“The remarkable thing about God is that when you fear God, you fear nothing else, whereas if you do not fear God, you fear everything else.” – Oswald Chambers

God het van oordeel gepraat (2)

In die vorige blog het ons gesien dat God se oordeel onvermydelik is. Hoekom is God kwaad?  Deur net na Romeine 1 te kyk, kry ons ‘n hele aantal antwoorde. Kom ons kyk na ‘n paar:

• Omdat, al weet hulle van God, hulle Hom nie as God eer en dank nie (1:21).
• In die plek van die heerlikheid van die onverganklike God stel hulle beelde wat lyk soos ‘n verganklike mens of soos voëls of diere of slange (1:23).
• Dit is hulle wat die waarheid van God verruil vir die leuen. Hulle dien en vereer die skepsel in plaas van die Skepper, aan wie die lof toekom vir ewig (1:25).

Ons hanteer dinge wat God gemaak het asof dit Hom kan vervang. Die dinge wat ons moes help om God te eer en te ken, word nou teen Hom gebruik – dit word wapens om die kennis van God te vernietig. Ons draai weg van God se waarheid en verruil dit vir die leuen.

Wat doen die mens as hy sy rug op God keer? Hy maak vir hom ‘n meer aanvaarbare “God.” Kyk net wat het by Sinai gebeur. God gee aan die hele volk die tien gebooie. Luister na die tweede gebod: Jy mag nie vir jou ‘n beeld of enige afbeelding maak van wat in die hemel daarbo of op die aarde hieronder of in die water onder die aarde is nie (Eksodus 20:4). Maar die mense word moeg om te wag vir Moses om van die berg af te kom. ‘n God wat jy nie kan sien nie en wat so tydsaam is, was vir hulle onaanvaarbaar. Daarom maak hulle vir hulle ‘n ander “god” – ‘n goue kalf (Eksodus 32).

Luister wat sê die volk oor hierdie goue beeld: Hier is jou God wat jou uit Egipte bevry het, Israel! Aäron bou selfs ‘n altaar waarop die volk offers vir hierdie nuwe “god” kan bring. Hulle glo dat aanbidding vir die ware God moes wees, maar hulle wou Hom nie in sy huidige vorm hê nie. Hulle soek ‘n god wat hulle sou toelaat om te leef soos hulle wil.

Volgende keer gaan ons kyk na die aanbidding van afgode en demone.

To abandon prayer is to embrace atheism. —Alec Motyer

Naäman

Ons kry die verhaal van Naäman in 2 Konings 5:1 – 16. Naäman was ‘n belangrike man. Hy was ‘n groot en trotse man – die bekendste generaal in Aram. Maar hy het melaats geword. Die siekte sou hom sy posisie ontneem – hy sou uit die samelewing geban word. Daar was geen genesing nie. Hierdie diagnose vernietig lewens.

In Naäman se huishouding was ‘n jong dogtertjie wat uit Israel ontvoer is. Die laagste in die huishouding. Naäman is desperaat en daarom luister hy na haar. Die meisie se geloof in die God van Elisa is groot. Hoe vernederend om na ‘n vyand te luister en dan nog na ‘n vyand te gaan vir hulp. Maar Naäman gaan.

Maar in plaas van die profeet self te sien, moet die trotse Naäman ‘n boodskapper sien – asof sy melaatsheid nie voldoende vernedering was nie. Die boodskapper sê dat Naäman hom in die Jordaan moet gaan was. Die riviere in sy land was veel beter as die Jordaan. Sy amptenare pleit by hom. Uiteindelik gaan was hy hom in die Jordaan en word genees.

Wat leer ons uit hierdie storie?

As Jy nie ‘n gelowige is nie

Elkeen van ons glo dat ons weet wat reg is, maar diep binne in ons weet ons dat dit nie waar is nie. Wat verkeerd is, is sonde. Nou probeer ons allerhande maniere om van die sonde en sy gevolge ontslae te raak – sonder sukses. Jesus sê: Ek is die weg en die waarheid en die lewe. Niemand kom na die Vader  toe behalwe deur My nie (Johannes 14:6).

Is  die riviere van Damaskus, die Abana en die Parpar, nie beter as al die waters van Israel nie? Kan ek my nie daarin was om rein te word nie?  Nee, God het ‘n pad gemaak om gereinig te word – net een pad. Vir Naäman klink dit na dwaasheid. Mense kan alle maniere probeer om rein te word –Mohammed. Bhoeddha … Maar God het ‘n eksklusiewe pad gemaak – Jesus. Die lewende, genesende water is net by Hom te vinde.

God mag jou vra om jou trots in jou sak te steek en na een van daardie Christene wat jy so haat, te luister. Die boodskap van genesing en lewe kom dikwels van iemand wat jy normaalweg verontagsaam. Moenie dat ‘n meerderwaardige gesindheid jou verhinder om jouself te verneder om te doen wat jou sal red.

As jy ‘n gelowige is

Israel was vol melaatses, maar hulle is nie genees nie. God genees hier ‘n vyand van Israel. God soek diegene wat Hom sal glo – al moet Hy buite die grense van die kerk gaan om hom te vind. Moenie dink omdat jy binnekant is jy nie as buitestaander  beskou kan word nie. Naäman luister na ‘n jong dogtertjie. Hy doen wat hy beveel word al klink dit nie vir hom rasioneel nie. God werk in die lewens van mense wat Hom vertrou. Hy gebruik die laagste van die laagste om met die hoogste te praat.

Wees versigtig na wie jy luister. Wees versigtig hoe jy reageer. Selfs Christene sal ‘n onvoldoende rivier verdedig as hulle op hulle eie wysheid vertrou Ons moet ook die storie verder lees. Gehasi, Elisa se dienaar, het sekerlik baie wonderwerke gesien. Tog het hy nie geloof nie. Die wêreld is vol Gehasi’s. Ons moenie sommer aanvaar dat ons beter as hy is nie.

God het ‘n pad in Jesus gemaak. Net een pad. Kom, verneder jouself en word rein.

 “No healthy Christian ever chooses suffering; he chooses God’s will, as Jesus did, whether it means suffering or not.” – Oswald Chambers

God het van oordeel gepraat (1)

As daar ‘n onderwerp is wat Christene – en die kerk – vandag vermy, is dit God se oordeel en sy toorn. Tog het God self oor oordeel gepraat. Ons lees ook dikwels van God se toorn in die Bybel. Ons gaan ‘n paar blogs hieraan spandeer waarin ons onder andere gaan kyk na:

• Die oordeelsdag
• Hoekom is God kwaad?
• Kom ons maak ‘n meer aanvaarbare God
• Die aanbidding van demone
• Die mens as sy eie God
• God gemaak na die beeld van die mens
• Soek God in alle erns.

God praat oor oordeel

God openbaar vanuit die hemel sy toorn oor al die goddeloosheid en ongeregtigheid van die mense wat die waarheid deur die ongeregtigheid probeer onderdruk (Romeine 1:18).

Sommige mense glo dat God nooit kwaad word nie, want hulle sien nie veel daarvan nie. Hoekom nie? Maar deur jou verharding en jou onbekeerlike hart is jy besig om vir jouself straf op te gaar vir die oordeelsdag, wanneer God sy regverdige oordeel sal uitspreek (Romeine 2:5). Baie van God se profete het dieselfde waarskuwing oor die oordeelsdag uitgespreek.

Hoe kan ons seker wees dat God se oordeelsdag beslis sal kom? Jesus Christus se opstanding bewys dat die dood nie die einde van alles is nie. [Dié wat goed gedoen het, sal opstaan en lewe, en dié wat verkeerd gedoen het, sal opstaan en veroordeel word – Johannes 5:29.]

Jesus self praat baie oor die oordeelsdag en van die pyn van die hel wat nooit ophou nie. [Gaan na die ewige vuur wat vir die duiwel en sy engele voorberei is –  Matteus 25:41] God weet dat daar ‘n vreeslike straf vir sondige mense wag. [Ek sal vir julle sê vir wie julle bang moet wees: vir Hom wat mag het om, na die dood, in die hel te werp – Lukas 12:4 – 5.]

Jesus Christus sal deel van hierdie oordeel wees. [Self veroordeel die Vader niemand nie, maar die oordeel het Hy geheel en al aan sy Seun oorgelaat – Johannes 5:22.]

Almal sal aan God antwoorde moet gee oor die keuses wat hy in sy lewe op aarde gemaak het. gemaak het

Wat ons dus sien, is die volgende:

• God se oordeelsdag kom beslis al sien ons nie nou tekens daarvan nie.
• Hierdie sal ‘n verskriklike dag wees.
• Jesus Christus sal self deel van hierdie oordeel wees.
• Almal sal aan God verantwoording moet doen.

Dit bring ons by die volgende vraag: Hoekom is God dan kwaad? Daarna kyk ons volgende keer.

Work is always healthier for us than idleness; it is always better to wear out shoes than sheets. —C.H. Spurgeon

Sterk gemeentes het ‘n sterk spangees

Maar hoe bou jy hierdie sterk spangees? Deur ‘n gesamentlike doelwit en goeie kommunikasie. Jy moet verseker dat beide elemente teenwoordig is terwyl jy jou span biu. Hoekom is dit belangrik?

1. Die liggaam van Christus funksioneer soos ‘n spanbediening

Ons het baie lede in een liggaam, en die lede het nie almal dieselfde funksie nie. Net so is ons, al is ons baie, in Christus een liggaam, en almal afsonderlik lede van mekaar (Romeine 12:4 – 5). God het dit so ontwerp dsat ons mekaar nodig het. Elke lidmaat het ‘n belangrike rol om te vervul.  Niemand het al die gawes wat nodig is om ‘n gemeente suksesvol te maak nie. As jy jou omring met mense met dieselfde sterkpunte as wat jy het, gaan jy groot probleme ondervind. Leiers moet erken dat daar sekere dinge is wat hulle nie kan doen nie. Die eerste stap na spanwerk is ‘n leier wat erken dat hy ‘n span nodig het.  Kies altyd spanlede wat vir jou swakhede kompenseer.

2. Spanne bereik meer as individue wat afsonderlik werk

Twee vaar beter as een. Hulle inspanning kom tot iets. As die eenval, kan die ander hom ophelp. Maar as een val wat alleen is, is daar niemand om hom op te help nie … Een alleen kan oorweldig word, twee saam kan weerstand bied. ‘n Driedubbele tou breek nie maklik nie (Prediker 4:9 – 12). In Nehemia lees ons ook van mense wat in groepe of families saam gewerk het. Jesus het ook dissipels twee-twee uitgestuur. Hierdie wedersydse bemoediging is noodsaaklik vir jou bediening. Een van die duiwel se gunsteling instrumente wat hy dikwels gebruik is ontmoediging.

3. Sterk spanne word nie deur onenigheid bedreig nie.

Goeie kommunikasie sluit in dat mense die geleentheid moet hê om hulle menings uit te spreek – al verskil hulle van dié van die leier. As mense nie met meer as een mening na vore kom, word daar nie baie in jou span gedink nie. Jy moet ‘n omgewing skep waarin spanlede nie bang is om hulle menings te lug nie, waar hulle nie bang is om ‘n fout te maak nie.