen in ons swaarkry is nie. As ons ander probeer oplig deur God se beloftes op hulle lewens toe te pas, kry ons ook krag

Om God se beloftes van genade op ons seer harte gevul met vrees toe te pas, is waar dinge ‘n werklikheid vir baie Christene word. Hierdie vyf voorstelle gaan jou nie oornag verander nie, maar dit sal jou help om die veiligheid van God se beloftes en die deernis van sy versorging te voel.