I have been driven many times to my knees by the overwhelming conviction that I had absolutely no other place to go —Abraham Lincoln

Die aard van die Skrif

Ons lees nou nie so baie uit Deuteronomium nie. In Hoofstuk 30 maak Moses in sy afskeidspreek aan Israel drie merkwaardige aansprake ook die aard van die Skrif.

• Lees die Skrif asof jou lewe daarvan afhang (30:15 – 18)

Moses lê ‘n duidelike keuse voor die volk: as julle julle aan die woord onderwerp sal julle geseën word; onkunde van die woord beteken dat hulle almal sal omkom: julle sal nie lank bly woon in die land wat julle in besit gaan neem nie. Jesus brei hierdie beeld in sy bergrede uit: Elkeen wat hierdie woorde van My hoor en daarvolgens handel, kan vergelyk word met ‘n verstandige man wat sy huis op rots gebou het (Matteus 7:24) Maar: Elkeen wat hierdie woorde van My hoor en nie daarvolgens handel nie, kan vergelyk word met ‘n dwaas wat sy huis op sand gebou het – dit stort ineen en word heeltemal verwoes (7:26). Van buite lyk die huise dieselfde, maar as die storms kom stort die een inmekaar en die ander een bly staan. Baie mense se lewens is reg solank as wat die weer mooi is. Maar as die onvermydelike storms kom, sal net die huis wat op die rots van God se woord gebou is, bly staan. Jy moet die woord van God leer, gehoorsaam en jou lewe daarmee versadig.

• Lees die Skrif, want God het nie dit wat Hy wil hê jy moet weet weggesteek nie (Deuteronomium 30:11 – 14)

Die gebod wat Ek jou vandag beveel, is nie te moeilik vir jou nie. Dit is ook nie buite jou bereik nie (30:11). Dit is nie hoe baie mense vandag oor die Bybel voel nie – baie mense glo dat hulle nooit die Bybel kan verstaan nie. Daar is so baie vreemde stories in die Bybel wat ons net verwar. Al wat ons dan doen, is om ons voorkeure te bevestig. Maar dit is nie hoe die Bybel oor homself praat nie. Moses sê dat God se woord nie buite ons bereik is nie. Die gebod is baie naby aan jou, jy kan daaroor praat, jy ken dit, jy kan daarvolgens lewe (30:14). Die kernelemente wat jy moet ken is duidelik – gereed vir jou om te verstaan en te gehoorsaam. Natuurlik sal ons nie alles verstaan nie. Natuurlik sal ons steeds vrae vra. Dit is so. Die probleem is egter nie daardie dele van die Bybel wat ons nie verstaan nie, maar daardie dele wat ons wel verstaan, maar nie gehoorsaam nie.

• Moenie net die Bybel lees nie; ontmoet die Persoon in die Bybel (Deuteronomium 30:19 – 20)

Aan die einde verander Moses sy taal; hy praat nou nie meer van die woord as Israel se lewe nie, maar van die Here as hulle lewe. Hy verander van: “Hou vas aan die woord,” na “Hou vas aan die Here.” Moses besef dat hy iets meer as ‘n boek nodig het om aan vas te hou. Die primêre doel van die Skrif is nie om vir ons ‘n lys van take wat ons moet uitvoer te gee nie – dit is om die Here aan ons voor te stel. Dit is nie ‘n handboek om ons lewe te verbeter nie; dit is om te lees hoe ons verlos is deur Hom te ken.

Soos die Israeliete het ons ‘n duidelike keuse voor ons: lewe of dood. Lees, bestudeer en dink na oor die Bybel

I used to ask God to help me. Then I asked if I might help Him. I ended up by asking God to do His work though me —Hudson Taylor

Leef eenvoudiger; gee vrygewiger

Live simply that others may simply live

Dit gaan nie hier om “nee” te sê vir geld en dinge nie, maar om “ja” vir God te sê. Daar is duisende maniere om eenvoudiger te leef. Maar hoekom sal ek nou eenvoudiger wil leef? Randy Alcorn gee vir ons ‘n paar redes:

• Ons moet eenvoudiger lewe en vrygewiger gee, want die hemel is ons tuiste

Ons is nie vrygewig nie, want ons glo dat hierdie wêreld ons tuiste is. Ons tyd op aarde is maar kort. Dit is beter om ons skatte na ons uiteindelike tuiste te stuur as om die hier op te gaar.

• Ons moet eenvoudiger lewe en vrygewiger gee, want dit maak ons vry

Om te gee, sal ‘n revolusie in ons lewe veroorsaak, want ons sal besef dat die lewe nie draai om die aardse dinge nie. Die lewe draai nie om huise en karre en dinge nie. Om te gee en daarom eenvoudiger te lewe, beteken ons breek uit die wentelbaan van geld.. Ons het nou ‘n nuwe swaartekragsentrum: God.

• Ons moet eenvoudiger lewe en vrygewiger gee, want ons is God se pyplyn

Christene is God se afleweringsbodes. God doen sy aflewerings aan behoeftige mense deur Christene. Ons is God se pyplyn van genade aan ander mense. As Christene dit nie doen nie, staak alle aflewerings. Luister hierna: Hy maak julle altyd in alles ryk genoeg om by elke geleentheid vrygewig te kan wees. Deur ons bemiddeling het julle vrygewigheid tot gevolg dat God gedank word (2 Korintiërs 9:11).

• Ons moet eenvoudiger lewe en vrygewiger gee, weens die beloning wat ons in die hemel sal ontvang en die vreugde wat dit vir ons sal bring

Die basiese vraag is: Waar vergader ek my skatte? In sy bergrede sê Jesus: Moenie vir julle skatte op aarde bymekaarmaak waar mot en roes dit verniel en waar diewe inbreek en dit steel nie. Maak vir julle skatte in die hemel bymekaar, waar mot en roes dit nie verniel nie en war diewe nie inbreek en dit steel nie. Waar jou skat is, daar sal jou hart ook wees (Matteus 6:19 – 21).

• Ons moet eenvoudiger lewe en vrygewiger gee as gevolg van die ernstige geestelike behoeftes van hierdie wêreld

As God mense wat swaarkry wou help, wat sou Hy in die hande van sy afleweringsbodes plaas? Rykdom in die hande van sy mense om na daardie mense uit te reik en in hulle behoeftes te voorsien. Het Hy dit nie gedoen nie? Tog is daar feitlik 3 biljoen mense in hierdie wêreld wat nog nooit van God gehoor het nie. Kerke kla dat hulle nie die nodige fondse het om na hierdie mense uit te reik nie.

• Ons moet eenvoudiger lewe en vrygewiger gee as gevolg van die wêreld se ernstige fisiese behoeftes.

Een van hulle, met die naam Agabus, is deur die Gees gelei om te voorspel dat ‘n groot hongersnood die hele wêreld sou tref. Dit het dan ook in die tyd van keiser Claudius gebeur. Die gelowiges het toe besluit dat elkeen na sy vermoë sou bydra tot ‘n hulpfonds wat vir hulle medegelowiges wat in Judea woon, gestuur sou word. Hulle het dit gedoen en die geld met Barnabas en Saulus aan die ouderlinge in Jerusalem gestuur (Handelinge 11:28 – 30)

Hier sien ons die Bybelse patroon van gee: sien ‘n behoefte; gee om dit te hanteer. Dit is waarna Paulus in 2 Korintiërs 8:14 verwys: Moet julle wat nou oorvloed het, dié help wat gebrek ly. Dan, as hulle weer oorvloed het en julle gebrek ly, kan hulle julle weer help. So kom daar ewewig.

Gee ons genoeg of spandeer ons te veel aan ‘n uitspattige lewenswyse?

If God had a refrigerator, your picture would be on it. If He had a wallet, your photo would be in it. He sends you flowers every spring and a sunrise every morning … Face it, friend. He is crazy about you! —Max Lucado

Nie van hierdie wêreld nie, maar vir hierdie wêreld

My koninkryk is nie van hierdie wêreld nie … Maar nou is my koninkryk nie van hier nie (Johannes 18:36). Dit is deel van Jesus se antwoord aan Pilatus op sy vraag of Jesus die koning van die Jode is. Beteken dit nou Jesus se koninkryk is van min belang vir hierdie wêreld? Beslis nie. Jesus se koninkryk is nie van hierdie wêreld nie, maar is beslis vir hierdie wêreld.

Jesus het gekom om dié wat verlore is te soek en te red,, om die koninkryk van God te vestig, om aan die kruis versoening vir ons sondes te doen, om ‘n skepping wat swaarkry te verlos en om die weg voor te berei vir die vernuwing van alle dinge. Daarvan is sy fisiese opstanding die teken. Intussen het sy volgelinge baie werk om te doen.

Baie mense betoog oor klimaatsverandering. Hoe moet Christene hierop reageer? Dit is nie ‘n saak waaroor die Bybel ‘n direkte uitspraak lewer nie – ons het nie ‘n groen Bybel om ons te help nie.

• Bid en volhard met gebed. Ons moet volhard om die koninkryk van God aarde toe te bring Dit is nie dat ons optrede noodsaaklik is om God se koninkryk aarde toe te bring nie … ons word wel geroep om in sy koninkryk te woon – vandag. Daarom moet ons nadink oor ons optrede en watter invloed dit op die wêreld het.
• Ons het geen verskonings nie. Ons kan nie sê ons weet nie; ons kan nie sê dat mense geen invloed op God se wêreld het nie. God laat mense toe om sy wêreld om te krap. Ons moet wysheid, onderskeidingsvermoë en nederigheid in al ons studies soek. Ons moet egter waak teen die neiging om antwoorde te soek wat ons sienings pas. Ons weet mos ons is altyd in die versoeking om die radikale uitdagings  van Jesus se pad te loop, te vermy.

En nou? Die Bybel stel dit duidelik dat ons die aarde moet bewoon en bewerk. Hierdie wêreld is nie ‘n verbruikersitem vir die mens nie. Ons as Christene moet reageer op klimaatsveranderinge – dit moet vir ons ‘n bron van bekommernis wees.

 “The future of humanity passes by way of the family” – Pous Johannes Paulus II

Tevredenheid: ‘n Onnatuurlike toestand?

Mense soek altyd na dit wat hulle nie het nie. ‘n Ou spreekwoord. Almal van ons verlang voortdurend na die volgende ding – ‘n beter werk/kar/huis/… Tevredenheid kom net nie natuurlik nie – dit is iets wat ons aktief moet ontwikkel. Om tevrede te wees, is ‘n stryd.

Almal van ons het wettige begeertes en behoeftes. God het dit aan ons gegee toe Hy ons gemaak het. Die probleem is dat ons hierdie behoeftes buite Christus probeer bevredig – en ons raak al hoe meer ongelukkig en ontevrede. Hoe kan ons na tevredenheid strewe?

• Wees geduldig met jouself

As jy ontevrede is, onthou dat jy nie alleen is nie – meeste mense sukklel op een of ander stadium hiermee. Luister na Paulus: Nie dat ek uit gebrek praat nie,  want ek het geleer om in die situasie waarin ek is, tevrede te wees (Filippense 4:11 – Direkte Vertaling – Interliniêre Bybel). Paulus sê dat hy tevredenheid moes aanleer – dit het nie sommer vanself gekom nie. Wees geduldig met jouself as jy met ontevredenheid sukkel.

• Ontwikkel ‘n dankbare hart

Maak nie saak wat jou omstandighede is nie, fokus daarop om ‘n dankbare hart te ontwikkel. As ons nie meer tevrede is met wat ons het nie en fokus op wat dit wat ons nie het nie, word ons ontevrede mense en glo God weerhou sy seën van ons. Ek wil U loof met ‘n dankoffer, ek wil die Naam van die Here aanroep (Psalm 116:17). ‘n Dankbare hart is ‘n offer. Streef daarna om God onder alle omstandighede te dank.

• Fokus op vandag

As ons gedurig na vore kyk, sien ons nie die oomblik waarin ons tans is raak nie – en daarmee saam die seëninge wat ons vandag ontvang. Fokus op vandag; drink elke oomblik in. Daar sal nie nog ‘n dag soos vandag wees nie.

• Vertrou op God se voorsiening

Die Here weet presies wat ons nodig het. In die woestyn het Hy die Israeliete van manna en kwartels voorsien om hulle elke dag te voed. Hy voorsien vir ons alles wat ons elke dag nodig het. Ons moet net ons oë oopmaak en sien wat Hy alles voorsien. Fokus op dit wat God elke dag voorsien.

• Ons kry tevredenheid net in Jesus Christus

Christus alleen kan in ons begeertes en behoeftes voorsien. Ons omstandighede sal ons nie gelukkig maak nie; huise, karre, geld sal ons nie gelukkig maak nie. Christus sal ons leer om tevrede te wees ten spyte van ons omstandighede. Soos ons op Hom vertrou, kan ons soos Paulus sê: want ek het geleer om in die situasie waarin ek is, tevrede te wees.

Streef elke daarna om ‘n tevrede mens te wees.