Om dankie te sê vir God is om Hom te loof (Lof)

Lof is ŉ ander woord vir “om vir God dankie te sê”. Aanbidding is om God te erken vir wie Hy is; lof is om Hom dankie te sê vir wat Hy in jou lewe doen. Ja, dit is om te erken dat Hy in jou lewe besig is en dat wat daar gebeur van Hom af kom.

As jy dus erken dat jou talente en jou gawes van God af kom en jy sê vir Hom dankie daarvoor, dán loof jy die Here. As jy vir die Here dankie sê dat jy gesond is en kan leef, dán loof jy Hom. Dit beteken dat ons God op baie maniere kan loof. Ons kan stil op sy skoot gaan sit en net vir Hom daar dankie sê. Ons kan lekker luidkeels saam met ŉ orkes vir hom dankie sê vir sy redding en genade. Ja, glo dit of nie, ons kan selfs met stemmige orrelspel Hom heerlik loof. Dit gaan nie oor die manier nie, maar oor die opregte dankie sê. Ons hoor partymaal na ŉ lekker singsessie dat iemand sê: “Ek het die Here nou lekker geloof”. Dit is goed om daarna lekker te voel, maar die groot vraag is nie of jy lekker gevoel het nie. Die vraag is of God lekker gevoel het. Lof se doel is om Hom te erken vir wat Hy in jou lewe gedoen het. Dit sal God laat lekker voel.

Maar kan ek nog die Here loof as dit swaar gaan? Waarvoor moet ek dan vir Hom dankie sê? Natuurlik kan jy God dan nog loof, al is dit net vir die voorreg om Hom te ken en op sy skoot te mag sit. Want as jy op sy skoot sit, sal jy weet… Hy sal jou nooit in die steek laat en jou ook nie bo jou kragte versoek nie. Soek dan jou krag in sy krag. Daaroor kan jy die Here verseker loof.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Simbole in die Bybel

Mense stry baie oor hoe letterlik ons die Bybel moet lees. As daar in Openbaring 21 staan dat die hemel soos ŉ stad van goud en edelgesteentes is, gaan dit letterlik so wees? Of as die Bybel sê dat God ons “loskoop” met Jesus se bloed, beteken dit dat God Jesus se bloed letterlik in geld verander en dit aan die duiwel betaal? Sjoe, moet God regtig die duiwel so betaal?

Dit is nie onbelangrike vrae nie. As jy byvoorbeeld ŉ grappie met iemand maak en die persoon dink jy is ernstig is daar gewoonlik ŉ gemors. Daai persoon dink jy wil hom beledig of in die gesig vat en dan is hy dadelik vies. En jy wou maar net gaaf en oulik gewees het. Nee, dit is belangrik dat jy die bedoeling van woorde reg moet verstaan. Daarom moet ŉ mens seker maak dat jy nie iets letterlik lees wat eintlik figuurlik bedoel is nie, en omgekeerd.

Omdat die Bybel oor God praat, is daar báááie dinge wat figuurlik is, doodgewoon omdat ons as mense nie woorde en selfs die kennis het om alles van God behoorlik te beskryf nie. God is net soveel groter as ons en die hemelse dinge so anders as wat ons ken, dat ons net met beelde en metafore en beskrywings regkom.

Vat byvoorbeeld die beeld van die nuwe Jerusalem wat van goud gemaak is. Jy sou nie eers lekker met jou meisie op die sypaadjie kon sit nie, want die goue grasspriete sou jou lekker van agter bygekom het. Nee, die hemel gaan nie ŉ goue stad wees nie. Dit gaan soos (vergelyking) ŉ goue stad wees. Die skrywer moes vir sy lesers vertel hoe die hemel gaan wees, maar het eintlik nie woorde gehad nie. Die hemel is te wonderlik. Toe vat hy die beste en wonderlikste beskrywing wat hy kon kry… ŉ stad van goud en edelgesteentes en ŉ pragtige rivier met genoeg kos. Beter en wonderliker as dit kan hy hom nie voorstel nie. Die goud en pêrels en edelgesteentes is maar net maniere om ons regtig te help om te verstaan hoe wonderlik die hemel gaan wees. Om alles letterlik te lees gaan jou in die geval op die verkeerde pad sit. As jy verstaan dat die goud en edelgesteentes en die dinge beelde is van iets wat nog baie wonderliker as dit is, verstaan jy wat die skrywer wou sê.

Om beelde en simbole, ja, figuurlike taal, in die Bybel te herken, is belangrik. (Onthou, die meeste dinge wat gesê word, is letterlik, maar daar is ook figuurlike taal en dit moet jy herken). Het jy geweet dat in omtrent al die plekke in die Nuwe Testament beelde gebruik word, waar daar gepraat word oor hoe ons gered word? Daar word byvoorbeeld gesê dat ons versoen word (ŉ beeld van kwaaivriende wat weer vriende word); losgekoop word (die beeld van ŉ slaaf wat vrygekoop word); dat ons geregverdig word (ŉ beeld van ŉ regter wat jou van jou skuld vryspreek sodat jy nou regverdig uit die hof kan uitstap); dat ons wedergebore word (die beeld van ŉ kind wat in die wêreld gebore word, hierdie keer geestelik), en so kan ons aangaan. Deur te snap dat die Bybel soms in “beeldtaal” praat, help ons ook sommer om te verstaan wat die Bybel wil sê. Daarom is behoorlike Bybelstudie (ook met hulpmiddels) nie net ŉ goeie idee nie, maar nogal lekker ook.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Wat is geloof?

Die Bybel sê dat as jy in God en Jesus glo jy ŉ kind van God is.

Dit is die manier waarop ons redding kry, met ander woorde, waarop God deel van ons lewens word. MAAR, en dit is die groot vraag, wat is geloof? As iemand vir my sê ek moet petrol in my kar gooi as ek wil ry, maar ek weet nie wat petrol is nie, gaan dit ŉ gemors afgee. As iemand vir jou sê jy kan God leer ken deur te glo, moet jy darem seker weet wat geloof is.

Dit is nie so moeilik nie. Geloof is eintlik net ŉ ander woord vir “geestelik sien” of “geestelik hoor”. As jy in ŉ pikdonker kamer sit, het jy nie ŉ idee wat om jou aangaan nie. Sit die lig aan en skielik maak alles sin. As jy geestelik blind is vir God sal jy Hom nooit raaksien nie. Maar as jou “geestelike oë” oopgaan, sal jy Hom sien. Ja, jy sal wéét Hy is daar. Jy sal nie oor Hom of sy bestaan wonder nie, maar jy sal weet. Dit is geloof. (Daarom sê Jakobus dat duiwels ook glo. Hulle weet God is daar. Jakobus 2:19).

Maar daar is iets anders om te onthou. Ander persone beïnvloed jou en jou optrede direk. Dink net hoe gesels jy en jou maats tot die meisie daar aankom op wie jy mal verlief is. As jy nou van ŉ persoonsverwisseling wil praat, is dit dan. As jy nie begin hakkel nie, tref die stilstuipe jou of jy begin so babbel dat niemand weet wat jy sê nie. Maar jy is nie meer die ou van ŉ paar minute tevore nie. Jou maats se grinnikke gaan jy na die tyd een vir een van hulle monde afvee… maar nou moet jy eers die meisie beïndruk. Waar kom die verandering vandaan? Wel, die teenwoordigheid van die meisie verander die situasie en nou reageer ek teenoor haar. Omdat sy daar is, tree jy op ŉ spesifieke manier op. Sieklik verander jou woorde en wat jy doen, want jy doen dit om haar te probeer beïndruk. Dit moet vir haar lekker wees by jou, ja, jy wil hê sy moet van jou ook hou.

Net so werk dit met geloof in God. Geloof laat jou God in jou lewe raaksien. As jy Hom eers raaksien, verander dinge, veral jy. Dan kan jy of die manier waarop jy optree nie meer dieselfde bly nie. Dan moet jy praat en doen om die Here in jou lewe te beïndruk. Jy moet Hom gelukkig maak. As jy Hom raaksien, kan dit nie anders nie. Jy kan nie sê God is by my en jy leef asof daar nie ŉ God is nie. Daarvan gaan God niks hou nie, dit is seker.

Geloof is dus om te weet die Here is in jou lewe en om so op te leef.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Nou maar wanneer het die Bybel nou eintlik die Bybel geword?

So ongeveer 300 jaar na Jesus het die keiser van die Romeinse Ryk (wat destyds die wêreldmag was) ŉ Christen geword.

Daar en dan besluit hy die Christendom moet die godsdiens van al die mense van die Romeinse Ryk word, wat dit toe ook ŉ paar jaar later geword het. Nou wou al die mense in die Ryk weet wat die Christene glo, want tot op daardie stadium was dit mos nie so bekende godsdiens nie. Die Christenleiers het toe bymekaargekom en die lys van boeke waarop hulle hulle geloof baseer amptelik vir almal gegee om te lees. Daarom sê party mense dat die Bybel toe eers “ontstaan” het. Dit is egter nie heeltemal waar nie. Die lys is wel toe amptelik vir almal gegee, maar die lys het bestaan uit die boeke wat van die begin af deur die Christene gebruik is as hulle “Bybels”. En nie sommer enige boek is gebruik nie. Die boek moes deur ŉ apostel of iemand wat een geken het, geskryf gewees het; Christene moes dit oral gebruik het en die boeke moes van die begin af gebruik gewees het. Dit moes ook die waarheid van God akkuraat uitdruk. Die Bybel is dus nie sommer saamgeflans nie. Daar is goeie redes waarom die Bybel die Bybel is.

Jy kan dus die Bybel met vertroue optel en lees. Dit gaan vir jou van God vertel… nee, jy gaan God deur die woorde en bladsye van die Boek van nader leer ken.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy