There is more to be learned at the foot of the cross than anywhere else in the world. —J.C. Ryle

God se woord is finaal

Kevin deYoung (Taking God at His word, 2014) het ‘n boek oor God se woord vir die mense van vandag geskryf. Ons gaan ‘n hele aantal blogs aan hierdie boek spandeer.

In Handelinge 17:1 – 15 lees ons van Paulus se besoeke aan Tessalonika en Berea. Die twee episodes het baie in gemeen:

• In beide begin Paulus sy werk in die sinagoge.
• In beide word God se woord verkondig en daar word oor die Skrif geredeneer.
• Tweespalt ontstaan, want  sommige word oortuig en sluit hulle by Paulus aan, terwyl ander sy boodskap verwerp.

Maar daar is ook ‘n groot kontras tussen die twee:

Tessalonika

Hulle oordeel die boodskap van Paulus op grond van hulle persoonlike vooroordele. Die Jode was afgunstig omdat ‘n groot aantal Jode, Grieke en ‘n aansienlike getal vooraanstaande vroue het ook nog bygekom.

Dit gebeur steeds dat mense God se woord verwerp vir onaanvaarbare redes: die musiek is te hard/sag; die gemeente is te groot/klein; die leraar trek nie reg aan nie; hulle het vantevore ‘n Christen geken waarvan hulle niks gehou het nie … Soms verwerp ons God se woord, want ons wil nie doen wat dit sê nie.

Die Tessalonisense kla omdat die Christene die wêreld omkrap. Daarom sleep hulle ‘n paar gelowiges na die stadsbestuur toe. Mense met allerhande vooroordele val ander aan in plaas daarvan dat hulle logies met mekaar redeneer. Die gelowiges word daarvan beskuldig  dat hulle die hele wêreld in beroering bring, dat hulle beweer dat daar ‘n ander koning as die keiser is.

Hulle is oortuig van hulle saak en loop ongeveer 60km na Berea om die mense daar teen Paulus op te sweep. Hulle oorweeg nie eers die aansprake van die Christene nie. Hulle doel is om die Christelike geloof uit te roei. Die tragedie is dat ons steeds mense kry wat die Christelike geloof wil vernietig, maar dit doen sonder om eers die Bybel te bestudeer.

Berea

Hulle gesindheid verskil radikaal van dié van die Tessalonisense: Hulle het met groot belangstelling na die woord geluister en elke dag die Skrif ondersoek om te sien of dit is soos Paulus sê.  Ondersoek ons nog die Bybel om die waarheid daarin te ontdek? Aanvaar ons net dinge as dit deur die Skrif ondersteun word?

Wat is die implikasie van hierdie benadering? As die Skrif dit sê, glo hulle dit, maar as die Skrif dit nie bevestig nie, glo hulle dit nie. Die Skrif het die laaste sê. Hulle het geen ander woord nodig as die Skrif dit gesê het nie.

 Volgende keer kyk ons na die gesag van God se woord.

I do not feel obliged to believe that the same God who has endowed us with sense, reason, and intellect has intended us to forgo their use. -Galileo Galilei, fisikus en sterrekundige (1564-1642)

Besware teen die leer van die duidelikheid van die Skrif

Kevin deYoung (Taking God at His word, 2014) het ‘n boek oor God se woord vir die mense van vandag geskryf. Ons gaan ‘n hele aantal blogs aan hierdie boek spandeer.

Daar is mense wat glo dat die leer van die Skrif nie so duidelik is as wat sommige Christene wil beweer nie. Hierdie besware val uiteen in drie groepe.

• Die mistiese beswaar

God is bonatuurlik. Daarom kan die mens nie betekenisvol van Hom praat nie. Hierdie beswaar word dikwels voorgehou as ‘n nederige poging om God te red van al die mensgemaakte beskouings. Hulle glo die Christelike geloof is geheimsinnig, want dit gaan oor dinge wat nie in woorde beskryf kan word nie. Daarom kan ons nooit seker wees van ons interpretasie van die Skrif nie.

• Die Katolieke beswaar

Die Bybel is nie voldoende duidelik in homself nie. Sekere dele moet daarom verduidelik word en deur tradisie aangevul word. Op ons eie sal ons dit net misverstaan en verkeerd interpreteer. Ons het iemand nodig om dit gesagvol vir ons te interpreteer – iemand soos die pous en biskoppe.

• Die pluralistiese beswaar

As die Bybel dan so duidelik is, hoekom kan Christene nie saamstem  oor  wat dit beteken nie? Hoekom kry ons so baie verskillende denominasies? Hoekom kry ons vandag so baie boeke oor vier sienings van dit en vyf sienings van dat? Hoe kan die Bybel so duidelik wees as ons voorouers die Bybel gebruik het om die kruisvaarte, apartheid en die plat aarde te regverdig? Wie van ons het voldoende gronde om die Bybel te interpreteer – te weet wat reg en wat verkeerd is?

Hoe kan ons hierdie besware en vrae beantwoord? Kom ons kyk wat sê die Bybel oor homself. ‘n Goeie plek om te begin is Deuteronomium 29 – 30. Die Israeliete staan op die rant van die beloofde land. In hierdie twee hoofstukke kry ons die hoogtepunt van Moses se boodskap aan die volk. Hy roep finaal die volk op om die lewe en nie die dood te kies nie. Dit moet hulle doen deur God se gebooie en wette te gehoorsaam. Die gebod wat ek jou vandag beveel, is nie te moeilik vir jou nie. Dit is ook nie buite jou bereik nie … Die gebod is baie naby aan jou, jy kan daaroor praat, jy ken dit, jy kan daarvolgens lewe (30:11 en 14).

Ons moet onthou dat Moses hier praat met mense wat reeds deur God uit Egipte gered is. Hulle is gered nie omdat hulle die wet onderhou het nie, maar uit genade. Hulle is eers gered en later het hulle die wet ontvang. Daarom Moses se oproep: leef soos mense wat deur God verkies en verlos is. Moses maak dit baie duidelik dat God se woord verstaan en gehoorsaam kan word – nie volmaak nie, maar op ‘n manier wat God tevrede sal stel. God se woord is nie ontoeganklik nie. Jy hoef nie na die hemel op te klim of oor die see te vaar om dit te kry nie (30:12 – 13). Ons kry presies dieselfde in die Nuwe Testament: Sy gebooie is ook nie moeilik om te gehoorsaam nie (1 Johannes 5:3). Dit wat God van sy mense verwag, het Hy nie versteek nie. Wat nie geopenbaar is nie, is bekend aan die Here ons God, maar wat geopenbaar is, is vir altyd bekend aan ons en ons nageslag: ons moet lewe volgens al die woorde van hierdie wet (Deuteronomium 29:29).

Die gebod is baie naby aan jou, jy kan daaroor praat, jy ken dit, jy kan daarvolgens lewe (Deuteronomium 30:14). Wat Deuteronomium oor die Skrif sê word elders in die Bybel bevestig.

Volgende keer kyk ons na ‘n volgende eienskap van God se woord: God se woord is finaal.

“Your vocation in life is where your greatest joy meets the world’s greatest need.” ~ Frederick Buechner

God se woord is duidelik

Kevin deYoung (Taking God at His word, 2014) het ‘n boek oor God se woord vir die mense van vandag geskryf. Ons gaan ‘n hele aantal blogs aan hierdie boek spandeer.

Die Westminster Geloofsbelydenis sê aangaande die duidelikheid van die Skrif die volgende:

• Sekere dele van die Skrif is duideliker as ander dele. Nie elke gedeelte het ‘n ooglopende, duidelike verklaring nie.
• Die belangrikste dinge wat ons moet weet, glo en doen, is duidelik in die Skrif.
• As ‘n noodsaaklike gedeelte nie duidelik genoeg in ‘n sekere gedeelte van die Skrif is nie, word dit elders duidelik gemaak.
• Dit wat nodig is om ons verlossing te verstaan, kan selfs deur een sonder teologiese geleerdheid verstaan word – as hy van die gewone maniere van studie en leer gebruik maak. Geen spesialisvaardigheid is nodig nie.
• Belangrike punte in die Skrif mag dalk nie volledig verstaan word nie, maar dit wat ons wel verstaan, is voldoende vir ons lewe en verlossing.

Gewone mense wat gewone maniere gebruik kan genoeg verstaan van dit wat ons nodig het om reg te lewe en verlos te word en om ‘n getroue Christen te wees.

Maar soos te verwagte is daar sekere besware teen die leer van die duidelikheid van die Skrif. Daarna kyk ons volgende keer.

The best theology refuses to be innovative. – A.J. Swoboda

Meer as genoeg

Kevin deYoung (Taking God at His word, 2014) het ‘n boek oor God se woord vir die mense van vandag geskryf. Ons gaan ‘n hele aantal blogs aan hierdie boek spandeer.

Die eerste verse van die Hebreër-boek dek die tafel vir die hele boek – Hebreërs 1:1 – 4:

In die verlede het God baiekeer en op baie maniere met ons voorvaders gepraat deur die profete,

maar nou, in hierdie laaste dae, het Hy met ons gepraat deur die Seun.  God het Hom deur wie Hy die wêreld geskep het, ook erfgenaam van alles gemaak.  Uit Hom straal die heerlikheid van God en Hy is die ewebeeld van die wese van God.  Hy hou alle dinge deur sy magswoord in stand.  Nadat Hy die reiniging van sondes bewerkstellig het, het Hy gaan sit aan die regterhand van die Majesteit in die hoë hemel. Hy is net so verhewe bo die engele as wat die Naam wat God Hom gegee het, voortrefliker is as hulle naam.

In vers 1 – 2 kry ons ‘n aantal kontraste. Een is die verlede teenoor hierdie laaste dae. Dit beteken ons het ‘n nuwe tydperk ingegaan – die tydperk van die Heilige Gees. Die dood en opstanding van Jesus het hierdie nuwe tyd ingelei. Omdat geen verdere verlossingsoptrede meer nodig is nie, het ons nou die laaste dae betree. Daar is ook ander kontraste:

• Ontvangers: in die verlede is met ons vaders gepraat, maar nou praat Hy met ons.
• Agente: vantevore het God deur die profete gepraat, maar tans deur sy Seun. Jesus Christus openbaar wie God is, leer ons wat sy wil is en wys vir ons die pad van verlossing.
• Paaie: in die verlede praat God deur visioene, drome, stemme, skrif op die muur, ‘n vuurkolom, ens. Nou praat God op net een manier – deur Jesus Christus.

Hier het ons vier kontraste, maar net een gevolgtrekking. Jesus Christus is die finale  agent van God se openbaring en verlossing. In hierdie verse maak die skrywer van Psalm 2 en 110 gebruik.

•  God maak Jesus Christus erfgenaam van alles. Alles begin en eindig by Hom.
• Jesus is die Skepper van alles. God het deur sy Seun alles geskep.
• Jesus Christus onderhou alles.
• Jesus Christus is die openbaring van God – Hy is die ewebeeld van die wese van God. Jesus wys vir ons God soos Hy werklik is.
• Jesus Christus bewerkstellig die reiniging van sondes
• Jesus Christus sit aan die regterhand van God, want Hy het sy werk op aarde voltooi.
• Jesus Christus is verhewe bo die engele. God het sy finale woord deur Jesus gepraat. Daar kom niemand na Hom nie.

Praat God nog met ons? Ja, deur sy Seun. God praat met ons – direk en persoonlik. In Christ God’s revelation has been completed (Herman Bavinck). Die woord van God is voldoende; dit wat Jesus Christus gedoen het, is voldoende.

Hoekom is dit belangrik dat God se woord voldoende is? Watter verskil maak dit aan my lewe?

• Tradisie word op sy plek gehou. Natuurlik het tradisie ‘n plek in ons verstaan van God se woord en om die kerk se leer te formuleer. Ons moet leer uit die lesse van die verlede en uit die belydenisgeskrifte. Al hierdie dinge het net waarde as hulle opsom wat reeds in die Skrif gesê word. Geen mensgemaakte teks kan God se woord vervang nie – die Skrif is die finale gesag. Alles moet teen God se woord getoets word. Tradisie speel slegs ‘n ondersteunende rol.
• Ons mag nie byvoeg of wegneem wat in die woord van God staan nie. Ons kan nie die Skrif beter of veiliger of in ooreenstemming met ons aannames maak nie.
• Die woord van God is relevant vir ons lewe. Dit beteken nie die Bybel vertel vir ons alles van alles nie, maar die Bybel vertel vir ons alles wat ons moet weet – van dit wat werklik saak maak.
• Die woord van God nooi ons uit om die Skrif oop te maak en die stem van God daarin te hoor.

Volgende keer kyk ons na die tweede eienskap van God se woord: God se woord is duidelik.