Aanbevelingsbriewe

. —Charles Hodge

Aanbevelingsbriewe

In 2 Korintiërs 3:1 – 3 skryf Paulus oor die nodigheid vir aanbevelingsbriewe. Sy teenstanders het almal aanbevelingsbriewe gehad. En hy? Julle is self ons aanbevelingsbrief – die stelling sou sy ondersteuners bly gemaak het, maar sou sy teenstanders onkant gevang het. Die Korintiërs was Paulus se lewende aanbevelingsbriewe. 2Julle is self ons aanbevelingsbrief, geskryf op ons harte, vir almal om te lees en te verstaan. Die Korintiërs is op Paulus se hart geskryf – die innerlikste dimensie van ‘n mens. Die hart is destyds as die middelpunt van die innerlike lewe gesien – dit is die plek waarna God Hom wend en waar sy Gees praat. Die Korintiërs is tydens hulle bekering op Paulus se hart geskryf. Hulle is permanent daar ingeskryf sodat hy hulle nie kan vergeet nie.

 

Hierdie lewende briewe is baie beter as geskrewe aanbevelingsbriewe.  Hulle is ‘n bewys van die krag van die evangelie en die vrug van sy bediening. Geskrewe briewe kan maklik mislei, maar lewende briewe openbaar die waarheid. Lewende briewe is ook meer intiem. Hierdie briewe kan nie verlore gaan nie; hierdie briewe is toeganklik vir alle mense, want almal kan dit lees. Briewe geskryf met pen en ink sal deur ‘n beperkte aantal mense gelees word; lewens kan deur almal gelees word – selfs deur diegene wat ongeletterd is. Die gemeente in Korinte was ‘n ope brief van Christus aan die wêreld – ‘n verklaring van sy mag en liefde aan die hele wêreld. Die bewys van Paulus se apostelskap berus by die gemeente in Korinte. As Paulus ‘n vals profeet is, is hulle ook vals.

 

Paulus dink terug aan die ou verbond waar God die wet met sy vinger op kliptafels geskryf het. Hierdie nuwe verbond is baie beter, want dit is geskryf nie met ink nie, maar met die Gees van die lewende God, nie op klip nie, maar op die harte van mense. God het reeds eeue tevore vir Esegiël gesê dat daar ‘n tyd sal aanbreek wanneer Hy hulle harte sal verander: Ek sal die kliphart uit hulle liggaam verwyder en hulle ‘n hart van vleis gee. Dan sal hulle volgens my voorskrifte leef en my bepalings nakom en daarvolgens optree. Hulle sal my volk wees, en Ek sal hulle God wees (11:19 – 20). In Jeremia 31:31 – 34 word geskryf oor die nuwe verbond. Daar sê die Here vir Jeremia: Ek sal my woord in hulle harte skryf en dit in hulle gedagtes vaslê.

Dit is wat Christus doen: Ons bly dieselfde mense, maar ons harte word radikaal nuut. God het nou sy wette in ons geskryf. Hulle is nie meer uitwendig en vreemd nie, maar in ons. Iemand wat aan Christus behoort, is ‘n nuwe mens. Die oue is verby, die nuwe het gekom (2 Korintiërs 5:17). Is ons nuwe mense? Leef ons so dat mense kan agterkom ons het ‘n nuwe hart?



God se heerlikheid in die ou en nuwe verbond

There is something beautiful about all scars of whatever nature. A scar means the hurt is over, the wound is closed and healed, done with. -Harry Crews, skrywer (1935-2012)

God se heerlikheid in die ou en nuwe verbond

In 2 Korintiërs 3:7 – 11 stel Paulus die ou en die nuwe verbond teenoor mekaar. Hoekom is die nuwe verbond soveel beter as die ou verbond? Vir sy argument gebruik hy die begrip van heerlikheid – hoekom is die heerlikheid van die nuwe verbond groter as dié van die ou verbond.  Hy gebruik die Hebreeuse kleiner/minder na groter vorm van argumentering.

  • Meer heerlikheid (vs 7 – 8).

Minder: 7Die wet wat in letters op klip gegraveer is, het in heerlikheid gekom. Hierdie heerlikheid, wat tog gou sou verdwyn, het op die gesig van Moses so geskitter dat die Israeliete nie na hom kon bly kyk nie.

Groter: As die bediening wat tot die dood lei, met soveel heerlikheid gekom het, 8hoeveel groter sal die heerlikheid van die bediening wat deur die Gees geskied, dan nie wees nie?

Die wet het in heerlikheid gekom. Dit oefen ‘n bediening van oordeel en dood oor Israel uit – Israel kon nie eers vir een dag die wet onderhou nie. Daarom was die mense bang was om na Moses se gesig wat so geskitter het, te kyk. As Moses se bediening met soveel heerlikheid gekom het dat dit met ‘n sluier bedek moes word, hoeveel heerliker is Paulus se bediening van die Gees wat nie versluier is nie. Dit stel God se mense voortdurend bloot as sy heerlikheid en transformerende krag.

  • Weer heerlikheid

Kleiner:  9Die bediening waardeur die mense veroordeel word, het met heerlikheid gekom,

Groter: Maar die bediening waardeur die mense vrygespreek word, oortref dit verreweg in heerlikheid.  

Gevolgtrekking: 10Ons kan sê dat die heerlikheid van vroeër nie te vergelyk is met die alles oortreffende heerlikheid van nou nie.  Die bediening van veroordeling verwys na die gevolge van Moses se bediening. Paulus se bediening van vryspraak bevestig wat die profete oor die bediening van die Gees voorspel het – die hart van klip word met ‘n hart van vleis vervang (Esegiël 11:19 – 20). Daarom kon Paulus sê: Daar is dus nou geen veroordeling vir dié wat in Christus Jesus is nie (Romeine 8:1).Die ou verbond het met heerlikheid gekom, maar die effek van die nuwe verbond oortref die heerlikheid van die oue.

  • Nog meer heerlikheid

Minder: 11As wat aan die verbygaan was, van heerlikheid gestraal het,

Groter: Veel meer nog sal die blywende van heerlikheid skitter.

Die heerlikheid van die ou verbond was verbygaande terwyl die heerlikheid van die nuwe verbond permanent is.

Paulus se logika verklaar:

  • Sy bediening is heerliker as dié van Moses as gevolg van sy onbeperkte blootstelling aan God se heerlikheid.
  • Paulus se bediening is heerliker, want dit is ’n bediening van vryspraak.
  • Paulus se bediening is heerliker, want dit is permanent.


Sien verder as jou omstandighede

We are not saved by works, but neither are we saved without them – Calvyn

 

Sien verder as jou omstandighede

‘n Lewe van geloof stel jou in staat om verder as jou alledaagse omstandighede te sien. Dit beteken ons sien die onsigbare wat aan ons beloof is. Ons oriënteer ons lewens op dit wat nog moet kom. Psalm 37 roep ons op vir hierdie soort lewe.

Die psalm begin met toekomstige hoop: Moet jou nie ontstel oor skelms en jou kwel oor skurke nie, want soos gras vergaan hulle gou en soos groenigheid verdwyn hulle sommer. Die bose mense – skelms en skurke – sal by die oordeelsdag vergaan. Een dag sal ‘n nuwe dag aanbreek en God se geregtigheid sal ten volle daar wees. Diegene wat Hom ken, word gered; diegene wat Hom nie ken nie, sal gestraf word.

 

Die psalmis sê vir ons dat wat sal wees, word deur ons huidige optrede bepaal. Hy gaan voort met die kontras tussen bose mense en die regverdige mense. Hy sê dat in die lig van die toekoms wat op ons wag ons moet wag. Dit is die lewe van ‘n Christen.

Die psalms wys vir ons hoe om te oorleef; hoe om met hoop te lewe al lyk dinge om ons maar sleg. Hoekom? Hier waar ons nou leef is nie die nuwe Jerusalem nie. Dikwels dink ons die psalms is vreemd. Hoekom? Al die klaery oor die kwaaddoeners en die sameswerings van boosdoeners. Dit is vir ons snaaks, want ons het al gemaklik geraak met die gebrokenheid van ons wêreld. Ons glo dat voorspoed die norm van ons huidige Christelike bestaan is.

Wat bedoel die psalmis as hy sê dat ons moet wag. Lees net verse 3 – 7: Vertrou liewer op die Here … vind jou vreugde in die Here …laat jou lewe aan die Here oor … daarom moet jy in stilte op die Here vertrou. Dit is hoe ons moet wag. Dit is nie stil sit en niks doen nie – dit is aktiewe wag. Hierdie wag is nie teoreties nie – ek sit nie op die pawiljoen nie. Ons vertrou die Here en doen goed; ek rol my moue op en maak my hande vuil.

Maar hierdie leefwyse is, anders as wat ons verwag het, vol vreugde. Kan nie wees nie. As skurke en skelms hulle verkeerde dinge beplan, ondervind ek vreugde. Hoe is dit moontlik?  Vind jou vreugde in die Here –  nie in jou omstandighede nie; nie in dit wat om jou aan die gang is nie. As ons deur ons pyn kyk en die onveranderlike heerlikheid van ons Verlosser, wat ons nooit alleen sal laat nie,  sien, weet ons Hy weet wat pyn en lyding is. Hy het daardie paadjie geloop.

As ons Hom vertrou en goed doen, as ons ons vreugde in Hom kry,as ons sy wil doen, wy ons ons lewe aan Hom. Ons weet die vyand maak vir die oorlog gereed, maar ons weet ook dat Hy reeds die oorwinning behaal het. Ons het vertrou, ons het opgetree, ons het ons vreugde in Hom gevind … en nou moet ons net sê: Mag die Here doen soos Hy dit goedvind! (2 Samuel 10:12).

Dan word ons stil voor Hom. Ons wag. Ons oriënteer ons huidige lewens teenoor die tyd wat nog moet kom.



Die nuwe verbond; WAT IS DIT?

Everybody knows if you are too careful you are so occupied in being careful that you are sure to stumble over something. -Gertrude Stein (1874-1946)

Die nuwe verbond – Wat is dit?

In Jeremia 31:31 sê die Here: Daar kom ’n tyd, sê die Here, dat Ek met Israel en Juda ’n nuwe verbond sal sluit. God is die God van alle mense – Hy onderhou almal en alles wat lewe. Maar daar is ’n teer hart-tot-hart verhouding: Ek sal hulle God wees en hulle sal my volk wees (31:33). Hierdie is ’n dieper, bevredigender verhouding. Ek sal hulle God wees – God gee Homself aan ons. Hulle sal my volk wees – Hy neem ons vir Homself.

 

Maar hierdie nuwe verbond behels nog meer: En hulle sal nie meer elkeen sy naaste en elkeen sy broer leer en sê: Ken die Here nie; want hulle sal My almal ken, klein en groot onder hulle, spreek die Here (31:34 – OAV). Die ou verbond is aan Israel gegee – korporatief.  Dit sluit in baie mense wat God nie persoonlik geken het nie. Die nuwe verbond kom individueel na almal wat die enigste ware God en Jesus Christus ken. Dit is nie nodig om vir hulle te sê: Ken die Here nie. Maar dit bly ’n oop uitnodiging aan die wêreld.

In hierdie nuwe verbond  sal Ek my woord op hulle harte skryf en dit in hulle gedagte vaslê. As dit gebeur belowe God: Ek sal hulle oortredings vergewe en nie meer aan hulle sondes dink nie (31:34). Onder die ou verbond is sondes nooit volkome vergewe nie. Ware vergifnis kom deur Christus se kruisdood.

God belowe:

  • ’n Nuwe hart (Ek sal my woord op hulle harte skryf),
  • ’n Nuwe verhouding ( Ek sal hulle God wees en hulle sal my volk wees),
  • ’n Nuwe kennis (En hulle sal nie meer elkeen sy naaste en elkeen sy broer leer en sê: Ken die Here nie; want hulle sal My almal ken, klein en groot onder hulle, spreek die Here), en
  • Ware vergifnis (Ek sal hulle oortredings vergewe en nie meer aan hulle sondes dink nie).

Ons kan mos nie hierdie beloftes ignoreer nie.