Adversity toughens manhood, and the characteristic of the good or the great man is not that he has been exempt from the evils of life, but that he has surmounted them.”  – Patrick Henry (1891)

Die tweede Adventskers

Verlede Sondag het ons die eerste Adventskers – hoop – aangesteek. Gister het ons die tweede kers – vrede – aangesteek. Soos ons vir die koms van Jesus Christus voorberei, onthou ons dat Jesus ons hoop en ons vrede is.

• Vir ons is ‘n Seun gebore, aan ons is ‘n Seun gegee; Hy sal heers, en Hy sal genoem word: Wonderbare Raadsman, Magtige God, Ewige Vader, Vredevors. Sy heerskappy sal uitbrei en Hy sal vir altyd vrede en voorspoed bring (Jesaja 9:5 – 6)
• Vrede laat Ek vir julle na; my vrede gee Ek vir julle. Die vrede wat Ek vir julle gee, is nie die soort wat die wêreld gee nie. Julle moet nie ontsteld wees nie, en julle moet nie bang wees nie (Johannes 14:27).

Gebed:

Genadige God, gee dat ons vrede mag ondervind terwyl ons voorberei vir ons Here se geboorte. Mag verskille tussen ons en ander in vrede opgelos word. Mag daar vrede in ons land en in die wêreld wees. Gee dat ons die vredespaaie raaksien en gee vir ons die moed om op hulle te loop. Here, laat ons nie vergeet dat U die Gewer van ewigdurende vrede is en dat U altyd met ons is nie. Amen.

What we hope ever to do with ease, we must learn first to do with diligence. -Samuel Johnson,  (1709-1784)

Veroorsaak tegnologie depressie?

Die sielkundige Daniel Coleman (skrywer van onder andere Social Intelligence, Emotional Intelligence en Focus) beskryf ons geslag wat op genot ingestel is as die geslag van melankolie (= swaarmoedigheid, swartgalligheid. Die woord is afkomstig uit die Grieks melas – swart en chole – gal.) Hy sê die oorsaak hiervan is tegnologie. Die oplossing sou dan die teorie van selfbepaling wees.  Hierdie teorie bestaan uit drie elemente:

• Outonomie – die gevoel dat ons self ons aktiwiteite kies. As ons voel ons is in beheer kan ons self ons prioriteite organiseer en bepaal hoe doeltreffend ons dit moet uitvoer.
• ‘n Gevoel van bekwaamheid – ons glo ons optrede is doeltreffend, ons weet watter aktiwiteite belangrik is en maak gebruik van tegnologie waar toepaslik.
• Verhoudings – ons voel naby aan ander mense. Tegnologie bedreig hierdie element. Sielkundiges het bevind dat die verskil tussen gelukkige en ongelukkige mense die teenwoordigheid of afwesigheid van diep, bevredigende sosiale verhoudings is. As jy gelukkig wil wees, moet jy tyd met jou familie en vriende deurbring.

Dit is interessant dat die slim mense die fundamentele ongelukkigheid van die mense ontleed en met hulle eie “evangelie” na vore kom – outonomie, bekwaamheid en verhoudings. Dit mag sekerlik tot beperkte, tydelike geluk lei. Die ware evangelie van Jesus Christus se diagnose gaan veel dieper – nie tegnologie nie, maar sonde. Dit stel ook ander oplossings voor: nie outonomie nie, maar afhanklikheid van Christus; nie bekwaamheid nie, maar erkenning van ons swakhede – ons doen alles in Christus se krag; nie verhoudings met mense nie, maar primêr met God deur Jesus Christus.

Veroorsaak tegnologie depressie? In sekere gevalle mag dit ‘n bydraende faktor wees. Die menslike brein kan net nie al die stimulasie waaraan ons vandag blootgestel is, hanteer nie. Een of ander tyd gaan ons petrol opraak. Ons moet stil tye in ons lewens inbou – tye waartydens ons brein kan rus en herlaai word. Onthou net dat Elia die stem van God nie te midde van sensasionele stimulasie gehoor het nie, maar in die stilte.

[Daar is baie verkeerde sienings oor depressie. Daar is ‘n groot groep waar die oorsaak ‘n chemiese wanbalans in die brein is. Hierdie gevalle het medikasie nodig en pas nie hier in nie. Wees baie versigtig om nie alle gevalle van depressie oor dieselfde kam te skeer nie.]

“To believe [the Gospel] when you wish it, and then disbelieve [it] when you wish it, is to believe nobody but yourself.” —St Augustine   

Die koninkryk van God in die Nuwe Testament: Die koninkryk vandag (6)

Die koninkryk van God is ‘n baie algemene tema in die Bybel. Ek gaan ‘n hele aantal blogs gebruik om te probeer vasstel wat dit is en hoekom dit belangrik is. Ek gaan onder ander gebruik maak van The Kingdom of God: Christopher W. Morgan en Robert A. Peterson (reds) 2012.

Wat moet God se mense doen in die koninkryk om die aansprake van Christus oral in die skepping te bevorder?

Behoefte

Wat het mense nodig om volledig mens te wees? Elke mense het die behoefte om met die drie-enige God te kommunikeer. Dit is ons grootste behoefte. Maar die mens het ook ander behoeftes.

Mense het veral die geleentheid om hulle volle potensiaal te bereik nodig – dit wat dit beteken om na God se beeld gemaak te word. Dit is meer as net die uitdeel van geld. Ons moet hulle menslike potensiaal ontsluit en hulle bemagtig. Wat ons nodig het, is ‘n raamwerk wat menswaardigheid bevorder. Dit beteken ons woon in ‘n samelewing wat basiese menseregte erken en uitleef.

As ons die behoeftes van die minderbevoorregtes wil hanteer, moet die kerk sy roeping aanvaar as dié instelling wat die deugde van die gemeenskap moet vorm. Die kerk moet alle pogings om menswaardigheid te bevorder ondersteun. Die kerk moet alles in sy vermoë doen om te verseker dat mense in harmonie kan saamleef. Die rol van die kerk is noodsaaklik, want die kerk verseker dat God se getroue mense onderhou word en groei.

Gevolgtrekking  

In die praktyk van die koninkryk van God is die heerlikheid van God en die beeld van God baie belangrik. As ambassadeurs van die koninkryk moet ons hierdie heerskappy van God aan die hele wêreld bekend maak. Ons het agt elemente bespreek wat as beginpunt moet dien. Goeie bedoelings sonder omsigtigheid wat deur die Bybel geïnspireer is, is nie voldoende nie.

Ons doel in die koninkryk is om op God se genade te reageer deur sy heerlikheid vir die wêreld te wys sodat ons ander kan uitnooi om te proe en te sien hoe goed God is.

“Trouble is to man what rust is to iron.” ~ Joodse Spreekwoord

Die koninkryk van God in die Nuwe Testament: Die koninkryk vandag (5)

Die koninkryk van God is ‘n baie algemene tema in die Bybel. Ek gaan ‘n hele aantal blogs gebruik om te probeer vasstel wat dit is en hoekom dit belangrik is. Ek gaan onder ander gebruik maak van The Kingdom of God: Christopher W. Morgan en Robert A. Peterson (reds) 2012.

Wat moet God se mense doen in die koninkryk om die aansprake van Christus oral in die skepping te bevorder?

Wederkerigheid

Niemand het nog ooit iets van God se voorsiening verdien nie. Ons kan geen aanspraak maak op die goedheid wat ons ervaar nie. Alle goeie dinge wat ons het, is as gevolg van God se genade. Hoe moet ons reageer? Ons kan tog nie vir God terugbetaal nie. Wat ons wel kan wees, is agente van sy genade wat sy genade aan ander oordra.

In die koninkryk beteken wederkerigheid om God te verheerlik en om ons naaste lief te hê deur sy genade aan hulle oor te dra. Werklike liefde is dit: nie die liefde wat ons vir God het nie, maar die liefde wat Hy aan ons bewys het deur sy Seun te stuur as versoening vir ons sondes. Geliefdes, as dit is hoe God sy liefde aan ons bewys het, behoort ons mekaar ook lief te hê (1 Johannes 4:10 – 11). As ek die genade wat ek ontvang het met ander deel, leer ek mense om saam te werk. So bevorder ons geregtigheid wat mense is staat stel om saam te leef in vrede en respek vir mekaar.

Wederkerigheid bring liefde en bekommernis oor menslike waardigheid by mekaar uit. Koninkryksmense moet wederkerigheid modelleer, want dit het ‘n positiewe effek op samelewings. Kom ondervind en sien self dat die Here goed is (Psalm 34:9). Wederkerigheid is die kern van Jesus se gebod dat ons ons naaste, as burger van God se koninkryk –  moet liefhê.

Ons reaksie op genade is dat ek God as Skepper moet erken in liefdevolle gehoorsaamheid. Hierdie fokus op ander is ‘n kenmerk van lewe in die koninkryk. Christene in die koninkryk word van gereddene tot redder bevorder. God se mense is deur genade uit die duisternis gered sodat hulle die lig vir die wêreld kan wees.

Gelykheid

Wederkerigheid moet die voorwaardes vir gelykheid daar stel. Gelykheid is dan om elke mens te behandel op so ‘n manier dat sy menswaardigheid herstel word. Elke mens moet behandel word as iemand gemaak na die beeld van God.

Die probleem is dat ons verskil oor wat ons bedoel as ons van gelykheid praat. Is dit materieel – die gelyke verspreiding van hulpbronne? Vir ander beteken dit ‘n samelewing waarin niemand voorgetrek word nie – almal word volgens dieselfde reëls behandel. Gelykheid volgens die Bybel beteken dat die verdelende kultuurverskille wat mense aan ander toedeel, verdwyn. Die Bybel praat eerder van mense se posisie voor God. Alle mense het ‘n Verlosser nodig: Almal het gesondig, en het nie deel aan die heerlikheid van God nie (Romeine 3:23). Wat die Skrif nie beklemtoon nie is ‘n definisie van gelykheid wat bepaal dat alle mense almal dieselfde materiële hulpbronne het en dieselfde sosiale mag het. Jesus het self gesê dat ons die armes altyd by ons sal hê (Matteus 26:11). Gelykheid kan nie net tot materiële besittings verskraal word nie.

Maar wat beteken gelykheid dan in die koninkryk van God? Elke mens word behandel op so ‘n wyse dat ons erken dat hy na die beeld van God gemaak is en dat elke mens die geleentheid moet kry om sy roeping in vrede uit te leef. Die samelewing is ‘n plek waar mense nie voor arbitrêre vooroordeel en uitsluiting te staan kom nie, maar waar elke persoon die geleentheid het om goed te lewe as vry en verantwoordelike lede van daardie gemeenskap. As ek my naaste liefhet moet ek mense in posisies plaas waar hulle werklike geleenthede het om die implikasies van beelddraers van God uit te leef.