The resurrection of Jesus is God’s answer to a hopeless world. —Ed Welch

Onthou die goeie nuus (Galasiërs 5:24 – 26)

Paulus sê vir die gelowiges dat hulle die hoop en krag wat hulle in hulle nuwe identiteit het, moet raaksien. In hierdie stryd is hulle nie magteloos nie. Daar is twee dinge wat hulle bemoedig.

• Gelowiges behoort aan Jesus Christus

Die wat aan Christus Jesus behoort, het hulle sondige natuur met al hulle hartstogte en begeertes gekruisig (5:24). Ons het ons sondige natuur gekruisig. Wanneer het dit gebeur? Met ons bekering. As ons in Christus alleen vir ons verlossing vertrou, verenig ons ons met Hom. Hierdie dood van ons sondige natuur bring ‘n nuwe skepping voort. Ons voel steeds die versoeking van die sonde, maar ons menslike begeertes  heers nie meer in ons nie. Is ek ‘n nuwe skepping? Behoort ek aan Christus? Dan het ek die mag om die begeertes van my sondige natuur te oorwin.

• Gelowiges lewe deur die Gees

Ons lewe deur die Gees; laat die Gees nou ook ons gedrag bepaal (5:25). Ons het nou ‘n nuwe krag waardeur ons elke dag kan lewe. Dit moet vir elkeen ‘n bron van hoop wees. Ons het wat ons nodig het om die oorwinning te behaal. Beteken dit nou dat ons niks hoef te doen nie? Laat die Gees nou ons gedrag bepaal. Dit geld vir ons gesindhede, optrede, verhoudings en bediening.

Ons moenie verwaand wees, mekaar uittart of op mekaar afgunstig wees nie. Die vrug van die Gees is liefde en nie verwaandheid of afguns nie. Om mekaar lief te hê en te dien is noodsaaklik.

“The Bible is alive, it speaks to me; it has feet, it runs after me; it has hands, it lays hold of me.” Martin Luther

Wat hou mense uit die kerk?

Geen gemeente gaan tog doelbewus sy deur sluit om mense buite te hou nie. Tog, as ons kyk na die min nuwe besoekers en hoeveel van hulle nooit weer terugkom nie, lyk dit asof dit die geval is. ‘n Gesonde gemeente wat groei, moet elke week nuwe besoekers sien. Dit lyk asof daar iets aan die gang is wat besoekers uit die kerk weghou.

Bill Tenny-Brittian sê dat daar vier dinge is wat die kerkdeure vir potensiële besoekers toemaak.

1. Niemand weet of gee om dat jy bestaan nie

Meeste lidmate glo dat hulle gemeente baie bekend is in die gemeenskap en dat die gemeente veral vir sy vriendelikheid bekend is. Dit is nie die geval nie. Baie mense in die gemeenskap weet nie eers van die bestaan van die gemeente nie. As mense nie weet dat jy bestaan nie, gaan hulle nie juis ‘n voetpad na die kerkdeur uittrap nie. Wat kan jy hieraan doen?

• Fokus daarop om een ding buitengewoon goed te doen – doen dit so goed dat jy jou reputasie daarop kan bou. Om geld aan verskeie organisasies in die gemeenskap te gee, is duur en werk baie selde.
• Doen iets uniek in die gemeenskap. Hou jou basaar in die gemeenskap en nie op die kerkterrein nie.

2. Jou gasvryheid is swak (hy noem dit lousy).

Dit is waarskynlik die belangrikste rede waarom besoekers nooit weer terugkom nie. Jy kry die reputasie van ‘n onvriendelike gemeente. Vir die gemeenskap verdwyn die gemeente – dit speel geen rol nie. Onthou dat omtrent alles wat die gemeente doen met gasvryheid verband hou – die aanwysings, die mense wat besoekers verwelkom, parkering, ens. Onthou as jou gasvryheid mense weggejaag het, verloor jy nie net vir hulle nie, maar hulle versprei die nuus in die gemeenskap. Nou staan jy  as daardie vervelige, irrelevante gemeente bekend.

3. Jy het konflik wat nie opgelos is nie

Swak gasvryheid is die #1 rede waarom besoekers nie terugkom nie; konflik wat nie opgelos word nie, is die #1 rede waarom gemeentes doodgaan. Dit skrik mense af. Dit jaag nie net mense weg nie, maar dit belemmer alles wat die gemeente is en doen. Die deure vir nuwe mense word gesluit.

4. Jou bedienings verander nie lewens nie

Gemeentes wat nie by ernstige, lewensveranderende bedienings betrokke is nie, kan net so wel onsigbaar wees. Hulle vervul nie die Groot Opdrag nie. Hoekom hou dit mense uit die kerk?

• Mense kyk deur die vernislagie van godsdiens – hulle sien die “gelowiges” dra ‘n masker.
• Sonder verandering van lewens is die kerk maar net ‘n klub wat net sy lidmate dien. Wie wil nou aan nog ‘n klub behoort?
• As lewens nie verander nie, gaan niemand van die gemeente praat nie

As jy ‘n gemeente wil wees waarvan mense praat, moet jy die hindernisse verwyder en lewens moet verander word. Wat het jou gemeente gedoen om die hindernisse wat kerklos mense buite hou, te verwyder?

There is no such thing as a totally middle-class discipelship – Albert Schweizer

Loop deur die Gees (Galasiërs 5:16 – 18)

Die fokus van hierdie gedeelte is op die noodsaaklikheid om voortdurend in die krag van die Heilige Gees te leef. Elke gelowige moet leer om deur die Heilige Gees te lewe. Paulus vertel hier vier belangrike waarhede oor loop deur die Gees:

• Ons moet voortdurend deur die Gees loop

Laat julle lewe steeds deur die Gees van God beheers word. Elke dag en oral. Om deur die Gees te loop, beteken ons volg Hom waarheen Hy ons ook al lei. Ons moet luister na Hom; ons moet sy wil onderskei; ons moet sy leiding volg. Dit is die normale Christelike lewe. Hier is dus ‘n mate van spanning tussen God se krag en die gelowige se menslike keuse. Die Christen moet besluit om voortdurend deur die Gees te loop, en terselfdertyd is die HG aan die werk om aan ons nuwe krag te gee om ons sondige natuur te weerstaan.

• Ons moet deur die Gees loop om ons sondige natuur te oorwin

Laat julle lewe steeds deur die Gees van God beheer word, dan sal julle nooit swig voor die begeertes van julle sondige natuur nie (5:16)

Hierdie is ‘n belofte. Hier is geen neutrale grond nie – of die een of die ander. Ons moenie net “nee” vir die sonde sê nie, maar ook “ja” vir die werking van die Heilige Gees. Geestelike groei is nie die gevolg van die bywoning van seminare of die lees van godsdienstige boeke nie … God verander ons van binne na buite deur sy Gees..

• Ons moet deur die Gees loop, want die stryd is intens.

Paulus sê dat wat die sondige natuur begeer en wat die Gees begeer, is in stryd met mekaar. Hierdie twee staan lynreg teenoor mekaar (5:17). Die Christelike lewe is ‘n stryd. Om die sondige natuur te oorwin, moet ons die erns van die stryd insien en besluit om deur die Gees te loop. Hoekom is hierdie stryd so intens? Omdat die sondige natuur en die Gees teenstrydige agendas het. Moenie dink dat jy nie deel van die stryd is nie. Ons sal hierdie stryd teen ons sondige natuur stry tot Christus se wederkoms – ‘n intense voortdurende stryd. Die probleem is nie daar buite nie, maar hier binne in my. Elkeen van ons moet leer om ons eie harte te hanteer.

• Ons moet deur die Gees loop om vry van die wet te wees

Maar as julle julle deur die Gees laat lei, staan julle nie meer onder die wet nie (5:18). Lewe deur die Gees bring ‘n nuwe manier van lewe. Jy is nie vry om te sondig nie, maar jy is vry van die sonde. Jy het nuwe begeertes; jy het nuwe krag om God tevrede te stel deur die vrug van die Gees te dra. Jy leef nie meer onder die swaar las van die wet nie, maar leef deur die dinamiese krag van die Gees.

Dit is duidelik dat ons nie in ons eie krag ver gaan kom nie. Daarom moet ons deur die Gees loop – elke dag.

“If you are godly you will never suffer, except in this world.” – Jeremiah Burroughs

Leef in die waarheid

Die Galasiërs het ‘n probleem, want tussen hulle is mense wat ‘n verkeerde boodskap verkondig – wat verkondig dat God se genade nie genoeg is nie, maar dat hulle hulle ook moet laat besny en die wet van Moses moet onderhou.

Wat gebeur as jy die vals leermeesters se boodskap aanvaar? Paulus verduidelik vir ons in Galasiëes 5:6 – 12.

• Jy sien Christus as onvoldoende

Jy sien dit wat Christus gedoen het as onvoldoende en daarom moet jy van jou kant af iets byvoeg. Maar Christus se werk is volmaak – ons kan daar niks byvoeg nie.

• Jy moet die hele wet vervul

Hy is verplig om die hele wet van Moses te onderhou (5:3). Jy kan nie net sekere dele onderhou nie. Die probleem is dat niemand die wet volkome kan onderhou nie.

• Jy draai jou rug op genade

Julle het julle band met Christus verbreek; julle het die genade van God verbeur (5:4). As jy glo dat die wet jou kan vrymaak, is genade nie meer vir jou belangrik nie. Jy moet kies: of die wet of genade. Jy kan nie beide hê nie.

• Jy verloor jou toekomsverwagting

Deur die werking van die Gees is dit ons hoop en verwagting dat ons deur te glo, vrygespreek sal word (5:5). Waar kry ons hierdie hoop? Deur op Christus te vertrou deur genade alleen. Die besnydenis het geen waarde nie: Al wat van belang is, is geloof wat deur die liefde tot dade oorgaan.

Vals lering gaan oor uitwendige rituele; Paulus sê die Christelike lewe gaan oor geloof wat bewys word deur liefdevolle diens.

Kom ons kyk na die vals boodskappe wat hierdie leermeesters versprei het. Die kenmerke van hierdie boodskappe is eintlik tipies van alle vals boodskappe.

• Dit verhinder gehoorsaamheid aan die waarheid. Wie het julle verhinder om die waarheid te bly gehoorsaam (5:7). Dit geld steeds.
• Dit kom nie van God nie. Wie het julle omgepraat? Nie God nie (5:8). Al sê iemand dat God hom geroep of gestuur het, moet jy hulle nie glo as hulle ‘n vals evangelie verkondig nie.
• Dit kontamineer ander. ‘n Bietjie suurdeeg deurtrek die hele deeg (5:9). Vals leermeesters is ‘n groot probleem, want hulle beïnvloed baie mense.
• Vals leermeesters sal geoordeel word. Maar die man wat vir julle in verwarring bring, wie hy ook al mag wees, God sal hom straf (5:10). Paulus is vol vertroue dat diegene wat waarlik in Christus is net soos hy sal dink – hulle sal die fout gou agterkom.
• Vals leermeesters vervolg ware leermeesters. As ek nog verkondig dat ‘n mens besny moet word, waarom word ek dan nog vervolg (5:11). Ons moet onthou dat die kruis mense aanstoot gee – hulle sien dit as ‘n struikelblok. Hoekom gee die kruis aanstoot? Dit vee menslike prestasies van die tafel – die mens het niks om op trots te wees nie.

Wees versigtig vir vals leermeesters. Die gevolge van hulle leer is katastrofies. Leer om vals boodskappe te identifiseer.