Laat sy Liefde jou Lei: Bid: “Maak my min” – Milanie Vosloo

Bid: “Maak my min”.

“ …Hy moet al hoe minder in die kalklig staan terwyl ek stadigaan van die toneel moet verdwyn. So moet en sal dit wees.” Johannes 3:30

Johannes die doper was ’n onbaatsugtige mens.

Vir hom het dit net om een Mens gegaan: dié Christus op wie se koms hy die wêreld moes voorberei. Hy was as’t ware die onsigbare pasaangeër vir Jesus. Hy het die weg gebaan vir die koms van sy Messias en ongemerk van die toneel verdwyn toe Christus sy opwagting maak.

Om ander mense in ons leef- en werkswêreld só te ondersteun dat hulle die eer ontvang, is mos nie altyd maklik nie. Tog is dit presies wat ons Vader soms van ons verwag. Hy vra dat ons ons deel sal doen en dan die uitkoms en erkenning in sy hande sal laat. Meer nog vra Hy dat ons onsself in so ‘n mate sal prysgee dat Hy, en Hy alleen, deur ons sigbaar sal wees. Dit kan ons alleen regkry as ons daagliks onsself voor die kruis van ons Meester neerlê, toelaat dat sy volmaakte Gees ons vul en sy wil ons s’n maak. Ja, slegs wanneer ek en jy heeltemal verdwyn, kan God se grootheid en heiligheid in en deur ons sigbaar word.  

Eers wanneer ons uit onsself niks is nie, kan ons deur Hom álles wees. Dan eers is ons werklik Olimpiese-standaard-atlete in sy diens. Maak seker dat jy elke dag vir die Hemelse spele kwalifiseer.

Heilige Gees, maak die “my” in my min, sodat die “U” in my baie kan word.

Skrywer: Milanie Vosloo

Laat sy Liefde jou Lei: Om van jou Podium af te klim – Milanie Vosloo

Om van jou podium af te klim

As iemand onder julle belangrik wil wees, moet hy die onbelangrikste posisie onder julle inneem. Hy moet bereid wees om alles te doen wat die ander van hom vra en moet die hele tyd reg wees om die ander te dien, of dit hom nou pas of nie. Markus 10:44

Ons as mense sukkel maar om vir ander pasaangeërs te wees. Dis mos darem nie maklik om vir ander mense die wind te keer en dan sommer so half ongesiens van die toneel te verdwyn nie. Veel eerder wil ons self die wedlope hardloop sodat ons tog die eer en erkenning kan kry. Pasaangeërs staan immers nie op podiums met lourierkranse om hul nekke nie!

Tog is dit presies wat Jesus bedoel wanneer Hy sê dat ons bereid moet wees om die minste te wees. En, voeg Hy by, hierdie minste-wees geld nie net vir die dag as ons so voel nie, dit beteken dat ons onder alle omstandighede bereid sal wees om ander te dien … of dit ons nou pas of nie.

Om van ons mensgemaakte “belangrikheidspodiums” af te klim, is verseker nie maklik nie. Dis mos immers die plek waar die skare mense ons raaksien en waar ons erkenning kry!

Dis makliker om van jou podium af te klim wanneer jy onthou dat dié dinge waarvoor ons hier op aarde aangeprys word, weinig punte in die hemel tel. Die hemel vereer immers net een ding: Die liefde.

Vader, maak my minder sodat u liefde in my meer kan word.

Skrywer: Milanie Vosloo

Laat sy Liefde jou Lei: Soms moet jy die pad loop – Milanie Vosloo

Soms moet jý die pad loop

“God het selfs nie-Jode tot inkeer gebring om aan hulle die lewe te gee.” Handelinge 11:18b

Het jy al daaraan gedink dat daar sekere dinge is wat net jý kan doen? Dat God bepaalde opdragte het wat Hy spesifiek aan jóú opgedra het? En het jy al daaraan gedink dat, ás jy dit nie doen nie, ‘n stukkie van die koninkryk so verlore kan gaan?

So het God byvoorbeeld vir Filippus gestuur om ‘n Etiopiёr tot bekering te lei sodat die Evangelie-boodskap Afrika kan bereik. En het Hy deur Lida die verlossingsboodskap in Europa begin. Ja, God het seker gemaak dat sy liefde dwarsdeur die wêreld versprei sodat élke mens kon weet: Daar is ‘n God wat álle mense wil red.

Jou koninkryksdeel kan dalk by jou onmiddellike kring lê: by die vriende, familie of kollegas met wie jy daagliks te doen kry. Maar dit kan ook wees dat God jou in die lewe van ‘n onbekende wil gebruik soos die kelner wat jou koffie bedien, die kassiere wat jou aankope hanteer, die bedelaar by jou hek of die persoon in wie jy jou vandag gaan vasloop. Wanneer jou hart ingestem is op die Gees van God, sal jy wéét wanneer die geleentheid hom voordoen. Jy sal “hoor” hoe daardie mens as’t ware vir jou sê: “Hoe kan ek die pad loop as jý my nie wys nie?”

Wees vandag fyn ingestel op die leiding van die Gees. Hy gaan vir jou sê: Maak só!

Heilige Gees, maak my asseblief gehoorsaam, selfs wanneer u opdrag vreemd klink.

Skrywer: Milanie Vosloo

Ek wil gedoop word maar bly saam met my ou – wat nou? – Kobus Kok

Alet vra: 

Ek en my vriend bly saam. Ons staan nou voor die keuse om gedoop te word. Ek weet egter nie of ek moet nie. Mag ek gedoop word as ek weet ek gaan verder in sonde saam leef?

Antwoord:

Dr Kobus Kok antwoord:

Ek wil gedoop word maar bly saam met my ou – wat nou? Dr. Kobus Kok 

Die doop is ‘n teken of seël van die feit dat iemand Jesus as verlosser aangeneem het. Dit veronderstel dat jy jou ganse lewe aan God oorgegee het en dat jy begeer om volgens Sy wil te leef. Wanneer mens tot wedergeboorte kom, is dit die Gees wat werksaam in jou is. Die Gees oortuig jou ook van wat reg en eerbaar is in God se oë (Joh 3:3-6). In Romeine 12:1-2 maak Paulus ‘n oproep op gelowiges om hulle liggame as heilige en lewende offers aan God te gee en om nie aan hierdie sondige wereld gelyk te word nie. In plaas daarvan om gelykvormig te word aan hierdie wereld moet die Christen haar denke laat vernuwe. Indien mens toelaat dat God jou denke vernuwe, se Paulus, sal mens ook vinnig weet wat vir God goed en aanneemlik en volmaak is. Die vraag is dus: Wat dink jy eerlik is die wil van God in hierdie situasie? Doen dan die wil van God – die Gees sal jou duidelik wys wat die antwoord is. Wees gehoorsaam aan God!

Skrywer: Dr Kobus. Kok