JOHANNES DIE DOPER – ‘N NUWE TYD BREEK AAN EN DIE PAD WORD GELYKGEMAAK (6)

JOHANNES DIE DOPER – ‘N NUWE TYD BREEK AAN EN DIE PAD WORD GELYKGEMAAK (6) – Jan van der Watt

deel 3 – Jesus word gedoop

Jesus is ook deur Johannes gedoop. Daarvan lees ons op die volgende plekke:

  • Matt 3:13-17
  • Mark 1:9-11
  • Luk 3:21-22
  • Joh 1:31-34

 

  • Lees die gedeeltes. Watter ooreenkomste en verskille merk jy op?

i) Waarom moes Johannes Jesus doop?

Dit is die probleem. Lukas en Markus ignoreer die probleem, maar Matteus en Johannes verduidelik.

Waarom is Jesus gedoop?

Matteus se antwoord

Jesus het hom geantwoord: “Nogtans moet jy dit nou doen, want op hierdie manier moet ons aan die wil van God voldoen.”

Johannes se antwoord

(Johannes sê:) “Ek het self ook nie geweet wie Hy is nie, maar ek het gekom en ek doop met water sodat Hy aan Israel bekend gestel kan word.”

Dit is die wil van God en daarom moet dit gedoen word.

  • Deurdat Jesus gedoop is, kon mense sien wie die Messias is. Dit was die manier waarop God Hom geïdentifiseer het. En hoe? Deurdat die Heilige Gees op Jesus neergedaal het. 

    • ii) Die Heilige Gees en die doop

    Nadat Jesus gedoop is, het die Heilige Gees op hom neergedaal. Vergelyk die ooreenkomste en verskille in die vier dele (sien bo).

    Die volgende feite is belangrik:

    1. Die Heilige Gees het op Jesus gekom. Waarom is dit so belangrik, dink jy? Het Hy nie voor die tyd die Gees gehad nie? Hy was immers deur die Gees gebore.

    Die manier waarop God by hulle sal wees om hulle te help om die spesiale opdrag uit te voer, is deur sy Gees. Nêrens in die Nuwe Testament staan daar dat Jesus gesalf is nie, maar wat hier gebeur is baie dieselfde as wat met die ou konings en profete gebeur het.

    Hoewel die Heilige Gees natuurlik by Jesus was, dui sy doop die punt aan waar sy openbarebediening begin. Nou kan Hy deur die krag van die Gees God se spesiale opdrag aan Hom begin uitvoer. Van hierdie punt af lees ons ook alles wat Jesus gedoen het. Wat hy voor die tyd (sy kinderdae tot hier rondom sy 30e verjaardag) gedoen het, weet ons eintlik niks van nie. Die oomblik toe die Gees op Hom kom, begin Hy met dit waarvoor God Hom gestuur het, of anders gestel, van daardie oomblik is wat Hy doen vir ons belangrik. 

    Was Hy nie God self wat op sy eie kon optree nie? Hoe dink jy?

    ……………………………………………………………………………………………………..

    Ons vergeet dat Jesus nie alleen opgetree het nie, maar dat Hy as gestuurde van die Vader na die wêreld gekom het. Natuurlik het Hy die Heilige Gees gehad, maar die krag van God, spesisfiek vir sy opdrag en wat deur die Gees kom, is na sy doop in alles wat Hy doen sigbaar. Johannes sê daarom dat toe Jesus gedoop is, Johannes die Doper gesê het dat Hy nou weet wie die wêreld met die Gees gaan doop (Joh 1:33). Deur Jesus word die Gees dus op ʼn baie spesiale manier sigbaar. Dit gaan dus nie hier oor die algemene optrede van die Gees nie, maar oor die spesifieke bekragtiging deur die Gees vir spesifieke taak. Jesus tree dus altyd deur die krag van die Gees op. (Dit sê iets van die drie-eenheidsleer).

    Skrywer: Jan van der Watt

     



    Alle Paaie lei na Jesus: Die Vervulling van profesieë

    Alle Paaie lei na Jesus: Die Vervulling van profesieë – Adrio König

    Hoofstuk 7

    In die volgende paar artikels hanteer ons die vervulling van profesieë. Ons begin deur na verskillende standpunte te kyk.

    Die vervulling van profesieë

    7.1 Verskillende standpunte

    Die vervulling van profesieë het altyd baie aandag getrek, en bepaald nie die minste nie die profesieë wat in Jesus se lewe vervul is. Veral Matteus gaan uit sy pad uit om te toon hoeveel profesieë in Jesus se geboorte en aardse bediening vervul is. Net in die eerste vier hoofstukke behandel hy ses van hierdie profesieë.

    As ons vra hoe profesieë in die toekoms vervul gaan word, is dit natuurlik vanselfsprekend dat ons sal kyk na dié wat reeds vervul is. En daarmee kan juis Matteus ons baie help. Waarskynlik juis omdat hy Jode probeer oortuig dat Jesus die verwagte Messias is, werk hy doelbewus met profesieë uit die Ou Testament wat in Jesus vervul is. Kom ons kyk hoe hulle volgens Matteus vervul is, en dan ook na ’n paar uit Handelinge.

     

    Dit gaan hier oor twee vrae:

    • Word profesieë letterlik vervul?
    • Word ’n profesie net een keer vervul?

     

    Daar is naamlik mense wat baie sterk daarop staan dat profesieë letterlik vervul word, wat beteken dat ’n mens voor die tyd uit die profesie kan aflei hoe die vervulling sal lyk. Dit beteken dat ons uit profesieë wat nog nie vervul is nie, presies kan aflei hoe dit sal gebeur. Ons kan as ’t ware vooraf ’n prentjie teken van hoe Jesus weer sal kom, en presies wat dan alles sal gebeur. Hierdie mense teken dan ook inderdaad detailprentjies van hoe die toekoms sal lyk, byvoorbeeld hoe die antichris sal optree, hoe die groot verdrukking sal verloop, hoe Christus tydens die duisend jarige vrederyk vanuit Jerusalem oor die hele aarde sal regeer. Hulle uitgangspunt is dat dit duidelik uit die Nuwe Testament blyk dat al die profesieë oor Jesus letterlik vervul is. Daaruit lei hulle dan af dat dit ook sal gebeur met alle profesieë wat nog vervul moet word.

     

    Hierdie standpunt dat profesieë letterlik vervul word, het inderdaad ’n bepaalde waarde. Die waarde is dat dit die sogenaamde vergeesteliking van profesieë afwys. Alreeds in die vroeë kerk was daar die oortuiging dat elke uitspraak in die Bybel eintlik meer as een betekenis het. Origenes van Alexandrië was oortuig dat daar in elke Skrifgedagte ’n dieper betekenis is. Die letterlike betekenis is vir die ongeleerdes, en dis genoeg vir hulle om salig te word. Maar die gekultiveerde gelowige soek dieper, en kry dan die geestelike of dieper betekenis. Eintlik het hy soms selfs drie verskillende betekenisse onderskei: die letterlike, die morele, en die geestelike betekenis.

     

    Hierdie beginsel is natuurlik oop vir erge subjektiwiteit. Daar is immers nie duidelike reëls oor hoe ’n mens die geestelike betekenis sou kon vasstel nie. Ons het al almal afgekom op die vreemde maniere wat sommige Christene het. In alles wat rooi is in die Ou Testament sal hulle die “geestelike betekenis” of die “dieper betekenis” van die kruis en die bloed van Jesus “ontdek”, soos die rooi tou van Ragab.

     

    Teen hierdie manier van interpretasie moet ons inderdaad standpunt inneem, eenvoudig omdat ons nie in die Bybel enige gronde hiervoor kry nie. Tereg beklemtoon die dispensasionaliste dan: Letterlike interpretasie, waaronder hulle verstaan die gewone, alledaagse betekenis wat ons aan woorde gee.

     

    Maar dit beantwoord nie regtig die vraag hoe profesieë vervul word nie. Daarvoor moet ons eenvoudig gaan kyk hoe spesifieke profesieë alreeds in die tyd van die Nuwe Testament vervul is. Ons vraag sal wees of ons bloot uit die profesie soos ons dit in die Ou Testament het, sou kon aflei hoe die vervulling sou lyk. Onthou ons het twee vorms van die profesie: die profesie self in die Ou Testament, en die vervulling in die Nuwe. Maar as ons geleef het in die tyd van die Ou Testament, vóór die vervulling in die Nuwe Testament, en toe ons die profesie gelees het, sou ons kon aflei hoe die vervulling uiteindelik in die Nuwe sou lyk?

     

    In die volgende aantal artikels gaan ons na spesifieke vervullings kyk.

     

    AllePaaieLeinaJesusMense wonder dikwels oor verskeie aspekte van die Christelike geloof. Alle Paaie lei na Jesus (2010) deur prof Adrio König is ʼn baie nuttige naslaanwerk wat ʼn betrokke en uitdagende verduideliking bied van die die middelpunt van ons geloof: Jesus Christus.

    Bybelkennis gaan gereeld gedeeltes uit hierdie bron publiseer. Ons dank aan prof König en CUM vir hierdie vergunning.

    Vir meer inligting oor CUM, besoek gerus hulle webblad by www.cumuitgewers.co.za

     

     

     

    Skrywer:Prof Adrio König



    Laat sy liefde jou lei: Praat tog met my!

    Laat sy liefde jou lei: Praat tog met my! – Milanie Vosloo

    Daar’s tye wat ons nie met God kan praat nie. En dan is daar dié tye wat ons ernstig op ons knieё met Hom worstel en dit vir ons voel of Hy eenvoudig doof vir ons geword het. Dis dan wanneer ons maar net kan bid:

    “Here, ek hoor U nie! Ek soek bakens, padwysers, vuurtorings, antwoorde, rigting, leiding in die Bybel, mense se raad, toevallige gebeure … en ek weet nie of dit U is wat praat nie. Leer my U hóór. Help my om u hand ráák te vat. Loop u pad met my, Here. Laat ek U sonder voorbehoud volg – vertrou – al verstaan ek niks. Wys my u leidrade. Wys my u rigting. Leer my U sién. Leer my die alfabet van u taal.”*

    Weet vandag: God hóór elke versugting en soeke van jou hart. Hy het ook al die antwoorde wat jy nodig het. Jy hoef geensins spesiale kennis oor God te hê om Hom te hoor nie, want jy het die Gees in jou. En die Gees van Christus salf jou en bind jou oomblik vir oomblik aan die waarheid vas.

    Onthou vandag: Julle almal (ja, ook jý,!) weet egter waaroor dit gaan, want julle dra die salwing van die Heilige Gees. 1 Joh 2:20

    Dankie dat u waarheid my begelei, Vader-God

    * Uit: In Gesprek met God, Milanie Vosloo Uitgegee deur Lux Verbi BM

     

     

    Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

    Vir meer inligting oor CUM, besoek gerus hulle webblad by www.cumuitgewers.co.za 

     

    milanie_boeke_advertensie

     

      Skrywer: Milanie Vosloo

     



    Alle Paaie lei na Jesus: Die gesag van die Septuagint

    Alle Paaie lei na Jesus: Die gesag van die Septuagint – Adrio König

    6.7 Die gesag van die Septuagint

    Die kwessie van die Septuagint het nou telkens na vore gekom. Kom ons kyk in meer besonderhede daarna.

    • Die vroeë Christene het die Septuagint verkies bo die oorspronklike Hebreeuse teks.
    • Die Septuagint was eerder ’n verwerking van die oorspronklike Hebreeus as ’n noukeurige vertaling. En juis dit was een van die redes waarom die Christene dit verkies het. Die afwykings in die Septuagint het hulle saak baie goed gedien.
    • Amos 9:11-12 en Psalm 16:8-11 is klassieke voorbeelde. In beide gevalle bou die skrywers van die Nuwe Testament hulle hele argument op die teks van die Septuagint.
    • Hulle het die Septuagint so effektief gebruik in hulle argumente met die Jode dat die Jode later hierdie vertaling verwerp het wat hulle self van die Ou Testament gemaak het.
    • ’n Saak waaraan ons nie aandag gegee het nie, is dat daar meer boeke in die Septuagint is as in die oorspronklike Hebreeus (ons Ou Testament). Daar is omtrent agt sulke boeke en ook toevoegings tot sekere boeke soos Jeremia en Daniël. Die meeste van hierdie boeke is geskiedenisboeke of wysheidsboeke. Die geskiedenisboeke dek hoofsaaklik die byna 400 jaar tussen ons Ou Testament en ons Nuwe. Dit is ’n waardevolle toevoeging tot ons kennis omdat heelwat oortuigings wat in hierdie eeue na vore gekom het, later ’n belangrike rol speel in die Nuwe Testament, soos die prominensie van bose magte.
    • Dit alles het natuurlik radikale implikasies vir ons siening van die inspirasie en gesag van die Ou Testament. Die feit dat die skrywers van die Nuwe Testament die Septuagint so vrylik gebruik het en selfs bo die Hebreeus verkies het, beteken dat hulle dit op presies dieselfde vlak as die oorspronklike Hebreeus aanvaar het as die Woord van God.
    • Trouens waarna ons nie gekyk het nie, is dat hulle selfs uit boeke wat nie in ons Ou Testament is nie, aangehaal het (Jud v 14-15) en dan op presies dieselfde wyse as hulle aanhalings uit die Ou Testament.
    • As ons dit alles regtig ernstig neem, kan ons nie woordinspirasie aanvaar nie. Woordinspirasie beteken dat elke woord in die Bybel geïnspireer is. As die vroeë Christene geglo het elke woord is geïnspireer, kon hulle nooit die Septuagint as die Woord van God aanvaar het nie.
    • Waarskynlik het hulle wel geglo dat die boodskap geïnspireer is, want wat hulle uit die Septuagint gebruik, klop met wat hulle oor Jesus en oor die boodskap van die Ou Testament geglo het.
    • Kom ons kyk net weer na ons twee voorbeelde. Hulle aanvaar die vreemde vertalings van sekere tekste wat makliker op Jesus as die Messias toegepas kan word. Maar dit is omdat hulle klaar geglo het Jesus is die Messias, en omdat daar in elk geval baie ander Messiaanse tekste in die Ou Testament was.
    • En hulle het ook dankbaar gebruik gemaak van die tekste wat in die Septuagint as sendingtekste vertaal is, maar dis weer omdat hulle klaar geglo het dat die evangelie vir die hele wêreld bedoel is en daar in elk geval duidelike uitsprake by die profete was dat die Here wil hê dat alle nasies Hom sal dien.

     

    Ons kan die vroeë Christene dankbaar hierin volg: Nie spesifiek elke woord nie, maar die boodskap van die Bybel is die woord van God. En as ons nou terugkyk na hierdie hoofstuk, staan Jesus in die middelpunt. Dit is Hom en sy boodskap wat die skrywers van die Nuwe Testament in die Oue gesoek en gekry het.

     

    AllePaaieLeinaJesusMense wonder dikwels oor verskeie aspekte van die Christelike geloof. Alle Paaie lei na Jesus (2010) deur prof Adrio König is ʼn baie nuttige naslaanwerk wat ʼn betrokke en uitdagende verduideliking bied van die die middelpunt van ons geloof: Jesus Christus.

    Bybelkennis gaan gereeld gedeeltes uit hierdie bron publiseer. Ons dank aan prof König en CUM vir hierdie vergunning.

    Vir meer inligting oor CUM, besoek gerus hulle webblad by www.cumuitgewers.co.za

     

     

     

    Skrywer:Prof Adrio König