Ter helle neergedaal – was Jesus in die hel? – Fanie Rudolph

Inleiding:

Ons bely elke Sondag dat ons glo in Jesus wat “ter helle neergedaal” het.  Wat sê ons hiermee?  Was Jesus regtig in die hel?

Ter helle neergedaal:

Die woorde “ter helle neergedaal” wat ons Sondae as deel van ons geloofsbelydenis herhaal, kom self nie in die Bybel voor ten opsigte van Jesus nie.  Jesus het wel “helse smarte” gely.  Sy hele lydensweg word hierin opgesom (vgl. Jesaja 53:5; Matteus 26:38; Hebreërs 5:7).  Die diepte van sy lyding was die Godverlatenheid wat Hy op Golgota beleef het (Matteus 27:46).  Om geen toegang tot God te hê nie, is ‘n ervaring van die hel.  Jesus het hierdie lyding namens ons verduur, sodat ons daarvan bevry kan word.  Dit was sy volkome offer om ons met God te versoen (2 Korintiërs 5:21).

Die algemene denke was dit iemand wat sterf, se siel na die doderyk toe gaan.  Daar wag dit dan op die oordeelsdag.  Ons lees veral oor hierdie lyding in die hel by die boek Henog.  Die Nuwe Testament skrywers, en veral Johannes in Openbaring, bring egter die gedagte na vore dat gelowiges by God in die hemel is, en nie in die doderyk wag nie (vgl. Openbaring 6:9-11; 20:1-6).  Die ongelowiges word by die wederkoms “opgewek” vir die oordeel (Openbaring 20:11-15).  Daarna word hulle in die hel gegooi (Openbaring 20:15).

Was Jesus in die hel?

Daar is geen bewyse vanuit die Bybel dat Jesus regtig in die hel was nie.  Die Bybel sê slegs dat Jesus dood was, en dat Hy vir drie dae in die graf was.  Wat met sy gees in daardie tyd gebeur het, is die Bybel stil oor.  Daar was wel ‘n gevoel dat ‘n mens se siel vir drie dae na jou dood by die liggaam gebly het, waarna dit die liggaam verlaat het en na die doderyk gegaan het.  In die lig hiervan is dit duidelik dat niemand rondom Jesus verwag het dat Hy êrens anders as in die graf was nie.

Die Bybel maak geen verklaring oor waar Jesus na sy dood was nie.  Die algemene afleiding onder mense in Jesus se tyd sou wees dat Hy in die doderyk was.  Dit is egter nie vir die skrywers van die Nuwe Testament ter sake nie.  Wat belangriker was, is om te weet dat die dood Hom nie kon vashou nie.  Hy het dan die sleutels van die dood en die doderyk (Openbaring 1:18).  Deur self deur die dood (en die doderyk) te gaan, het Hy vir ons ‘n deurgang bewerk.  Die dood kan ons ook nie meer vashou nie, want Jesus sluit die deur na die lewe vir ons oop.

Wat van 1 Petrus 3:19?

Hierdie vers word deur baie mense aangegee as bewys dat Jesus in die hel was.  Tog was die teks nie aanvanklik so verstaan nie.  As ‘n mens 1 Petrus 3:18-22 chronologies lees, vind jy dat vers 19 volg na Jesus se sterwe en opstanding.  Sy preek is dus nie in die hel gelewer nie, maar aan mense wat gesterf het, wie “in die gevangenis” was.  Die gevangenis verwys moontlik na die doderyk.  In vers 20-21 word hierdie preek in verband gebring met Noag se preek voor die sondvloed.  Dit wil voorkom asof die mense in die gevangenis die mense is wat nie na Noag wou luister nie (vgl. vers 20).  Sommige verklaarders reken selfs dat Jesus se Gees deur Noag met die mense in die gevangenis praat.  Vers 19 stel dit egter duidelik dat Christus self sy oorwinning aangekondig het.  En aangesien Jesus waarskynlik die preek na sy opstanding lewer, vind dit nie plaas terwyl Hy in die graf is nie.  Sy tyd in die graf was bloot om sy oorwinning oor die dood en die doderyk te verklaar.

Vir hulle wat nie gehoorsaam was nie, bring Christus dan die boodskap van sy oorwinning (vgl. vers 19).  Hierdie is nie ‘n bekeringsboodskap nie.  In die doderyk is bekend gemaak dat daar verlossing en oorwinning is vir dié wat geglo het, en veroordeling vir hulle wat nie wou glo nie.  Die kern van 1 Petrus 3:18-21 is die verlossing en hoop omdat Christus oorwin het.

Gevolgtrekking:

Die Bybel sê nie vir ons of Jesus in die hel was of nie.  Dit is eintlik nie ter sake nie.  Ons kan aanvaar dat Jesus nie daarnatoe hoef te gegaan het nie.  Die oorwinning oor die duiwel het nie in die hel plaasgevind nie, maar in die hemel en aan die kruis (Openbaring 12:7-12).  Die “ter helle neergedaal” wat ons bely, verwys na die “helse smarte” wat Jesus tydens sy lyding moes deurmaak, so erg dat Hy geheel en al van God verlate gevoel het (Matteus 27:46).

Outeur: Dr Fanie Rudolph

Huis seën na Selfmoord? – Kobus Kok

My man het my en my twee dogters in Desember 2006 vir ‘n ander vrou verlaat. Ons is ongelukkig geskei, maar my kwellinge het nie opgehou nie. Laas jaar Junie (26) het my gewese man selfmoord gepleeg – hy het hom self gehang. Ek het baie geworstel met die vraag of hy wel hemel toe is as gevolg van sy selfmoord en het die Here hom vergewe of nie. Nou worstel ek met sy huis waar hy hom self in gehang het om die huis te verkoop. Die huisagent het vir my gesê om die huis skoon te maak en te seën- MAAR ek weet nie wat om te doen nie. Waar begin ek hoe maak ek die huis skoon en wat seën ek af.

Antwoord:

Ek is baie jammer om te hoor van jou man en ek bid dat God julle sal troos en veral ook die dogtertjies.

Deesdae sal baie mense sê dat jy jou huis moet seën (Op die webtuiste is daar ook ʼn artikel oor huis skoonmaak wat jy gerus kan lees; kyk ook e-kerk se artikels daaroor). Mens hoor dit oral. Mens moet net versigtig wees dat mens nie soos die mense van die ou-tyd in die heidense gelowe geestelike krag aan allerlei objekte en ruimtes toesê en met een of ander magiese ritueel die geeste daar  probeer uitkry nie. Ons moet eers mooi gaan dink hoekom ons doen wat ons doen en wat die teologie daar agter is.

In terme van die teologie: Met die koms van Jesus het daar iets radikaal in die geestelike wêreld gebeur. In Johannes 1:4 lees ons dat Jesus lig is en dat hy die bron van lewe is. In Johannes 12:31 sê Jesus self dat dit wat hy kom doen het direk saamgaan met die uitgooi en die oorwinning van die duiwel en die bose magte. Jesus is immers sterker as die bose.  Die kern van dit alles is dat indien jy ʼn Christen is,  jy deel in die volheid van dit wat Christus kom bring het. In Efesiërs 2:15 lees ons dat Jesus die bose meegesleur het in die triomftog van Christus, wat beteken dat duister magte nie voor die lig kan bly staan nie. Lig verdryf duisternis.

Indien iets vreesliks gebeur het in ʼn huis soos ʼn selfmoord, voel dit dikwels of daar een of ander vreemde “geestelike” ding daar aan die gang is. In mens se gedagtes is dit omtrent net die vreeslike gebeure waaraan jy die heeltyd dink as jy in die huis is. Dit kan die oorsaak van een van twee dinge wees. Dit kan ons eie gedagtewêreld wees en ons eie wete dat iets vreesliks daar gebeur het, en op sielkundige vlak beleef ons dan negatiewe “geestelike” dinge. Aan die ander kant kan dit dalk regtig iets geestelik wees wat buite ons is. Ek wil dus nie sommer net sê dat dit net  in ons gedagtes is nie, want ons moet maar altyd ruimte maak vir die moontlikheid dat daar iets meer kan wees as wat ons met ons sintuie kan ervaar.

Hoe dit ook al sy, daar is net een manier om jou huis “skoon” te maak. Maak net seker dat jy die regte teologie het. Met ander woorde – jy gaan uit vanuit dit wat Christus gedoen het: Teenoor die wreedheid en die onrus van dit wat in die huis gebeur het, spreek jy die realiteit van Christus se vrede, sy genesing en restourasie en jy bid dat God die situasie sal kom omkeer en die pyn sal genees. In die eerste plek kan jy dus in die kamer waar jou man oorlede is gaan bid tot God.  Jy kan geestelike musiek daar speel en met jou hele hart net tot die Vader bid. Jy sal dalk diep emosioneel geraak word deur die pyn wat julle almal beleef het. Daar in die kamer kan jy jou hart voor God se voete breek, en jy sal beleef hoe God jou in die konteks van jou trane, verligting sal kom bring en jou sal troos. Jy kan jou man vergeef en van jou kant af jammer sê vir die dinge wat verkeerd geloop het en vir hom vertel wat jy van hom mis. In jou hart sal God dan iets kom doen en jy sal meer vrede beleef. Dit gaan jou nie net op sielkundige wyse anders oor die huis en die kamer laat voel nie, maar ook geestelik omdat jy in jou gebedstyd sekerlik God se teenwoordigheid daar sal beleef. God is myns insiens die groot God van Lewe. Hy is die God van Genesing wat ons wonde kan genees en hy is ook die God van vrede. Indien jy, wanneer die tyd reg is,  die kamer oorverf, kan dit ook terapeuties wees. Na die tyd sal die kamer sommer anders lyk en geestelik sal jy weet dat God se vrede heers oor die seer.

Mag God jou en jou gesin vrede gee.

In terme van die vraag of jou man in hemel is of nie, ek dink nie een van ons op aarde kan dit beantwoord nie. Kom ons vertrou dat God, die God van liefde en genade wat ons beter ken as wat ons onsself ken, dat Hy beter daaroor kan besluit as wat ons ooit sou kon doen. Kom ons vind rus in die wete dat die God weet en ons vertrou Hom.

Outeur: Dr Kobus Kok

Om God oral te kan sien – selfs in “onheilige” plekke – Kobus Kok

Is dit waar dat God ons slegs in stiltetyd ontmoet en nie in die wind, storms, aardbewings ens. nie? Met ander woorde nie in ons daaglikse lewensstryd nie.

Antwoord:

Dr Kobus Kok antwoord:

In 1 Konings 19:11 en verder lees ons inderdaad dat God vir Elia ontmoet – nie in die aardbeweging en die donderweer en die vuur nie, maar in die stilte. In daardie tyd het mense God se teenwoordigheid veral verwag in die teofaniese verskynings, met ander woorde die donderweer en die aardbewegings. Selfs die heidene het gedink as die blitse slaan dan praat die gode of dan is hulle baie kwaad. Hier in 1 Konings sien ons egter die mooi gedeelte dat God nie in die donderweer met Elia gepraat het nie. Elia het seker gedink dat God nooit met hom gaan praat nie. En toe kom daar skielik ‘n reuse wind, en in die Hebreeus word die woord roag gebruik vir wind en vir God se gees. Net toe spits Elia sy ore want sekerlik sal God nou met hom praat. Maar steeds was God nie in die wind soos mense van daardie tyd dit sou verwag het nie.

Daarna was daar ‘n skielike stilte. Arme Elia het seker gedink God gaan nooit met hom praat nie. Maar toe hoor hy in die mees onverwagte stilte die stem van God.

In die geweldige besige tyd waarin ons leef raak ons min stil. Ons moet egter onthou dat God meer as dikwels nie bo ons selfoon en bo die radio en die televisie met ons praat nie. Stilte is baie belangrik omdat dit ons help om te kan fokus – veral in die buitengewone besige tyd waarin ons leef.

Natuurlik praat God ook in alledaagse dinge op dikwels op ʼn manier waarop ons dit die minste verwag. Die wat naby aan God leef ervaar hom immers heeltyd en sien iets van God oral waar hulle gaan. In die boemelaar langs die pad hoor mens God, in die natuur- daar in die wildtuin- sien mens God. Soms ervaar mens God in die middel van die besige verkeer in die middestad – daar tussen duisende mense wat soos miere rondskarrel kan mens God ervaar – die God wat almal wat daar loop en wat rondom ons beweeg ken en wat in ‘n verhouding met ons wil staan. In ‘n nagklub kan ons God hoor en ervaar, want God is ook daar. Dit is juis die punt van die Nuwe Testament. Die Jode het gemeen dat God net op sekere plekke teenwoordig is en dat hy nie daar is waar goddelose en onrein mense is nie. In Lukas 15:1vv lees ons dat Jesus egter meer as dikwels God se teenwoordigheid daar gebring het waar mense gedink het dit nie gevind kan word nie, soos tussen die tollenaars en die sondaars. In die Nuwe Testament word onheilige ruimtes skielik heilige ruimtes met die potensiaal dat God se heerlikheid en lig daar te voorskyn kan kom. Sommige kerkleiers soos Ervin McManus van Amerika hou hulle kerk in nagklubs omdat hulle juis wil sê dat God oral is en dat kerk oral is waar gelowiges in die naam van Jesus bymekaar kom – en dat God se stem oral kan tuiskom, nie net in tradisionele kerke nie.

God is dus nie net in stilte nie, God is letterlik sigbaar in alles omdat Hy die skepper van alles is. Niks wat bestaan, het sonder hom bestaan nie – dit is dalk in die verkeerde hande, maar dit skree eintlik uit om deur die lig omskep te word. God is dus oral, ook in die konteks van ons alledaagse lewensstryd – die vraag is net of ons ore oop is om Sy stem te hoor en ons oë oop is om te sien wat Hy ons wil wys… Persoonlik dink ek tog dat stilte kosbaar is omdat dit ons op ʼn besondere wyse help om net op Hom te fokus.

Outeur: Dr Kobus Kok

Hoe skryf ek ʼn opstel oor ʼn Bybelse onderwerp? – Jan van der Watt

Heelwat mense vra hoe ʼn mens ʼn opstel skryf oor byvoorbeeld wat die Bybel oor vreugde sê?

Antwoord:

Prof. Jan van der Watt antwoord:

Kom ons gee ʼn paar eenvoudige stappe wat jou mag help:

a)      Jy moet eers uitvind waar die Bybel oor ‘blydskap’ praat. Hoe doen jy dit? Daar is boeke wat ons ‘konkordansies’ noem wat al die voorkomste lys. As jy rekenaar het, is dit nog makliker. Gaan op GOOGLE en tik in: Bible concordance. Daar sal jy dan Bybelse artikels kry waarin jy soektogte kan maak. Jy tik net ‘joy’ in en dan word al die gevalle in die Bybel waar jy van ‘joy’ lees gelys.

b)      Nou moet jy al die gevalle deurlees en vasstel wat elkeen van die tekste oor ‘joy’ sê. BAIE BELANGRIK: jy moet nie net een sin of een vers lees nie. Kyk na die hele konteks om te probeer agterkom wat gesê word. Terwyl jy so lees moet jy dit wat die vers sê ‘rangskik’ volgens dit wat die gedeelte spesifiek sê (dit is amper soos om lekkergoed te sorteer – daar is ʼn pakkie vir elke soort en jy moet sorg dat wat saam hoort moet saam kom. Uiteindelik moet daar ʼn pakkie vir elke soort lekkergoed wees). Jy moet opskrifte (pakkies) maak en soos jy lees moet jy die verse onder die regte opskrif sit wat daarby pas. Byvoorbeeld, jy sal ʼn teks lees waarin daar staan: ‘Wees bly in die Here’ – hierdie vers sit jy dan onder die opskrif: ‘Blydskap in die Here’. Sê nou daar staan: ‘Wees bly in die Here, want Hy het jou lief’ – dan maak jy ʼn onderafdeling by die groot eerste opskrif: ‘Blydskap oor God se liefde’. DWS (as jy nou alles deurgegaan het, kan dit so lyk):

1)      Blydskap in die Here

…………………

………………….

i.      Blydskap oor God se liefde

……………………………

……………………………

ii.      Blydskap oor ………

2)      Blydskap oor die skepping

……………………

i.      Blydskap oor die berge en see

………………………

ii.      Blydskap oor die diere  ens……….

c)       Nou is jy nog nie klaar nie. Jy het nou nog net die onderwerpe mooi georden.

Nou moet jy kyk wat alles gesê word onder die opskrif: Blydskap oor God se liefde. Daar is miskien drie stellings wat vertel van hoe groot God se liefde is, hoe waardevol die liefde is en hoe ewig die liefde is. Nou moet jy ʼn kort ‘opstelletjie’ skryf waarin jy die drie punte beskryf en met mekaar in verband bring. Nou het jy nie meer net ʼn lysie met drie verse nie, maar ʼn mooi beskrywing van die onderwerp. So gaan jy al die opskrifte deur.

d)      As jy klaar is, lees jy alles deur en skryf dan ʼn opsomming in jou eie woorde. Sit

dan ook ʼn mooi inleiding by, en daar het jy jou opstel.

Ander boeke wat help is ‘Dictionaries of the Bible’. Hulle het gewoonlik opstelle oor sulke onderwerpe in.

Outeur: Prof Jan van der Watt