God gee vir ons ʼn nuwe lewe (wedergeboorte)

As jy in Jesus glo, gee God vir jou ʼn nuwe lewe saam met Hom, ʼn ewige lewe (Johannes 3:16).

Om die waarheid te sê, jy word in God se familie gebore (Johannes 1:12-13; Johannes 3:1-8; 1 Petrus 1:3, 23). Dit word wedergeboorte genoem, of iemand wat vir ʼn tweede keer gebore word, hierdie keer geestelik. So verduidelik Johannes wat met ʼn mens gebeur as jy gered word. Jy kry ʼn tweede geestelike, ewige lewe wat deur God vir jou gegee word. Ja, jy word geestelik of van bo gebore. Nou kan en moet jy geestelik vir God leef.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

God lieg nooit nie (waarheid)

Baie mense sê daar is nie meer iets soos absolute waarheid nie. Alles is relatief. Ek kan glo wat ek dink en jy wat jy dink. Wat ek glo, is vir my waar en wat jy glo, is vir jou waar.

Mense wat so redeneer vergeet van God. As ons na waarheid en egtheid soek, kry ons dit by God. Hy het alles gemaak en weet hoe alles werk. Hy weet wat eg en reg is, want Hy het ook die reëls en wette vir die wêreld gemaak. En as ons werklik God wil leer ken, moet ons die weg na die waarheid loop, naamlik Jesus (Johannes 14:6). Om dus te ontken dat daar werklik ʼn absolute waarheid is, is om God te ontken. Hy is waar en wie in Hom glo, is mense van die waarheid

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Visioene en drome… praat God so?

In die Bybel lees ons van mense wat visioene gesien het en ander wat drome gedroom het.

ʼn Mens hoor vandag nog daarvan, maar baie keer is mense skepties daaroor. Die rede is omdat drome en visioene soms so subjektief is. Jy weet eintlik nie regtig of dit van die Here af kom en of dit sommer maar jou eie gedagtes is nie. Tog is drome soms deur die Here gebruik om boodskappe aan mense te gee. Toe Jesus egter gekom het, het Hy die finale en duidelikste boodskap van die Here aan mense kom gee. As jy dus wonder oor wat die Here wil hê, is die veiligste plek om te gaan luister, by Jesus self. Gaan lees wat Hy gesê het. Daarmee saam het ʼn tweede ding gebeur: God se Gees het met Pinksterdag op elke gelowige gekom. Die Gees lei en leer gelowiges nou. Die Gees doen dus wat drome gedoen het voor die Gees gekom het. As jy nou moet kies tussen ʼn droom of die Gees van God wat self met jou praat, wat sal jy kies? God kies sy Gees. Ons moet net seker maak dat ons sy Gees duidelik en helder hoor en nie dalk na ʼn vals boodskap luister nie. Lees maar 1 Johannes 4:1-2.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Die Heilige Gees neem beheer van jou lewe (Vervul met die Gees)

In Handelinge lees ons hoe die Gees op mense gekom het en hulle vervul het (Handelinge 2:4). Die vervulling beteken dat hulle nou mense is in wie die Gees woon en werk. Hulle is vol van sy Gees. Daar word op baie maniere gepraat oor wat gebeur as die Gees in jou kom woon. In sommige gevalle ervaar mense die wonderlikste dinge (veral aanvanklik in Handelinge), in ander gevalle gee die Gees hulle gawes en in ander gevalle kry hulle wysheid om reg op te tree. Die Gees gee hulle dus die krag om op verskillende vlakke die Here reg te dien.

In Galasiërs 5:16-26 (sien ook Romeine 8) sê Paulus dat ons ons hele lewe deur die Gees moet laat beheer. Ons moet die stuurwiel van ons lewe in sy hande sit, want Hy is in ons. As ons dit doen, sal ons die vrug van die Gees, naamlik, liefde, vriendelikheid, goedheid en sulke dinge, in ons lewens begin sien. Hy sal ons dus lei om reg op te tree. So maak die Gees ons lewens “vol” van sy invloed.

In 1 Korintiërs 12 (sien ook Romeine 12) bespreek Paulus al die wonderlike geskenke wat God deur sy Gees vir ons gee. Wat ons as gelowiges geestelik nodig het, daarvoor sorg die Gees. Weereens maak Hy gelowiges se lewens “vol” van sy teenwoordigheid.

In Johannes 14-16 word die Gees gelowiges se Spesiale Helper genoem. Hy sal gelowiges versorg, hulle lei op die pad wat hulle moet loop en hulle goeie volgelinge van Jesus maak. So wil die Gees elke hoekie en draaitjie van ʼn gelowige se lewe vul.

Vervulling is dus baie meer as net ʼn emosionele ervaring. Dit is God se Gees wat aktief in jou werk om beheer in jou lewe uit te oefen.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy