“There comes a time when one must take a position that is neither safe, nor politic, nor popular, but he must take it because conscience tells him it is right.” – Martin Luther King, Jr.

Jesus is volmaak gehoorsaam vir ons

In Matteus 26 lees ons van Jesus in Getsemane. Ons lees dat Jesus bedroef en beangs was: Ek voel doodsbenoud. Hoekom is Hy so oorweldig? Hy moes die lydensbeker drink. Om die beker te drink in antieke tye is eintlik ‘n teken dat jou dood geregverdig is. Sokrates het die gifbeker gedrink. Jesus weet dat Hy tereggestel gaan word, maar Hy Hy weet dit sal meer as net die fisiese marteling en dood behels – Hy gaan ook die volle toorn van God ondervind. Wat is hierdie toorn van God? God se afwesigheid. Daarom roep Jesus aan die kruis uit: My God, my God, waarom het U My verlaat?

Ons sal nooit soortgelyke lyding ondervind nie. Help hierdie verhaal ons?

• Jesus is die model van integriteit. Hy is alleen; dit is donker; niemand kyk nie. Jesus word geroep om die moeilikste ding te doen. Hy doen steeds die regte ding. Is ons dieselfde persone in die donkerte as in die lig, as ons tussen ander mense of alleen is.
• Jesus se gebed moet as model vir ons dien. Jesus is baie eerlik oor sy begeertes en gevoelens: Laat hierdie lydensbeker by My verbygaan. Maar dan voeg Hy by: Moet nogtans nie doen soos Ek wil nie, maar soos U wil. Die basiese doel van gebed is nie om God se wil te buig na my wil nie. Ek moenie my gevoelens in my gebede onderdruk nie, maar my gevoelens mag my nie beheer nie.
• Jesus se oneindige geduld met mense. Drie keer kom Hy na sy dissipels terug en kry hulle aan die slaap. Hy veroordeel hulle nie – Hy maak eintlik vir hulle verskoning: Die gees is gewillig, maar die vlees is swak.

Hy het sy eie mense wat in die wêreld is, liefgehad, Hy het hulle tot die uiterste liefgehad (Johannes 13:1).

“The ultimate measure of a man is not where he stands in moments of comfort and convenience, but where he stands at times of challenge and controversy.” – Martin Luther King, Jr.

Jesus tree in vir ons: Twee advokate

Dit is die laaste aand wat Jesus met sy dissipels bymekaar is. Hy weet sy tyd is kort. Wat weeg die swaarste op sy hart? My kinders, Ek is nog net ‘n klein rukkie by julle … Waar Ek heen gaan, kan julle nie kom nie (Johannes 13:33). Die dissipels is baie ontstel oor hierdie stelling. Petrus sê dat hy sy lewe vir Jesus sal aflê. Tomas sê dat hulle Hom nie kan volg nie, want hulle weet nie waarheen Jesus gaan nie. Filippus vra: Here, wys vir ons die Vader, en dit is vir ons genoeg (14:8). Dan Jesus se antwoord: Ek is al so lank by julle, en ken jy My nie? Filippus, Wie My sien, sien die Vader.

Jesus het hierdie dissipels self uitgesoek; drie jaar bly hulle in sy teenwoordigheid; Jesus het hulle uitgekies om sy boodskap in die wêreld uit te dra. Die volgende dag sou Jesus sterf … en sy dissipels ken Hom nie.

Jesus weet wat vir hulle voorlê – vervolging en teenstand. Is daar enige hoop? Ja. Ek sal die Vader vra, en Hy sal vir julle ‘n ander Voorspraak stuur om vir ewig by julle te wees, naamlik die Gees van die waarheid (14:16 – 17). Die OAV verwys na ‘n ander Trooster; die NIV verwys na another advocate.

Jesus praat van die Gees op ‘n paar interessante maniere:

• Hy praat van die Gees nie as ‘n mag nie, maar as ‘n Persoon – maar julle ken Hom. Jesus sê dus dat nadat Hy gesterf het die Vader ‘n ander Persoon na hulle gaan stuur.
• Jesus wys vir die dissipels dat dit tot hulle voordeel is dat Hy weggaan, want anders sal die Heilige Gees nie na hulle toe kom nie (16:7). Hierdie Gees sal hulle in die waarheid lei (16:13). Hierdie Gees kom langs jou om jou te ondersteun. Hy is ons advokaat vir die verdediging; Hy is daar om jou saak te bevorder.

In Johannes 14: 16 praat Jesus van ‘n ander advokaat. Wie is san die eerste advokaat? In 1 Johannes 2:1 – 2 lees ons van Jesus as ons voorspraak by die Vader – Jesus is ons eerste Advokaat. Wat sê hierdie woord van Jesus se werk? Jesus Christus het aan die kruis vir ons sondes gesterf. Korrek, maar onvolledig. Dit is meer radikaal as dit.

• Iewers is daar ‘n universele, goddelike hofsaal waar almal op een of ander stadium moet staan. Daar is ook ‘n standaard neergelê vir ons lewens. Maar watter hoop het ons in so ‘n hofsaal? Ons voldoen tog nie aan God se standaarde nie. Dit is nou reeds ‘n probleem vir ons – ons gewetens kla ons nou reeds aan. Diep binne in my weet ek van hierdie hofsaal. Ek weet ook ek is in geen toestand om daar alleen voor God te staan nie.
• In hierdie hofsaal is Jesus ons advokaat. In ‘n sekere sin is my advokaat ekself – as jy hakkel en hy is welsprekend is jy ook welsprekend. My advokaat verskyn in my plek. Ons is skuldig. Wat het ons nou nodig? ‘n Advokaat om namens my voor die Vader te verskyn – iemand wat daar my saak kan stel. Ons het Jesus Christus, die regverdige, as ons voorspraak by die Vader (1 Johannes 2:1 – 2).

Die taak van ons eerste Advokaat- Jesus – is om voor die Vader te sê: “Aanvaar hulle in my Naam.

Wat is dan die taak van die tweede Advokaat – die Heilige Gees? Hy sal julle alles leer en julle herinner aan alles wat Ek vir julle gesê het (Johannes 14:26). Die Heilige Gees hou ons hand vas, gee vir ons krag en leer ons die lewensveranderende waarheid. Hy leer ons om te leef ooreenkomstig dit wat Christus gesê en gedoen het.

Sonder die werk van die Heilige Gees kan nie Jesus of sy vrede kom nie. Maar ons hoef nie bekommerd te wees nie – ons het immers twee Advokate wat ons bystaan.

“Though God may intend man to destroy himself, he also has given man free will and the ability to cleanse himself and his world. The church will not be pessimistic, nor sit quietly in its handsome houses of worship while the war rages outside its churches for the bodies, minds and souls of its parishioners.” – Archbishop Iakovos, Greek Orthodox Archdiocese of America

Hoe ontmoet ek Christus vandag?

Jesus Christus kom as die Verlosser – die antwoord op die groot lewensvrae. As ek wil hê my lewe moet verander, moet ek Hom as my Verlosser ontmoet. Om dit te kan doen, moet ek sien wat Hy vir my gedoen het. Daarom gaan ons na vyf sleutelelemente in die lewe van Jesus kyk: 

• Hy oorwin die bose vir ons
• Hy tree in vir ons
• Hy is volmaak gehoorsaam vir ons
• Hy verlaat die aarde om vir ons te heers
• Hy verlaat die hemel om vir ons te sterwe

Hy oorwin die Bose vir ons

Reg aan die begin van Jesus se aarse lewe is daar twee gebeure wat mekaar volg: sy doop en sy versoeking in die woestyn (Matteus 3:14 – 4:11). Jesus se doop en versoeking word aanmekaar verbind deur die woordjie toe. God spreek kragtige woorde van versekering: Dit is my geliefde Seun. Oor Hom verheug Ek My. Toe word Jesus deur die Gees die woestyn in gelei om deur die duiwel versoek te word. Na God se seën volg versoeking en beproewing.

Niemand is vrygestel van swaarkry en beproewing nie. Dit is deel van God se misterieuse plan. Versoeking is net die begin van Jesus se lewe. Daarna volg verwerping, verraad, hartseer, marteling en die dood. Hierdie gedeelte wys vir ons die mag en kompleksiteit van die bose in hierdie wêreld. As ons ons vyand onderskat, gaan ons in alle waarskynlikheid die geveg teen hom verloor. As ons nie weet wat om te verwag nie, sal ons oorweldig word.

Matteus sê om die bose te hanteer, moet ons drie vrae vra:

• Wie is die vyand?

Die Bybel sê die bose is natuurlik en bonatuurlik, binne en buite my, beide in my individueel en in die samelewing. Daar is geen menslike manier om volledig van die bose te ontsnap of om die bose volledig te verstaan nie.

• Waar is die gevegsfront

Waar/wat is die duiwel se hoof aanvalspunt? Versoeking. Wat sê die duiwel vir Jesus? “As jy die Seun van God is, laat Hy dit bewys.” Ons vra nie bewyse nie tensy ons twyfel nie. Dit is wat die duiwel probeer doen: laat hulle net twyfel. Hy wil verhoed dat ek glo dat Jesus Christus die Seun van God en die Verlosser van die wêreld is. Hy wil hê dat ek moet twyfel of Hy my liefhet en of ek sy kind is,

• Wat is die beste verdediging in die stryd?

Jesus blaas nie vir die duiwel weg nie – al kon Hy dit doen. Jesus beveg die duiwel met die waarheid. Elke keer as die duiwel Hom aanval, gebruik Jesus die Bybel om Hom te verdedig. Selfs aan die kruis haal Jesus Psalm 22:2 aan: My God, My God, waarom het U My verlaat. As ek God se versekerings, beloftes en openbarings diep in my het, is dit onmoontlik vir die duiwel om enige vastrapplek te kry. Maar om dit te kan doen, vereis tyd en energie – gereelde studie van die Bybel en gebed.

Wat is ons beste verdedigingsmeganisme? Jesus Christus: Die Hoëpriester wat ons het, is nie Een wat geen medelye met ons swakhede het nie; Hy was immers in elke opsig net soos ons aan versoeking onderwerp, maar Hy het nie gesondig nie. Kom ons gaan dan met vrymoedigheid na die genadetroon, sodat ons barmhartigheid en genade ontvang en so op die regte tyd gered word (Hebreërs 4:15 – 16).

“Be laborious and diligent in your callings… and if you cheerfully serve [God] in the labour of your hands, with a heavenly and obedient mind, it will be as acceptable to him as if you had spent all that time in more spiritual exercises.” – Richard Baxter

Die eerste Christen

Ons het gesien dat Jesus Christus regmaak wat verkeerd is. Dit bring ons by die volgende vraag: Hoe moet ons daarop reageer?  Dit bring ons by dié fundamentele aspek van ons verhouding met God – geloof. Maar wat beteken geloof? Daarvoor gaan ons na Jesus se ontmoeting met Maria Magdalena kyk.

Niemand het in homself die vermoë om self geloof in Jesus Christus te produseer nie. Daarvoor het hy ‘n ingryping van buite nodig.

Jesus Christus het herhaaldelik verwys na sy dood en opstanding. Maria Magdalena moes terdeë daarvan bewus gewees het. Tog toe sy die leë graf sien, was haar eerste reaksie dat  hulle die Here uit die graf weggevat het.

Geloof in die persoon en werk van Jesus Christus kom nie natuurlik nie – ons het ‘n inherente geestelike blindheid. Jesus moes tot Maria se hulp kom. Ons het ook sy hulp nodig: Vir mense is dit onmoontlik, maar vir God is alles moontlik (Matteus 19:26). Geloof is rasioneel, maar dit is meer as net rasioneel. Geloof berus op bewyse – en die bewyse sien ons reg voor ons.

Moderne mense glo nie meer in wonderwerke nie. Ons glo dat geloof die teenoorgestelde van logika is. Geloof is nie hoop op iets wat nie waar is nie. Geloof beteken ek het sekerheid oor iets wat ek nie kan sien nie.

Verbasend is die eerste ooggetuie van Jesus se opstanding ‘n vrou. Vroue kon nie destyds in die Romeinse en Joodse howe getuig nie, want hulle getuienis was as onbetroubaar en daarom as ontoelaatbaar beskou. En tog word Maria gebruik.

Maar geloof het ‘n rasionele komponent. Petrus kom by die graf en gaan in. Die doeke lê daar; die doek wat om Jesus se kop was, lê daar eenkant – opgerol. Petrus dink nou. As Jesus opgestaan het, sou die doeke tog geskeur en deurmekaar gewees het; as iemand Jesus se lyk gevat het, sou hulle tog nie die doeke afgehaal het nie. Geloof betrek egter nie net die rede nie, maar die hele persoon – intellek, emosies en wil.

Lees ons hierdie verhaal verder sien ons dat geloof deur genade kom. Ons sien die teerheid van die interaksie tussen Jesus en Maria: Mevrou, waarom huil jy? Maria dink egter dat Jesus die tuinopsigter is, hy sou dalk vir haar kan sê wat met Jesus se lyk gebeur het. Jesus wend nog ‘n poging om tot haar hart deur te dring. Hy sê een enkele woord: Maria! Ware geloof is altyd persoonlik – Jesus het nie vir die mense aan die kruis gesterf nie, maar vir my persoonlik. Die probleem is dat Maria ‘n dooie Jesus soek. Maar Maria se geloof kom deur genade – sy verdien dit nie. Ons vergeet dat Jesus die goeie herder is: Hy roep sy skape op hulle name (Johannes 10:3).

Maria is die eerste mens wat ‘n persoonlike ontmoeting met die opgestane Jesus gehad het – die eerste Christen. Jesus kies doelbewus ‘n vrou, ‘n vrou wat vantevore van bose geeste verlos moes word. Sy was een van sy ondersteuningspan – nie een van die leiers nie; sy was nie wat ons sou beskryf as ‘n pilaar in die samelewing nie. My verlossing berus nie op wie ek is of wat ek in die verlede gedoen het nie – my baanrekord is nie vir God belangrik nie. Die goeie nuus is dat ek gered word deur wat Jesus Christus gedoen het – nie deur wat ek moet doen nie. Geloof is genade – ‘n gawe van God.

Vraag: Hoe reageer ek op dit wat Jesus Christus vir my gedoen het? Deur geloof.