NEHEMIA – WYSHEID (2)

“The Bible does not say we should aim at numbers but rather urges us faithfully to proclaim God’s message in the boldness of the Holy Spirit. This will build God’s church God’s way.” ~ Jim Cymbala

Nehemia – Wysheid (2)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #4: Wysheid … bevorder jou leierskap

Nehemia se lewe van wysheid

Daar is ‘n paar tekens wat Nehemia se wysheid beskryf.

Nehemia soek antwoorde. Ek het by hulle navraag gedoen (1:2).’n Leier het inligting nodig as hy wyse besluite wil neem. Eers inligting en dan optrede.
Nehemia vra advies by God. Hy vas en bid. Hy besef dat hy God se krag, sterkte, hulp wysheid nodig sou hê. Daarom bid hy tot die God van die hemel.
Nehemia was geduldig. Drie maande lank bid en beplan hy. Moenie oorhaastige besluite neem nie. Dink, bid, vra advies.
Nehemia was versigtig. Ek was baie bang (2:2). Hoe oorwin jy vrees? Deur wysheid. Wysheid is versigtig; die aanvaar nie sonder meer iets nie. Nehemia het baie voorregte geniet, maar hy het ook die koning geken. Daarom druk hy sy kommer op ‘n respekvolle manier uit. Ondervinding maak hom versigtig.
Nehemia was voorbereid. Stuur my na Juda (2:5). Hy het reeds beplan en gebid. Toe die regte oomblik aanbreek, tree hy met wysheid op. ‘n Wyse leier weet presies wat hy wil sê en wanneer. Hy berei selfs voor vir die moontlike vrae en besware.
Nehemia soek geregtigheid. Van God se kinders in Juda is sleg behandel. Van die ryk mense vra selfs rente op lenings. Wat doen Nehemia? Na ek dit oorweeg het, het ek die skuld op die vooraanstaande burgers en die ampsdraers gelê en vir hulle gesê: “Julle is besig om julle volksgenote uit te buit!” (5:7). Let op: kry die feite; dink daaroor; tree dan op.
Nehemia soek oplossings. Die muur is herbou. Daar was egter maar min inwoners. Nehemia kry die register van die mense wat eerste teruggekom het. My God het my die besluit laat neem (7:5). Die lot het bepaal watter mense na Jerusalem moes terugkeer (11:1).

Wat was die geheim van Nehemia se sukses as leier? Ons weet dat hy die Skrif geken het en gehoorsaam was aan wat die Skrif gesê het. Wysheid begin met die dien van die Here; wie die Heilige ken, het werklik insig (Spreuke 9:10). Wat kan jy doen om ook ‘n wyse leier te word?

Verlang na wysheid. God vra vir Salomo wat hy van Hom wil hê. Wat vra Salomo? Insig (1 Konings 3:5 en 9). Dit gaan goed met die mens wat wysheid gevind het, wat insig as sy deel ontvang het, want dit bring meer winste in as silwer en lewer ‘n groter opbrengs as goud (Spreuke 3:13 – 14).
Pleit vir wysheid. God beloof wysheid as jy daarvoor vra. Hoe vra jy vir God? Deur voortdurende gebed.
Soek wysheid. God gee wysheid, maar waar kan ons dit kry? Dit is die Here wat wysheid gee, uit sy mond kom die kennis en die insig (Spreuke 2:6). Grawe in die Bybel en jy sal baie wysheid daar kry.
Versorg wysheid. Wysheid moet gereeld gevoed en versorg word – lewenslank. Alles verander en daarom moet jy voortdurend wysheid soek.

Volgende keer gaan ons na ‘n volgende kenmerk van ‘n leier kyk: Beplanning.

NEHEMIA – MOED (3)

The conclusion I dread is not “So there’s no God after all,” but “So this is what God is really like. Deceive yourself no longer.” – C. S. Lewis

Nehemia – Moed (3)

Kenmerk #3: Moed – verstewig jou leierskap

God het nie vir Nehemia, soos vir Josua, drie maal gesê om nie bang te wees nie. Tog het hy baie moed geopenbaar. Hoekom? Hy ken God se geskiedenis van trou waarop jy kan vertrou.

Sy reaksie op sy vrees was ‘n keerpunt in sy lewe en God se gebruik van hom. As hy aan sy vrees toegegee het, het sy bydrae net daar tot ‘n einde gekom. Om aan vrees en lafhartigheid toe te gee, was (en is steeds) ‘n opsie – ‘n maklike uitkoms.

Nehemia besluit dat hy God gaan vertrou. Met die krag van God gaan hy sy vrees hanteer. Hy is bang vir wat koning Artasasta gaan doen, maar hy besluit dat hy vas gaan staan. Dit maak sy pad oop vir die toekoms wat God vir hom beplan het.

Hoe lyk moed?

Moed begin in die hart. Dit is nie ‘n onmiddellike emosie of outomatiese reaksie nie. Moed is die gevolg van harde gevegte in die hart en ‘n verstand wat vrae vra. Dit veg om die belange van ander voor jou eie te plaas. Nehemia se stryd is hoe om by sy mense betrokke te raak – hoe kan hy deel wees van die oplossing om God se mense te herstel. Die groei in Nehemia se moed begin by gebed – ‘n biddende hart.
Moed waag. Nehemia het elke keer as hy die koning se wyn geproe het, gewaag. Toe die koning sien dat Nehemia bedruk was, verduidelik hy wat die probleem was en vra toestemming om na Jerusalem te gaan – hy vra selfs die koning se hulp. Slegs die koning kon sy versoeke toestaan. Maar Nehemia vertrou dat God die koning se hart sal sagmaak. Die wil van die koning staan onder die gesag van die Here; soos ‘n stroom water lei Hy dit soos Hy verkies (Spreuke 21:1).
Moed probeer die onmoontlike. Dit vereis nie moed om die gewone te doen nie. Om die onmoontlike te doen, vereis moed. Nehemia gaan die onmoontlike probeer regkry. Vir 90 jaar probeer mense al die mure van Jerusalem herbou – sonder enige sukses. Dit is waarvoor Nehemia nou toestemming vra en kry by die koning. Om God se wil te doen, is nie onmoontlik nie al lyk dit soms so.
Moed neem ‘n standpunt in. Intimidasie is die gunsteling instrument van die bullebak. Die nasies om Jerusalem was bullebakke. Hulle dreig met geweld om die Jode te onderdruk. Toe Nehemia in Jerusalem aankom, neem hy standpunt in teen hierdie bullebakke. Hy beskerm sy werkers wat aan die opbou van die muur werk. Die bullebakke onttrek. Vra vir God vir meer moed as jy moet opstaan en ‘n standpunt inneem.
Moed soek geregtigheid. Moed soek nie ‘n geveg nie – dit vereis meer moed om nie te veg nie as om te veg. Maar groot ongeregtighede is teen die mense van Juda gepleeg. Moed baklei vir die welstand van die behoeftiges. Nehemia veg vir hulle. Leiers moet altyd hulle oë en ore oophou vir ongeregtighede en dan alles in jou vermoë doen om dit reg te stel.
Moed doen die regte dinge. Die regte keuses is dikwels moeilik, maar mense met moed maak die regte keuses. Nehemia is heeltemal bewus van die probleme wat vir hom voorlê, maar hy is gewillig om die regte ding te doen. Moed maak dat jy die regte keuses maak – al mag dit vir jou nadelig wees. ‘n Sterk gebedslewe sal jou keuses rig wanneer jy probeer om die regte ding te doen.
Moed is nie selfsugtig nie. Leiers moet die kalklig van sukses met ander deel. Nehemia was die leier; hy verdedig die stad; hy motiveer die mense om die muur te bou. Toe hy op die toppunt van sy gewildheid was, staan hy terug – hy laat Esra oorneem. Hy besef dat Esra beter in staan sal wees om die mense in aanbidding te lei. Mag God aan ons die insig gee om te besef wanneer ons deel afgehandel is; mag God ons die moed gee om met grasie terug te staan.
Moed gaan nie kompromieë aan nie. Nehemia spandeer 12 jaar daaraan om Jerusalem, sy mense en veral God en sy woord te beskerm. Sy besluite was dikwels ongewild; sy Joodse broers en die omliggende volke het sy besluite betwis.

Mense verwag dat hulle leiers moed moet hê – dat hulle kalm in die geveg sal bly; dat hulle nie sal huiwer as hulle voor moeilike en onaangename situasies te staan kom nie. Jou mense trek hulle krag en moed en voorbeeld by jou. Nehemia was ‘n sukses, want hy was bereid om te waag en God met die resultate te vertrou.

Ons kan ook sulke leiers wees. Ons moet net ons vrese vir sy moed inruil; ons moet put uit sy krag. God soek leiers wat die moed het om op Hom te vertrou en wat hulle geloof in Hom daagliks op die slagveld neem. Hy soek leiers wat die moed het:

Om in die openbaar, by die werk en by die huis vir Hom op te staan
Om as modelle vir ‘n Goddelike karakter op te tree
Om hulle gesinne uit die wêreldse na die goddelike te lei
Om voortdurend vir Christus te lewe, maak nie saak wat die prys is nie

As jy voel jou krag is min moet jy besef dit is nie ‘n rede om oor skaam te wees nie. Baie groot leiers struikel, maar hulle val nie. As jy struikel, moet jy:

Sterkte en volharding by God, sy woord en sy teenwoordigheid trek.
Jou ideale bepaal – weet wat jy glo en hoekom. Moed kom as jy bereid is om vir hierdie ideale te veg.
Jou moed toets. Moed kom as jy hindernisse oorkom – dit maak jou sterker vir die volgende toets.
Onthou dat God met jou is – Hy is altyd daar om jou te help. Wees sterk en vol moed.

Omdat God met jou is en jy met God is, is daar niks waaroor jy hoef te vrees nie.

NEHEMIA – WYSHEID (1)

There is dust enough on some of your Bibles to write ‘damnation’ with your fingers. — Charles Spurgeon

Nehemia – Wysheid (1)

Ons kyk nou na die vierde eienskap van ‘n leier – wysheid.

Kenmerk #4: Wysheid … bevorder jou leierskap

“As die koning dit goedvind, as u dienaar op u goedgesindheid mag reken, stuur my na Juda toe, na die stad waar my voorvaders begrawe is, sodat ek die stad kan herbou.”… Hy was die saak dus goedgesind (Nehemia 2:5 – 6)

Drama en groot spanning. Vir drie maande lank het Nehemia gebid; hy soek ‘n oplossing vir die probleem van God se mense. Geduldig en doelgerig berei hy hom vir die regte oomblik voor. Maar toe Nehemia die regte oomblik sien, gryp hy dit aan.

Wysheid gebeur nie sommer nie

Dit vereis tyd en energie; probeer en misluk. Kan ons nie maar hierdie probeer en misluk fase uitskakel nie? Dit is juis wat God vir ons wil doen. As een van julle wysheid kortkom, moet hy dit van God bid, en Hy sal dit aan hom gee, want God gee aan almal sonder voorbehoud en sonder verwyt (Jakobus 1:5).

Hoe moet ons wysheid verstaan?

Die bron van wysheid is God

Alles begin iewers – dit het ‘n bron. God is die enigste uitsondering. Hy is die bron van alles. Genesis 1 sê dat Hy die Bron van die heelal is. God is ook die bron van wysheid: Jy, Esra, moet volgens die wysheid waaroor jy beskik soos dit jou deur God gegee word … (Esra 7:25). God se wysheid kry Hy van niemand nie: Sou iemand vir God iets kon leer (Job 21:22). Alle ware wysheid kan ons net by Hom kry. As jy wysheid kortkom, kyk na God en sy woord.

Wysheid is meer as kennis

Jy het nie formele opleiding nodig om die wysheid van God in sy woord te gebruik nie. Wysheid laat jou helder dink en daarom kan jy die beste besluite, selfs in moeilike situasies, maak.

Wysheid is beskikbaar

God het wysheid belowe (Jakobus 1:5). Dit is ‘n belofte – jy moet net daarvoor vra en Hy sal dit gee.

Wysheid word vryelik gegee

Probeer ‘n lening by die bank kry – ‘n nagmerrie. God se reaksie is net die teenoorgestelde. Hy gee sonder voorbehoud en verwyt. Jy staan nie in ‘n tou om dit te ontvang nie. Hy gee vryelik en oorvloedig.

Wysheid kom op ‘n verskeidenheid maniere

Watter sytakke voer God in jou lewe om jou meer volwasse/wyser te maak?

Jou wandel met God. Soos jy saam met Hom loop en Hom volg, word jy meer bewus van Hom. Kennis begin met die dien van die Here (Spreuke 1:7). Soos jy Hom eer en sy woord gehoorsaam, word sy wysheid jou wysheid. Dit is joune as jy toelaat dat Hy die beherende invloed in jou lewe is.
Die tyd wat jy in God se woord deurbring. U gebooie gee my meer insig as wat my vyande het, en is altyd by my. … Ek het meer insig as ouer mense, want ek gehoorsaam u bevele (Psalm 119:98 – 100).
Insette van ander. Soek wysheid by mense wat wys is. Kyk na hulle lewens, vra vrae vir hulle, lees wat hulle geskryf het. So groei jy in wysheid. Hier speel mentors ook ‘n groot rol.

Maar wat kan ek doen om ‘n wyse leier te word? Volgende keer kyk ons daarna.

NEHEMIA – MOED (2)

There would be no manifestation of God’s grace or true goodness, if there was no sin to be pardoned, no misery to be saved from. —Jonathan Edwards

Nehemia – Moed (2)

Ons is besig om na die derde kenmerk van ‘n leier te kyk – moed.

Kenmerk #3: Moed – verstewig jou leierskap

Moed te midde van vrees

Josua word die leier van Israel na Moses se dood. Hy was bang. God berispe hom nie oor sy vrees nie; Hy bemoedig hom en sê dat hy sy vrees moet oorwin. Josua het rede gehad om bang te wees.

Sy voorganger. Josua moes in die voetspore van Moses volg – dieselfde Moses wat met God gepraat het en wat sy mense uit Egipte uitgelei het.
Josua se leër. Hulle het min/geen opleiding gehad nie; hulle het geen ondervinding van oorlogvoering gehad nie.
Josua het met sy eie oë die inwoners van Kanaän gesien … en party van hulle was reuse!

God weet van sy vrees en daarom bemoedig Hy vir Josua: Wees sterk, wees vasberade. Moenie skrik nie, moenie bang wees nie, want ek, die Here jou God, is by jou oral waar jy gaan (1:9). Hierdie belofte geld steeds vir God se leiers.

Jy hoef nie toe te laat dat vrees jou verlam nie. Hoekom kan Christene altyd met moed optree?

Moed groei uit God se karakter

God bemoedig Josua om as ‘t ware sy mense tot ‘n oorwinning te lei. Hoekom? God het die land met ‘n eed aan hulle voorvaders beloof (1:6). Josua kan met moed vorentoe gaan, want hy weet dat God die oorwinning belowe het. God sal nie toelaat dat sy dienaar Josua misluk nie. God se herversekering van sy belofte aan Josua, moet ons vertroue gee. God het ook aan ons die oorwinning belowe. Maar aan God die dank! Hy voer ons altyd saam in sy triomftog omdat ons een is met Christus (2 Korintiërs 2:14). Jou oorwinning in Hom is ‘n gegewe. Jou beloofde oorwinning moet jou die nodige moed en vertroue gee in die stryd wat voorlê.

Moed vermeerder met God se leiding

Ons weet nie presies wat Josua gedink het nie. In 1:7 sê God vir Josua vir ‘n tweede keer: Wees veral sterk en baie vasberade. Hoe kan God dit sê? Want God het aan hom die plan vir die stryd gegee en God sal hom lei; God gee aan hom al die krag wat hy nodig sal hê. God het aan Josua leiding gegee en Hy sal dit ook aan ons deur sy woord gee. Maar God waarsku vir Josua: hy moet die wet wat God aan Moses gegee het, onderhou: Hierdie wetboek moet die rigsnoer wees vir alles wat jy sê (1:8). Daarom moet Josua dit dag en nag oordink. Daarby moet julle altyd geloof as skild in die hand hê, want daarmee sal julle al die brandpyle van die Bose kan afweer (Efesiërs 6:16). Ons moet God se advies aan Josua volg. Moenie dat jou aandag afgelei word nie; moenie moed verloor nie. Fokus op God en sy plan vir jou lewe. Dan sal jy slaag in wat jy moet doen, jy sal voorspoedig wees … oral waar jy gaan (Josua 1:8 – 9).

Moed vermeerder met God se teenwoordigheid

Vir die derde keer sê God vir Josua dat hy nie moet skrik of bang wees nie. Hoe kan God dit sê? Want Ek, die Here jou God, is by jou oral waar jy gaan (Josua 1:9). Almal van ons kom op ‘n plek waar ons moed moet openbaar. Dit help as ons familie en vriende naby is om ons te ondersteun. Hulle teenwoordigheid stimuleer ons om ons beste te lewer – dit gee aan ons die moed om die regte ding te doen. ‘n Groter motivering is om te weet dat God naby is – by ons wat ook al gebeur en waar ons ook al gaan. Dit was Josua se geheim vir sy sukses. Dit moet ook ons geheim wees.

Die volgende vraag wat ons moet beantwoord, is: Hoe lyk moed in ‘n Christenleier?