Hebreërs 4:1-16 (fokus 4:12-13)

 Min dinge is so irriterend as beterweterige Christene, veral as hulle jou begin intimideer deur te sê: “Die Gees het vir my dit of dat oor jou gesê”. Natuurlik praat die Gees met ons en ons moet mooi luister sodat ons sy stem nie dalk mis nie. Maar daar is mense wat die stem van die Here met hulle eie stem verwar. As iets in hulle kop opkom, dink hulle sommer dit is die Here. Nou ja, dit kan die Here wees, maar dit kan ook nie. Hoe weet mens?

Die Here se Woord is soos ‘n skerp mes (12) wat alles kan oopsny. Niks kan geheim bly nie. Daarom is die Woord van die Here die ideale “toets” vir “boodskappe” van die Gees. Deur die “boodskappe” deur die “meslem van die Woord” te sit, sal ‘n mens dit tot in sy kern kan oopsny. Daar sal ‘n mens kan sien of dit eg is of nie. As dit nie in alle opsigte met die Woord ooreenstem nie, moet ‘n mens maar versigtig wees.

Met ander woorde, die Gees sal nie vir jou ‘n boodskap gee wat nie die toets van die Woord kan deurstaan nie. ‘n Boodskap van die Gees sal ook nooit liefdeloos afgelewer word of jou in dinge in wil manipuleer waarvan jy nie seker is of die Here dit regtig wil hê nie. As die Here wil hê jy moet iets doen, sal Hy nie net die “boodskapdraer” oortuig nie, maar ook vir jou.

Gebruik God se skerp mes, sy Woord, en toets… nie net wat ander sê nie, maar ook wat in jou eie lewe aangaan.

Hebreërs 3:1-19 (fokus 3:7-19)

 Iemand vra eendag vir ‘n ou wat altyd vir ure op sy eie in ‘n hoekie van ‘n koffiewinkeltjie sit wat hy doen. “Ek dink”, sê hy. “Hoekom dink jy so?” vra die ander man. “Omdat ek ‘n probleem het”. “Wat is jou probleem?” vra die ander man weer. “Ek dink te veel”, kom die antwoord. So maak ons baie keer ook. Ons dink en dink oor ons godsdienstige probleme maar praat met niemand daaroor nie…

Deel van Christenwees is om te praat, met mekaar te praat, oor probleme te praat, raad te vra, uitweë te soek uit moeilike situasies. Dit kom nie deur net in jou eie dop gekruip te wees en daar oor alles na te dink nie, maar veral deur met ander te praat. Het jy al agtergekom hoe ‘n gesprek kan verander as iemand op ‘n mooi manier oor die Here begin praat. Nie lank nie, of almal praat daaroor en dan leer ‘n mens ook sommer baie. Nou praat ek natuurlik nie van ‘n situasie waar almal om die vuur staan, rugby luister en bier drink nie. Situasies pas ook maar mos by tipe gesprekke.

Mense bly maar skaam en ongemaklik, veral as dit by dinge van die Here kom. Hulle is bang dit pas nie om oor jou eie pad met die Here te praat nie. Hulle is bang mense dink jy dweep of is skynheilig, want daardie mense ken waarskynlik jou foute ook baie goed. Ons wil nie praat nie en so verloor ons een van die grootste gawes wat die Here vir ons gegee het… ander mense. En onthou, Hy praat dikwels deur ander mense met ons. So verloor ons eintlik sy stem ook.

Hebreërs draai nie hieroor doekies om nie. Ons moet mekaar moed inpraat en help (13). Daarom moet ons geleenthede maak om met mekaar te praat. Dan sal jy agterkom jy is nie die enigste een wat sukkel met sekere dinge in jou lewe nie; net so sal jy kan hoor wat ander gedoen het om probleme op te los, en miskien werk dit ook vir jou.

Moenie jouself in ‘n hoekie vasdink nie; gaan dink en praat saam met ander. Skep vir jou sulke geleenthede. Dit kan jou baie help, want dit is ook die Here se raad vir jou.

Hebreërs 2:1-18 (fokus 2:14-18)

 As ‘n mens mooi daaraan dink, kan dit vreemd klink dat Christene ‘n mens, Jesus, aanbid. Sjoe, ons val voor ‘n Jood wat in die stofstrate van Palestina geloop het neer en sê ons sal alles vir Hom doen. Vir buitestaanders moet dit snaaks klink.

Natuurlik is Jesus ook God, maar waarom het Hy dan mens geword? Kon Hy nie maar as God sommer alles afgehandel het sonder om mens te word nie? God kan mos alles doen.

Die skrywer van Hebreërs verduidelik dat Jesus nie bang was om in die doodskuil van die duiwel in te stap nie. As Hy die duiwel wou oorwin, moes Hy hom in sy hart oorwin, daar waar sy krag vandaan kom (14-15). Die duiwel se krag lê in die feit dat as ‘n mens eers dood is, is jy dood. Daar kan jy nie uitkom nie. Vir Jesus om te wys dat Hy die krag het om die mag van die duiwel te breek, moes Hy in daardie doodskuil instap… en weer ander kant uitstap. Om dit te kon doen, moes Hy mens geword het. As mens het Hy ingestap en uitgestap, en as mense sal ons ook kan instap en uitstap.

Maar daar is nog meer. In die doodskuil van die duiwel het Jesus gevoel hoe dit is om mens te wees. Die duiwel het Hom van alle kante af aangeval, Hom probeer versoek, Hom laat swaarkry, laat ly… ja, al sy geheime toertjies van misleiding waarmee hy mense so maklik uitvang het hy met Jesus probeer, maar sonder sukses. Jesus was die sterker een, ook as mens.

Ja, as ‘n mens mooi daaraan dink, moes dit iets geweldigs gewees het vir Jesus om so in die doodskuil in te stap, met al die gevare en risiko’s. En dit vir ons, ja, nie vir Homself nie, maar vir ons. Geen wonder ons kniel voor Hom nie.

Hebreërs 1:1-14 (fokus 1:5-14)

 Wat maak die Christendom anders as enige ander godsdiens? Net Jesus. Ander godsdienste het ook liefde, tree ook goed op, is ook toegewyd aan hulle gode, probeer ook hulle bes, maar hulle het nie vir Jesus nie. En dit maak al die verskil. Juis daarom is dit te wagte dat daar by die vroeë Christene geen twyfel was oor wie Jesus is nie. Hulle moes dit buitendien vir ander kon verduidelik, want hoe anders sou hulle ander kon oorhaal om Christene te word?

Heb 1 is so hoofstuk waarin daar verduidelik word wie Jesus is. Hy is die Seun van God, nee, eintlik God self (1:5,8). Maar Hy is ook Koning. Dit word verduidelik in die vorm van ‘n antieke troonsbestyging. Kom ons kyk:

• Die aankondiging: Jesus word aangekondig as die Seun van God, die Vader (1:5).
• Opdragte aan die onderdane: Almal moet die Seun getrou dien (6-7).
• Die taak en opdrag van die Koning: Hy moet vir altyd en ewig heers en sorg dat dit wat reg is in die koninkryk gebeur (8-9).
• Die lofsang oor die goeie kwaliteite van die Koning: God self besing nou die lof van Jesus. Hy is die Skepper, sal vir altyd daar wees, is beter as almal… (10-12).
• Die troonsbestyging self: God gee vir Jesus spesiale plek aan sy regterhand, daar waar die verslane vyande magteloos gaan lê (13).

Jesus is Koning, my Koning, jou Koning. En as die Koning vir jou is, wie kan teen jou wees?