Ambition is like hunger; it obeys no law but its appetite. -Josh Billings,

‘n Nuwe Kategismus: Vraag 14

Vraag:

Het God ons so gemaak dat dit vir ons onmoontlik is om sy wet te onderhou?

Antwoord:

Nee, maar as gevolg van die ongehoorsaamheid van ons eerste ouers, Adam en Eva, het die hele skepping in sonde verval.  Ons is almal in sonde en skuld gebore, korrup/bedorwe van aard en nie in staat om God se wet te onderhou nie. [Onderstreepte gedeeltes is die antwoord vir kinders.]

Teksvers:

Deur een mens het die sonde in die wêreld gekom en deur die sonde die dood, en so het die dood tot al die mense deurgedring, omdat almal gesondig het (Romeine 5:12)

Kommentaar:

Ek glo dat God aan die begin die hemel en die aarde gemaak het met die verskeidenheid inwoners. Laastens, en uitstaande onder sy verbasende verskeidenheid van skepsels van sy almagtige mag en oneindige vaardigheid … het Hy die mens gemaak en hom meester van hierdie wêreld gemaak. Man en vrou het Hy hulle gemaak, na sy eie beeld, eerlik, onskuldig en heilig; die mens het die vermoë om sy vrygewige Skepper te dien en te verheerlik … ek glo die mens het nie lank in hierdie heilige en gelukkige omstandighede geleef nie; maar, oorgelaat aan die vryheid van sy eie wil het hy die wet  wat sy Skepper en Here gemaak het, oortree. Gevolglik verval hy in ‘n staat van skuld, verdorwenheid en vernietiging. En, omdat hy nie net die natuurlike, maar ook die federale hoof en verteenwoordiger van sy ongebore nageslag was nie, het sy hele nageslag in hom gesondig en saam met hom geval. Die skuld van sy eerste sonde is oorgedra en ‘n verdorwe natuur volg vir almal wat sy nageslag is. Daarom is alle mense van nature kinders van die toorn, teen alles wat geestelik goed is, geneig tot die bose, dood in die sonde onder die vloek van die regverdige wet … Uit hierdie toestand is daar geen verlossing behalwe deur Jesus Christus, die tweede Adam, nie.

Hierdie kommentaar is deur Abraham Booth (1734 – 1806), ‘n Engelse Baptiste leraar, geskryf. Hy was pastor van die Prescot Street kerk in Whitechapel, Londen, vir 35 jaar. Hy was ook die stigter van wat vandag die Regents Park College vir die opleiding van leraars in Oxford is. Sy bekendste werk is The Reign of Grace.

Hierdie kommentaar kom uit  “Confession of Faith” in Works of Abraham Booth: Late Pastor of the Baptist Church, Volume 1 (London: Button, 1813), xxxi–xxxii.

Verdere Leesstof:

 “The Fall” en “Inability” in Concise Theology, deur J. I. Packer.

Gebed:

Ons Vader, as ons u beskrywing van die menslike natuur lees, is ons seker dit is waar, want U het die mense sedert sy sondeval gesien, en U is in u hart bedroef oor hom … dit is vir ons ‘n wonder dat U hoegenaamd na die mens kyk, die haatlikste voorwerp in die skepping, want hy het u Seun doodgemaak, omdat hy herhaaldelik in opstand teen u regverdige en heilige wet kom. Tog, daar is niks wat vir U meer plesier verskaf as om die mens te sien nie, want Jesus was ‘n mens; sy helder heerlikheid bedek al ons sondes; die reinheid en volmaaktheid van sy gehoorsaamheid skyn soos die son te midde van donkerte. Om sy onthalwe is U tevrede en woon in ons … En nou, Here,  vir die paar dae wat nog vir ons oorbly op aarde, laat ons uitroep: “Kyk, die Lam!” Leer ons harte om altyd van u liefde bewus te wees en ons lippe – stel hulle in staat om met U hulp die verhaal van die kruis na die beste van ons vermoë te verduidelik. … Here, vergewe ons ons sondes; Here, heilig ons; Here, lei ons in moeilike tye; Here, voorsien aan ons behoeftes. Die Here leer ons; die Here maak ons volmaak; die Here vertroos ons; die Here maak ons gereed  vir ons ontmoeting vir die wederkoms van sy Seun uit die hemel.

Hierdie gebed is deur Charles Haddon Spurgeon (1834 – 1892) geskryf. Hy was ‘n Engelse Baptiste prediker. Hy word die pastor van New Park Church (later die Metropolitan Tabernacle) in Londen toe hy net 20 jaar oud was. Hy het gereeld vir meer as 10 000 mense gepreek sonder enige klankversterking. Hy het baie geskryf. Toe hy dood is het hy amper 3 000 preke gepreek en 49  volumes – kommentare, gesegdes, liedere en dagstukke – geskryf.

Hierdie gebed kom uit: “Prayer VII: Let All the People Praise Thee” in Prayers from Metropolitan Pulpit: C. H. Spurgeon’s Prayers (New York, Revell, 1906), 43–47.

Copyright © 2012 by Redeemer Presbyterian Church

We encourage you to use and share this material freely—but please don’t  charge money for it, change the wording, or remove the copyright information. Ek het slegs die gedeeltes vertaal.

JOHANNES DIE DOPER – ‘N NUWE TYD BREEK AAN EN DIE PAD WORD GELYKGEMAAK (4)

deel 2 – Johannes se preke

Johannes die Doper het die pad vir Jesus voorberei. Dit het hy gedoen deur sy kragtige prediking en deur mense te doop.

i) Wat het Johannes gepreek?

Die samevatting en tema van sy preke was: “Bekeer julle en laat julle doop en God sal julle sondes vergewe” (Mk 1:4). Hulle moes dus van hulle sondes ontslae raak en hulle voluit met God assosieer. Dit gaan oor bekering – doop – vergifnis.

Lees Mat 3:7-12 saam met Luk 3:9-14 vir ‘n opsomming van Johannes se prediking.

• Hy preek veral oor Jesus:

  Johannes het wel baie te sê gehad oor God se oordeel wat aan die kom is (Mat 3:7-8), maar sy hooftaak was om oor Jesus te getuig, met ander woorde, om die pad gelyk te maak vir die koning wat kom. Kom ons kyk wat sê hy alles oor Jesus (dieselfde opmerkings in ander NT boeke word nie hier herhaal nie:

  Mat 3:3

  Maak die pad vir die Here gereed, maak die paaie vir Hom reguit.

  Mat 3:11

  Hy wat ná my kom, is my meerdere

  Mat 3:11

  en ek is nie eers werd om sy skoene uit te trek nie.

  Mat 3:11

  Hy sal julle met die Heilige Gees en met vuur doop.

  Mat 3:12

  Hy het sy skop in sy hand en Hy sal sy dorsvloer deur en deur skoonmaak. Sy koring sal Hy na die skuur toe bring, maar die kaf sal Hy met ’n onblusbare vuur verbrand

  Mat 3:14

  Ek moet eintlik deur U gedoop word en U kom na my toe?

  Joh 1:29

  Dáár is die Lam van God wat die sonde van die wêreld wegneem!

  Joh 1:30

  Ná my kom daar ’n Man wat my vóór is, want Hy was voor my reeds daar

  Joh 1:31

  Ek het self ook nie geweet wie Hy is nie, maar ek het gekom en ek doop met water sodat Hy aan Israel bekend gestel kan word

  Joh 1:32-34

  Ek het duidelik die Gees soos ’n duif uit die hemel sien kom, en Hy het op Hom gebly. ³³Ek het self ook nie geweet wie Hy is nie, maar God wat my gestuur het om met water te doop, het vir my gesê: ‘Die Een op wie jy die Gees sien kom en bly, dit is Hy wat met die Heilige Gees doop.’³⁴Ek het dit self gesien en daarom getuig ek: Hy is die Seun van God.

  Joh 3:27-30

   

  Vir ons is dit maklik om te sê Jesus is die Messias. Maar destyds is die Messias verwag, maar niemand het geweet wie hy is nie. Hy moet eers uitgeken word. Maar hoe ken ‘n mens die Messias uit. Daar was kriteria: a) Hy moes lyk soos die Skrifte sê hy sou lyk. Met ander woorde, hy moes die profesieë vervul. b) Hy moes wys hy is met die krag van God vervul deur wonderlike dinge te doen. As die lewe van die persoon met die Skrifte klop en wat hy doen klop met die teenwoordigheid van die krag van God, dan moet ‘n mens begin om te oorweeg of die persoon nie die Messias is nie. Ons sien in die NT hoeveel maal daar na Jesus verwys word wat die OT se voorspellings waar maak. Dit wys Hy is die een wat die Skrifte voorspel het. Die wonders wat Hy doen, wys God is aan sy kant.  As Jesus vir Johannes in Mat 11:4-6 antwoord, dan verwys Hy na wonders wat in die OT voorspel word – dit is wat gaan gebeur as die Messias kom.

   

  Volgende keer antwoord ons die vraag: Vir wie het Johannes gepreek?

   

  Skrywer: Prof Jan van der Watt

   

Alle Paaie lei na Jesus: Uit watter Ou Testament haal die Nuwe Testament se skrywers aan? (1) – Adrio König

6.6 Uit watter Ou Testament haal die Nuwe Testament se skrywers aan?

Natuurlik lyk dit na ’n snaakse vraag. Daar is tog net een Ou Testament. Nee, dis nie regtig so nie. Daar is eintlik twee:

• Die Hebreeuse Ou Testament wat ook die Masoretiese teks genoem word. Dis uit hierdie Hebreeuse Ou Testament wat ons vertaling gemaak is.
• Die Griekse vertaling van die Ou Testament, ook die Septuagint of LXX genoem.

Israel het vir eeue net die oorspronklike Hebreeuse teks gehad. Daar is wel van die latere boeke soos Daniël wat in ’n later vorm van Hebreeus, Aramees, geskryf is, die taal wat Jesus waarskynlik ook gebruik het, wat die omgangstaal in sy tyd was. Maar Aramees was maar net ’n later vorm van Hebreeus.

6.6.1 Die ontstaan van die Septuagint (die Griekse vertaling)

Maar in die paar eeue voor die geboorte van Jesus het die Jode erg versprei rondom die Middellandse See. Gaandeweg het hulle al meer Grieks gepraat wat die algemene taal was, en veral baie Joodse kinders kon later glad nie meer Hebreeus/Aramees praat nie. Dit is dus nie vreemd dat die Jode toe so teen 200 jaar voor Christus besluit het om ’n Griekse vertaling van hulle Hebreeuse Ou Testament te maak nie. Onthou net hulle het nooit van die Ou Testament gepraat nie, en hulle doen dit vandag nog nie omdat hulle nie die Nuwe Testament aanvaar het nie. Baie geleerdes verkies dan ook om liewer van die “Hebreeuse Bybel” te praat.

Daar is interessante verhale oor die ontstaan van hierdie Griekse vertaling. Die “mooiste” een is dat die Joodse koning van destyds presies 72 vertalers aangestel het, ses uit elk van Israel se twaalf stamme. Hulle het elkeen in ’n aparte kamer gaan sit, en nooit enige kontak met mekaar gehad nie. Hulle het elkeen die hele Ou Testament vertaal. Toe hulle klaar was en hulle vertalings vergelyk, was dit presies dieselfde tot op elke woord.

Daar is ook mense onder ons wat vandag nog so magies, “tooragtig,” met die Bybel omgaan. Hulle lei allerlei geheime kodes uit die Bybel af waarin dan die eintlike boodskap sou wees. Maar die Bybel se boodskap is wonderlik genoeg. Niemand hoef of kan dit wonderliker maak nie.

Dit is na aanleiding van hierdie oortuiging dat daar 72 vertalers was dat hierdie vertaling die Septuagint of LXX genoem word. Septuagint is 70 in Latyn, en LXX is 70 in die Latynse telwyse.

Mense wonder dikwels oor verskeie aspekte van die Christelike geloof. Alle Paaie lei na Jesus (2010) deur prof Adrio König is ʼn baie nuttige naslaanwerk wat ʼn betrokke en uitdagende verduideliking bied van die die middelpunt van ons geloof: Jesus Christus.

Bybelkennis gaan gereeld gedeeltes uit hierdie bron publiseer. Ons dank aan prof König en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Prof Adrio König

Our meat and our drink is to do the will of him who sent us – C. H. Spurgeon

Musiek in die Ou Testament

Musiek was ‘n integrale deel van die kultuur van die antieke Nabye-Ooste – ook die kultuur van die Israeliete. Dit geld reeds van lank voor die tyd van Dawid. Argeologiese opgrawings het onder andere figuurtjies wat verskillende musiekinstrumente bespeel en ratels, fluite en simbale opgelewer.

Daar is tekeninge van mense wat dans en allerhande musiekinstrumente bespeel, gevind. In Megiddo is vloerteëls ontdek waarop soldate, jagters, dansers en ‘n vrou wat ‘n harp bespeel, gekry is. Reeds in Genesis 4:21 lees ons van Jubal die stamvader van dié wat op die lier en fluit speel.

Onder watter omstandighede lees ons van musiek in die Ou Testament?

• Oorlog

In Rigters 7 lees ons van Gideon se geveg teen die Midianiete. Hy gee aan elke groep ‘n ramshoring. Die teken vir die aanval was dat elke groep op die ramshoring sou blaas en erdekruike breek. Die vyand vlug. Nadat die Here die Israeliete by die Rietsee gered het, lees ons dat Mirjam ‘n tamboeryn gevat en al die vroue het met tamboeryne agternageloop en gedans (Eksodus 15). Nadat Dawid die Filistyne verslaan het, het die vroue van al die dorpe van Israel uitgegaan om te sing, en die danseresse het koning Saul tegemoet gegaan met tamboeryne en driesnarige musiekinstrumente (1 Samuel 18:6).

• Aan die koninklike hof

Musiek was ook algemeen aan die koninklike hof. Ons lees van Dawid wat vir Saul op sy lier gespeel het wanneer die boosaardige gees op Saul was (1 Samuel 16:23). Die bejaarde Barsillai sê vir Dawid toe dié hom nooi om Jerusalem toe te kom; Kan ek nog die stem van sangers en sangeresse waardeer? (2 Samuel 19:35). As Amos God se oordeel oor die volk uitspreek, kla hy die ryk manne aan: Julle maak liedjies vir die harp. Julle dink vir julle  musiekinstrumente uit soos Dawid (6:5).

• Profesie

Ons lees dikwels dat profesie en musiek saamgaan. Nadat Samuel vir Saul gesalf het, vertel hy vir Saul wat hy op sy terugreis kan verwag, onder andere dat hy op ‘n groep profete sal afkom: Hulle sal van die hoogte af gaan onder begeleiding van tamboeryne, fluite en liere (1 Samuel 10:5). In 2 Konings 3:15 lees ons: Terwyl die lierspeler gespeel het, het die mag van die Here vir Elisa in besit geneem.

• In die tempel

Musiek staan sentraal in die aanbidding van die Here by die tempel. Hiervan getuig die psalms. In die psalms word dikwels verskillende musiekinstrumente genoem. Ook kry ons gereeld oproepe in die psalms om te sing: Sing, en slaan die tamboeryn, laat hoor die lieflike klanke van die lier en die harp (Psalm 81:3). In die opskrifte van die psalms kry ons ook aanduiding van musiek: Vir die koorleier: Op die wysie van “Lelies.” Van Dawid (Psalm 69).

• Ander

Musiek was egter ook deel van die alledaagse lewe. Toe Jakob van Laban gevlug het, sit Laban hom agterna en sê vir Jakob: Ek sou jou laat vertrek het met ‘n fees en met liedere, met tamboeryne en met liere (Genesis 31:27). In Jesaja 16:10 – 11 lees ons: In die wingerde word nie meer gesing en gejubel nie.

Hierdie is natuurlik nie ‘n volledige oorsig nie, maar is voldoende om te wys dat musiek en sang deel was van die lewe van Israel. Sing en juig ons nog oor die goedheid van ons Here?