All of our failures are prayer failures –  John R. Rice

Die getuienis oor Jesus Christus (2)

In Johannes 5 praat Jesus oor die getuies van sy bediening. Hy noem vier. In die vorige blog het ons na die eerste getuie gekyk – Johannes die Doper. Ons kyk nou na die ander drie.

• Die werke van Jesus self

Maar Ek het getuienis wat nog gewigtiger is as dié van Johannes. Die werk wat die Vader My gegee het om te voltooi en waarmee Ek nou juis besig is, lê oor my getuienis af en bevestig dat die Vader My gestuur het (5:36). Die wonderwerke en tekens getuig van Jesus Christus. Hy doen dit voor die oë van die mense, maar hulle weier om die tekens te sien vir wat hulle was. Die tekens was bedoel om Jesus se identiteit en gesag te openbaar – om te getuig dat Jesus God se Gesalfde en sy Seun is.

In Hoofstuk 6 lees ons van die vermeerdering van die brood om 5 000 mans en hulle gesinne te voed. Hierdie is ‘n illustrasie van Jesus se werke. Maar net ‘n dag later lees ons: Watter wonderteken kan u doen sodat ons dit kan sien en in u kan glo? (6:30). Hulle weier om te sien en leef voort asof niks gebeur het nie.

• Die Vader self getuig van Jesus

En die Vader wat My gestuur het, het ook oor My getuienis afgelê (5:37). In Deuteronomium 4 sê Moses vir die volk dat hulle nie vir God gesien het nie, maar Hom gehoor het. Watter mense het die stem van die lewende God wat uit die vuur uit praat, gehoor soos ons en bly lewe? (Deuteronomium 5:26). God se mense hoor sy stem. Maar: Sy stem het julle nog nooit gehoor nie … En sy woord lewe nie werklik in julle nie, omdat julle nie in die Een glo wat Hy gestuur het nie (5:37 – 38). Hulle het selfs nie gehoor toe God by Jesus se doop uit die hemel gepraat het nie.

• Die Skrif getuig van Jesus

Julle ondersoek die Skrif, omdat julle dink dat julle die ewige lig daarin kry. En dit is juis die Skrif wat oor My getuig. Tog wil julle nie na My toe kom sodat julle die lewe kan kry nie (5:39 – 40). Om die Skrif te ondersoek, is ‘n goeie ding. Tragies egter is dat mense hulle lewe daaraan kan wy en tog nie verlos word nie. Onthou die Skrif waarna Jesus Christus hier verwys, is die Ou Testament. Jesus sê dat die Ou Testament oor Hom getuig. Jy kan nie die Ou Testament lees sonder om van Jesus Christus te lees nie. Mense wat dus die Skrif geken het, moes gereed gewees het vir Jesus se koms – hulle moes Hom verwag het en na Hom verlang het.

Ons moet Jesus in die Ou Testament vind. Die mense in Jesus se tyd het Hom nie gevind nie, want hulle het geweier om Hom daar te vind. Jesus kla hulle aan. Ook Moses, hom wat hulle as hulle gesag aanvaar het, sal hulle aankla: As julle Moses geglo het, sou julle in My geglo het, want Hy het van My geskrywe. Maar as julle sy geskrifte nie glo nie, hoe sal julle my woorde glo? (5:46 – 47). Hulle het hulle hoop op Moses gevestig; Moses het sy hoop op die Messias – Jesus Christus – gevestig.

Hierdie vier getuies wat van Jesus getuig is nie verborge nie – dit is daar reg voor ons oë. Hulle getuig, maar die mense (ons) weier om hulle getuienis te hoor en te glo. Ons verraai Hom nie uit onkunde nie, maar omdat ons Hom doelbewus verwerp – ons is blind en doof vir sy getuies.

You do not fall because you are weak, you fall because you think you are strong.” ~ Joodse Spreekwoord

Die Israeliete trek deur die Rooisee (1)

In Eksodus 14 kry ons een van die hoogtepunte van Israel se uittog uit Egipte – die deurtog deur die Rooisee. In die Ou Testament  kry ons meer as 20 direkte verwysings en heelwat indirekte verwysings na hierdie gebeurtenis. Ook in die Nuwe Testament  kry ons sekere betekenisvolle stellings:

• Matteus 2:15: So is vervul wat die Here deur ‘n profeet gesê het: “Uit Egipte het Ek my Seun geroep.”  Die profeet waarna hier verwys word, is Hosea. Hosea 11:1 het na die uittog verwys; die seun in Hosea verwys na Israel. Hier verbind Matteus die werk van Jesus direk aan die uittog.
• Tydens Jesus se verheerliking op die berg (Lukas 9) lees ons van twee manne wat met Jesus praat. Dit was Moses en Elia: Hulle het in hemelse glans verskyn en met Hom gepraat oor sy uittog wat Hy in Jerusalem sou voltooi. Uittog hier verwys sekerlik na Jesus se dood. Lukas sê dat dit wat Jesus in Jerusalem reggekry het die eksodus is.
• In Hebreërs 3:1 – 6 lees ons dat Jesus meer is as Moses. Moses was ‘n getroue dienaar in die huis van God. Christus, daarenteen, is as Seun getrou oor die huis van God. Moses wys na Jesus.
• Hebreërs 11 praat oor die Christelike geloof. Die skrywer gebruik die deurtog deur die Rooisee as ‘n beeld van Christelike geloof: Omdat die Israeliete geglo het, het hulle deur die Rooisee getrek soos oor droë grond (vers 29).
• In 1 Korintiërs 10 waarsku Paulus teen afgodery: Broers, ek wil julle daaraan herinner dat ons voorvaders almal onder die beskerming van die wolk was en almal veilig deur die see gegaan het. Omdat hulle almal vir Moses gevolg het, is hulle almal in die wolk en in die see gedoop …Hierdie dinge het gebeur as voorbeelde vir ons dat ons ons nie soos hulle deur sondige begeertes moet laat dryf nie (vers 1 – 2, 5).

Wat kan ons uit hierdie deurtog deur die Rooisee van Jesus Christus en verlossing leer? Drie dinge:

• Ons trek uit gebondenheid/slawerny – lae en lae bande wat ons vasbind.
• Ons trek uit deur genade.
• In die proses het ons ‘n Middelaar.

In die volgende paar blogs gaan ons verder na hierdie drie aspekte kyk.

Indeed the safest road to Hell is the gradual one – the gentle slope, soft underfoot, without sudden turnings, without milestones, without signposts – Screwtape se raad aan Wormwood – C. S. Lewis

Die getuienis oor Jesus Christus (1)

In Johannes 5 praat Jesus oor die getuienis van sy bediening. Hierdie hoofstuk begin met die genesing van die man by die bad van Betesda. Hier sien ons:

• Jesus vra ‘n vraag: Wil jy gesond word? (vers 6)
• Jesus gee dan ‘n opdrag: Jesus sê toe vir hom: “Staan op, tel jou goed op en loop.” Oombliklik het die man gesond geword, sy goed opgetel en geloop (vers 8 – 9)
• Jesus verklaar dat Hy niks uit sy eie kan doen nie – Hy kan slegs doen wat Hy die Vader sien doen het. Die Vader het die Seun lief en daarom wys Hy vir die Seun alles wat Hy moet doen (vers 19 – 24).
• Dan kom Jesus by die kernsaak: Dit verseker Ek julle: Wie luister na wat Ek sê, en in Hom glo wat My gestuur het, het die ewige lewe. Hy word nie veroordeel nie, maar het reeds uit die dood na die lewe oorgegaan (vers 24). Hier het ons die kern: hoor en glo.

Daarna praat Jesus oor die getuies van sy bediening. Hy bevestig die belang van getuies. ‘n Profeet se woord moet nie sonder meer aanvaar word nie – dit moet getoets word; daar moet getuies wees. Vir diegene wat weier om Hom te glo en te ontvang, stuur Jesus getuies. In Johannes 5 verwys Jesus na vier getuies. Dit is meer as voldoende, want die wet het net twee getuies vereis.

Kom ons kyk na hierdie getuies:

• Johannes die Doper

Jesus verwys na Johannes die Doper  in Johannes 5:35: Hy was die lamp wat gebrand en geskyn het, en julle was gewillig om julle ‘n rukkie in sy lig te verheug. Jesus praat dus baie positief oor Johannes. Hy voeg by: Julle het ‘n afvaardiging na Johannes toe gestuur, en wat hy getuig het is die waarheid (5:33). Maar Jesus ontleen nie sy identiteit aan die getuienis van Johannes die Doper nie: Nie dat Ek op die getuienis van ‘n mens steun nie (5:34).

Daar was ‘n man wat deur God gestuur is. Sy naam was Johannes. Hy het gekom om te getuig; hy moes getuig van die lig, sodat almal deur hom tot geloof kon kom. Hy was self nie die lig nie, maar hy moes van die lig getuig (Johannes 1:6 – 9). Hier word Johannes se rol verduidelik, maar die mense verstaan dit nie en weier om dit te aanvaar. Hulle aanvaar nie Johannes se getuienis oor Jesus Christus nie.

Dit is moeilik om te verstaan, want daar is ‘n duidelike Ou Testamentiese agtergrond om Johannes as getuie te verstaan. Mense wat hom moes herken het as die persoon wat die pad vir Jesus Christus sou voorberei, herken hom nie. Tragies. Toe hy wou getuig, wou die mense nie sy getuienis aanvaar nie.

Volgende keer gaan ons na drie verdere getuies kyk: Jesus se werke, die Vader en die Skrif.

It is so stupid of modern civilization to have given up believing in the devil when he is the only explanation of it –  Ronald Knox

Jongmense verlaat die kerk

Jong mense verlaat die kerk. Hoekom? Drew Dyke (Generation Ex-Christian) het gaan kyk hoe hierdie groep wat die kerk verlaat het, lyk. Hy noem ‘n paar kenmerke:

• Hulle voel die boodskap van die evangelie is te nou – te beperkend.
• Hulle het ‘n slegte ondervinding met die kerk gehad.
• Die modernisme het ‘n anti-bonatuurlike wêreldsiening gevestig. Dit beteken dat wondertekens, soos in die Bybel opgeteken, onaanvaarbaar is. Daarom wil hulle niks met wat hierdie tekens as die “Bybelse waarheid” beskryf, te doen hê nie.
• Mense speel vandag rond met verskillende vorme van spiritualiteit.
• Baie van hulle is geestelike rebelle wat op hulle outonomie aandring.
• Sommige het maar net stadig al verder van die kerk af weggedryf.

Mense het nog altyd die kerk verlaat, maar die getal kerkverlaters is besig om toe te neem. Hoekom verlaat hierdie jongmense die kerk. Christian Smith sê dit is as gevolg van moralistic therapeutic deism. Sjoe! Wat beteken dit?

• Moralistic – God wil hê dat sy kinders hulle goed moet gedra
• Therapeutic – God wil hê dat sy skepsels goed oor hulleself moet voel
• Deism – God bestaan wel, maar is nie betrokke by die lewens van mense nie.

Baie teoloë voel dat hierdie jongmense nie werklik Christene is of was nie – altans nie volgens aanvaarde Bybelse/teologiese definisies nie. Hoe het dit gebeur? Hulle is nooit die evangelie van Jesus Christus geleer nie – nie in  die ouerhuis en nie in die kerk nie. In baie kerke is daar vandag ‘n afwesigheid van Bybelse/evangeliese prediking. Dit lei tot ‘n geslag wat grootgeword het met moralistiese, terapeutiese deïsme.