“All of God’s people are ordinary people who have been made extraordinary by the purpose he has given them.” – Oswald Chambers

God het van oordeel gepraat (4)

Ons dink dikwels dat afgode tot beelde beperk is. Daar is baie ander soorte “gode” wat Satan vir ons aanbied. Die mens sien dat van alles in die skepping hy die hoogste is. Daarom glo hy dat hy die belangrikste in God se skepping is. Daar kan niks met die mens se verstand vergelyk word nie. Wat kan die mens daarvan weerhou om sy begeertes te vervul? Hulle sal eerder liefde vir genot hê as liefde vir God (2 Timoteus 3:4). Die verderf is hulle einde; die maag is hulle god; hulle skande is hulle trots; hulle is aardsgesind (Filippense 3:19).

Die afgode van vandag is dinge soos plesier, seks, geld, status, sekuriteit, sukses, roem, ens. Hierdie dinge is belangriker as God. [ Die goddelose verlustig hom nou al in wat hy hoop om in die hande te kry. Die een wat hom wil verryk ten koste van ‘n ander, wens homself by voorbaat geluk. Hy verag die Here. Neus in die lug sê hy: “God vra tog geen rekenskap nie!” In al sy planne is daar geen plek vir God nie (Psalm 10:3 – 4)]. Selfsugtige begeertes en trots neem God se plek in ons harte oor.

Selfsugtige mense soek altyd meer. Hulle gee nie om as ander in die proses seerkry nie. Hulle glo daar is geen Regter wat hulle sal straf nie. Ons is soos die Babiloniërs: Dan jaag hulle verder, hulle trek verby soos die wind. Vir hierdie sondige nasie is sy eie mag sy god (Habakuk 1:11).

As ons onsself aanbid, maak ons God na ons eie beeld. Ons wil ‘n God wat net so swak soos ons is, hê. God het nou nie die krag om ons te help en ons lewens te verbeter nie. Ons soek ‘n God wat nooit sal straf nie – sag en teer. Ons glo dat God, soos ons, nooit sy beloftes sal nakom nie.

Dit is nie waar nie. Maar dié wat bang en ontrou geword het, die losbandiges, moordenaars en onsedelikes, bedrieërs en afgodsdienaars, en al die leuenaars, hulle lot is die poel wat met vuur en swael brand, dit is die tweede dood (Openbaring 21:8). Mense probeer hierdie straf vermy deur weg te kruip en omkoopgeskenke aan te bied. [Moet Ek stil bly as jy sulke dinge doen? Nee, Ek eis rekenskap van jou, Ek kla jou aan – Psalm 50:21; Die Here jou God, Hy alleen is God, die Here: die groot God, die magtige, wat wonderdade doen, wat vir niemand partydig is nie en ook nie omkoopgeld aanneem nie – Deuteronomium 10:17]

As ons God soos ons laat lyk, open ons die weg vir vals aanbidding. Die God wat ons sê ons aanbid verskil van die ware God wat Homself aan ons in die Bybel geopenbaar het.

Ons het nou baie gepraat oor God se toorn en oordeel. Wat moet ons doen as ons die ware God wil aanbid. Daarna kyk ons volgende keer.

“When people show you their boundaries (“I can’t do this for you”) you feel rejected…part of your struggle is to set boundaries to your own love. Only when you are able to set your own boundaries will you be able to acknowledge, respect and even be grateful for the boundaries of others.” – Henri Nouwen

 ‘n Stryd wat keuses vereis

Die mens is nie ‘n hulpelose slagoffer wat tussen twee groot leërmagte vasgevang is nie. Die mens is immers na die beeld van God gemaak (Genesis 1:27). Elkeen van ons het ‘n liggaam wat sal sterf en ‘n siel wat nie sterf nie. Moenie bang wees vir dié wat die liggaam doodmaak, maar nie die siel kan doodmaak nie. Nee, vrees Hom eerder wat sowel die liggaam en die siel in die hel kan laat vergaan (Matteus10:28).

Die mens kan ‘n keuse maak oor wie hy wil aanbid en dien – ons moet tussen die ware God en die vals gode kies. Kies dan vandag wie julle wil dien: die gode wat julle voorvaders gedien het anderkant die Eufraat, of die gode van die Amoriete in wie se land julle woon. Wat my en my familie betref, ons sal die Here dien (Josua 24:15). Toe Jesus by Marta en Maria kuier, sit Maria aan sy voete. Maria het die beste deel gekies (Lukas 10:42).

Versoekings is deel van ons lewens. Hoe jammer tog vir die wêreld dat daar dinge is wat die mens afvallig maak! Sulke dinge kom noodwendig (Matteus 18:7). Daarom moet die mens ‘n keuse maak tussen die goeie en die bose, tussen God en die Satan. Wat God van ons verwag is duidelik: Luister, Israel, die Here is ons God, Hy is die enigste Here, Daarom moet jy die Here jou God liefhê met hart en siel, en met al jou krag (Deuteronomium 6:4 – 5). Maar dit gebeur nie sommer outomaties nie – ons moet kies: Kies die lewe, sodat jy en jou nageslag kan lewe (Deuteronomium 30:19).

God stel nie belang in liefde wat afgedwing word nie. Hy maak mense wat kan kies om Hom lief te hê: Maar daar kom ‘n tyd, en dit is nou, wanneer die ware aanbidders die Vader deur die Gees en in waarheid sal aanbid,  want die Vader wil juis hê dat die mense wat Hom aanbid dit so moet doen (Johannes 4:23-24).

God, omdat Hy die ware God is, soek ware aanbidders. Satan probeer om hierdie aanbidders van God weg te rokkel, sodat hulle hom sal aanbid. Die Ou Testamentiese verhaal van Job gaan oor aanbidding en dien. Job het God aanbid en gedien. Satan wou egter nie aanvaar dat Job ‘n ware aanbidder van God is nie. Die duiwel (= aanklaer) beskuldig Job dat hy God weens selfsugtige en vals redes aanbid. Die duiwel beskuldig vir God dat Hy vir Job teen swaarkry beskerm. God laat die duiwel toe om vir Job te toets: Alles wat hy het, gee Ek in jou mag oor. Net aan hom self mag jy nie raak nie (1:12); Goed hy is jou mag. Net sy lewe mag jy nie neem nie (2:6). Let op dat God in beheer bly en die duiwel se mag beperk – die duiwel kan nie doen net wat hy wil nie.

Job verloor sy rykdom en famile en ontwikkel pynlike swere. Hoe reageer Job? Die Here het gegee en die Here het geneem. Prys die Naam van die Here (1:21). Niks kon verhoed dat Job die Here aanbid nie. Hy staan by sy keuse. Het ek al die keuse gemaak en staan ek vas by daardie keuse?

“The beginning and the end of all Christian leadership is to give your life for others.” – Henri Nouwen

Oorlog in die hemel … ellende op aarde

God kan nie verlei word nie, en self verlei Hy niemand nie (Jakobus 1:13). Die Satan kan nie vir God verlei nie – al probeer Hy ook hoe hard. Dit is in God se mag om die Satan enige tyd te vernietig. Die totale vernietiging van Satan word voorspel in die Bybel: Die duiwel wat hulle verlei het, is in die poel van vuur en swael gegooi, daar waar die dier en die vals profete ook is. Hulle sal dag en nag gepynig word tot in alle ewigheid (Openbaring 20:10).

God laat die Satan se opstand vir ‘n beperkte tyd toe. Hoekom? Die presiese redes weet ons nie. God waarsku ons egter dat die stryd teen die Satan ernstig is. Openbaring 12 beskryf ‘n oorlog in die hemel. Migael en sy engele (God se engele) veg teen die Satan en sy engele. God se engele wen die oorlog. Die groot draak, die slang van ouds, wat die duiwel en Satan genoem word en wat die hele wêreld verlei, is uit die hemel uit gegooi (Openbaring 12:9). Beteken dit die einde van die oorlog? Beslis nie. Maar vir julle, land en see, wag daar ellende omdat die duiwel na julle toe gekom het met groot woede en met die wete dat hy min tyd het (Openbaring 12:12).

Wat kan ons hieruit aflei? Daar was ‘n groot oorlog in die hemel; die Satan het hierdie oorlog verloor en is uit die hemel gegooi; die Satan is nou op aarde en dit beteken ellende vir die mense, want die aarde is nou die slagveld.

“Our humanity comes to its fullest bloom in giving. We become beautiful people when we give whatever we can give: a smile, a handshake, a kiss, an embrace, a word of love, a present, a part of our life…all of our life.”

God het van sy vyande gepraat

In Matteus 4 lees ons van Jesus se versoeking in die woestyn. Een van die versoekings was dat die duiwel al die koninkryke van die wêreld aan Jesus sou gee as U neerval en my aanbid. Jesus antwoord hom: Gaan weg, Satan, want daar staan geskrywe: Die Here jou God moet jy aanbid en Hom alleen dien (4:10). Satan probeer dus aanbidding wat God toekom vir homself toeëien. God se vyand is die Satan.

Die Bybel praat baie oor die Satan, maar sê min oor sy oorsprong. God het alles gemaak, so God moes ook vir die Satan gemaak het. Maar ons lees: Toe het God gekyk na alles wat Hy gemaak het, en dit was baie goed (Genesis 1:31). Ons moet aanvaar dat die Satan aanvanklik goed was. Maar nou? Julle is kinders van die duiwel; hy is julle vader, en julle wil doen wat julle vader wil hê julle moet doen. Hy was van die begin af ‘n moordenaar. En hy staan nie aan die kant van die waarheid nie, omdat daar geen waarheid in hom is nie. Wanneer hy leuentaal praat is dit volgens sy aard, want hy is ‘n leuenaar en die vader van die leuen (Johannes 8:44). Hy was waarskynlik die eerste een wat leuens vertel het, want hy is die vader van die leuen.

Maar wat het dan gebeur dat dinge so verander het? God het selfs die engele wat gesondig het, nie gespaar nie. Hy het hulle in die hel gestort en hulle laat boei om in die duisternis gevange gehou te word vir die oordeel (2 Petrus 2:4). Judas in vers 6 sê vir ons dieselfde: Dink ook aan wat gebeur het met die engele wat hulle nie binne hulle eie magsgebied gehou het nie, maar hulle aangewese woonplek verlaat het. God het hulle met onbreekbare kettings gebind en hou hulle in die duister dieptes vir die oordeel van die groot dag. Ons kan dus aanneem dat die Satan weens sy opstand teen God uit die hemel gegooi is.

Satan is egter baie bedrieglik. Satan self doen hom voor as ‘n engel van die lig (2 Korintiërs 11:14). Hy probeer God se plek inneem; hy soek ons aanbidding wat net aan God toekom.