Tussen stimulus en respons – Kobus Kok

‘n Leser vra:

Ek het hulp nodig, want ek word gou kwaad en dan word ek lelik . Ek glo in God en weet hy hou my hand vas elke dag . Ek wil weer rustig wees en nie net skel nie . Kan iemand my help

Antwoord:

Tussen stimulus en respons

Tussen stimulus en respons is daar ‘n spasie. In daardie spasie lê die mens se keuse om te kan kies, die “response-ability”. Dit is belangrik dat mens nie ‘n slagoffer van jou eie emosies en impulse word nie. Die groot geheim is om by ‘n keuse te begin. Maak die verantwoordelike, doelbewuste keuse om te WIL verander. Alles begin hier. Indien jy dit besluit het, en erken dat ‘n bepaalde emosie ‘n probleem is, het jy alreeds begin wen. Nou kan jy jou gedagtes bestuur. Indien bepaalde impulse nou  na jou kom, besluit jy om anders te reageer. Dikwels word ons kwaad vir bepaalde situasies en reageer deur kwaad te word of beheer te verloor, sonder dat ons self regtig verstaan wat die verlies is. Hoekom word jy kwaad, wat is dit wat in die bepaalde situasie jou kwaad maak?

Neem die volgende voorbeeld. Iemand by die werk kom sommer so uit die bloute en maak die opmerking dat jy mal en skisofrenies in jou denke is. In plaas daarvan om dit wat die persoon gesê het na jouself te trek en dit persoonlik op te neem kan jy dit objektiveer. Vra jouself eerder af wat in die ander persoon “getrigger” sou word. Miskien gaan dit nie regtig oor jou nie, maar is die persoon self in sy menswees baie ongelukkig of het hy probleme by die huis. Die gevolg is dat jy nie voel dat jy die persoon terug wil kry of terug sleg sê nie, maar probeer verstaan wat die ander persoon so laat optree teenoor jou. So ontwikkel jy eerder passie vir die ander persoon se swakheid en onvermoë om homself of haarself toepaslik uit te druk. So kan ons aangaan. Mens het die krag/vermoë/verantwoordelikheid om te kies hoe jy gaan reageer. Deur kwaad te word ontmagtig jy eintlik jouself en doen meer skade aan verhoudings. Dit is net nie die moeite werd nie. Lees gerus Romeine 12:2 – laat God toe om jou denke te vernuwe en moenie gelyk word aan die sondige aardse manier van doen nie.

Skrywer: Dr Kobus Kok

Meditasies en gebede uit Job se hart – deel 1 – Retha Pretorius

Ter inleiding

Hierdie meditasies het hulle ontstaan gehad in ‘n idee wat die Here in my hart geplaas het, om Job se gedagtes en gebede in verkorte vorm te dokumenteer, en my eie perspektiewe daaroor te bewaar vir toekomstige weer en weer lees.

Ek hoop dat die gedagtes en gebede vir elkeen wat dit lees iets sal beteken, en sal bydra tot geestelike groei.

‘n Persoonlike getuienis

Ek kan onomwonde getuig dat dit Job, meer as enige ander boek in die Bybel, was wat my deur trauma en hartseer gedra het, so asof die Here met my persoonlik gepraat het.

Die bottom line van Job is vir my dit: Wie is die mens, om die Skepper van die Heelal te bevraagteken? Ons is geskape om ons Maker te verheerlik, Hy is nie daar om ons gemak en gerief te verseker nie, maar….. Hy is altyd dáár vir ons, maak nie saak wat die omstandighede is nie.

Gedagtes oor Job se eerste toets

Job het eerstens al sy materiële welvaart en al sy kinders verloor, met God se toestemming. Nogtans het hy op die grond voor God neergeval en hierdie hartverskeurende, onsterflike gebed aan God gerig:

“Naak het ek

uit my ma se skoot gekom,

en naak sal ek weer

van alles gestroop wees

die dag wanneer ek doodgaan.

Die Here het my alles gegee

wat ek gehad het,

en nou het Hy

dit alles weggeneem.

Prys die naam van die Here!”

(Die Nuwe Lewende Vertaling)

Soveel vrae kom by ons op oor die toelatende wil van die Here –  maar, al wat ek, en elkeen van ons hoef te weet is dat ons vertroue op God kan hê, ten spyte van, soos Job gehad het.

‘n Lied wat ek oor die radio gehoor het, sê die volgende: “I realized I have to go through the valley to stand on the mountain of God.”

God se prioriteit is dat ek ‘n beter begrip van Hom sal vorm. Hy is meer geïnteresseerd in wat binne-in my aangaan, as wat om my gebeur.

Job is terloops ook ‘n ongelooflike stuk literatuur, sowel die prosa-gedeeltes as die digkuns-gedeeltes is, volgens kenners, van die beste wat nog ooit die wêreld ingestuur is. Net die beste is goed genoeg vir ons God!

Hiermee ook erkenning aan die Bybellenium Naslaanwerk vir aanvullende gedagtes en stellings.

Skrywer: Retha Pretorius

Die Groot Geloofswoordeboek: Reïnkarnasie

Reïnkarnasie

Reïnkarnasie is die geloof dat die mens se siel telkens by die dood van een liggaam na ‘n ander oorgaan in ‘n proses van reiniging totdat die siel volmaaktheid bereik het en met God verenig word. Dit word veral in Hindoeïsme geleer. Dit is nie verenigbaar met die Christelike geloof nie omdat ons glo dat ons een maal sterf en daarna kom die oordeel (Heb 9:27).

Skrywer: Prof Adrio König

Die Groot Geloofswoordeboek: Puriteine

Puriteine

Die Puriteine wou na die Kerkhervorming (*Hervorming) die Church of England reinig (purify). Hulle het die reiniging/hei­liging van sowel die individu as die samelewing nagestreef. Hulle het ‘n verbondsteologie gehad en die kerk en die staat in terme van Bybelse beginsels probeer hervorm. Hulle het baie streng lewensreëls gehad, en was veral streng oor die viering van Sondag. Ons eie voorouers het baie van hierdie reëls oorgeërf.

Skrywer: Prof Adrio König