Cheap grace is that grace which we bestow on ourselves – Dietrich Bonhoeffer

Paulus se blydskap

Selfs al word my bloed daarby as drankoffer uitgegiet is ek bly daaroor, ja, is ek saam met julle bly. Om dieselfde rede moet julle ook bly wees, ja, saam met my bly wees (Filippense 2:17 – 18)

Vier maal gebruik Paulus in net twee verse die woordjie bly. Blydskap is baie dieper as gelukkig wees, want gelukkig wees word deur my omstandighede bepaal. Paulus kan bly wees, want hy weet dat God se verlossingswerk voldoende was. Daarom kan hy hoop op die toekoms.

Onthou Paulus skryf hierdie brief uit die tronk uit. Om bly te wees te midde van lyding beteken dat hy besef dat hierdie tyd nie al is wat daar is nie – die huidige tyd het nie die finale sê nie. Jesus Christus, die Verlosser, sal weer kom. Dan is ons vir altyd by hom.

Kyk Sondag na die mense om jou by die erediens. Het jy al ooit so ‘n swaarmoedige klomp mense bymekaar gesien? Luister wat Paulus sê – vier keer in twee verse – wees bly.

A lie will go around the world while truth is putting its boots on – Ou Spreekwoord

Opreg en onberispelik

Sorg dat julle bo verdenking staan en opreg bly, onberispelike kinders van God (Filippense 2:15)

Dit herinner nogal aan die offerpraktyke van die Israeliete: die offers wat hulle gebring het, moes vlekkeloos gewees het. Dieselfde het ook vir die volk gegeld: Wie het die reg om in u woonplek te kom, Here? Wie mag op u heilige berg vertoef? Hy wat onberispelik wandel en doen wat reg is, wat met sy hele hart die waarheid praat (Psalm 15:1 – 2).

In ‘n wêreld vol ontaarde en korrupte mense moet die gelowiges in Filippi as ligdraers optree. Gelowiges moet opstaan en teen die bose getuig; gelowiges moet mense na God toe trek. Hierdie lig wat gelowiges moet versprei, moet ‘n baken van hoop in die wêreld wees.

Ons lewens moet rein wees. Reinheid is nie ‘n wapen waarmee ek ander slaan nie; reinheid staan teenoor sonde wat mense se lewens vernietig. Daarom kan reinheid nooit ‘n saak net van my private lewe wees nie – ons kan nooit sê dat onreinheid iets is wat net vir my raak nie. Verslawing aan alkohol raak baie mense om my.

Kan ons eerlik sê dat ons opregte en onberispelike kinders van God is?

If you want the truth to go around the world you must hire an express train to pull it, but if you want a lie to go around the world, it will fly, it is as light as a feather, and a breath will carry it –  Spurgeon

God werk in ons

Want dit is God wat julle gewillig en bekwaam maak om sy wil uit te voer (Filippense 2:13)

Vir Paulus is die bron van die mense se goedheid, gehoorsaamheid, vreugde, liefde en geregtigheid God se goedheid, gehoorsaamheid, vreugde, liefde en geregtigheid. In hierdie teks beklemtoon Paulus God se onderskraging en bemagtiging. Hierdie bemagtiging sluit twee aspekte in:

• Die wil om te doen wat God van ons verwag; en
• Die werklike doen van hierdie dinge wat God van ons verwag.

Nee, God het ons gemaak wat ons nou is: in Christus Jesus het Hy ons geskep om ons lewe te wy aan die goeie dade waarvoor Hy ons bestem het (Efesiërs 2:10). Paulus het in sy lewe geleer dat sy krag van die Here kom. Toe hy vra dat die Here die doring uit sy vlees moet verwyder, antwoord die Here hom: My genade is vir jou genoeg. My krag kom juis tot volle werking, wanneer jy swak is (2 Korintiërs 12:9).

God maak dit vir die Filippense en vir ons moontlik om die wil van God uit te voer deur hulle toegang te gee tot sy krag wat hulle in staat sal stel om sy wil te doen. God maak my gewillig en bekwaam om sy wil uit te voer. In eie krag gaan ek nêrens kom nie.

“Are you a champion of Christ on Twitter, but not in your neighborhood?” Michael Oh

Ambisie: Goed of sleg

Baie leiers bereik nooit hulle volle potensiaal nie, want hulle gaan deur die lewe op stuuroutomaat. Hulle behou die status quo sonder enige ambisie; hulle het geen meesterplan en geen drome wat hulle vorentoe trek nie. As jy ‘n leier wil wees, moet jy groot drome droom. As jy ophou droom, begin jy doodgaan; as jy geen doelwitte het nie, groei jy nie. God het aan jou die vermoë gegee om groot te droom. As jy groei en ontwikkel is jy ‘n gesonde mens. Ons groei deur nuwe uitdagings te hanteer.

 Volgens Rick Warren is daar drie algemene dwalings wat verhoed dat mense ‘n lewensambisie het. Ons kry hulle baie algemeen is kerkleiers:

• Ons verwar nederigheid en vrees

God wil hê dat ons nederig moet wees, maar Hy wil nie hê dat ons bang moet wees nie. Vrees verhoed dat jy betekenisvolle dinge doen. Elke leier is uniek met unieke geestelike gawes, passie, vermoëns, persoonlikheid en ondervindings. God se begeerte vir hoe ‘n leier die wêreld om hom sal beïnvloed, word deur hierdie uniekheid bepaal. Maar jy moet al die invloed wat Hy vir jou sal gee begeer sodat jy ‘n so groot as moontlike impak sal maak vir die onthalwe van die koninkryk van God. Nederigheid beteken nie dat ek aanvaar dat ek nie ‘n groot leier kan wees of ‘n groot impak kan maak nie. Dit is vrees. Vrees stroop ons van die vermoë om groot dinge wat die wêreld sal verander, te doen. Nederigheid beteken dat ek my identiteit soos gedefinieer deur my Skepper verstaan. Vrees hou ons terug; ware nederigheid laat ons vorentoe gaan, want ons glo dat ons ‘n groot God dien.

• Ons verwar tevredenheid met luiheid

Ek is en bly altyd tevrede, wat my ook al tref (Filippense 4:12 – Die  Boodskap)

Dit beteken beslis nie dat Paulus geen ambisie of doelwitte het nie. Baie leiers glo hierdie vers beteken dat hulle tevrede moet wees met alles wat hulle kry – geen ambisie nie. Nee, leiers moet leer om tevrede te wees met waar hulle gemeente tans is. As ons tevredenheid as ‘n verskoning vir luiheid gebruik, wie gaan dan uitreik na kerklos mense; wie gaan na die armes uitreik; wie gaan baklei vir geregtigheid. Ons mag nie tevredenheid met luiheid verwar nie.

• Ons verwar klein denke met spiritualiteit

Satan is ‘n kundige om ons so ver te kry om klein te dink. In bediening wil ons so veel mense as moontlik vir Christus bereik en ons wil hê dat hulle so diep as moontlik moet groei. Ons wat ‘n groot God aanbid, moet groot verwagtings hê van wat God kan en wil doen deur ‘n leier wat aan Hom oorgegee is.

Ons word dikwels geleer dat ambisie sleg is. Daar is niks verkeerd met ambisie nie, mits ons dit reg hanteer.