Apologetiek: Die basiese temas van Christelike apologetiek (2)

. —C.H. Spurgeon

Apologetiek: Die basiese temas van Christelike apologetiek (2)

[Apologetiek = Grieks Apologia = verdediging van die Christendom]

Alister McGrath het ‘n belangrike boek – Mere Apologetics – geskryf waarin hy op ‘n praktiese manier sê hoe gelowiges die Christelike geloof kan verdedig. Ek gaan ‘n hele paar blogs hieraan spandeer, want ek voel dit is ‘n belangrike taak vir gelowiges in ons sekulêre wêreld

Ons sê dat apologetiek die verdediging van die Christelike geloof is. Wat beteken dit? Van watter take praat ons? Ons het reeds na die eerste taak – verdedig – gekyk. Ons kyk nou na twee verdere take.

 

1.Aanbeveel

Hier laat die apologeet toe dat die gehoor die waarheid en toepaslikheid van die evangelie waardeer. Om dit te kan doen moet mense die volle omvang van die Christelike geloof verstaan en waardeer. Ongelowiges moet verstaan waarom die Christelike geloof ernstige oorweging verdien. Jesus self het by geleentheid die koninkryk van God met ‘n waardevolle pêrel vergelyk: As hy (die handelaar) ‘n baie waardevolle pêrel raakloop, gaan verkoop hy alles wat hy het, en koop die pêrel (Matteus 13:45 – 46). So moet ons wys dat die Christelike geloof meer sin maak as enigiets anders – ons moet alles verkoop om hierdie waardevolle skat in die hande te kry.

Ons mag egter nooit die aanspraak van die evangelie tot menslike rede beperk nie. Wat van die hart? In die evangelie lees ons herhaaldelik dat mense tot Jesus aangetrek is, want hulle het besef dat Hy hulle lewens kon verander. Argumente het sy beperkings. Mense word na die Christelike geloof aangetrek omdat hulle glo dat dit hulle lewens sal verander. Hulle vra nie: Is dit waar? nie, maar: Sal dit werk? Ons moet mense oortuig dat die Christelike geloof so opwindend en wonderlik is dat niks daarmee vergelyk kan word nie. Ons moet mense help om die aantreklikheid van die geloof te begryp. Dit is soos iemand wat ‘n skatkis oopmaak en juwele ophou – een vir een sodat mense hulle kan sien en waardeer. Dit is soos om ‘n diamant op te hou sodat mense die skoonheid van elke faset kan waardeer.

2.Vertaal

Die kernidees en temas van die Christelike geloof is vir baie gehore onbekend. Hulle moet verduidelik word deur bekende of toeganklike beelde en verhale. C. S. Lewis was die meester van hierdie benadering. Hy sê: We must learn the language of our audience … you must translate every bit of your theology into the vernacular. Ons moet in staat wees om ons geloof in ons kultuur te verduidelik deur taal en beelde te gebruik wat hulle verstaan. Dit is nie toevallig dat Jesus gelykenisse gebruik het om mense oor die koninkryk van God te leer nie. Hy gebruik die taal en beelde wat sy gehoor verstaan.

Bybelse terme  moet verduidelik en geïnterpreteer word sodat mense dit kan verstaan. Kom ons kyk na Romeine 5:1: God het ons dan nou vrygespreek deurdat ons glo. Daarom is daar nou vrede tussen ons en God deur ons Here Jesus Christus. Hierdie is duidelik ‘n belangrike stelling oor ons geloof. Moderne gehore sal dit nie sommer verstaan nie. Hulle sal waarskynlik Paulus se siening van vryspraak misverstaan.  Dit is duidelik dat Paulus se siening van vryspraak verduidelik moet word in woorde wat beide getrou aan sy oorspronklike betekenis en verstaanbaar vir hedendaagse gehore is.

Is apologetiek en evangelisasie dieselfde? Daarna gaan ons volgende keer kyk



Wat gebeur na Paulus?

O my God, in whose tender embrace there is no contradiction, rain down gentleness on my heart, that I may put up with such people. – Augustine.

Wat gebeur na Paulus?

Handelinge begin met Jesus se hemelvaart, die belofte van die Heilige Gees en die opdrag aan sy boodskappers: Julle sal my getuies wees in Jerusalem  sowel as in die hele Judea en in Samaria en tot in die uithoeke van die wêreld (1:8). In Handelinge kry ons dialoë en gesprekke; wondertekens, karakterontwikkeling – absolute transformasie as Paulus tot bekering kom en daarna ‘n baie prominente rol speel.

 

Soms word Jesus se boodskappers vir gode aangesien; soms word hulle gestenig; soms word hulle onthoof. En dan die einde van die boek. Paulus, teen hierdie tyd ‘n bejaarde, nooi die Joodse leiers om hom in sy huis in Rome te besoek sodat hy vir hulle van Jesus Christus kan vertel.

Handelinge skep ‘n raamwerk waarbinne die kerk homself moet verstaan – dit het ‘n vormingsfunksie. Dit antwoord die vraag van die kerk: “Wie is ons en wat is ons veronderstel om te doen?” Lukas gee nie vir ons ‘n lys punte nie; hy gee nie vir ons ‘n boek vol voorskrifte nie. Nee, hy vertel ‘n storie – ons geskiedenis. Die hele boek, veral die einde, dien as rigtingwyser. Wat Paulus in Hoofstuk 28 doen, het geweldige implikasies vir hoe ons vandag Christen kan wees.

Dit is nie ‘n oproep dat almal van ons nou huiskerke moet begin nie. Dit egter belangrik vir hoe ons ons getuienis in hierdie wêreld verstaan. Die Bybelse visie van die uitbreiding van die evangelie is nie helder ligte en ‘n uitstekende klankstelsel nie. Dit is baie eenvoudiger. Dit is om deure oop te maak vir almal wat wil inkom. Paulus nooi mense in sy huis en daar vertel hy hulle die storie van God en wie Jesus was; “Kom in, kry koffie, sit en ek vertel jou wie Jesus was.” Dit is iets wat ons steeds vandag kan en moet doen. Daar waar Paulus opgehou het, moet ons voortgaan.

 

 



Apologetiek: Die basiese temas van Christelike apologetiek (1)

“They who wish to become partakers [of a grace] of so great a benefit must be a part of Israel, that is, of the Church, out of which there can be neither salvation nor truth.” – Calvyn

Apologetiek: Die basiese temas van Christelike apologetiek (1)

[Apologetiek = Grieks Apologia = verdediging van die Christendom]

Alister McGrath het ‘n belangrike boek – Mere Apologetics – geskryf waarin hy op ‘n praktiese manier sê hoe gelowiges die Christelike geloof kan verdedig. Ek gaan ‘n hele paar blogs hieraan spandeer, want ek voel dit is ‘n belangrike taak vir gelowiges in ons sekulêre wêreld

Ons sê dat apologetiek die verdediging van die Christelike geloof is. Wat beteken dit? Van watter take praat ons? Daar is veral drie take van belang:

 

  1. Verdediging

Hier probeer ons vasstel wat die hindernisse vir geloof is. Is dit as gevolg van misverstande of verkeerde voorstellings van die evangelie? Of voel die persoon daar is werklik probleme met die aansprake van die Christelike geloof – hulle is nie waar nie? Verdediging is uiteraard ‘n reaktiewe strategie – ons reageer op ‘n bekommernis van iemand. Waar eerlike vrae in opregtheid gevra word, moet eerlike antwoorde kragtig, maar met beskeidenheid, gegee word.

Almal het verskillende vrae en bekommernisse en vrese. Daarom moet die apologeet sy gehoor ken – watter probleme ondervind hulle met die evangelie? Ons kan nie sommer alles veralgemeen nie. Nie alle probleme is intellektueel nie. The heart has its reasons, which reason knows nothing about (Blaise Pascal, 1623 – 1662). Die probleem kan dus in die verstand (rede) of in die hart lê? Hierdie hindernisse vir geloof, moet geïdentifiseer word en die reaksie moet help om die probleem te oorkom.

Voordat ons die vrae wat ander oor ons geloof vra, kan antwoord, moet ons hulle eers vir onsself kan beantwoord het. Paulus praat van die vernuwing van ons denke (Romeine 10:2). Christene moet nadink oor hulle geloof en antwoorde vir hulle eie vrae ontwikkel. Ons moet die rykdom van ons geloof ontgin. Ons moet ook onthou dat dit nie net mense buite die kerk is wat vrae vra nie. Baie gelowiges ondervind ook probleme met hulle geloof. Dink maar aan: Hoekom laat God lyding toe? Hoe moet ek die Drie-eenheid verstaan?

Christene moet wys dat hulle hierdie bekommernisse verstaan en hulle nie sommer ligtelik van die tafel vee nie. Ons moet hulle met sensitiwiteit en deernis hanteer. Ons moet vrae vra soos: Hoekom is dit vir hulle ‘n probleem? Hoe kan ek hulle help om dinge op ‘n nuwe manier te sien? In apologetiek is my persoonlike gesindheid en karakter baie belangrik. Jy kan die evangelie verdedig sonder om verdedigend te wees. 

Volgende keer kyk ons na twee ander take: aanbeveel en vertaal.

.



Wat is die definisie van ‘n dissipel?

The Church exists to glorify God, to edify believers and to extend the gospel throughout all the nations and the languages of the world — Thomas Murphy, Pastoral Theology

Wat is die definisie van ‘n dissipel?

Daar word baie oor dissipels en dissipelskap geskryf, maar as jy teoloë vra wat ‘n dissipel is, kry jy geen eenstemmigheid nie. Jesus het vir ons ‘n beskrywing gegee van wat ‘n dissipel moet wees. Op ‘n paar plekke sê Hy: As jy my dissipel wil wees, moet jy … Kom ons kyk na ‘n paar voorbeelde:

 

  • Jy moet die Here bo alles liefhê

As iemand na My toe kom, kan hy nie my dissipel wees nie, tensy hy afstand doen van sy eie vader en moeder en vrou en kinders en broers en susters, ja, selfs van sy eie lewe (Lukas 14:25 – 26).

  • Leef in die lig van God se woord

As julle aan my woorde getrou bly, is julle waarlik my dissipels; en julle sal die waarheid ken, en die waarheid sal julle vry maak (Johannes 8:31 – 32).

  • Neem jou kruis op

As iemand agter My aan wil kom, moet hy homself verloën, elke dag sy kruis opneem en My volg (Lukas 9:23).

Jesus herhaal hierdie stelling by ‘n paar geleenthede. Let op die vooruitgang van die drie elemente: verloën … kruis opneem … volg.

  • Aanvaar die wil van die Vader

Die frase om jou kruis op te neem (Lukas 9:23) beteken dat ons die Vader se wil aanvaar – sonder voorwaardes. Dissipels aanvaar die wil van die Vader net soos Jesus dit gedoen het.

  • Gehoorsaam Jesus

Om Jesus te volg (Lukas 9:23), beteken dat ons op sy pad loop. Dit beteken ons is gehoorsaam aan die Een wat ons volg. Ons moet Hom gehoorsaam al is dit ongemaklik en kos dit ons iets.

  • Jy moet jou medegelowiges liefhê soos Jesus hulle liefhet.

Ek gee aan julle ‘n nuwe gebod: julle moet mekaar liefhê. Soos Ek julle liefhet, moet julle mekaar ook liefhê. As julle mekaar liefhet, sal die wêreld almal weet dat julle dissipels van My is (Johannes 13:34 – 35).

Liefde vir hulle medegelowiges is ‘n kenmerk van dissipels.

  • Sluit aan by Jesus se sending

My Vader word juis daardeur verheerlik dat julle baie vrugte dra, en my dissipels is … Julle het My nie uitgekies nie, maar Ek het julle uitgekies en julle aangestel om uit te gaan en vrugte te dra, vrugte wat sal hou. So sal die Vader aan julle gee wat julle ook al in my Naam vra (Johannes 15:8 en16).

Een van die kenmerke van dissipels is dat hulle by Hom in sy sending om die wêreld te verlos deur dissipels te maak, aansluit.

Leraars kan oor hierdie teksverse preek, maar dit sal geen verskil maak nie. Kerkleiers moet in die gemeente ‘n omgewing skep – akkurate inligting plus ondervindings – sodat mense die geleenthede het om dissipels te word.