G. K. Chesterton stel dit so: “The most extraordinary thing in the world is an ordinary man and his ordinary wife and their ordinary children.”

Alles kom tot niks (2)

The Gospel Coalition is besig met ‘n reeks oor verwarrende gedeeltes uit die Bybel. Kundiges verduidelik hierdie gedeeltes. Vandag kyk ons na die tweede blog oor Tremper Longman se hantering van Prediker 1:2.

Wat is die boodskap van die tweede wyse man?

Daar is ‘n rede waarom hy sy seun aan die Prediker se denke blootgestel het: Hy (die Prediker) het daarna gestrewe om hom raak uit te druk en die waarheid getrou op te teken (12:10). Hy waarsku egter sy seun dat hierdie onderrig ook pynlik kan wees: Die woorde van mense met wysheid is soos skerp stokke, versamelde spreuke is soos spykers wat ingeslaan word. Daarom moet die seun nie ‘n obsessie met hierdie mense hê nie: My seun, wees versigtig! Daar kom nie ‘n einde aan die skryf van baie boeke nie, te veel studie ooreis die liggaam (12:11 – 12).

Die tweede wyse man sê dat die Prediker ‘n voorbeeld van eerlike denke oor ons huidige lewe is: “Die lewe is moeilik en dan gaan jy dood!” Maar hy gaan verder en moedig sy seun aan om verder as die huidige lewe te dink: Dien God en gehoorsaam sy gebooie. Dit is wat van die mens gevra word. God sal rekenskap eis oor alles wat gedoen word, ook oor wat in die geheim gedoen word, of dit goed is of kwaad (12:13 – 14).

Die boodskap van Prediker is duidelik. Die tweede wyse man sê vir sy seun om die regte verhouding met God te ontwikkel en deur daardie verhouding in stand te hou deur God se opdragte te gehoorsaam en te leef in die lig van die toekomstige oordeel. Hy sê dat seun net betekenis in God kan kry – plaas God eerste en al die ander dinge val in plek.

Prediker in die lig van Jesus Christus

Daar word in net een plek in die Nuwe Testament na Prediker se boodskap verwys: Ek is daarvan oortuig dat die lyding wat ons nou moet verduur, nie opweeg teen die heerlikheid wat God vir ons toekoms sal laat aanbreek nie. Die skepping sien met gespanne verwagting daarna uit dat God bekend maak wie sy kinders is. die skepping is immers nog aan verydeling onderworpe, nie uit eie keuse nie, maar omdat God dit daaraan onderwerp het (Romeine 8:18 – 20). God het die skepping aan verydeling onderwerp. As die Prediker dus vir betekenis “onder die son” – in die gevalle wêreld – soek, sal hy dit nie kry nie.

Paulus hou egter nie hier op nie: Daarby het Hy die belofte van hoop gegee: die skepping sal self ook bevry word van sy verslawing aan die verganklikheid, om so tot die vryheid te kom van die heerlikheid waaraan die kinders van God deel sal hê (Romeine 8:20 – 21). Christus het in ons plek ‘n vervloekte geword om ons van die vloek van die sondeval te bevry (Galasiërs 3:13). Hy sterf – juis die ding wat die Prediker se lewe betekenisloos gemaak het – om ons van die angel van die dood te bevry. Deur die Prediker-boek in die lig van die Nuwe Testament te lees, rig ons op Jesus in wie ons lewens ware betekenis kry.

If there is a God, of course he would know things that I can’t know about what’s best for me – Tim Keller

Alles kom tot niks (1)

The Gospel Coalition is besig met ‘n reeks oor verwarrende gedeeltes uit die Bybel. Kundiges verduidelik hierdie gedeeltes. Vandag kyk ons na Tremper Longman se hantering van Prediker 1:2.

Alles kom tot niks, sê die Prediker, tot niks.

Om die boek te verstaan, moet ons verstaan dat ons hier twee sprekers met verskillende boodskappe het. In die grootste deel van die boek praat die persoon in die eerste persoon – Ek, die Prediker (1:12 – 12:7). Maar daar is ook ‘n tweede spreker wat van die Prediker praat (1:1 – 11 en 12:8 – 14).

Die boodskap van Prediker

Eenvoudig gestel is die boodskap: “Die lewe is moeilik en dan sterf jy.” Hy het probeer betekenis van die lewe kry in wysheid, plesier, werk, rykdom, status en verhoudings – sonder sukses. Daar is drie faktore wat die lewe sonder betekenis maak:

• Die dood – jy word oud en jy sterf. Die Prediker het geen vertroue in ‘n lewe na die dood nie. die tyd wanneer die stof na die aarde toe terugkeer soos dit was, en die gees na God terugkeer wat dit gegee het (12:7).
• Ongeregtigheid – as daar dan geen lewe na die dood is nie, mag betekenis dalk gekry word uit belonings in hierdie lewe vir die regverdige en wyse persoon. Dit werk nie so nie: ‘n Regverdige gaan onder al doen hy reg, ‘n goddelose geniet ‘n lang lewe al doen hy verkeerd (7:15).
• Die mense se onvermoë om die regte tyd te onderskei. Dit word goed beskryf in die bekende gedig wat in 3:1 begin: Elke ding het sy vaste tyd, elke ding in hierdie wêreld het sy tyd. Wysheid in die Bybel word bepaal deur die wysgeer se vermoë om die regte woord en die regte tyd vir die regte optrede te onderskei. Volgens die Prediker het God alles vir ‘n bepaalde tyd gemaak, maar: Tog kan die mens die werk van God van begin tot einde nie begryp nie (3:11).

Daarom is daar geen betekenis in die lewe nie Die beste wat die mens kan doen onder hierdie omstandighede is om in die lewe te gryp wat jy kan (2:24 – 26; 3:12 – 14, 22; 5:18 – 20; 8:15; 9:7 – 10). [Carpe diem =  gryp die lewe.] Diegene wat die lewe aangryp kan hulle ten minste tydelik onttrek uit die harde werklikheid van die lewe.

Is die Prediker Salomo?

Prediker is nie die skrywer se regte naam nie. Dit assosieer hom met Salomo. Dit is egter onwaarskynlik dat die Prediker Salomo is. As die Prediker dan Salomo is hoekom gebruik hy ‘n skuilnaam? Daar is ook baie gedeeltes waar die Prediker van die koning as ‘n derde party praat (1:16a; 4:1 – 3; 5:8 – 9; 10:20). Die boodskap van die boek is ‘n waarskuwing dat ons nie met die illusie as ek net meer geld/rykdom/wysheid gehad het, sou ek tevrede met my lewe gewees het, kan leef nie.

Volgende keer kyk ons verder na Prediker.

Character may be manifested in the great moments, but it is made in the small ones. —Phillips Brooks

Simson

Simson herinner ons baie aan onsself – nie sy hare en krag nie, maar sy grootste vyand. Simson se grootste vyand was hyself. Is dit nie ook waar van ons nie? Simson vertel ons storie. Hy is ‘n verteenwoordiger van die volk van God, maar hy is ook ‘n waarskuwing vir ons dat ons grootste vyand nie daar buite is nie, maar binne in onsself

Sy lewe wys vir ons vyf maniere wat alles van binne na buite saboteer.

1. Simson was impulsief

Alles wat Simson doen, word deur een of ander begeerte gedryf. Hy soek seks, so hy besoek ‘n prostituut; hy is honger, so hy eet heuning wat hy nie mag eet nie; hy vereg hom en tel ‘n kakebeen op en maak ‘n duisend mense dood. Impulsiwiteit is ‘n kanker – as jy dit nie beheer nie, gaan dit jou vernietig. Ons moet leer om nee te sê vir ons begeertes. ‘n Stad sonder ‘n muur om hom te beskerm, so weerloos is ‘n mens as hy nie selfbeheersing het nie (Spreuke25:28). As jy nie selfbeheer het nie, is rampspoed jou voorland.

2. Simson maak kompromieë

Simsom het hom nie veel aan sy Nasireër-belofte gesteur nie. Toe hy een opdrag verbreek en nie God se toorn ondervind nie, het hy net eenvoudig aangehou om af te dwaal. Totdat, op een tragiese oomblik toe God nie meer by hom was nie. Sê nou net die gevolge van my oortredings is nie al nie?Die grootste gevaar is dat jy God uit jou lewe dryf. Geleidelik word jou hart vir die stem van God verhard.

3. Simson was onleerbaar

As hy ‘n idee in sy kop gekry het, kon niemand hom keer nie. Sy ouers waarsku hom om nie met die Filistyne te lol nie, maar hy luister nie. ‘n Paar keer stamp hy sy kop deur vrouens wat seks gebruik om hom uit te buit. Tog val hy steeds vir die strik wat Delila vir hom stel. Hy leer net nie.

4. Simson was ‘n alleenloper

Simson was ‘n een man vertoning. Hy luister na niemand nie; hy vra niemand se hulp nie; hy vorm geen bondgenootskappe nie. Hy het niemand naby genoeg aan hom gehad om vir hom te sê: “Broer, dit is ‘n slegte idee.” Is daar mense in jou lewe na genoeg aan jou om jou tereg te wys? Luister jy as ander praat? Leer jy by ander? Of is daar gebiede in jou lewe wat niemand mag betree nie. Daar is nie so iets soos ‘n geïsoleerde Christen nie. Mense wat ernstig oor Jesus voel, voel ernstig oor die geloofsgemeenskap.

5. Simson was trots

Simson gee nooit die eer aan God nie. Hy gebruik God se seëninge vir sy eie doel. Hy aanvaar – verkeerdelik – dat hy nooit sy krag sal verloor nie. Hy het vergeet dat sy krag ‘n genadegawe van God was. Gaan jy deur die lewe en dink dat jou gawes jou eie is? Jy is maar net ‘n rentmeester. Jy kry alles op bruikleen by God. Vra vir God: “Waarom het U hierdie gawes vir my gegee? Wat wil U hê moet ek daarmee doen?”

Hier is ‘n paar belangrike lesse om te leer.

.

“Here is a test to find whether your mission on earth is finished: If you’re alive, it isn’t” –  Richard Bach, skrywer van Jonathan Livingston Seagull

Hoe kan ek diegene wat die kerk verlaat het weer betrokke kry?

Ons is bekend met die sogenaamde nones – mense sonder enige kerkverband. Daar is ook ‘n nuwe kategorie – die dones. Hulle was aktiewe Christene, maar is nou klaar met die kerk. Hoekom? In hulle boek Church Refugees beskryf Josh Packard en Ashleigh Hope vier redes waarom hulle die kerk verlaat het:

• Hulle soek gemeenskap … en kry oordeel.
• Hulle wou die lewe van die kerk beïnvloed … en kry burokrasie.
• Hulle soek gesprekke … en kry leerstellings.
• Hulle soek betekenisvolle betrokkenheid by die wêreld … en kry morele voorskrifte.

Hierdie boek beveel vier strategieë aan om weer die dones betrokke te kry. Hulle verwys na hulle as vlugtelinge.

1. Nooi hulle uit vir deelname

Hieronder het hulle ‘n paar moontlike planne:

• Groot burokrasieë kan nie ware innovering sentraliseer nie.
• ’n Organisassie wat nie misluk nie, is dikwels ook nie ‘n sukses nie.
• Die grootste bate van enige sterk, florerende organisasie is sy mense – nie ‘n persoon nie.
• Ondermyn die burokrasie

2. Teikendatums

Baie van die werk in ‘n gemeente geskied op ‘n projekbasis en nie op ‘n programbasis nie. As ‘n projek klaar is, is hy klaar en die gemeente beweeg verder. Wat kan ons doen om ‘n impak op die dones te maak?

• Laat hulle verstaan hulle moenie verwag dat die leiers alles moet doen nie.
• Hou die roeping en sending van die gemeente altyd voorop.

3. Beklemtoon verhoudings

Beklemtoon dat daar in die gemeente ‘n plek vir diens en verhoudings is. Verhoudings was ‘n kernboodskap van Jesus. Wat gemeentes moet doen, is om ‘n benadering tot gemeenskapsontwikkeling te ontwikkel. Met hierdie benadering moet gemeenskappe versterk word. Daar word gefokus op die sterkpunte wat reeds in die gemeenskap teenwoordig is.

4. Maak ‘n impak op jou gemeenskap

Om dit te kan doen, moet ons verstaan dat ons verstaan van ‘n probleem verdiep en uitgebrei word deur ‘n hele aantal perspektiewe te hoor. Luister na die gemeenskap – na soveel as moontlik mense.