Sermons are dangerous things. None goes out of church as he came in, but either better or worse. —George Herbert

Het ons ons godsdiens afgewater? Die kerk (2)

Daar het die afgelope aantal jare heelwat boeke verskyn waarin gesê word dat die kerk sy boodskap afgewater het. (Michael Horton se  Christless Christianity en David Platt se Follow Me. A call to die; a call to live is goeie voorbeelde hiervan) Ons aanvaar sekere waarhede en bid die sondaar se gebed en glo alles is reg – ons is nou Christene. Maar dit is nie waar nie.

Ons het die nou band tussen Jesus Christus en die kerk gesien. Maar: Wat is die kerk? Meeste mense sal onmiddellik wys na ‘n gebou. Ons gaan kerk toe – na die gebou.

Ons gaan selfs so ver om kerke te klassifiseer volgens die programme wat hulle aanbied. Maar geboue en programme is verbruikersgoedere wat gebruik word om kliënte te lok.

In die Nuwe Testament sien ons nooit dat die kerk as ‘n fisiese gebou beskryf word nie. Ons lees wel dat die kerk van Christus ‘n liggaam is met baie lede – ‘n gesin van broers en susters wat lief is vir mekaar. Die kerk is mense wat Jesus Christus dag vir dag met mekaar deel. Die model is Jesus Christus en sy dissipels – Hy het hulle liefgehad, gedien, onderrig, bemoedig, reggehelp en saam met hulle gereis. Net so moet die volgelinge van Jesus Christus langs mekaar leef. Hulle gee om vir mekaar; hulle het mekaar lief; hulle eer mekaar; hulle onderrig, vergewe, motiveer en bou mekaar op; hulle huil en lag saam … Hierdie is nie die beeld van mense wat na ‘n gebou vol programme kom nie. Dit is eerder die beeld van mense wat besluit het om hulle lewens neer te lê om mekaar lief te hê.

Die kerk is die gemeente van Jesus Christus wat mekaar liefhet en verlang dat hulle in hulle kennis van God sal groei. Die kerk is ‘n gemeenskap, maar ‘n andersoortige gemeenskap. Volgende keer kyk ons daarna.

The real measure of our wealth is how much we’d be worth if we lost all our money. —John Henry Jowett

Het ons ons godsdiens afgewater? Die kerk (1)

Daar het die afgelope aantal jare heelwat boeke verskyn waarin gesê word dat die kerk sy boodskap afgewater het. (Michael Horton se  Christless Christianity en David Platt se Follow Me. A call to die; a call to live is goeie voorbeelde hiervan) Ons aanvaar sekere waarhede en bid die sondaar se gebed en glo alles is reg – ons is nou Christene. Maar dit is nie waar nie.

Kan ek aan Jesus Christus behoort, maar los van die kerk staan? Volgens die Bybel is dit onmoontlik. Dit beteken nie dat as ek by die kerk aansluit ek ‘n Christen is nie.

As ek saam met Jesus Christus lewe, lewe ek saam met sy kinders. Ek kan nie ‘n dissipel van Jesus Christus wees sonder om my aan sy kinders/familie toe te wy nie. Ons lees tog dat die kerk die bruid en liggaam van Jesus Christus is. Hoe kan ons nou vir Jesus Christus liefhê sonder om ook sy bruid en liggaam lief te hê?

Kyk net na Saulus op pad na Damaskus om die Christene daar te vervolg. Daar sien hy ‘n helder lig en hoor ‘n stem: Saul, Saul, waarom vervolg jy My? Toe Saulus vra wie dit is wat praat, kom die antwoord: Ek is Jesus … Dit is vir My wat jy vervolg. Saulus vervolg die kerk, maar Jesus sê dat hy Hom vervolg.

Dit is baie duidelik dat daar ‘n baie noue verband tussen Jesus Christus en die kerk is. Maar wat is die kerk? Daarna kyk ons volgende keer.

When we deal seriously with our sins, God will deal gently with us. —C.H. Spurgeon

Het ons ons godsdiens afgewater? God se wil vir my lewe (2).

Daar het die afgelope aantal jare heelwat boeke verskyn waarin gesê word dat die kerk sy boodskap afgewater het. (Michael Horton se  Christless Christianity en David Platt se Follow Me. A call to die; a call to live is goeie voorbeelde hiervan) Ons aanvaar sekere waarhede en bid die sondaar se gebed en glo alles is reg – ons is nou Christene. Maar dit is nie waar nie.

Belangriker as om sy wil te soek, is om Hom te ken en te vertrou. Ons soek formules en allerhande slim antwoorde om God se wil te bepaal. Maar wat verwag God van ons?

Dat ons Hom sal ken en vertrou. Dit beteken dat ons na Hom toe sal gaan en tyd met Hom spandeer. Luister na sy Woord; wees gehoorsaam aan Hom. Dan besef ons dat die wil van God nie ‘n padkaart is wat ons moet ontdek nie … dit is ‘n verhouding met Hom. As ons so naby aan Hom leef, sal ons nooit hoef te vra wat sy wil vir my is nie. Die doel is dus nie om te vra wat God se doel vir my lewe is nie, maar om dag vir dag saam met Hom te loop.

God openbaar sy wil vir ons in sy Woord. Gaan dan na al die nasies toe en maak die mense my dissipels; doop hulle in die Naam van die Vader en die Seun en die Heilige Gees en leer hulle om alles te onderhou wat Ek julle geleer het (Matteus 28:19 – 20). Dit is tog duidelik. Ons kry hierdie selfde basiese benadering in ander Skrifgedeeltes. Soos U My na die wêreld toe gestuur het, het Ek hulle ook na die wêreld gestuur (Johannes 17:18)

Ons moenie God se wil vind nie – dit is duidelik aan ons gegee. Ons moet dit net uitvoer. Ons moet sy getuies wees. Ons onmiddellike reaksie is dat ons dit nie kan doen nie. Net voor sy hemelvaart sê Jesus vir sy dissipels: Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en in Samaria en tot in die uithoeke van die wêreld (Handelinge 1:8). God se wil is baie duidelik: gaan getuig – vertel vir die wêreld wie Jesus Christus is, wat Hy gedoen het en hoe Hy mense verlos.

Lukas vertel agt maal dat mense met die Heilige Gees vervul is en elke keer is die gevolg dat daardie mense begin praat het. As ek ander mense van die wonder van die evangelie van Jesus Christus vertel, doen ek die wil van God.

It is not so much our friends’ help that helps us as the confident knowledge that they will help us. –Epicurus, filosoof (c. 341-270 BCE)

Het ons ons godsdiens afgewater? God se wil vir my lewe (1)

Daar het die afgelope aantal jare heelwat boeke verskyn waarin gesê word dat die kerk sy boodskap afgewater het. (Michael Horton se  Christless Christianity en David Platt se Follow Me. A call to die; a call to live is goeie voorbeelde hiervan) Ons aanvaar sekere waarhede en bid die sondaar se gebed en glo alles is reg – ons is nou Christene. Maar dit is nie waar nie.

Wat is die mees algemene vraag wat Christene vra? Wat is God se wil vir my lewe? Hoe weet ek wat God se wil vir my lewe is?

Dit klink so asof God se wil op een of ander manier verlore geraak het. Nou begin ons allerhande metodes uitdink om God se wil te ontsyfer. Ons maak die Bybel oop en druk ons vinger op ‘n vers en siedaar ons het die antwoord. Of ons soek vir ‘n wonderteken – soos Moses se brandende bos of Saulus se verblindende lig. Sommige voel dat God deure vir ons oop- en toemaak en ons moet dit so aanvaar.

Maar God het nooit sy wil vir ons verberg nie. Die probleem is dat ons dikwels nie so seker is dat ons wil gaan waarheen Hy ons lei nie – sê nou net Hy lei my na ‘n verskriklike plek. Daarom is ons bang om te sê: God, ek is gewillig om te gaan waarheen U my ook al lei. Hy is tog ons Vader; ons weet mos hy maak nie foute nie; ons weet tog Hy soek net die beste vir ons.

Die antwoord is om my wil aan sy wil oor te gee. Dit is wat dit beteken om ‘n dissipel te wees. Maar hoe doen ons dit? Daarna gaan ons die volgende keer kyk.