‘n Voorskrif vir gesondheid

—C.H. Spurgeon

‘n Voorskrif vir gesondheid

Welgeluksalig is hy wat ag gee op die arme; die Here sal hom red in die dag van onheil. Die Here sal hom bewaar en hom in die lewe hou; hy sal gelukkig gemaak word op die aarde. Ja, U kan hom nie oorgee aan die begeerte van sy vyande nie. Die Here sal hom ondersteun op die siekbed; sy hele slaapplek verander U as hy krank is (Psalm 41:2 – 4 – OAV)

Psalm 41 is ‘n voorskrif vir ons gesondheid.

Volgens hierdie psalm is diegene wat omsien na die arme welgeluksalig – in die NAV word welgeluksalig omskryf as dit gaan goed met die mens. Wat beteken dit om om te sien na die arme. Dit is meer as net dink aan die arme; dit is meer as om aan hom ‘n geldjie te gee. Omsien na beteken om enigiets wat die arme nodig het om vorentoe te gaan, te voorsien.

Hoe sal diegene wat na die arme omsien geseën word: In hierdie gedeelte lees ons van sewe seëninge:

Die Here sal hom red in die dag van onheil.

Die Here sal hom bewaar.

Die Here … sal hom in die lewe hou.

Hy sal gelukkig gemaak word op die aarde.

U kan hom nie oorgee aan die begeerte van sy vyande nie.

Die Here sal hom ondersteun op die siekbed.

Sy hele slaapplek verander U as hy krank is. Die Nuwe Vertaling sê: As hy siek is, sal U hom genees.

Is hierdie ‘n towerformule vir sukses? Help die armes en siedaar verlossing, genesing en seën. Net ‘n paar verse later (vers 10) lees ons: Selfs my boesemvriend op wie ek vertrou het, wat altyd by my geëet het, het my in die rug gesteek. Ons moenie hierdie psalm meganisties lees nie – seën ‘n arme en God sal jou seën nie. Maar oor die algemeen is dit waar.

Is ek vol moed?

We want people to e involved in culture because Christ has revealed himself in cultute – Dan Alexander

Is ek vol moed?

Almal van ons wil graag vol moed wees. Ons lees van Dawid en Goliat en van Daniël se drie vriende en van die apostels in Handelinge en dink: “Hoe kan ek ook ‘n vreeslose hart kry?” In ons samelewing is een van die strategieë wat ons gebruik juis om moeilike situasies te visualiseer sonder al die moontlike negatiewe gevolge te bedink. Daar is egter ‘n beter manier om vrees te oorwin. J. D. Greear kyk na Handelinge 4 en ontdek vyf geheime om vrees te oorwin.

Hulle glo in God se soewereiniteit in hulle beproewing

Die gelowiges is onder geweldige druk. Petrus en Johannes het pas voor die Joodse Raad verskyn. Hulle is terug by hulle medegelowiges. Almal bid toe saam: Here, dit is U wat die hemel en die aarde en die see en alles wat daar is, gemaak het …Dit is wat werklik in hierdie stad gebeur het. Herodes en Pontius Pilatus het met heidennasies en die volk Israel saamgespan teen u heilige Dienaar, Jesus, wat deur U gesalf is, en hulle het alles gedoen wat U vooruit beskik en besluit het (Handelinge 4:24 – 28). Hulle het besef dat bose mense wat gedink het hulle het teen God se plan gewerk in werklikheid vir God se plan gewerk het. Die gelowiges wat daar bymekaar was, mag gevoel het dat die vervolging hulle oorweldig het, maar hulle het vertrou dat God besig was om daardeur te werk. Sou ons perspektief nie verander as ons sake soos daardie eerste gelowiges gesien het nie; Geloof in God tydens my probleme is belangriker as dat God my probleme oplos.

Hulle ken die Skrif

Hulle staan in eerbied voor hulle grootste Held

In Handelinge 5 staan Petrus weer voor die Joodse Raad. Hy sê vir hulle: Die God van ons voorvaders het Jesus uit die dood opgewek nadat julle Hom vermoor het deur Hom aan die kruis te hang. God het Hom verhoog tot Leidsman en Verlosser aan sy regterhand, sodat Hy Israel tot bekering kan bring en hulle sondes kan vergewe (5:30 – 31). Die woord Leidsman verwys na ‘n kampioen of held. Petrus noem Jesus hier ‘n Held. Maar Hy is ‘n held wat nie sy mag gebruik om vyande te verslaan nie, maar om in swakheid te sterf om hulle te verlos. Dit laat die gelowiges weer dink: As Jesus sy lewe vir hulle gewaag en gegee het om hulle te verlos, moet hulle nie ook hulle lewens gee sodat ander gered kan word nie?

Hulle het ‘n mededeelsame gees besit

As ek die evangelie glo, maak dit my ook mededeelsaam (Handelinge 4:32 – 37). Hulle gee vrywillig van hulle besittings weg. As hulle getrou was aan die boodskap van Jesus Christus mag dit tot fisiese lyding lei, maar hulle was gewillig om te ly. Hulle doen dit omdat hulle radikaal vrygewig was. As ek op sekere gebiede vrygewig is (my finansies), maar nie op ander gebiede (getuig van die evangelie) nie, is ek nie werklik vrygewig nie.

Hulle is deur die Heilige Gees gevul

Na hulle gebid het, lees ons: Hulle is almal met die Heilige Gees vervul en het met vrymoedigheid die woord van God verkondig (4:31). Die plek waar hulle bymekaar was, het geskud. Hoe meer hulle deur die Heilige Gees geskud was, hoe minder word hulle deur die mag van hulle vyande geskud. Net soos Petrus-hulle die Heilige Gees nodig gehad het, het ons Hom ook nodig. Dit is waar lewegewende krag vandaan kom. Baie van ons het nog nooit gevra dat die Heilige Gees ons lewens moet skud nie. Vra. God staan gereed om te gee.

Ek is ontevrede

. —J.I. Packer

Ek is ontevrede

11Moet my nie verkeerd verstaan nie. Dit is nie omdat dit met my so swaar gaan dat ek nie sonder julle hulp kon klaarkom nie. Die lewe het my al geleer om klaar te kom met wat ek het, maak nie saak wat gebeur nie. 12Ek weet hoe dit voel om arm, nee, brandarm te wees, maar ek weet ook hoe dit voel om genoeg of selfs te veel geld te hê. Maar ek laat nie toe dat sulke dinge my onderkry of met my weghardloop nie. Ek is en bly altyd tevrede, wat my ook al tref. Dit maak nie saak of ek sonder ’n krieseltjie kos gaan slaap of soveel kos het dat ek dit nie alles kan opeet nie. Of ek net die klere aan my lyf het en of ek ’n huis vol goed op my naam het, vir my is dit eintlik maar om ’t ewe.

13Vir alles in die lewe, die goeie of die slegte, sien ek kans, omdat Jesus my bron van krag is.

(Filippense 4:11 – 13 – Die Boodskap).

Gelowiges se tevredenheid word nie deur hulle omstandighede betaal nie. Tevredenheid word bepaal deur dit wat ons glo; jou geloof word bepaal deur wat jy sien: Laat ons elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop, die oog gevestig op Jesus, die Begin en Voleinder van die geloof (Hebreërs 12:1 – 2). As ons die las van ontevredenheid wil afgooi, moet ons begin deur te kyk waarna ons kyk.

Toe Paulus sy brief aan die Filippense geskryf het, sit hy in die tronk. Tronke destyds was nare plekke en mense het dikwels in tronke gesterf. Daarom skryf hy aan die mense in Filippi: Dit is my vurige verlange, en daarna sien ek uit, dat ek niks sal doen waarvoor ek my sal hoef te skaam nie. Ek wil ook nou, soos nog altyd, met alle vrymoedigheid deur my hele wese Christus verheerlik in lewe en in sterwe (1:20). Hoe kan Paulus wat in die tronk sit – honger, wetende hy kan enige oomblik doodgemaak word – skryf Ek is en bly altyd tevrede, wat my ook al tref? Omdat hy die Prys gesien het: Ek beskou alles as waardeloos, want om Christus Jesus, my Here, te ken, oortref alles in waarde. Ter wille van Hom het ek alles prysgegee en beskou dit as verwerplik sodat ek Christus as enigste bate kan verkry (Filippense 3:8).

Vir Paulus was Jesus ‘n Skat/Prys en hy het sy Prys gesien. Die geheim van tevredenheid is om die Prys te gesien het. Maar hoe sien ek die Prys?

Stop. As ek ontevredenheid in my lewe raaksien … stop. Hou op murmureer en kla. Stop jou kritiese tong teenoor ander – iets wat dikwels uit ‘n ontevrede hart voortspruit. Hou op begeer. Stop … en kyk.

Kyk. Kyk na wat jy besig is om te kyk. Jy is ontevrede, want daar is ‘n hindernis tussen jou en die Prys. Dink weer: Wat is die Prys wat ek wil hê?

Dink. Ek kan my oë net op die regte Prys fokus as ek daaroor dink. Waaroor ek dink, is dit wat ek waarneem. Ek is ontevrede, want ek het oor die verkeerde dinge nagedink en frustrasie het my plat gedruk – daarom is ek ontevrede. Verder, broers, alles wat waar is, alles wat edel is, alles wat reg is, alles wat rein is, alles wat mooi is, alles wat prysenswaardig is – watter deug of lofwaardige saak daar ook mag wees – daarop moet julle julle gedagtes rig (Filippense 4:8).

Moenie ontevrede wees nie. Los die swaar las en vestig jou oë op Jesus.

Vyf dinge wat God nooit gesê het nie

If you do all the talking when you pray, how will you ever hear God’s answers?” – AW Tozer

Vyf dinge wat God nooit gesê het nie

“God help diegene wat hulleself help.” Mense gebruik dit as bewys dat jy jou plek na die hemel kan oop werk. Maar God het dit nooit gesê nie. Wat die Bybel wel sê, is:Die genadegawe wat God gee, is die ewige lewe in Christus Jesus ons Here (Romeine 6:23). Hierdie is ‘n genadegawe – die ewige lewe is gratis.

Hier is vyf ander wanindrukke oor wat God se woord vir ons sê. Ongelukkig beïnvloed hulle ons uitreik na nie-Christene op ‘n negatiewe wyse:

As jy nie weet watter datum jy gered is nie, is jy nie gered nie

Daar is natuurlik ‘n moment wanneer ‘n persoon van die duisternis na die lig oorgaan. Nadat jy besef dat jy ‘n sondaar is en dat Christus vir jou gesterf en opgestaan het, plaas jy jou vertroue in Hom. Net omdat jy nie weet presies wanneer daardie sekonde was nie, beteken nie dat jy nie gered is nie. Dit gaan hier nie oor ‘n datum en tyd nie, maar oor ‘n feit. As jy op Christus alleen vertrou as jou enigste weg na die hemel is jy gered – maak nie saak wanneer jy die lyn oorgesteek het nie. Hierdie is belangrik, want hoe kan ek met iemand oor sy verlossing praat as ek onseker oor my eie verlossing is?

Natuurlik is daar mense wat dramaties tot bekering kom. Die ontmande Etiopiër (Handelinge 8:26 – 39) en Paulus (Handelinge 9:1 – 22) sou vir jou ‘n datum kon gee. Daar is baie wat dit nie kan doen nie. Hulle het miskien in ‘n Christelike omgewing grootgeword. Op een of ander stadium het hulle hulle sondige toestand besef en op Christus begin vertrou. Maar hulle weet nie die presiese tyd nie.

As jy gered wil word, nooi net vir Jesus in jou hart in

Kyk, Ek staan by die deur en Ek klop. As iemand my stem hoor en die deur oopmaak, sal Ek by hom ingaan en saam met hom die feesmaal hou, en hy saam met My (Openbaring 3:20). Hiervan lei sommige mense af dat ek net vir Jesus in my hart moet innooi. Die hart sou dan ‘n deur wees waaraan Jesus klop en wag om ingenooi te word. Hierdie vers is egter aan Christene en nie aan nie-Christene gerig. Dit gaan hier oor gemeenskap en nie oor verlossing nie. Sommige mense dink dat as hulle net ‘n eenvoudige gebed opsê waarin hulle Hom in hulle harte innooi, hulle gered is. Hulle vertrou op ‘n gebed en nie op die Verlosser wat vir ons aan die kruis gesterf het nie. Ons moet op Christus, ons enigste weg na die hemel, vertrou. Om ‘n gebed op te sê sal ons nie red nie – vertroue in Jesus Christus red ons.

As jy ‘n geleentheid om iemand van Christus te vertel nie gebruik nie, is jy verantwoordelik as hy nie gered word nie.

Baie mense hou nie van evangelisasie nie. As hulle dit doen, doen hulle dit omdat hulle skuldig voel. Hoekom voel hulle skuldig? Hulle is vertel dat as hulle ‘n geleentheid het om vir Christus te getuig en hulle doen dit nie en daardie persoon gaan hel toe is hulle verantwoordelik. Hierdie siening berus op die verkeerde verstaan van Esegiël 3:19 – 20: Wanneer Ek vir ‘n goddelose sê hy gaan sterwe, en jy waarsku hom nie, jy praat nie en jy waarsku nie die goddelose teen sy bose optrede om hom so in die lewe te hou nie, dan sal hy deur sy sonde sterwe, maar Ek sal van jou rekenskap eis vir sy dood. As jy hom waarsku en hy bekeer hom nie van sy goddeloosheid nie, van sy bose optrede nie, sal hy deur sy sonde sterf, maar jy sal jou eie lewe behou. Hierdie verse het niks met evangelisasie te doen nie. Esegiël is deur God as ‘n wag vir Israel aangestel (3:17). Sy taak was om teen naderende gevaar te waarsku. Sy uitroep gee aan die mense wat buite die mure is die geleentheid om beskerming te soek. Dit gee ook die mense die geleentheid om die poorte toe te maak en reg te maak vir die verdediging van die stad. Die dood waarvan Esegiël praat is fisies en nie geestelik nie.

Enigeen wat weier om Esegiël se waarskuwing te gehoorsaam, kan die fisiese dood verwag. Esegiël moes almal waarsku en nie net die goddeloses nie. As Esegiël die mense nie waarsku nie, is hy verantwoordelik vir hulle dood. Dit is ons taak om Christus na die goddeloses te bring; net God kan die goddeloses na Christus bring.

As jy na My toe kom, wil ek jou hele lewe of niks hê nie

Jy kan nie vir God halfpad ontmoet nie; as jy na Christus wil kom, moet jy jou volledig aan Hom oorgee. Lees net weer die Johannes-evangelie. Hy maak dit duidelik dat verlossing van een ding afhanklik is:glo en vertrou dat Christus jou enigste weg na die hemel is. As ek Hom so vertrou, is ek verlos. Verlossing is gratis, maar daar is ‘n koste aan dissipelskap verbonde. Dissipelskap is ‘n proses.

Wie van ons kan sê dat op hierdie gegewe moment elke aspek van my lewe aan Christus behoort? Sodra ek besluit het om Christus te vertrou en in Hom te glo vir my verlossing, word ‘n volkome oorgawe aan Christus ‘n doel waarna ek streef met behulp van die Heilige Gees en die geloofsgemeenskap.

Beklemtoon dat dit belangrik is om mense te vertel dat jy ‘n Christen is. Hy was nie skaam vir my nie so hoekom sal ek vir Hom skaam wees? Elkeen wat hom voor die mense openlik vir My uitspreek, vir hom sal Ek My ook openlik uitspreek voor my Vader wat in die hemel is. Maar hom wat My voor die mense verloën, sal Ek ook verloën voor my Vader wat in die hemel is (Matteus 10:32 – 33). Die konteks verduidelik dat dit hier oor dissipelskap gaan.

Maar is getuienis dan nie ‘n saak van verlossing nie? Kyk na hierdie drie sake:

oJohannes 12:37 – 43: Die wondertekens wat Jesus gedoen het, moes as vlag voor die Jode gedien het. Dit sê: Christus is God. Alhoewel Jesus so baie wondertekens voor die mense gedoen het, het hulle tog nie in Hom geglo nie. Sommige het wel geglo: Nietemin het selfs baie van die lede van die Joodse Raad tog ook tot geloof in Hom gekom, maar uit vrees vir die Fariseërs het hulle dit nie openlik bely nie, sodat hulle nie uit die sinagoge geban sou word nie; want hulle het verkies om liewer deur mense geër te word as deur God.

oDaar is baie verse in die Bybel wat sê dat die enigste voorwaarde vir verlossing geloof alleen is. Maar die mens wat nie op wetsonderhouding staatmaak nie, maar wat glo in Hom wat die goddelose vryspreek, hy kry die vryspraak deur sy geloof (Romeine 4:5).

oDan kon ons na die misdadiger aan die kruis verwys. Een van die misdadigers vra vir Jesus: Is jy dan nie die Christus nie? Red jouself en ons ook! (Lukas 23:39). Die ander man plaas sy geloof in Jesus: Jesus, dink aan my wanneer U in u koninkryk kom. Jesus se reaksie was sekerlik die beste nuus wat ‘n sterwende man kan hoor: Ek verseker jou: Vandag sal jy saam met My in die paradys wees. Hierdie misdadiger kon vir niemand van sy verlossing vertel het nie. Hy is gered deur Christus te erken vir wie Hy gesê het Hy is: die enigste een wat hom van sy sonde kon red.

Wanopvattings kan skadelik wees. Ons het hier na vyf wanopvattings gekyk wat ons uitreik na nie-Christene kan belemmer. Die gevolg is verwarring van die boodskap, die bevraagtekening van ons eie verlossing en ‘n teruggetrokkenheid om met ander oor die Here te praat. Dit beteken nie dat ons nie mense moet aanmoedig om te getuig nie, maar hulle moet dit uit genade doen en nie omdat hulle skuldgevoelens het nie.