If heaven is our country, what can the earth be but a place of exile? If departure from the world is entrance into life, what is the world but a sepulchre, and what is residence in it but immersion in death? If to be freed from the body is to gain full possession of freedom, what is the body but a prison? – Johannes Calvyn

Die tien gebooie (1)

[Ek gaan ‘n hele aantal blogs aan Eksodus spandeer. Ek maak onder andere van “Exalting Jesus in Exodus” (2014) vanTony Merida gebruik.]

Voordat ons die tien gebooie kan bespreek, is daar een belangrike vraag wat ons moet vra: Wie het hierdie gebooie aan Israel en aan ons gegee? Die antwoord kry ons in Eksodus 19:1 – 20:1.

Toe het God al hierdie gebooie aangekondig (20:1). Die mense was so oorweldig deur God se verskyning op Sinaiberg dat hulle na die tyd vir Moses gevra het om met hulle te praat. Die mense het God se stem gehoor; hulle kon nie aan sy teenwoordigheid getwyfel het nie. Om dit vir die mense te vererger, het dit met natuurverskynsels gepaard gegaan: donderslae, weerligte, ‘n donker wolk op die berg, die ramshoring, die berg wat rook, die Here wat in vuur na die berg toe afkom, die berg wat skud.

Eksodus 19 dek die tafel vir die tien gebooie. In hierdie hoofstuk stel God die voorwaardes vir die verhouding tussen Israel en Homself. Hulle het God geken – Hy het hulle immers uit Egipte gered. Maar nou sal hulle Hom ken soos nooit vantevore nie. Hier oorweldig Hy die volk met sy heiligheid en oorweldigende heerlikheid. Dit is Hy wat hulle roep en sy verbond met hulle maak. Dit is noodsaaklik dat ons weet dat hierdie gebooie van God self kom.

Hier is veral twee aspekte wat ons in die volgende blogs gaan bespreek:

• Die roeping; en
• God se heiligheid

Daarna gaan ons volgende keer kyk.

If I want to love God more, I have to know Him more deeply. The more I search the Scriptures and focus my mind’s attention on who God is and what He does, the more my soul breaks out in flames –R.C. Sproul

Beveg ontmoediging met beloftes uit die evangelie (2)

[Ek gaan ‘n hele aantal blogs aan Eksodus spandeer. Ek maak onder andere van “Exalting Jesus in Exodus” (2014) vanTony Merida gebruik.]

Eksodus 5:1 – 7:5)

Ons kom nou by God se derde belofte aan Moses.

• God verlos (6:6 – 7:5).

In hierdie gedeelte kry ons ‘n hele aantal Ek sal … stellings. Kom ons kyk na vyf sulke stellings:

• Verlossing

Ek sal julle van die dwangarbeid van Egipte bevry. Ek sal julle van die verknegting verlos, Ek sal julle vry maak met mag en met groot reddingsdade (6:6). God gaan hulle deur Moses van hulle slawebande verlos. Dit gebeur deur genade; dit is nie iets wat Israel verdien het nie. Die doel hiervan is dat hulle die almagtige God kan dien. Ons kry hierdie waarheid ook in die Nuwe Testament. Genade en vrede vir julle van God ons Vader en die Here Jesus Christus wat Homself vir ons sondes gegee het om ons te verlos uit hierdie goddelose wêreld en so die wil van God ons Vader te volbring (Galasiërs 1:3 – 4). God verlos ons van ons geestelike slawerny en ons onvermoë om die wet te onderhou. Dit gebeur net deur genade in geloof. Die doel van ons vrylating is ook aanbidding. Slegs as ons vry is, kan ons God waarlik aanbid.

In ‘n sekere sin het dit reeds gebeur, maar ons kyk ook vooruit na wanneer Jesus ons vir altyd sal vrymaak van hierdie wêreld. Ek is daarvan oortuig dat die lyding wat ons nou moet verduur, nie opweeg teen die heerlikheid wat God vir ons in die toekoms sal laat aanbreek nie (Romeine 8:18). Ons wag angstig op die finale verlossing.

• Vrylating

Ek sal julle vry maak met mag en met Goot reddingsdade (6:5). God kom om sy mense vry te koop. Sy familie – sy volk – was slawe en Hy kom om hulle te verdedig, vir hulle in te tree en hulle vry te maak. Maar toe die tyd wat God daarvoor bepaal het, aangebreek het, het Hy sy Seun gestuur … van sy geboorte was Hy aan die wet onderworpe om ons wat aan die wet onderworpe was, los te koop sodat ons as kinders van God aangeneem kan word. En omdat ons sy kinders is, het God die Gees van sy Seun in ons harte gestuur, en in ons roep Hy uit: “Abba!” Dit beteken: “Vader!” Jy is dus nie meer ‘n slaaf nie; jy is nou ‘n kind van God. En omdat jy sy kind is, het God jou ook sy erfgenaam gemaak (Galasiërs 4:4 – 7). God het in ons swaarkry ingegryp; Hy het ingegryp om ons van ons groot skuld vry te maak. Hy doen dit deur die dood van sy eie Seun. As Jesus weer kom om ons finaal vry te laat, sal ons probleme wat ons hier ondervind na niks lyk nie.

• Aanneming

Ek neem julle aan as my volk en Ek sal julle God wees. Dan sal julle besef dat Ek, die Here, julle God is wat julle van die dwangarbeid van Egipte bevry het (6:6). Hier sien ons God se oneindige liefde. God het ons vrygelaat en verlos. Maar Hy het ons ook as deel van sy familie aangeneem. Wat ‘n wonderlike voorreg. Kyk watter groot liefde die Vader aan ons bewys het: Hy noem ons kinders van God, en ons is dit ook (1 Johannes 3:1). Dit is God wat my red van die graf en my met liefde en ontferming kroon (Psalm 103:4). God het ons uit die graf van sonde gered en ons deel van sy familie gemaak.

• Erfgename

 Ek sal julle bring na die land toe wat Ek met ‘n eed aan Abraham, Isak en Jakob belowe het. Ek sal dit julle eiendom. Ek is die Here (6:7). Hierdie is ‘n belofte wat God oorspronklik aan Abraham gemaak het. Hierdie mense het niks gehad nie – hulle was slawe in Egipte. Nou gee God aan hulle ‘n erfenis – die beloofde land. Hulle het dit nie verdien nie – dit is alles uit genade. Nou het ons ‘n lewende hoop op die onverganklike, onbesmette en onverwelklike erfenis wat in die Hemel ook vir julle in bewaring gehou word (1 Petrus 1:4). Ons is seker van hierdie erfenis.

Ten spyte van hierdie beloftes sukkel Moses en die Israeliete om te glo: Maar in hulle moedeloosheid oor die harde werk het hulle nie na hom geluister nie (6:8). Die stryd om oorlewing is vir baie mense net te veel. God beveel Moses om terug te gaan na die farao. Moses se reaksie was een van ongeloof en wanhoop – hoe sal die farao nou na hom luister as die Israeliete dit nie wou doen nie. God beveel hom egter om te luister en te gehoorsaam. Dit bring ons dan by die vyfde belofte:

• Oordeel en genade

Maar Ek sal die farao hardkoppig maak … maar dan sal Ek Egipte my mag laat ervaar (7:3 – 4). God herinner vir Moses wie in beheer is. Farao het geglo dat hy ‘n god was, maar hier sit God hom op sy plek. God gaan Egipte oordeel. Hoekom doen Hy dit?  Sodat hulle kan besef dat Hy die Here is. Ons herken God deur sy barmhartigheid in sy verlossing, maar ook deur sy toorn in sy oordeel te ondervind.

God wag vir diegene wat Hom nie ken nie. Vertrou op Hom as die Verlosser. Glo in die God wat in sy genade sondaars vrylaat, verlos, aanneem en belowe dat hulle sy erfgename sal wees. Ons moenie soos farao ons harte verhard nie. Ons moet die evangelie hoor en glo. Ons moet in Christus vertrou.

Your goals are only as big as your God. —Rick Warren

Bevry deur genade (3)

In die vorige blog het ons wettisisme gedefinieer. Ons kyk nou na hoe ons wettisisme kan vernietig. In Galasiërs 1 kry ons twee fundamentele waarhede wat wettisisme vernietig – die evangelie is gratis en die evangelie bevry. Ons het reeds gesien dat genade en die evangelie gratis is. Ons kyk vandag na ‘n ander waarheid: die evangelie bevry.

In Galasiërs 1:4 lees ons dat Jesus Christus  ons uit hierdie goddelose wêreld verlos het. Verlos beteken dat ons verlos is van die skuld van ons sonde, maar dit sê ook dat ons van ‘n mag verlos is – hierdie goddelose wêreld. Dit verwys na die wêreld waarin ons woon. Ons leef steeds in hierdie wêreld, maar ons hoef nie langer soos hierdie wêreld te leef nie – ons is vry.

Die Judaïseerders beskuldig Paulus daarvan dat hy ‘n evangelie verkondig wat tot ‘n “los lewe” lei. Omdat hulle die Ou Testamentiese wet beklemtoon het, glo hulle dat as die wet weggeneem word dit tot ‘n wettelose lewe sal lei. Maar ons word nie bevry in niks nie – ons word in Christus bevry wat ons deur sy Gees ons van binne na buite verander. Ons is vry om te lewe in Christus se krag wat in ons werk. Ons werk nou in sy krag en volgens sy reëls.

• Deur sy genade is ons vry van sonde in hierdie wêreld. Ons is vry van die goddelose wêreld. Christus leef in ons; deur sy Gees bemagtig Hy ons; ons is vry om sy woord te gehoorsaam.
• Deur sy genade is ons vry om met hierdie wêreld te deel. God gee aan ons sy genade om Hom te verheerlik. Hy sê dat God hom al voor sy geboorte vir Hom afgesonder het en hom geroep het sodat ek die evangelie oor Hom onder die heidennasies sou verkondig (Galasiërs 1:15 – 16). Ons kry hier ‘n private openbaring vir openbare kommunikasie. Hierdie genade maak ons vry om te vertel. Ons as mense wat God se genade ontvang het, het die voorreg om sy evangelie met ander te deel.

Ons moet nooit die bevrydingsmag van genade onderskat nie.

“The gospel is so simple that small children can understand it, and it is so profound that studies by the wisest theologians will never exhaust its riches.” Charles Hodge

Beveg ontmoediging met beloftes uit die evangelie (1)

[Ek gaan ‘n hele aantal blogs aan Eksodus spandeer. Ek maak onder andere van “Exalting Jesus in Exodus” (2014) vanTony Merida gebruik.]

Eksodus 5:1 – 7:5)

As gehoorsaamheid lei tot lyding word ons bemoedig deur ons te herinner aan die beloftes van ons soewereine God.   In hierdie gedeelte leer ons ‘n baie belangrike les: Gehoorsaamheid aan God se roeping beteken geensins dat alles nou maklik sal wees nie. Dit mag swaarkry, lyding en vervolging beteken. Daar kom oomblikke waar ons selfs vir God bevraagteken. In Moses  se geval lyk dit asof dinge eintlik erger word toe hy God gehoorsaam het. Here, waarom werk U so sleg met hierdie volk? Waarom het U my nou eintlik gestuur. Om God te gehoorsaam waarborg nie ‘n pynvrye lewe nie; dit beteken nie dat jy gewild sal wees nie; dit beteken nie dat jy nie tye van wanhoop sal ervaar nie. Jy kan probleme verwag. Die vraag is nie: Sal ek ooit ontmoedig word? nie. Die vraag is: Hoe kan ek my ontmoediging hanteer? Waar gaan ek heen vir hulp en krag?

Moses was die middelpunt van God se wil. Tog ondervind hy ernstige teenstand. In Eksodus 6 praat God met Moses en maak sekere beloftes aan hom Hierdie beloftes versterk hom vir die taak wat voorlê. In Eksodus 6:6 – 8 gee God aan Moses ‘n aantal Ek sal … beloftes. Hierdie geloftes gaan oor God se genade. God versterk ons deur die evangelie.

Beloftes gee vir ons hoop vir die toekoms. Te midde van donkerte herinner beloftes ons aan die heerlikheid van God. In hierdie gedeelte gee God drie beloftes aan Moses.

• God is in beheer (6:1)

Ek is die Here!

God verseker vir Moses dat daar net een soewereine God is … en dit is nie die farao nie. Daarom sal God se plan nie verydel kan word nie. Baie glo dat God soewerein is, maar dit het nog nie in die praktyk na hulle harte deurgewerk nie. God is gedurig besig om omstandighede te gebruik om ons na sy Seun se beeld te vorm. God het sy eie manier van doen en dit op sy eie tyd. As ons ontmoedig is, moet ons dit met hierdie waarheid beveg: God is in beheer.

• God kom sy verbond na (6:2 – 5).

God herinner sy mense gereeld aan sy beloftes. God noem hier twee groot motiewe vir sy verlossing: sy verbond en sy kennis van die onderdruktes. God het het sy verbond in Jesus Christus nagekom. In Christus is ons deel van ‘n ewige verbond. Daarom kan ons rus kry as ons ontmoedig is. Ons het ‘n Verlosser wat uit die dood opgestaan en na die hemel opgevaar het; Hy sit aan die regterhand van die Vader van waar Hy vir ons intree. Hy is getrou aan sy mense; onthou sy verbond.

Volgende keer kyk ons na nog ‘n belofte van God aan Moses.